Biehraina Paraona
1 Zeremiah hnohta ABEIPA bie a vaw tlôpa cha:
2 “He biehrai bie he thei ula, Zudah chyhsazy nata Zerusale liata a pahrâpazy hnohta reih teh u.
3 Nâ ta ama hnohta, ABEIPA Izarel Khazohpa” chata he tana heta a tah: He biehrai biezy a nahthlie leituhpa cha chhiesapa ta y mawh sy,
4 cha cha nama mahpawzy Izi râh patisana tawhta ei chhihtha nota, ei reih a ngia ula, bie ei piepa zydua cha tao teh u, tahpa ta bie ei cha pie ei. Chatanachata ei chyhsazy châ aw eichi ta, kei cha nama Khazohpa ei châ aw,
5 nama mahpawzy hnohta sâhpiti nata kheihti a lohpa râh chhiesapa ta pie ei taihpa cha ei patlô thei nawpa ta atanoh ta a ypa hawhna heta tao teh,” tah ta. Chatawhcha kei chata, “Châ la vâ, ABEIPA,” tahpa ta a chhy na ta.
6 Chatawhcha ABEIPA chata ei hnohta, “Zudah khihpizy liata nata Zerusale khih liazy liata he bie zydua he phuah la, he biehrai biezy he nahthlie ula, zyh teh u.
7 Nama mahpawzy Izi râh tawhta ei chhihtha noh tawhta atahma taihta, ei rei a ngiah teh u, tahpa ta pahnosa tyh na ta.
8 Châhrasala a ngiah leipa ei ta, ama nah pachôh hra veih ei, chyhsa to âmo pathipalôh moleinazie lymâ hawhta tlao y haw ei ta, chavâta He biehrai bie tao awpa ta bie ei piepa ama tao leipa zydua he, ama chô liata ei vaw patlôsa aw,” tah ta.
9 ABEIPA ta ei hnohta, “Zudah chyhsa nata Zerusale liata a pahrâpazy hry liata bie a paraona a y.
10 Ama pathlatuhpa ei bie a nahthlie khoh leipazy hmoparaona lâna chata kua heih ei ta; khazoh hropazy chakao awpa ta sie ei ta; Izarel chhôhkhazy nata Zudah chhôhkhazy cha ama mahpawzy hnohta ei biehrai taopa cha ama parao haw.
11 Chavâta ABEIPA chata he tana heta a tah, vâchhiena amâ râsai thei lei awpa ta ama chô liata ei vaw patlôsa aw; na aw aw ei ta, châhrasala chhy aw va na.
12 Zudah khihpizy nata Zerusale liata a pahrâpazy chata khazohzy ama hnohta rohpahâhpa ama raona tyhpazy lâta cha aw aw ei ta, châhrasala amâ tymâ tina chata chazy chata pachha cheita aw veih ei.
13 Hy Zudah y, na khazohzy cha na khihpi zi châ tlôh ei ta; hmo nozachhih ngaitapa Baal hnohta ropahâhpa raona awpa ta maisâh tlai chhao Zerusale othliah zi ta tao haw eichi ta.
14 “Chavâta hezy he thlahchhâpa kha y, ama châta hiana tlyma, ao tlyma papua hra khâ, amâ tymâ tita eina awpa ei cha nahthlie tlôh leipa aw na ta.
15 Hmo pasichhih ngaitapa taona chôta ei kho ngaitapa chata ei o liata tovyuh khâpa a hnei? Bie a taihpa nata sa pathaihpa chata nama raona awpa a cha pakhôkhâhsa thei aw ei ma? Namâ palaikhei thei ma?
16 ABEIPA chata na moh ta, ‘Oli tho hrohpa, a ngiapa thei phapa,’ cha bi ta; paro ngâpa ta a chô liata mei patih ta, a chiahzy chhao a thlie khai haw.
17 Pheisaihzy ABEIPA cha lotuhpa châ ta, Izarel chhôhkhapazy nata Zudah chhôhkhapazy moleina, Baal lâta ropahâhpa hlâpa ta ei hie eina pahâhpa hmo âmo chata ama hriapa chô liata hmopha lei awpa kyh cha na chô liata a phuah haw.”
18 ABEIPA chata na pahnosa ta ei pahno haw; nâ tlaita ama hmotaopazy eina pahmô haw chi.
19 Kei deikua cha mietahkupa taw nônaipa thie awpa ta a chhipa hawhta ei châ. “Tho cha a thei chhaota parao ei suh u; a hropa râh tawhta ano cha pahlei syulyu ei suh u, a moh rai pahnopa a châ vei na hâh ta, “tahpa ta ei chô liata hmo amâ chhuahpa vaw pahno va na.
20 Châhrasala, Hy Pheisaihzy ABEIPA a dopa ta a pachiatuhpa, Chhôh rih lâ nata pathipalôh a pasiatuhpa y, ama chô liata na phuh lapa cha na pahmôsa mah y, ei thâtih he na hnohta cha pavaosa tlôh na ta.
21 Chavâta Pheisaihzy ABEIPA chata Anathô chyhsa na hrona a tluatuhpa, “Eima ku liata na thie vei na hâh ta ABEIPA moh ta chhochhielie khâ,” a tahtuhpazy kyh liana chata,
22 chavâta Pheisaihzy ABEIPA ta he tana heta a tah; “Âmo hrie aw na ta; satliapazy cha zaozi ta thie aw ei ta; ama sawchapawzy nata ama sawchanôzy cha chakâhpa ta thie aw ei ta;
23 âmo hry liata laibâhpa rai y aw veih ei. Anathô chyhsazy chô liata hmopha leipa patlôsa tlôh aw na ta, âmo hriena kô awpa tlai cha.”