Zeremiah 31
1 “Cha daihti liana chata kei he Izarel chhôhkhapa zyduazy Khazohpa cha aw na ta, âmo chhao ei chyhsazy ama châ aw, ABEIPA ta a tah.”
2 ABEIPA chata he tana heta a tah: “Zaozi ta thie bâhpazy chata râhpathohpa râh liata ngiachhiena ama to; ei pahâsa nona khata Izarel tlai cha,
3 Lâ hlapi tawhta a hnohta ABEIPA a vaw luah. Kyhpachâ chhâ leipa ta kyh cha pachâna ta; chavâta thaphana ta ei châ dikhei.
4 Ei cha padua pathi heih aw, â ipa ta paduapa na châ aw, Hy Izarel laihsakôpa y! Khozy chhaota a tobi heih aw chi ta, thapha noh lâna suzy liana chata na hlao aw.
5 Kresahdôzy Samari tlâh ualua ta tao heih aw chi ta; a pahrâtuhpazy ta loh aw ei ta, a theilâpazy cha ama nie aw.
6 Ephrai tlâhzy liana chata vaihtuhpazy awna noh a tlô aw; Thyu teh u, Zaio lâ sie ei suh u, ABEIPA eima Khazohpa lâna chata tahpa ta tlâh awh pata y tlôh aw ta.’”
7 ABEIPA chata he tana heta a tah: “Zakaw chata thaphapa ta sa ula, phopi rôhnah chaipa châta awh teh u; phuah ula, reithai ula, ‘Hy ABEIPA na chyhsazy Izarel laibâhpa he pachha mah y,’ tah teh u.
8 Pachâ teh u, maw lâ râh tawhta ei vaw chhi aw, kaoki tawhta ei pakhy aw,mochaopa zy, pheisypa zy, saw aphaohpa zy, saw a zei haipa zy chhaota hmaokha ta; zawpi hluh ngaitapa, he liata ama vaw kua aw.
9 Mothlih chhaota a vy aw ei ta, thlahlôh ngaitapa ta ei dikhei aw, chavah ti alohpa zy lâta chareisa aw na ta,ama chapia leina awpa lâpi palâhpa liana zy chata; Izarelzy châta paw châ tlôh na ta, Ephrai cha ei saw tuapa a châ.
10 “Hy phopizy saih u, ABEIPA bie cha thei ula, liahpahlô râh hlapapi zy liata phuah ula; ‘Izarel a papaituhpa chata pakhy heih aw ta, mietahkuvaihtuhpa a mietahkupazy a chahlôpa hawhta a chahlô aw,’ tahpa ta.
11 Zakaw cha ABEIPA ta chatlai hawta, ano hlâta a thatlôpa ku tawhta pachha haw tlôh ta.
12 Zaio su sâhpa liata hla sapa ta a vy aw ei ta, ABEIPA phana liana chata aly aw ei ta, sa zy, kresawti zy, thaw zy, mietahkupa nata sahroh taw chô liata amâ ly aw; ama hrona cha sahdô ti baopa hawhta châ aw ta, chhâzaw ta ama pachârôh khao aw vei.
13 Chatawhcha laihsakôpazy cha lâpa ta thaphapa ta y aw ei ta, satliapazy nata machâpa chhao ama mâchhiesana alyna ta pachâsapa ta, thlah palôh aw na ta, ama pachârôhna tawhta ei palysa aw.
14 Theihthaipazy hrona cha thawna kyh ta lôhrâ patlôsa aw na ta, ei phana ta ei chyhsazy chhao lôhrâ tlôpa ta ama y aw, ABEIPA ta a tah.”
15 ABEIPA chata he tana heta a tah: “Rama liata pyu thei ei ta, Mâchhiesapa ta a cha ngâpa, Rakheli ta a sawzy chakhei ta;sawzy ama y khao leipa vâta thlah palôh theipa châ vei.
16 ABEIPA chata he tana heta a tah: “Cha lei awpa ta na ao cha mao-oh la, na mothlih hi mawh sy; na hmotaopa ta lymâ a hnei aw na, ABEIPA ta a tah, chariahpa râh tawhta ama vaw kua aw.
17 Na daihti chhâna lâ cha hnabeisei ngaitapa a châ aw, âmo râh tlai liata na sawzy ama vaw kua heih aw, ABEIPA ta a tah.
18 He tana heta Ephrai chata anosasyh ta a chakheipa cha ei pahno tlai na,‘Nâ ta na hrie chi ta, viachao,raopakypa lâta pangâ mâh leipa hawh tlaita hriepa châ na ta;na pakuasa la, chatawhcha ei kua aw na,ABEIPA ei Khazohpa châ tlôh chi ta.
19 Pakuasapa ta ei y tawhta ei ro hra; chhoreipa ta ei y tawhta ei byh chabai na ta; ei noza ta, ei thyutlia noh maochhie phaohpa ta patypamâpa ta ei y,’ tah ta.
20 Ephrai cha ei sawchapawpa kho ngaitapa a châ ma? Saw phapa a châ ma? Ano ei chhoreina maihta ei pathipalôh liata khâchâ a y tyhpa he. Chavâta ei pathipalôh ta a thapasa tyh ta; a chô liata zawh ei ngiah tlai aw, ABEIPA ta a tah.
21 “Lâpi pahnona zy a tao la, na châta lâpi pahnona zy bô teh; na kei puana lâ lâpi, lâthlôh lâ tlai cha liahsa ngia teh. Hy Izarel laihsakôpa, vaw kua heih teh, he na khihpizy lâna tlai heta.
22 Hy nâ, sawchanônô hnôh lâ a sypa, khachâ e nâ khie ngâ aw tly? ABEIPA chata alei liana heta hmo thiehpa a tao haw hih: chanô ta chapaw tlao a paboh haw.
23 Izarel Khazohpa Pheisaihzy ABEIPA chata a tah: “Ama seichâna tawhta ei pakua tina chata, Zudah râh nata a khihpizy liana chata, he hawhpa reikah he ama hmâh heih aw:‘Hy siana pahrâna su, hy tlâh pathaihpa, ABEIPA chata byhnâ cha pie mawh sy!’ tahpa hih.
24 Cha liana chata Zudah sahlao nata ama khihpi liatahpa zyduazy cha hmaohkha ta pahrâ aw ei ta, lyu a taotuhpazy nata sahroh a pasatuhpazy chhaota.
25 Thazeipazy cha lôhrâpatlô nata pachârôhpa maih chhao tha patlôsa tlôh na ta.
26 Chatanachata a vaw hra na ta, mohmia pasaih na ta, moku pahâh ngaitapa a vaw châ.
Biehrai thiehpa cha
27 “Pachâ teh, nohzy cha a vaw tlô aw, Izarel chhôhkhazy nata Zudah chhôhkhazy liana chata chyhsapa chi nata sahroh chi ei tu aw, ABEIPA ta a tah.
28 Chatawhcha âmo phiapa ta, pazaopa nata thypa ta, pahleipadiapa ta, rie pathei awpa ta ei byhpa hawhna khata, âmo sa pathi awpa nata loh awpa ta ei mokhâh aw, ABEIPA ta a tah,
29 Cha nohzy liana chata,‘Pawzy ta kre thaopa nie ei ta, ama sawzy hâh a za,’tah beih khao aw veih ei.
30 Âmo chyhsa to ta hmoparaona tlao thikhei aw ei ta; kre thaopa a niepa maih, hâh tlai cha a za aw.
31 “Nohzy cha a vaw tlô aw, cha nohzy liana chata Izarel chhôhkhapa nata Zudah chhôhkhapa hnohna chata biehrai thiehpa ei tao aw,
32 ama mahpawzy Izi râh tawhta chhihtha awpa ta ama ku ei patu nota ei biehrai hawhpa kha châ leipa ta; ama châta vahpa ei châna chôta cha ei biehrai cha parao ei ta, ABEIPA ta a tah.
33 Cha nohzy hnôh lâta Izarel chhôhkhapazy hnohta bie ei hrai awpa deikua cha he he a châ, ABEIPA ta a tah; ama chô liata ei ryhpa bie soh aw na ta, ama pathipalôh liata roh hra aw na ta; kei he ama Khazohpa châ aw na ta, âmo cha ei chyhsazy ama châ aw,
34 Ahy hmah ta, ‘ABEIPA pahno teh,’ tahpa ta âmo vaih nata âmo unawhpa pachu khao aw veih ei, a chyh chaipa tawhta a lai chaipa taihta ama zydua ta na pahno chyu tlôh aw ei ta, ABEIPA ta a tah; ama paraona cha a ngiahthai aw na ta, ama moleina chhao a thei thlâh ha khao aw va na, tahpa ta.”
35 He tana heta ABEIPA nohchhô a pakhaihtuh awpa ta noh a pietuhpa, thlâpâ nata awhsizy chata ryhpa zy raopa ta, zâ a pakhaituh awpa ta a pietuhpa, chalâhparâpazy a paro ngâ awpa ta, tilaipi pachhaihtuhpa chata a tah, a moh cha Pheisaihzy ABEIPA a châ:
36 “He ryhpa raopazy he ei hmiakô tawhta a lei khiahtala, Izarel pathlazy cha ei hmiakô tawhta phopi châna ama bâh pathla aw, ABEIPA ta a tah.”
37 ABEIPA chata he tana heta a tah: “Chô lâ avâ khi thlie theipa a châ nata leilô bônazy hmô khai theipa a châ khiahtala, Izarel pathlazy cha ama hmotao hawpazy vâta ei thy pathla hra aw, ABEIPA ta a tah.”
38 “Nohzy cha a vaw tlô hai na, Hananel kuh a sâhpa tawhta Ki Chhikao taihta ABEIPA chata khihpi cha sapa châ ta, ABEIPA ta a tah.
39 A thliena ri cha Kare tlâh taihta palâhpata ta sie aw ta, Kôah lâta a pakoh aw.
40 Athipa ri nata buchâh thyna saikao zydua nata lyu zydua Kidraw vatiepa taihta nochhi lâchhâh ta Arâ Chhikao ki taih cha ABEIPA chata pathaipa a châ aw, cha cha khatita hmahta papaipa nata paraopa châ khao aw vei.”