Zeremiah 38
Khaotlô tawhta Zeremiah ama pachha
1 Matata sawchapawpa Shephatiah nata Pashu sawchapawpa Kedaliah nata Shelemiah sawchapawpa Zukal nata Malkiah sawchapawpa Pashu zy chata zawpi zydua hnohta Zeremiah ta,
2 “ABEIPA chata he tana heta a tah, he khihpi liata a ypazy cha, zaozi zy, chakâhna zy, potlana zy ta thi aw ei ta; Kaldia mozy hnohta a piepazy deikua cha hroh aw ei ta; a hrona cha a paboh aw ta, a hroh aw.
3 ABEIPA chata he tana heta a tah, he khihpi he Babylaw beipa pheisaih sahlaozy ku liata piepa châ tlai aw ta, a la aw,” tahpa ta a reipa cha thei ei ta.
4 Chatanachata abeisawzy chata abei hnohta, “He chyhsa he thiepa châ mawh sy, eima châ haw na, ano cha âmo hnohta he hawhpa biezy reipa ta, he khihpi liata adyuna chyhsa a ypazy nata zawpi zyduazy tha pazeisa khai tlôh ta. He chyhsa he zawpizy phana tlua leipa ta ama raona tlao a tlua,” tah ei ta.
5 Beipa Zedekiah chata, “Ano cha nama ku liata a y mâh tâh, abei he nama khoh leipa tao theipa na kaw châ va,” tah ta.
6 Chatawhcha Zeremiah cha a chhi ei ta, vaihtuhpa dôhpachhôh liata a ypa abei sawchapawpa Malkiah alei ry patâhna liana chata thy ei ta, Zeremiah cha khawhri ta za pathliah ei ta. Cha alei ry patâhna liana chata chiatlao deita leipa ta cha ti y leipa ta, Zeremiah cha chiatlao liana chata tla ta.
7 Ethiôpia chyhsa, hrilyupa abei o liata a y tyhpa Ebemeleka chata Zeremiah cha alei ry patâhna liata ama khô tahpa vaw pahno ta, cha nona chata abei cha Benzami kuh chhikao liata a tyuh ta,
8 Ebemeleka cha abei o tawhta pua ta, abei hnohta chata,
9 “Ei beipa, abei y, he chyhsazy ta hrohsopa Zeremiah alei ry patâhna liata ama thypa he, hmo molei ngaitapa ama tao; nodipa vâta a yna su liana chata a thi aw mâ tâh, khihpi liana chata viahchhâ y khao tlôh va,” tah ta.
10 Chatawhcha abei chata Ethiôpia chyhsa Ebemeleka cha bie pie ta, “He tawhna heta chyhsa sythôh a chhi la, alei ry patâhna tawhtapa cha a thi hlâta hrohsopa Zeremiah cha papua teh u,” tahpa ta.
11 Chatanachata Ebemeleka chata chyhsazy a chhi ta, abei ryubyh o ry lâna chata a ngia ei ta, chysia parohpa nata poh parohpa hmypazy la ei ta, alei ry patâhna liana chata Zeremiah lâta khawhri ta pathliah ei ta.
12 Ethiôpia chyhsa Ebemeleka chata Zeremiah hnohta, “He chysia parohpazy nata poh hmypazy he na bâkalie liata khawhri heta chahrypa teh,” tah ta. Chatawhcha Zeremiah chata cha hawhna chata tao ta.
13 Zeremiah cha alei ry patâhna tawhtapa cha khawhri ta a daophi ei ta. Chatawhcha Zeremiah cha vaihtuhpa dôhpachhôh chhôh liana chata y thlâh haw ta.
Zedekiah chata Zeremiah liata chhosiena tuah ta
14 Beipa Zedekiah chata hrohsopa Zeremiah aw ta, ABEIPA o lâ a ngiana miathôhna liana chata a hnohta a chhi ta. Beipa chata Zeremiah hnohta, “Hmo cha hiahri aw na ta; kei liata khâpa hmah nyu khah y,” tah ta.
15 Zeremiah chata Zedekiah hnohta, “Cha chho aw sala, na thie thlyu aw va chi ma? Cha chhosie aw sala, na nahthlie tlôh aw chi va,” tah ta.
16 Beipa Zedekiah chata Zeremiah hnohta, “ABEIPA he eima hrona a taotuhpa he a hropa hawhta, cha thie cheita aw va na, na hrona a tluatuhpazy ku liana chata, cha pie hra aw va na,” tah ta, a ru lâta chhie sa ta.
17 Zeremiah chata Zedekiah hnohta, “ABEIPA Pheisaihzy Khazohpa, Izarel Khazohpa chata he tana heta a tah, Babylaw beipa, abeisawzy hnohta, nâ sasyh ta na pie khiahtala, na hrona cha paboh aw chi ta, he khihpi chhao he mei ta kâ aw vei, nâ nata na chhôhkhapazy chhao nama hroh aw.
18 Babylaw beipa abeisawzy hnohta, nâsasyh ta na pie vei khiahta deikua cha he khihpi he Kaldia mo ku liata piepa châ aw ta, mei ta rao aw ei ta, ama ku tawhtapa pua chacheita aw va chi,” tah ta.
19 Beipa Zedekiah ta Zeremiah hnohta, “Kaldia mo lâta a bai hawpa Zu sahlao ku liatahpa na patusapa ta eina taola aw ei, tahpa ei chi na,” tah ta.
20 Zeremiah deikua chata, “Cha patusa aw veih ei, na hnohta ei reipa ABEIPA ao he a ngiah teh, ei châ haw chaimâh, chatanachata na châta pha aw ta, na hroh hra aw.
21 Nâsasyh ta na pie khoh leipa khiahta deikua cha, he he ABEIPA bie eina pahmôpa cha a châ:
22 Zudah beipa o liata chanô a ypa zyduazy chata Babylaw beipa abeisawzy hnohta chhihthapa ta y aw ei ta,‘Na viasa phapazy ta cha dô ei ta, ama cha pahni haw; na phei cha chiatlao liata â taw pata nahta ama châ heisai, ’ama tah aw.
23 Na lahpinô zydua nata na saw zydua cha Kaldia mozy hnohta a chhi khai aw ei ta, ama ku tawhta pua aw va chi, Babylaw beipa ku liata patupa ta tlao y aw chi ta; nâma vâta he khihpi he mei ta raopa ta a y aw,” tah ta.
24 Zedekiah chata Zeremiah hnohta, “He biezy he ahy hmah ta pahno kha se, chatanachata thi aw va chi.
25 Abeisawzy ta bie ei cha chhopa he pahnopa ta nâ lâta a vypa ta na hnohta, ‘Abei hnohta na reipa cha maniah chho teh, nama hnohta abei bie a reipazy chhao; keimo liata khâpa hmah phih khâ cha thie aw ma pi,’ ama tah khiahtala,
26 nâ chata ama hnohta, ‘Zawnatha o liata na pasiesa leipa ta, cha liata thi lei awpa ta abei hnohta hiana ei pangia,’ na tah aw,” tah ta.
27 Chatawhcha abeisaw zydua zy chata Zeremiah lâta a vypa ta hiahri haw tlai ei ta, abei bie a piepa zydua lymâ hawhta âmo cha chho ta. Chatanachata ama bie a chhopa cha bâh haw ei ta, a bie cha hmôpa ta y tlôh lei khâh ta.
28 Zeremiah cha Zerusale lana noh taihta vaihtuhpa dôhpachhôh liata y thlâh ha ta.