Mara Holy Bible: Zawba

Showing posts with label Zawba. Show all posts

Zawba 1

Zawba siana cha pasiapa a châ

1 Uza râh liana chata chyhsa pakha, a moh Zawba ama bipa y ta; cha chyhsa cha chyhsa sia ngaitapa nata a dopa, Khazohpa a chipa, hmo moleipa a cha-uapa chyhsa a châ.

2 Ano cha sawchapawpa pasari nata sawchanô pathôh hnei ta.

3 A hneirôh zie cha mietahkupa sâh sari, râraoseihpa sâh thôh, viahchao tôhpa raopakypa bao za pangawh, alâ chanôhpa za pangawh nata chakaotuhpa hluhpi chhaota a châ; chatanachata nochhi lâ chyhsa hry liana cha chyhsa rôhnah chaipa a vaw châ.

4 A sawchapawpazy chata ama o liata kyhchhina hnei tyh ei ta, âmo daihti lymâ hawhta; ama sietanô pathôhpa zy cha ama hnohta nie nata dopa ta chyhsa hruapa ta tuah tyh ei ta.

5 Ama kyhchhina noh a vaw pai khai nahta, Zawba ta âmo cha aw ta, pathaisa haw ta, mydi kari ta thyu ta, âmo zydua moh kipa ta raopa hlâna kaw hlâ ta; Zawba chata, “Ei sawchapawpa zy heta hmo paraopa ta ama pathipalôh zy liata Khazohpa lâta pachâna pasichhihpa ama hnei ngyu na,” tahpa ta. Cha hawhna chata Zawba cha tao tyh ta.

6 Khazohpa sawchapawpa zy ta ABEIPA hmiakô liata amâ luahna noh vaw y ta, Sâta chhao chata âmo hryta a vy hra ta.

7 A BEIPA chata Sâtâ hnohta, “Khataih tawhta e nâ vy?’’ tah ta. Sâtâ chata ABEIPA cha a chhy ta. “Aleilô liata a khiekhâna tawhta a khypa nata a zupa ei châ,” tah ta.

8 ABEIPA chata Sâtâ hnohta, “Ei chakaotuhpa Zawba he na pachâ beih ma? Alei chô liana he ano hawhpa rai y veih ei, chyhsa sia ngaitapa nata dopa, Khazohpa a chipa nata hmo moleipa a cha-uapa chyhsa a châ,” tah ta.

9 Sâtâ chata ABEIPA a chhy ta, “A chhâpa y leipa ta Khazohpa cha a chi rai aw mâ?

10 Ano cha a o nata a hneipa zydua su tota chadô va chi mâ? A ku raihria liata byhnâ aw pa chi ta, he râh liana heta a hneirôhna zy chhao papôhsapa ta a y.

11 Châhrasala atahmâ he na ku pazawh la, ano hneina zydua hria la, ano cha na hmia chhypa tlaita chhie a cha sapa thlyu aw,” tah ta.

12 ABEIPA chata Sâtâ hnohta, “A phana, ano hneina zydua cha na hmotaotheina liata y khai aw ta; ano chô lia deikua cha na ku pazawh khâ,” tah ta. Chatanachata Sâtâ cha ABEIPA hmiakô tawhtapa pua ha ta.

13 Noh kha cha ano sawchapawpa zy nata ano sawchanônô zy chata nie nata kresawti dopa ta ama uhthei chaipa o liata y ei ta;

14 Zawba lâta zikyurâtuhpa pakha vaw tlô ta. “Viahchao tôhpa zy cha alei ama palie hai nota ama kiapâh ta alâ zy chhao ama bâ ngâ nota;

15 Sabia chyhsa zy chata âmo chôta sie hnaopa ta, siekhei khai haw ei ta, a vaihtuhpa zy cha zaozi ta ama thie hra; kei deita he nâ chho awpa ta a vaw râpa ei châ,” tah ta.

16 Cha bie a rei hai nona chata, chyhsa hropa vaw tlô ta, ano chata, “Avâ tawhta Khazohpa mei cha za tla ta, mietahkupa zy a kâ khai haw, a vaihtuhpa zy chhao a kâ patlô khai haw ei; kei deita he nâ chho awpa ta a vaw râpa ei châ,” tah ta.

17 Cha bie a rei hai nona chata chyhsa hropa vaw tlô heih ta, ano chata, “Kaldia chyhsa zy chata py thôh lâta a pachhaih ei ta, râraoseihpa chôta siehnao ei ta, ama siekhei khai haw, zaozi ta na seizy cha thie hra ei ta; kei deita he nâ chho awpa ta a vaw râpa ei châ,” tah ta.

18 Cha bie a rei hai nona chata, chyhsa hropa vaw tlô ta. ano chata, “Na sawchapawpa zy nata na sawchanônô zy cha niepa ta nata kresawti do haipa ta, ama uhthei chaipa o liana cha y ei ta;

19 thlihpi ru ngaitapa râhpathohpa tawhta vaw pathli ta, a o ki palih zy liata su ta, thyudyupa zy chô liata za cho ta, âmo cha thipa ta y ei ta; kei deita he nâ chho awpa ta a vaw râpa ei châ,” tah ta.

20 Zawba cha thyu ta, viahpakaopasihpa cha hrie ta, a luh chhao ngyu ta, alei liata pao ta, Khazohpa a chhy ta.

21 “Ei nô chhi tawhta thluahruapa ta ei vaw pua, thluahruapa ta ei kua heih aw; ABEIPA chata pie ta, ABEIPA chata a la haw heih; ABEIPA moh cha reithaipa ta y mawh sy,” tah ta.

22 He hmo zydua liana heta Zawba cha moleina rai tao vei, hrungâna zieta chhao Khazohpa rai pachhie hra vei.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 2

1 Khazohpa sawchapawpa zy ABEIPA hmiakô liata amâ luahna noh y heih ta, Sâtâ chhao ABEIPA hmiakô liata âmo hryta a vy hra ta.

2 ABEIPA chata Sâtâ hnohta, “Khataih tawhta e nâ vy?” tah ta. Sâtâ chata ABEIPA a chhy ta, “Aleilô liata a khiekhâna tawhta nata a khypa nata a zupa ei châ,” tah ta.

3 ABEIPA chata Sâtâ hnohta, “Ei chakaotuhpa Zawba cha na pachâ beih ma? Aleilô liana cha ano hawhpa rai y veih ei; chyhsa sia ngaitapa nata a dopa, Khazohpa a chi khohpa hmo moleina a cha-uapa chyhsa a châ; a chhâpa y leipa ta eina paraosana chô chi chhao khata a dona kyh liata a ualua ta a y,” tah ta.

4 Sâtâ chata ABEIPA a chhy ta, “Savo vyuhpa ta savo a châ! Chyhsa cha a hneina zydua a hrona châta a pie pasaih aw na.

5 Chârasala atahmâ he na ku ta hria la, a sapa nata a rupa cha hria teh, na hmia chhypa tlaita chhie a cha sapa thlyu aw,” tah ta.

6 ABEIPA chata Sâtâ hnohta, “Pachâ teh, ano cha na ku liata y ta; ano hrona deikua cha pahlôh teh,” tah ta.

7 Chatanachata Sâtâ cha ABEIPA hmiakô tawhta vaw pua ta, Zawba cha kheihluh ru ngaitapa ta pathlasa ta, a pheipazah tawhta a laki taih tlaita.

8 A haona awpa ta beikaopa la ta, buchâh hry liana cha a tyuh ta.

9 Chatanachata a lahpinô chata a hnohta, “Na ngâchhihna kyh cha atahmâ taih chhao cha na patu lymâ khoh thlâh ha aw mâ? Khazohpa cha chhie sapa la, thi thlâh ha teh,” tah ta.

10 Ano deikua chata a hnohta, “Ahrupa chanô biereipa hawhta na reih thlâh haw. Khazia Khazohpa tawhtapa hmophapa hmô pi ta, hmopha leipa chhao eima hmô awpa châ hra vei mâ?” tah ta. He hmo zydua liana heta Zawba chata a hmao ta moleina hmo rai reih vei.

11 Zawba viasa pathôh chata ano chô liata hmopha leipa zydua a vaw tlathlupa ama theipa vâta, âmo chata ama yna su chyu tawhtapa a vy ei ta, Temani chyhsa Elipha nata Shuhi chyhsa Bilda nata Naama chyhsa Zôpha zy, ahmaohpakhyna hneipa ta ano châta pachârôhkheipa ta, ano palôh ama patlâhsana awpa ta bie amâ paraoh haw.

12 Lâhla tawhta ama vaw mo nahta, pahno leipa ei ta; ama ao papuapa ta cha ei ta; ama pohzy hriepa ta ama luh chô liata buchâh ama hie.

13 Cha hawhna chata alei liata ano hnohta a vaw tyuh ei ta, noh sari chhôh pakha hmahta khâpa bie chhao reih veih ei, a pachârôhna a ru ngâsâpa vâta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 3

Zawba a vaw pihpa vâta â ngiapachhi

1 He hnôh lâna heta Zawba chata a pakah â ta, a pihna noh cha chhie sa ta.

2 Zawba chata:

3 “Ei pihna noh cha leidiapa ta y se,‘Chapaw hawti phaohpa a châ haw,’tahtuhpa zâ chhao.

4 Cha noh cha zohpa ta châ se! A chô lâ Khazohpa ta pachâ khah se,khaihna cha a chôta khaihpa pasaipa ta y khah se.

5 Zohna nata thina nohpahlipa chata a chhu ei se. Ano chô liata meihdo ta khu se; zohna ta noh khupa chata pachisa se.

6 Cha zâ cha zohna ta chadô thlâh se!Cha kô liata noh zy hry liana chata reipa châ khah se,thla reina hry liata chhao a vaw hlao khah se.

7 Cha zâ cha ziahzirohpa ta châ se; cha chhôh liana cha thaphana pyurai y khah se.

8 Molie a hmâhpa zy chata noh cha chhiesa mawh sy, A mâchhiesana ta Leviatha pathyu theipa zy chata.

9 Khihdei chyta awhsi zy cha zohpa ta y ei se; khaihna cha hâ ei se hmô tlôh leipa ei sala,khihdei chyta awhsi chhao cha hmâpa pasaih hra khah se.

10 Ei nô chhi ochhi a khaw leipa vâta nahta, ei mohmôna liata tyhreina a nyu hra leipa vâta.

11 Khazia ma chhi liata ei thi vei tly? Khazia ma py chhôh tawhta ei vaw pua nota ei hroh tly?

12 Khazia e byh chô liata einâ pyh? Khazia e sâhpi pazypa ta eina pasaih chi?

13 Chata a châ khiah cha a zia aw na ta, Thahnopa ta ei y aw, a môpa ta y ha aw na ta; a pahâpa ta ei y ha aw;

14 alei beizy nata ryhraotuhpa zy, âmo chata rohryhrapa su a paduakheipa nata

15 cha leipa ta abeisaw zy ngôh a hneipa,âmo ozy tâkâ ta a pabiepa zy nata.

16 Cha leipa ta a daihti leipa ta a piepa,anyupa hawhta ei châ hawpa tlai,hawsaih khaihna a hmô beih leipa zy hawhna heta.

17 Cha liana cha moleipa zy paty pahreina amâ chalih, Rietheipa zy cha pahâpa ta ama y.

18 Cha liata atâhpa zy cha hmaohkha ta amâ pahâ;’ a vaihtuhpa ao cha thei hra veih ei.

19 Cha liana cha chyhsa laipa nata chyhpa chhao y ei ta, seih chhao chata ano zibeipa tawhta khotalaipa ta y mawh sy.

20 “Khazia e rietheipa hnohta khaihna piepa cha ta pathipalôh atymâpa hnohta chhao hrona piepa a châ,

21 thi khoh ngâsâpa ta hmô tlôh leipa ta, ryuby nyupa tluapa hlâta thata tluatuhpa;

22 thata ama thapha nata, thlâ ama hmô nahta aly ngaitapa ta ama y ma?

23 Chyhsa a lâpi a nyupa hnohna chata khazia khaihna a pie, Khazohpa ta a khawhlôhpa hnohna cha?

24 Ei nie hlâ chhaota ei hu po ta, ei hrona cha ti hawhta a loh hra.

25 Ei chipa hmo chata ei chô liata eina vaw khu haw, hmo ei chipa chhao chata ei hnohta vaw tlô ta.

26 Ei tha a hno leipa ta, y thlâh thli thei va na, a pahâ thei va na; châhrasala tymâna cha tlao a vaw tlô,” tah ta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 4

Elipha ta Zawba a chhorei

1 Chatanachata Temani chyhsa Elipha chata a chhy ta:

2 “Na hnohta bie reipa a chhuah aw sala, palôhtlâh leipa ta na y aw ma? Charâta chyhsapa bie rei leipa ta ahy a y thei aw?

3 Nâ cha chyhsa hluhpi pachu haw chita, ku thatlô leipa zy cha tha patlôsa haw chi ta.

4 A pao haipa cha na bie ta a padua haw, pakhu thazeipazy chhao tha na patlôsa haw.

5 Châhrasala atahmâ na chôta vaw tlô ta, pasa na tao hih; cha hria ta patypamâpa ta na y.

6 Na Khazohpa china he na ngâna chaipa nata na lâpi patlâhna he na hnabeiseihna chaipa châ vei ma?

7 “Pachâ tua la, thaipa ta a ypa ahy e a leidia tly? Cha leipa ta khataih liata e chyhsa siapazy pahleipadiapa ta ama y?

8 Keima hmôna zieta cha hmo paraona kyh lei paliepa tymâna zie a hiepazy cha a ualua tlaita ama hria heih aw.

9 Khazohpa husona ta ama leidia tyh; a hiehâhna hu ta patlôsa khaipa ta ama vaw châ.

10 “Chakeibarôhneipa a rôhpa nata, chakeibarôhneipa ao chichhihpa cha, chakeibarôhneipa dawpa zy hâhzy cha a tlie.

11 Chakeibarôhneipa a hmâhpa chata niepa a phahla ta a leidia, chakeibarôhneipa taw a chhipa chapai khaipa ta a y.

12 “A ru lâta ei hnohta bie vaw tlô ta, ei nahkhao zy ta cha bieparu cha a thei.

13 Zâ ta aluahna cha ei pachâ ngâ haino ta, Chyhsa zy a mô ei ta, a dâh lichih no ta;

14 china kyh ei chôta vaw tlô ta, a chalyuna chhao cha, ei ru zydua chalyusa haw ta.

15 Thlahpa chata ei chôta na sie pakhô ta, ei pôhmi thata â duah.

16 A dua thlâh ha ta, kei deikua chata a yzie cha pahno thai leipa na ta. A nohthlahpa cha ei mohmôna liana chata vaw y tlai ta; sidiapa ta y ta, chatawhcha ao ta bie vaw reipa thei na ta;

17 Chyhsa thi theipa cha Khazohpa hlâta a sia via aw mâ? Chyhsa a taotuhpa hlâta ano cha a pathaih via aw mâ?

18 Ano chakaopazy chhao ngâ khao leipa ta, ano vâlyuhchâpa zy chhao hruna kyhta a bai hra;

19 beihlei o liata a pahrâpa zy cha a ngâ lei via pachai aw, ama thabypa buchâh liata a bôpa; tâbalâpa hlâta chyhsapa cha a rao nao viapa a châ.

20 My nata zâ likaw ta tâbalâpa hawhta leidia ei ta; Ahy hmah ta pachâ leipa ta chhâzaw ta ama leidia.

21 Ama chhôh liata poh-o chahryna ri chhiepa ta a châ nahta, sona hnei leipa ta tlâ thi vei mâ?’

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 5

1 “Atahmâ he aw tua; châ chhypa rai ama y tlyma? Mo pathaihpa ahy lâta e nâ heih aw tly?

2 Hiehâhna chata chyhsa hrupa a thie thei, hiatliana chhao chata chyhsa hrupa a thie thei.

3 Kei chata ahrupa thari a pathlapa hmô na ta, sôkha ta a chhôhkha cha Khazohpa ta chhie sapa ta.

4 A sawzy cha a bohna tawhta amâ hla, khihpi kuh ochhi liana chata pasasapa ta ama y. âmo pachhana awpa ta ahy hmah y veih ei.

5 A sâh hriapa cha nodipa zy ta nie khai ei ta, ahloh dôpa chhôh cha parao hra ei ta; a hneina zydua cha dâhphipa zyta palâ khai ei ta.

6 Rietheina he dolei tawhta a puapa cha leipa ta, tyhreina chhao alei tawhta a pyuhpa châ hra vei;

7 chyhsapa cha tyhrei awpa ta a vaw pihpa châ ta, meikhuh chô lâta a zawpa hawhta.

8 “Kei cha Khazohpa lâta cha tlua awna ta, Khazohpa ota chhao ei byuhpa hmo ei pavaosa aw;

9 hmo rôhnah ngaitapa tlua thei leipa zy, hmonoâh chhih ngaitapa rei tiah leipa zy a taotuhpa chu:

10 alei chô liata avâ pasuasatuhpa. alei chô liata ti a vaw tuahtuhpa cha;

11 a nawhpa zy cha pasasa ta, mâchhie a sapa zy cha a bohna liata a soh.

12 Chyhsa zôthaipa ryhraona cha parao ta, ama ku ta amâ chhuahpa papitlohsa vei.

13 Chyhsa sopa zy cha âmo sona piehpiena liata ama so; chyhsa piehpieh-aohraopa cha thy pathlapa ta a châ.

14 Nohchhô khaihna liata zohna a tyh ei ta, nohchhô ta zâ hawhta ama pathâ tyh.

15 Ama pakah tawhta hârapa cha pachha ta, chyhsa thatlôpa ku tawhta phahlapa zy chhao.

16 Chatanachata rietheipa zy cha hnabeiseihna hnei ei ta, paraona liata pakah a chahu.

17 “Khazohpa chhoreipa chyhsa cha a nohlao na. chavâta Atotaotheipa chhoreina cha nawhtaw kha y.

18 Ano chata pasasa ta, chahry heih ta, hmah paphaosa ta, a ku ta a patlâhsa heih.

19 Patypamâna sâcharu liana cha cha pachha aw ta; sâsarina liana cha hmo moleina chata cha hria aw vei.

20 Chakâhna liana cha thina tawhta a cha chatlai aw, adyuhna liana cha zaozi hmotaotheina tawhta chhao.

21 Bie pha leipa liata nyupa châ aw chi ta, paraona a vaw tlôpa chhao chi aw va chi.

22 Paraona kyh nata chakâhna cha pahneisao aw chi ta, aleilô liata sahrâhpa zy chhao rai china hnei aw va chi.

23 Râh liata alôzy cha bie a paraoh aw chi ta, râh liata sahrâhpa zy chhao chata nâma lâta adyhpa ta ama y aw.

24 Na poh-o cha thlahlôhpa ta a y tahpa na pahno aw; na pahrâna su chhao cha a ki leipa khâpa hmah ta y aw vei.

25 Na chi pathlapa zy thata ama hluh aw tahpa pahno aw chi ta, na pathlazy cha alei liata sibiepa hawhta ama y aw tahpa chhao.

26 Kô tloh ngaitapa ta na thlâ tlô aw chi ta, a daihti liata sapiah ama pakhypa hawh tlaita.

27 Pasia haw pi ta; a do tlai hih. Na châta a phana awpa ta pahno teh,” tah ta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 6

Zawba ta a viasazy a maochhiena

1 Chatawhcha Zawba chata a chhy ta:

2 “Aw, ei nôpona he khopathliapa châ sala, ei vâchhiena zydua he khopathlia khaipa châ sala!

3 Atahmâ he tilaipi leisadi hlâta a hri via tlôh aw ta; chavâta ei biezy a chahrâh haw.

4 Atotaotheipa châtai cha ei chhôh liata y haw tlôh ta; cha liata châmaih cha ei thlahpa ta vaw doh ta, Khazohpa chichhihna kyh cha kei lâta na siehnao ta.

5 Alâ hrâhpa chata sibiepa a bâ nota a sâ ma? Viahchao tôhpa chhaota a lao a bâ nota â aoh ma?

6 Pahâna hnei leipa cha alôh leipa ta a nie thei ma, awhti liata a râhpa chhao heta pahâna a hnei rai ma?

7 Chazy cha ei hrona heta hroh khoh vei, ei châta niepa pasi a chhih ngaitapa hawhta ama châ.

8 “Aw, ei hiapa cha hmô thei thlâh ha tlai sala. Khazohpa ta ei hmo khopa cha na pie tlai sala;

9 Khazohpa ta charoh saopa na khoh tlai sala, a ku hmâpa ta na tai pachhô sala!

10 He he ei thlahlôhna a châ aw; pasana pathlie leipa chhaota ei ly aw; pathaihpa bie cha ei paphasai leipa vâta.

11 Ei thatlôna he khâpama châ ta, ei hâ thlâh ha awpa cha? Ei chhânapa he khâpama châ ta, ei hâ thlâh ha aw?

12 Ei thatlâna zie cha alôh thatlôna hawhta a châ ma? Cha leipa ta ei sapa chhao dawh hawhta a châ hra ma?

13 Keima chhôh liata tao theina rai y vei, ei hria theina chhao kei tawhta to khaipa châ hra vei ma?

14 Thazeipa chyhsa cha a viasa tawhta ngiachhiena a hmôpa a châ. Atotaotheipa china vâ tlai chata.

15 Ei unawhpa zy cha vatie hawhta hai hmâhpa ama châ, vatie thlai a tlapachhapa hawhta,

16 amâ vypa chata dâhaw cha patisa ta, dâhaw cha hmô thaipa châ vei.

17 A lalôhna daihti ta ama lei tyh; a vaw lo nah chata ama su tawhta ama zao tyh.

18 Sôhryhpa zy chata ama lâpi tleisai ei ta; râhchawhpa liata a ngia ei ta, ama leidia.

19 Tema sôhhrypazy chata moh ei ta, Sheba khitlyhpa zy chata hnabeiseih ei ta.

20 Ama ngâna cha hnabeipadysapa ta châ ta, vatie kuapa ama tlô nata ama hnabeiseina pahlei ei ta.

21 Vatie hawhna chata ei hnohta nama vy; ei chhi tyhna hmô eichi ta, nama chi.

22 ‘Nama hmosaipa na pie ula’ tlyma; “Nama hneipazy na hlâ ula’ tlyma.

23 “Khakhaipa ku tawhta na pachha ula’ tlyma. Riepatheisatuhpa tawhta na chatlai mah y’ ei cha tah ei ma’?

24 “Na pachu la, chatanachata ei chalih ha aw; hmo ei taopasipa na pahnosa hra mah y.

25 Biedopa cha a thatlô kaw dia! Na biereipa heta khâpa e a hria?

26 Bie deitata hria namâ chhuah ma? Chyhsa nôpopa reih he ziza hawh châ vei ma?

27 Paw a hnei leipa chôta pachao khoh eichi ta, sôhdaona awpa ta nama viasa hmâh eichi ta.

28 “Atahmâ alypa ta na moh ula; nama hmiakô liata hai cheita aw va na.

29 A vaw heih tua ula, a do leipa khâpa hmah tao khah u. A vaw heih teh u, ei chô liata hmo he â dopa na a châ.

30 Ei palei liata sia leina kyh a y ma? Hmo pha leipa cha pachâ thai vana mâ?

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 7

Zawba ta Khazohpa a pahaona

1 “Alei liana heta chyhsa ta chakaona kyh rupa hnei tlai vei ma? A hrona nohzy cha a hlaopa hawh dei châ vei ma?

2 Sei, nodipa a khoh ngâsâpa hawhta nata, a hlaopa ta a hlao awpa sai a sai tyhpa hawh tlaita,

3 khâpahrao leipa ta thla hluhpi hmâpa ta vaw pahlei na ta, noâhchhi kawpa zâ zy ei châta raopa a châ.

4 A zia na ta, ‘Khatita ei thyu aw? tah na ta. Châhrasala zâ cha pasih kaw ta, khihpavâ chy taih a paliepatheihpa ta ei y.

5 Ei sapa cha alô nata apuapa ta a khu; ei vopa cha a vaw bie ta, a kai heih tyh

6 Ei nohzy he thaisatuhpa chakhao hlâta a chatlie via, hnabeiseina hnei leipa ta lei ei ta.

7 “Ei hrona he thlih hawh dei a châ tahpa a thei la; ei mo ta hmophapa hmô khao aw vei.

8 Nâ hmôtuhpa mokhaoh chata na hmô khao aw vei; na mozy ei chô liata na moh aw ta, châhrasala y aw va na.

9 Meihdo a pai ta, a leidiapa hawhta, Sheol lâta a zupa cha a khy heih aw vei;

10 a o lâna cha kua heih khao leipa aw ta, a su chata ano cha pahno khao aw vei.

11 “Chavâta ei pakah cha a sohsi aw va na; palôhrupa pachâ chhiepa ta ei vaw reih aw na; palôh pasa ngâsâpa ta ei paphôh aw.

12 Tilaipi tlyma châ na ta, tilaipi hmohrohneipa tlyma châ na ta, nâma ta na vaihtuhpa tlao na soh tly?

13 ‘Ei rakhô ngiaryhpa châ ha sala, ei ziana heta ei paphôhna a panaisa aw,’ ei tah.

14 Nâma chata mâsana kyh ta na pachhipary chi ta, aluahna hmâpa ta na pachisa chi ta,

15 ei hrona heta riesaona tlao a tlyh ta, ei pasanazy hlâna heta thi chhao.

16 Eina ai ngâsâ; hro parei khoh aw va na. Kei deita tlao y aw sala, ei noh zy he khâpahrao leipa a châ hih.

17 Chyhsa he khâpa ma châ ta, Pasasa chi ta, a chô liata na pathipalôh na pahnieh.

18 Ano cha my chareih tly chi ta, ano cha na pasia tyh?

19 Khachâ e nâ heisai leipa ta y aw chi ta, ei pachih ei palâ chhôh chhao na pathlie khoh leipa ta na y tly?

20 Moleipa châ aw sala, na chôta khâpa e ei to aw, hy chyhsa zy vaihtuhpa y? Khazia e pahnosana chata eina soh chi? Khazia keima cha phaohripa ei vaw châ?

21 Khazia ei paraona cha nâ ngiahthai vei, ei moleina zydua khazia na siekhei vei? Atahmâ he dolei liata a zia na ta, thata na tlua aw chi ta, châhrasala y aw va na,” tah ta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 8

Bilda ta Khazohpa pathluna â do a tahzie

1 Chatanachata Shuhi chyhsa Bilda chata a chhy ta:

2 “Khachâ e he hmo he na reih aw, na pakah bie cha thlihpipa hawhta khachâ e a châ aw tly?

3 Khazohpa ta pachiana cha su leipa ta a pakuasa vei ma? Atotaotheipa chata a su leipa lâta a pakuasa vei ma?

4 Na sawzy ta ano lâta moleina tao haw ei sala, ama taopasina ku ta âmo cha patusa sala.

5 Khazohpa tiama ngaitapa ta na tlua khiahtala, Atotaotheituhpa lâta nâ hawna bie cha pado la,

6 pathaihpa nata a dopa na châ khiahtala, atahmâ thlai cha pathyu aw ta, chyhsa siapa to awpa chhao cha a chapie aw.

7 Nâ thaona liata chyh hra la, na chhâna lâta lai tlô aw chita.

8 “Zâkhano daihti kha hiahri tua la. ei châ haw na, ama mahpaw zy tluana kyh lâta pachâ tua teh;

9 keimozy cha a zâhiahpa chyhsa dei eima châ, khâpa hmah pahno ma pi. alei liata eima hro noh zy cha nohpahlipa hawh deita a vaw châ hih.

10 Chazy cha cha pachu veih ei ma, cha chho veih ei ma, ama pahnona tawhta biezy vaw rei hra vei ma?

11 “Lothi cha chiatlao leipata a kaw laiseih thei ma? Ti y leipa ta râhbu a laiseih thei aw ma?

12 A hro chhôh chhawh leipa ta a y no tlai chhaota, chichei hropa hlâta a uah khoh.

13 Cha hawhna hra chata Khazohpa a mypa zy lâthlôh cha a châ; Khazohpa a pachâ leipa zy hnabeiseina chhao cha a leidia aw.

14 A pahniehna cha cho aw ta, a ngâchhihna cha zytôpuhpa bu hawhta a châ aw.

15 A o cha a hnie ta, châhrasala a duah aw vei; a ipa ta patu aw ta, châhrasala tao aw vei.

16 Noh a chhi hlâta hroh aw ta, a chiahzy chhao thao aw ta, sahdô a khu aw.

17 A thari cha a pahmaohna su liata tla ta; alô su liata a pahrâ hra.

18 A lei tawhta phiapa a châ khiah cha, ahy hmah ta cha liana chata a yna tah aw veih ei.

19 He he khazohpa a pachâ leipa chyhsa chô liata a tlôpa a châ. a sie tawhta chyhsa hropa zy ta ama thlâ.

20 “Khazohpa chata chyhsa siapa cha thy beih leipa aw ta, hmo molei a taotuhpa cha padua hra aw vei.

21 Na pakah pahneina ta pabie heih aw ta, na hmao chhao thaphana awna pyuta.

22 Châ haotuhpa zy cha nozana a hmâpa ta ama châ aw, moleipazy poh-o chhao y khao aw vei,” tah ta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42

Zawba 9

Zawba ta Khazohpa chyh ei thei vei

1 Chatawhcha Zawba chata a chhy ta:

2 “Cha hawhta a châ hmeihseih tahpa a do ngâsâpa ta ei pahno: Châhrasala kheihta e, Khazohpa mohmô liata chyhsa a sia thei aw?

3 Ano bie ei khoh sala, ei sâh kha liata ei kha chhao a chhy thei aw vei.

4 A pathipalôh so ta, thatlô ta hmo a tao thei, ano liata kuchhapa ta a ypa cha ahyma hlaotloh thei aw tly?

5 Tlâhzy pasie ta pahno leipa ei ta, a hiehâh ta a panano nona khata;

6 alei suzy chalyupa ta, atôh zy cha thata chathosa ta,

7 noh biepie ta, chhi leipa ta, awhsi chhao khawhlôh khai ha ta.

8 avâzy a pakaisa theipa, tilaipi a chatlaosa theipa cha;

9 Awhsichavyhzy, Vaothawlapiapa nata Awhsicharu zy taotuhpa, chho lâ chhôhpadâhpa zy a taotuhpa cha;

10 hmo rôhnahpa lai chadai tiah leipa zy a taotuhpa, hmonoâhpa reitiah leipa zy cha.

11 Ei kiapâh ta sie ta hmô va na, ei kiapâh ta na khô ta, pahno hra vana.

12 La thlâh ha ta, ahy e a pakhâ thei? ‘Khazia na tao?’ ahy e a tah aw?

13 “Khazohpa cha a hiehâhna cha a sy leipa aw ta, Rahabi baotuhpa zy ano ry ta amâ bôh.

14 Keima tlaita ano cha kheihta e achhy aw na ta, khâpa bie e ei hmâh aw?

15 A do hra sala, a chhy aw va na; ei khotuhpa liata ngiachhiena ei hiah aw.

16 Aw sala, ano chata nâ chhy sala, ei bie a uasa aw nata pangiasa va na.

17 Thlihpipa ta na parao ta, a chhâpa y leipa ta ei hmahzy na papôhsa ta;

18 ano chata ei husopa lapa pasaih leipa ta, rietheina ta tlao eina pabie.

19 Tah raruah aw sa la, moh tua, Ano cha thatlô ta! ryureina kyh liata chhao ahyma a aw aw tly?

20 Sia hra sala, ei pakah tawhta thailei eina pachâsa aw, kei châ sia hra sala, a su leipa ta eina pachâsa aw.

21 Seina hnei va na keima sasyh ta a tah va na; ei hrona he ei pasi.

22 A miakha sai thlâh haw; Chavâta ma a, a siapa nata sia leipa cha a pahleipadia rairieh ei tah.

23 Paraona ta thina sôkha ta a tlôkhei khiahla, a siapa taona cha a pahneisao aw.

24 Hmoparaopa ku liata piepa châ ta, Pachiatuhpa zy hmia khu ta, ano châ leipa ta ahy e a châ aw?

25 “Ei daihti he zikyurâpa hlâta chatlie via ei ta; a zaw ei ta, hmo phapa rai hmô veih ei.

26 Balyh chatliepa hawhta khô ta, pahmô ta a pathlô hnaopa hawhta.

27 Ei palôhtlâh leina he ei my aw, pachârôhna hmia he pahlei aw na ta, palôh lypa ta ei y aw’, ei tah na ta,

28 ei pachârôhna zydua he chi na ta, nâ ta thai na pachâsa aw va chi tahpa ei pahno.

29 Thai lei a châpa châ aw na ta, khazia e a phahnai leipa ta ei hria aw?

30 Dâhaw ta ei ngai a sipa ta, ei kuzy sia ngâsâpa ta a si hra aw sala,

31 chiatlao khaoh liata na chati thlyu aw chi ta, ei chysia zy chhao thlai eina pasi haw.

32 Ryureina kyh liata eimâ kho tita ei chhyna awpa ta, ano cha keima hawhta chyhsapa châ tlôh va.

33 Eima chô liata pahnie rairiehpa ta. eima likawh ta bie pathlatuhpa rai y veih ei.

34 Ei tawhtapa a sômasi la sala, chi a chhina ta thlah na pazoh khah se.

35 Chatanachata ano chi leipa ta bie reih aw na ta, keimasasyh ta cha hawhna chata châ tlôh lei khâh na ta.

Zawba (Job)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42