Zeremiah 33
Zerusale nohhlaona vaw tlô heihnazie
1 Zeremiah hnohta vaihtuhpa dôhpachhôh liata patâhpa ta a y no ta, ABEIPA bie cha ei nona ta vaw tlô heih ta:
2 “Hmo taotuhpa ABEIPA a i awpa ta a taotuhpa ABEIPA chata he tana heta a tah, ano moh cha ABEIPA a châ:
3 Na aw la ei châ chhy aw, hmo rôhnahpa nata hmo nyupa na pahno beih leipa cha ei cha pamosa aw.
4 Izarel Khazohpa ABEIPA chata he khihpi ozy nata Zudah beizy ozy zaozi nata alei pabyupazy tawhtapa, vaihna tao awpa ta ama paraopa kyh liana chata he tana heta a tah:
5 Kaldia sahlao adyuh awpa ta a vy ei ta, ei hiehâhna nata ei pathi-iana ta ei thihpa rizy chata tlao ama pabie aw, ama moleina zydua vâta he khihpi tawhna heta ei hmia nyu haw tlôh na ta.
6 Pachâ teh, tlâhna nata patlâhna vaw tlôkhei aw na ta, ei patlâh aw, thatlôna nata a bohna a i ngaitapa ei pahmôsa aw.
7 Zudah seichâna nata Izarel seichâna pakuasa aw na ta, hmiatua ta ei paduapa hawhna khata ei padua heih aw.
8 Ama hmoparaona ei chô liata ama hmotaopa moleipa tawhtapa pathai aw na ta, ama hmoparaona ei chô liata ama hmotaopa ei ngiahthai aw.
9 He khihpi he alei liata phopi zydua châta a phana ei taopa zydua a hmôtuhpazy hmiakô liana chata ei châta thaphana zy, palyupalihna zy, rôhnahna zy châ aw ta.
10 “ABEIPA chata he tana heta a tah: Zudah khihpi tlai lia chhaota, ‘Chyhsa nata sâh y khao leipa ta roryhrapa,’ Zerusale othliah liata chyhsa nata sa nata a pahrâtuhpa y leipa ta roryhrapa ama tahpa liana heta,
11 alyna ao zy, thaphana ao zy, myuhthieh a hneipa ao zy, zawpi zy, ‘Pheisaihzy ABEIPA lâna chata adyhna bie reih teh u, ABEIPA cha pha tlôh ta,a zawngiahna cha chhâzaw ta y tlôh ta!’tahtuhpazy ao nata ABEIPA o liata alyna atheihna a vaw cheihtuhpazy ao cha, he su liana heta theipa ta a y heih aw. Hmiatua ta a yzie hawhta seichâna tawhta a râh cha ei pakuasa heih aw, ABEIPA ta a tah.
12 “Pheisaihzy ABEIPA chata he tana heta a tah: He su chyhsa nata sa y leina taihta roryhra hawpa, a khihpi zydua liana heta mietahkuvaihtuhpa ama mietahkupa zaw a pabyusatuhpazy pahrâna su a vaw y heih aw.
13 Tlâh râh khihpi liata zy, by râh khihpi liatazy, Neke khihpi liatazy, Benzami râh liatazy, Zerusale chheipâh su liatazy, Zudah khihpi liatazy, âmo a reihtuhpa ku ry liana chata mietahkupazy ama sie ngâh aw, ABEIPA ta a tah.
14 Pachâ teh, nohzy a vaw tlô hai na, ABEIPA ta a tah, Izarel chhôhkhapazy kyh liata nata Zudah chhôhkhapazy kyh liata bie pha ngaitapa ei vaw reih hawpa cha ei patlô aw.
15 Cha nohzy liata nata cha daihti liana chata Chia Davi hnohta ei papua aw; cha râh liana chata a do ngaitapa nata sia ngaitapa ta ryu a reih aw.
16 Cha nohzy liana chata Zudah cha pachhapa ta y aw ta, Zerusale cha a bohpa ta a y aw. Chatawhcha a moh phaoh awpa cha he he a châ aw: ‘ABEIPA cha eima siana,’ tahpa hih.
17 “ABEIPA chata he tana heta a tah: Davi chata Izarel chhôhkhapazy ryureina dyuchhai liata atyuh awpa chyhsa a phahla beih aw vei,
18 theihthaipa Livai chizy chhao ei hmiakô liata raona hlâna hlâ awpa nata niepa hlâna hlâ awpa nata atheihna tao lymâ awpa ta chyhsa a phahla hra aw veih ei.
19 ABEIPA bie cha Zeremiah hnohta vaw tlô ta:
20 “ABEIPA chata he tana heta a tah: Chhô nata zâ ei raopa kyh he paraopa ta, chhô nata zâ he ama daihti liata y lei awpa ta, nama tah thei khiahtala,
21 na chakaotuhpa Davi hnohta ei biehraina chhao ryureina dyuchhai liata atyuh awpa sawchawpa ryu reih awpa ta a hnei leina awpa ta paraopa deita a châ aw, Livai chizy, theihthaipazy ei chakaotuhpazy hnohta chhao,
22 avâ liata a ypa sahlao reih thai lei nata tilaipi leisadi reitiah lei hawh tlaita ei chakaotuhpa Davi nata Livai chi na chakaotuhpazy ei papôh aw.
23 ABEIPA bie cha Zeremiah hnohta vaw tlô ta:
24 “Chhôhkha miano ABEIPA ta a tlypazy cha a thy haw, tahpa ta he chyhsazy ta ama reipa cha pachâ beih va chi ma? Ama mohmô liata phopi tah tlâh ama châ lei nawpa ta, he hawhna heta ei chyhsazy cha ama mohnao.
25 ABEIPA chata he tana heta a tah: Ei chhô nata zâ raopa cha a duah patlô leipa ei ta, avâ nata alei yzie zy he ei rao leipa a châ khiahtala,
26 Zakaw pathlazy nata na chakaotuhpa Davi pathlazy cha ei thy aw, Abaraha zy, Aisika zy, Zakaw pathlazy chô liata ryureituhpa ta a pathla ei pahlei aw. Ama seichâna pakuasapa ta ama chô liata ngiachhiena hnei tlôh aw na ta.