Zeremiah 29
Seichâpazy hnohta Zeremiah bie paphaopa cha
1 Hrohsopa Zeremiah ta Zerusale tawta seichâpa machâ zy, theihthaipa zy, hrohsopa zy, mo hropazy Nebukaneza ta Zerusale tawhta Babylaw lâta seichâna ta a chhi hawpa a hroh chhôhpazy châ a paphaopa bie cha hezy he a châ.
2 Abei Zekôniah zy, abei nô zy, chyhsa hrilyupa zy, Zudah nata Zerusale abeisaw zy, chyhsa zôthaipa zy, syudaihpa zy ta Zerusale ama puasai tawhna khata.
3 Cha cha Shaphana sawchapawpa Elasa nata Hilkiah sawchapawpa Kemariah zy ku liata a paphao, chazy cha Zudah beipa Zedekiah ta Babylaw râh lâta Babylaw beipa Nebukaneza hnohta a tuapazy cha ama châ:
4 “He tana heta Izarel Khazohpa Pheisaihzy ABEIPA chata a tah, seichâpa zydua Zerusale tawhta Babylaw sei ta ei pachhithasapa zy hnohta:
5 O zy sa ula, cha liana chata pahrâ ula; sahdô zy tao ula, atheih ula.
6 Lahpinô zy hnei ula, sawchapawpazy nata sawchanôzy sa ula; nama sawchapawpazy châta lahpinô la ula, nama sawchanôzy vahpa pahneisa ula, sawchapaw sawchanô ama sa theina hâh ta; pôh ula, a sy khah u.
7 Sei ta ei cha patâhsana khihpi phana awpa tlua ula, ABEIPA lâta thlahchhâ teh u, ano phana liana chata nâmo chhaota phana hmô tlôh aw eichi ta.
8 Izarel Khazohpa Pheisaihzy ABEIPA chata tah tlôh ta: Nama hry liata hrohsopazy nata mopathaihpazy chata cha dô khah ei se, mâ ama sapa chhao cha nahthlie hra khah u,
9 ei moh reipa ta haipa bie nama hnohta ama chhochhielie; keima tuapa châ leipa ei ta, ABEIPA ta a tah.
10 “ABEIPA chata he tana heta tah tlôh ta: Babylaw atâhna kô sysari cha a ki pata nahta, cha vaw tly aw ei na ta, nama hnohta ei bie pha ngaitapa cha patlô aw na ta, he su liana heta ei cha pakuasa heih aw ei.
11 Nâmo lâta ei palôhrupa phaozie cha a pahno tlôh na ta, nama daihti chhâna liana chata hnabeiseina cha pie awpa ei ta, hmopha leipa châ leipa ta, phana ei pachâ mâ tâh, ABEIPA ta a tah.
12 Chatawhcha na pado aw eichi ta, kei lâta thlahchhâ aw eichi ta, ei cha nahthlie aw ei.
13 Na tlua aw eichi ta, nama pathipalôh zydua ta eina tlua tina chata eina hmô aw eichi,
14 nâmo hmôpa ta y aw na ta, ABEIPA ta a tah, nama seichâna kyh palie aw na ta, phopi zydua hry liata ei cha papaina su tawhtapa kha ei cha pakhy heih aw ei, ABEIPA ta a tah, sei ta ei cha patusana su liana tlai khata ei cha tlôkhei heih aw ei.
15 “‘ABEIPA chata Babylaw râh liana chhao heta hrohsopa maniah paduapa ta,’ tah tlôh eichi ta,
16 ABEIPA chata Davi abeidyuchhai liata abei a tyuhpa kyh nata he khihpi liata a pahrâpa zawpi zydua seichâna kyh ta a chhi leipa nama unawhpazy:
17 ‘Pheisaihzy ABEIPA chata he tana heta a tah, âmo chô liana chata zaozi zy, chakâhna zy, potlana zy patlôsa aw na ta, theiku thupa a pha lei vâta nie tlâh a châ leipa hawhta ei tao aw.
18 Zaozi zy, chakâhna zy, potlana zy ta chadai aw na ta, alei chô liata khihnarâh zydua zy hry liata hmo rarôh y ngaitapa ta tao aw na ta, âmo ei papaina phopi zydua hry liana chata chhiesapa ta noâh chheipa ta, naihbeichiepa ta, reipachhiepa châ awpa ta ei tao aw,
19 mydi ta thyupa ta na chakaotuhpa hrohsopa zy hmâpa ta ei biezy nama hnohta ei vaw tlôkheipa cha amâ papeisa leipa vâta, ABEIPA ta a tah, nahthlie khoh tlôh eichi va, ABEIPA ta a tah.’
20 Nâmo Zerusale tawhta Babylaw lâta ei tuapa sei atâhpa zydua saih u, ABEIPA bie nahthlie teh u;
21 ‘Izarel Khazohpa Pheisaihzy ABEIPA chata he tana heta a tah, Kôlaiah sawchapawpa Ahaba nata Maasei sawchapawpa Zedekiah ei moh reipa ta nâmo hnohta haina bie a chhochhielietuhpazy liana chata: Pachâ teh u, Babylaw beipa Nebukaneza ku liata ei patusa aw na, nama mohmô tlai liata âmo thie aw ta.
22 Âmo kyh liana chata Babylaw râh liata Zudah sei atâhpa zydua chata, “Babylaw beipa ta mei ta raopa Zedekiah nata Ahaba hawhna khata ABEIPA ta na chô liata tao mawh sy,’ tahpa he chhiesana châta ama hmâpa aw.
23 Izarel râh liana chata hmo chhie ngaitapa ta taopa ta ama vaih lahpinôzy liata aphei ei ta. Ei moh reipa ta ei biepiepa châ leipa ta haipa bie ama reipa vâta, kei a pahnotuhpa nata a pahnokheituhpa ei châ na,’ ABEIPA ta a tah.”
24 Nehela chyhsa Shemaiah kyh liana chata nâ ta he tana heta na reih awpa a châ:
25 “Izarel Khazohpa Pheisaihzy ABEIPA chata he tana heta reih ta: Zerusale zawpi zyduazy hnohta nata Maasei sawchapawpa theihthaipa Zephaniah hnohta nata theihthaipa zydua hnohta, nâma moh tlaita cha paphao chi ta,
26 ‘ABEIPA chata theihthaipa Zehôiada vyuhpa ta theithaipa ta cha tao ta, ABEIPA o vaituhpa châ eichi ta, ahrupa anosasyh ta hrohsopa a bipa maih cha keihrai zy, thua keihrai zy na daih awpa châ ta.
27 Chatanachata khazia e Anathô khihpa Zeremiah nama hnohta anosasyh ta hrohsopa a biepa cha nama chhorei vei?
28 Babylaw liata ei hnohta, “Seichâna awpa cha bohpi châ aw ta, ozy sa ula, cha liana chata pahrâ ula, sahdôzy tao ula, a theilâpazy nie teh u,” tahpa kyh maniah a paphao,’ tahpa ta”.
29 Theihthaipa Zephaniah chata cha cha hrohsopa Zeremiah theipa ta a reih.
30 Zeremiah hnohta ABEIPA bie vaw tlô ta:
31 “Seichâpa zydua chata Nehela chyhsa Shemaiah kyh liana chata ABEIPA ta he tana heta a tah: Ei tuapa châ leipa ta Shemaiah ta nama hnohta chhochhielie ta, haipa bie cha pazosa ta,
32 chavâta ABEIPA ta he tana heta a tah: Nehela chyhsa Shemaiah nata a pathlazy cha hrie aw na ta; he chyhsazy hry liatahpa pakha hmahta hnei leipa aw ta, ei chyhsazy chata hmophana ei tao awpa cha hmô hra aw vei, ano cha ABEIPA chô liata atyna kyh a reipa vâta ABEIPA ta a tah,’ tahpa ta paphao teh,” tah ta.