Zeremiah 28
Hananiah chhochhieliena pakheipa
1 Cha kô ualuapa Zudah bei Zedekiah ryureina a thaona lâta, a kô palihna, thla pangawhna liana chata, hrohsopa Hananiah Azu sawchapawpa Kibia chyhsa chata theihthaipazy nata zawpi zydua hnohta, ABEIPA o liana chata Zeremiah cha chho ta, a hnohta,
2 “Pheisaihzy ABEIPA Izarel Khazohpa chata he tana heta a tah: Babylaw beipa raopakypa cha ei parao haw.
3 Kô no bohlo chhôhta ABEIPA o hmobaoh Babylaw beipa Nebukaneza ta he su tawhta a lapa, Babylaw taihta a siekheipa zydua cha, he su liana tlai heta ei vaw tlôkhei heih aw.
4 He su liana heta Zudah beipa Zehôiki sawchapawpa Zekôniah nata Babylaw lâta a siepa Zudah sei a châpa zydua cha ei pakuasa heih aw, Babylaw beipa raopaky parao tlôh aw na ta, ABEIPA ta a tah,” tahpa ta.
5 Hrohsopa Zeremiah chata theihthaipazy nata ABEIPA o liata a duahpa zawpi zydua hmiakô liana chata hrohsopa Hananiah hnohta;
6 hrohsopa Zeremiah tlai chata, “Amen! ABEIPA chata cha hawhta tao tlai se; ABEIPA o liata hmobaohzy nata seichâna ta siekheipa zydua, Babylaw tawhta he su liata tlôkhei awpa ta na chhochhieliepa cha ABEIPA chata tao tlai se.
7 Châhrasala zawpi zydua nata nama nahkhao liata ei bie reipa he thei teh.
8 Keima nata nama hmia lâta hlâno ta hrohsopazy chata râh hluhpizy chô liata nata khihnarâh rôhnahpazy chô liata adyuhna zy, hmopha leipa zy, potlana zy chhochhielie tyh ei ta.
9 Hrohsopa adyna kyh a chhochhielietuhpa bie reipa cha a vaw tlô tita, cha hrohsopa cha ABEIPA ta a tua tlai tahpa â hno aw,” tah ta.
10 Chatanachata hrohsopa Hananiah raopakypa hrohsopa Zeremiah ta a kypa cha la ta, parao ta.
11 Chatawhcha zawpi zydua hmiakô liata Hananiah chata, “He tana heta ABEIPA ta a tah: He hawhna tlai heta Babylaw beipa Nebukaneza raopakypa cha kô no bohlo chhôh tlaita phopi zydua rao tawhtapa ei parao aw,” tah ta. Châhrasala hrohsopa Zeremiah chata siesai ha ta.
12 Hrohsopa Hananiah chata hrohsopa Zeremiah rao tawhta raopakypa a parao tawhna chata, Zeremiah hnohta ABEIPA bie vaw tlô ta:
13 “Sie la, Hananiah hnohta kei chho teh, ‘He tana heta ABEIPA chata a tah: Tho raopakypa cha parao chi ta, châhrasala a vyuhpa ta thua raopakypa tlao ei cha taopa aw.
14 He tana heta Izarel Khazohpa Pheisaihzy ABEIPA chata tah tlôh ta: Babylaw beipa Nebukaneza ama chakao thei nawpa ta he phopi zydua he thua raopakypa ei pakysa, ano ama chakao aw, lyurâhpa sazy chhao ano ei pie hra,’ tahpa ta.
15 Chatawhcha hrohsopa Zeremiah chata hrohsopa Hananiah hnohta, “Pachâ teh, Hananiah y, ABEIPA ta cha tuah vei, he chyhsazy he haipa tlao na pazosa hih.
16 Chavâta he tana heta ABEIPA chata a tah: ‘Pachâ teh, alei chô tawhtapa he ei cha thy aw. ABEIPA chô liata atyna bie na reipa vâta atakô tlai heta na thi aw,’ tah ta”.
17 Cha kô ualuapa, thla sarina liana chata hrohsopa Hananiah cha thi haw ta.