1 “Keipa ta Leviatha nâ daophi pathla thei ma? chaori ta a paleih na chahry thei ma?
2 Khawhri ta a hnari nâ dao thei ma? keipa ta a kâh liata na chathi pahlie thei ma?
3 Na hnohta hiana a hluhpi a tao aw ma? Na ota reikah naipa ta a reih aw ma?
4 Tlyzaw ta chakaotuhpa châta na hmâh awpa ta, na ota biehraina a tao ma?
5 Pavaw hawh deita ta na hria aw ma? na chanôzy ta amâ daophi awpa ta na buh thei aw ma?
6 Nga a patutuhpa zy ta sôhdaona ta ama hmâh aw ma? Sôhdaopa zy hryta ama rai patla khai aw ma?
7 Thuahlô ta a vo pabiepa ta, a luh liata nga a chôna sei ta na pabie thei ma?
8 A chôta na ku pathla khiahtala, atuna zie pachâ la; tao beih khao aw va chi!
9 Chyhsa hnabeiseihna cha khâpa hrao leipa a châ; a hmô thlâh hapa chhaota a hnabei a dy.
10 Ano a pathyu nota chichhih ngaitapa a châ. Ahy e, a hmiakô liata a duah thei aw?
11 Ahyma hmahphaoh leipa ta a dyuh thei? Avâ ry ta ahy hmahta y veih ei.
12 “A kuphei kyh liata tlâ a chalih thlâh ha aw va na. a thatlôna zie nata a pôhpa a pi zy adaih thai zie chhao.
13 Ahyma a vo liatahpa a hlai thei aw? ahyma a kâh tho no chhôhta a ngia thei aw?
14 Ahyma a hmia ochhizy a pahy thei aw? A hâh zy cha chichhih ngaitapa a châ.
15 A vo chhapa cha a palaikhei ta, pachawh khâhpa hawhta a phikalu haw.
16 Liahsa a patyh khai hapa vâta, a likawh ta ziza chhao a ngia thei vei.
17 Khâchâ apazao khai ha ei ta; liahsa â thâhpâ khai ha ta, a pachhaih thei khao vei.
18 A hnaphipa cha phu khaih ha ta, a mokhaoh zy cha zo vâ a thuapa hawhta a châ.
19 A pakah tawhta meipaleih pua ta; meihlih zy a zaw ngâ ta.
20 A hnapasu tawhta meikhuh vaw pua ta, sa beih a tlaopa nata liaryh kâpa hawhta a châ.
21 A husopa chata meihei pa-ia ta, a pakah tawhta meipaleih a pua.
22 A rao liata thatlôna y ta, a hmiakô liata chichhihpa a lâ ta.
23 A sapa chhao a patlô khai ha ta, liahsa â baipâ khai ha ta, pasie theipa rih châ vei.
24 A pathipalôh cha alô hawhta châ ta, charona lô ry via tahpa hawhta a châpa a châ.
25 Ano a vaw thyu nona cha riahphapa chhaota chi ei ta; ama thlahzohpa ta âmo chhao a pahno khao veih ei.
26 Chyhsa ta zaozi ta siehnao hra sala, pahnie aw vei, asei tlyma, li tlyma nata seichhi tlyma chhaota.
27 Ano ta thuazy cha sâhkô hawh deita ta pachâ ta, dawh cha tho hmypa hawhta.
28 Châtai ta ano cha parâsa leipa ta; ano chata cha alô vawpa zy cha sâhkô thabypa hawhta a châ.
29 Byuthôh zy cha sawphao hawhta pachâpa châ ta; seichhi pyuzy cha a pahneisao.
30 A ry lâchhâh chhao cha beikao tiah ngâsâpa hawh châ ta, Chiatlao zy liana cha sâh tlyna chhaichhi hawhta a byu ta.
31 Ti athuh ngaitapa zy cha beih hawhta patlaosa ta, tilaipa cha sathaw ôh hawh deita ta a tao.
32 A siena hnie cha a khaihpa ta paysa ta, chyhsa ta tilaipa cha a pawhpa ta ama hmô tyh.
33 Alei chô liana he ano hawhpa rai y leipa ei ta, china hnei leipa ta taopa cha.
34 Hmo a sâhpa maih moh tyh ta; apalaipa lyurâhpa sa zydua chôta beichaipa cha a châ,” tah ta.