1 Chatawhcha ABEIPA cha Zawba ota reih lymâ ta:
2 “Atotaotheipa a hyutuhpa chata a ei aw ma? Khazohpa a eituhpa chata duah a chhy tua se,” tah ta.
3 Chatawhcha Zawba chata ABEIPA cha a chhy ta;
4 “Keita heta khâpa e, ei châ chhy aw? Ei pakah ei chahu thlâh haw.
5 Ei kha reih ha na ta, châ chhy khao aw va na; ei no, châhrasala pazao khao aw va na,” tah ta.
Khazohpa hmotaotheina â lâna zie
6 Chatawhcha ABEIPA chata khisô tawhta Zawba cha a chhy ta:
7 “Chapaw ngâsâpa ta na poh a sai la; bie cha hiahri aw na ta, na chho mah y.
8 A do leipa ta eina pachâ chi ma? Nâma siapa na châ thei nawpa ta thai lei eina pachâsa chi?
9 Khazohpa bâh hawhpa na hnei ma? ano hawhta tôkalôpa a thuapa a aoh hawpa na papua thei ma?
10 Abeina nata zachhihna ta a tobi la, palyupalihna nata rôhnahna ta a tobi teh.
11 Na hiehâhna khô pathlapa cha patlai la, chyhsa a palaipa cha tawpâpa ta panawhsa teh,
12 Chyhsa apalaipa cha tawpâpa ta pahnaisa la; Hmoparaopa zy cha amâ duana su tlypa teh.
13 Dohlei liata pabu chyu la; a nyuna su liata ama hmia nyu teh.
14 Cha tawhna cha na ku chachâh lâ tlaita, a cha pachha thei tahpa ei cha pahnosa aw.
15 “Moh teh, Behemô nâma hawhta ei tao hih; viahchao tôhpa hawhta sibiepazy bâ ta.
16 A thatlôna cha a chai liata y ta, a thari thatlôna cha a py liata a y.
17 Sidy hawhta a chaolahmei pachyu ta; a chakhai thari cha a phiepa ta a y.
18 A ruzy cha dawh pakaopa hawhta châ ta, a kuphei cha thua tlai hawhta a châ.
19 “Ano cha Khazohpa taopa rôhnahpa a châ, a taotuhpa chata ano châta zaozi taopa cha pie ta,
20 Ano chata tlâh liata pahrâ awpa cha pakhâ ta, cha cha râh sa zydua palaona a châ.
21 Lotus buh ry liata a zia ta, tiphi ry nata chiatlao zy liata chhao.
22 Lotus buh chata pahli ta, vatie râhbuh zy chata ano chadô ta.
23 Ti a vaw lai ngâpa chhao chi beih vei, a pakah taih Zawda vao hra sala, a ngâh lymâ.
24 Â pachy thlâh ha nota chyhsa ta ama patu thei ma? a hnari ama dao thei ma?