Zeremiah 34
Zeremiah ta Zedekiah zikyu a râna
1 Babylaw beipa Nebukaneza zy, a pheisaih sahlao zydua zy, alei liata abeina khihnarâh zydua nata zawpi zyduazy ta, Zerusale nata a khihpi zydua amâ dyuh nota, ABEIPA tawhtapa Zeremiah hnohta bie a vaw tlôpa cha:
2 Izarel Khazohpa ABEIPA chata he tana heta a tah: Sie la, Zudah beipa Zedekiah hnohta reih la, he tana heta chho teh, ‘ABEIPA chata he tana heta a tah: He khihpi he Babylaw beipa ku ta pie aw na ta, mei ta a rao aw.
3 A ku tawhtapa pua chachei aw va chi, patupa ta y aw chi ta, a ku liata cha pie aw ei ta; na mo tlaita Babylaw beipa cha hmô aw chi ta, pakah tlaita bie a chho aw eichi ta; Babylaw râh lâta na sie awpa a châ.
4 Anodeikuacha Hy Zudah bei Zedekiah, ABEIPA bie he nahthlie lymâ tua! Na kyh liana chata ABEIPA chata he tana heta a tah: Zaozi ta thi aw va chi.
5 Thlalôh ngaitapa ta na thi aw. Na hmiakô liata abei tuapa cha pathlatuhpazy rohpahâhpa ama cha raopa hawhna khata, nâma chhao ama cha raopa hra aw, mâchhie cha sapa aw ei ta, “Abeipa y, cha rimâ cha!” tahpa ta,’ bie ei reih haw hih, ABEIPA ta a tah,” tahpa ta.
6 Hrohsopa Zeremiah chata he bie zydua he Zerusale liata Zudah beipa Zedekiah hnohta reih ta,
7 Babylaw beipa pheisaih sahlaozy chata Zerusale nata Zudah khihpi lâ a ypa zydua, Lakhi nata Azekah ama dyuh nona chata; Zudah khihpi hry liata kuh hneipazy cha hezy deita he châ tlôh ei ta.
Hebrai seizy thâtih biehrai a paraopa
8 Abei Zedekiah ta Zerusale liata a ypa zawpi zydua hnohta chyhsa tota ama seichanôzy, ama seichapawzy, Hebrai chanô tlyma, Hebrai chapaw tlyma ama châ khiahtala ama papua awpa a châ,
9 a unawhpa Zu chyhsa chakaopa ta ahyhmah ta ama y awpa châ vei, tahpa ta khotalaina bie phuah ta, biehrai a tao tawhta ABEIPA tawhtapa Zeremiah hnohta bie a vaw tlôpa cha.
10 Chyhsa to ta chakaotuhpa chapaw tlyma, chakaotuhpa chanô tlyma a papua awpa châ ta, âmo chakao awpa ta ahyhmah ta ama y awpa châ vei, tahpa biehrai a pyhtuhpa abeisaw zydua nata zawpi zydua chata biehrai cha zyh ei ta.
11 Papua tlai ei ta, anodeikuacha cha hnôh lâna chata a ngiapachhi ei ta, seichapawzy nata seichanôzy ama papua ha chiehpazy cha pakuasa heih ei ta, ama bie ry liata seichapawzy nata seichanôzy ama tao heih.
12 ABEIPA bie cha Zeremiah hnohta ABEIPA tawhta vaw tlô ta:
13 “ABEIPA Izarel Khazohpa chata he tana heta a tah: Izi râh nata seichâna chhôhkhapa tawhta ei vaw chhihtha nona khata nama pathlatuhpazy hnohta biehraina tao na ta,
14 ‘Chyhsa to ta a unawhpa Hebrai chyhsa a hnohta zuapa, kô charu a chakao ha chiehpa cha a kô sarina chhâna liana chata a papua awpa a châ,’ tahpa ta. Cha pathlatuhpazy deikua chata na nahthlie leipa ei ta, ama nah pachôh hra veih ei.
15 Atahmâ nâmo ta vaw palie eichi ta, chyhsa to maihta ano vaih mo liata khotalaina bie phuahpa ta, ei mohmô liata hmo dopa cha vaw tao haw eichi ta, ei moh bipa o liana chata ei hmiakô liata biehrai nama vaw tao haw;
16 châhrasala a palie heih eichi ta, ei moh ta papuapaleipa ta ama khopa hawhta nama papua ha chiehpa nama seichapaw nata nama seichanô cha pakuasa heih eichi ta, nama bie ry liata seichapaw nata seichanôzy ta nama tao heih.
17 Chavâta ABEIPA cha he tana heta a tah: Chyhsa to âmo unawhpa nata ama vaihzy liata khotalaina bie phuah awpa ta ei bie nahthlie leipa eichi ta; keima ta nama hnohta khotalaina bie ei phuah, ABEIPA ta a tah, zaozi zy, potlana zy, chakâhna zy ta a châ aw. Alei liata khihnarâh zydua hry liata pasi ngâ awpa ta ei cha tao aw ei.
18 Chatawhcha ei biehraina a paraopazy ei hmiakô liata viahchao taw patlawpa likawh liata sie palâhpa tlaita, bietaipa ta a patlô leituhpa,
19 Zudah beisawzy nata Zerusale beisawzy, hrilyupazy, theihthaipazy zawpi zydua viahchao taw patlawpa likawh ta a siepa zydua cha;
20 ama khakhaipazy nata ama hrona a tluatuhpazy ku liata pie aw na ta. Ama rizy cha avâ pavawzy nata alei liata râhsazy niepa châta a châ aw.
21 Zudah beipa Zedekiah nata abeisawzy cha ama khakhaipazy nata ama hrona a tluatuhpazy nata Babylaw beipa pheisaih sahlao nâmo cha siesai ha chiehpazy ku liata ei pie aw.
22 Pachâ teh u, he khihpi liata vaw kua heih awpa ta bie pie aw na ta; ABEIPA ta a tah, chatanachata adyuh aw ei ta, la aw ei ta, mei ta ama rao aw. A pahrâtuhpa y leipa ta Zudah khihpizy cha roryhrapa ta ei tao aw.