Khazoh pakheipa nata Khazohpa hmeihseihpa
1 Hy Izarel chhôhkhapazy saih u, nama hnohta ABEIPA bie a reipa he thei teh u.
2 ABEIPA chata he tana heta a tah: “Phopizy yzie a chu leipa ula, avâ liata pahnonazy vâta riahchhiepa ta y hra khah u, phopizy cha chazy liana chata riahchhiepa ta y tlôh ei ta,
3 chyhsazy yzie zy cha khâpa hrao leipa châ tlôh ta. Râhhmâhpa liata tho thlu ei ta, ahyrai ta chyhsa zôthaipa ku ta taopa a châ.
4 Tâkâri nata ngôh ta tobi ei ta; a pasie leina awpa ta thua nata syulô ta ama hrai.
5 Pavaw chi awpa nohthlahpa hawhta dei châ ei ta, ama rei pathlie thei veih ei; âmo kho ta ama sie thei leipa vâta pasie awpa a byuh tyh, Âmo cha chi khah u, hmo chhiepa tao thei leipa nata hmophapa tao thei hra veih ei.
6 Hy ABEIPA, nâ hawhpa ahy hmah y veih ei; rôhnah chi ta, na mo thatlôna ta a pathâh na.
7 Hy phopizy ABEIPA, ahy e châ chi vei aw? Cha cha nâ phuhpa rai châ tlôh ta; phopizy chyhsa sopa zydua hry liatazy ama râh liata chhao nâ hawhpa rai y veih ei.
8 Âmo cha nôchhiepa nata ahrupa châ ei ta; nohthlahpa pachuna cha yzie hnei leipa a châ!
9 Tâsi tawhta tâkâri daipa vaw cheih ei ta, Upha tawhta ngôh chhao zôthaipa taopa ngôh a daihtuhpa taopa;ama chysia ta a nohpa nata a nohsaihpâpa zôthaipa taopa sai ama châ na.
10 ABEIPA deikua cha Khazohpa hmeihseihpa a châ, Khazohpa hropa chhâzaw ta Abeipa a châ na. A hiehâh nahta alei a chalyu ta, phopizy ta a pathi-iana pasa tao thei veih ei.
11 Âmo hnohta he tana heta na tah awpa a châ: “Khazohpa avâ nata alei a taotuhpa a châ leipazy cha, alei tawhta leidia aw ei ta, avâ ry tawhta ama lei khai aw.”
12 A hmotaotheina ta alei tao ta, a sona ta khizaw padua ta, a ryhna pahnona ta avâ parai ta.
13 A ao a papua nahta avâ liata ti paro ngâ ta, kaoki tawhta ameih pakiasa ta. Vâsua cha dôhla pathliesa awpa ta tao ta, a ryubyh tawhta thlih pathlisa ta.
14 Chyhsa to hru ei ta, pahnona hnei veih ei; ngôh a daihtuhpa chhaota a nogthlahpa daipa cha zakhei ta; a khazoh nohthlahpa leipa cha haipa dei châ tlôh ta, âmo liata hu chhao y vei.
15 Khâpa hrao leipa nata dôna hriana dei ama châ; ama hriena daihti liata ama lei aw.
16 Zakaw tovyuh la, he hawhta châ vei,hmo zydua thabypa châ tlôh ta, Izarel he a ryutona phopi châ ta; a moh cha Pheisaihzy ABEIPA a châ.
Zudah roryhrana
17 Hy nâ, padopa ta a ypa chi chata, na hmo alei tawhta la teh.
18 ABEIPA chata he tana heta a tah: “Atahmâ a râh liata a pahrâpazy ei thy aw, ama pahno thaipa ta rie ei patheisa aw”.
19 Ei pasapa vâta ei hu a po na! Ei hmah ru kaw ta.Châhrasala, “He tlai he rietheina cha a châ, ei tao awpa a châ,” ei tah.
20 Ei poh-o a rao haw, ei khawhri zydua chie khai haw ta; kei tawhta ei sawzy pua ei ta, y khao veih ei; ei poh-o parai awpa y khao veih ei, ei poh paraipa a padua awpazy.
21 Mietahkuvaihtuhpazy cha hru ei ta,ABEIPA a chhohiana cha pahno veih ei;chavâta vânoh topa ta y veih ei, ama mietahkupa zawzy ama pai khai haw.
22 Pachâ teh u! Pyu cha a vaw tlô! Maw lâ tawhta tymâna rôhnah ngaitapa Zudah khihpizy rorypahrasapa ta, sihâ pahrâna su lâta pachâsa awpa ta.
23 Hy ABEIPA, chyhsa yzie cha ano reisai châ vei tahpa ei pahno haw,chyhsapa a chareipa liana heta a chakâhna a chhihtha awpa ta y vei.
24 Hy ABEIPA miah pado la, a daihpa rakhata ta;hiehâh leipa ta, chata leipa ta la eina pahlei pathlei aw chi na.
25 Cha pahno leipa phopizy chô liata nata, na moh a pado beih leipa chhôhkhazy chô liata na hiehâhna leitha mah y;Zakaw palâ khai haw ei ta, palâ khai ei ta, patlô khai haw ei ta, a pahrâna râh roryhrapa ta ama paysa.