Elihu ta Khazohpa cha â do a tah zie
1 Chatawhcha Elihu chata reih lymâ ta:
2 “‘Nâmo chyhsa sopazy saih u. ei bie nahthlie teh u, nâmo a pahnopa saih u, nama nah pachôh teh u;
3 Pakah ta pahâna a pahnopa hawhta, nahkhao ta bie a pasia.
4 Â dopa cha a tlyh ei sih la; keimo tlai ta â dopa cha pasia ei si.
5 Zawba chata, ‘A siapa cha ei châ, Khazohpa ta ei siana na lapa ta;
6 ei sia thlâh hana chôta a haipa ta na pachâ ta, hmo ei parao lei tarawpa ta, ei pasana cha patlâhsa thei leipa ta y ta,’ a tah.
7 Zawba hawhpa he ahy e a y, mohnaona cha ti hawhta dohpa ta,
8 moleina a taopa py liata ypa ta, hmoparaopa chyhsa zy nata a chareipa cha?
9 Khazohpa liata alypa he, chyhsa chata khâpa hmahta phahnai vei.’ a tah bailai.
10 ‘Chavâta nâmo pahno thaina a hneipa zy, na nahthlie ula, Khazohpa cha hmo moleipa taopa ta, Atotaotheipa cha moleina tao tiarâh aw vei.
11 Chyhsapa cha ama taona hawhta viarithôpa châ aw ta, chyhsa to ama yzie hawh sai ta ama chôta a patlôsa aw.
12 Khazohpa cha moleipa ta tao chacheita aw vei, Atotaotheipa chata a dopa cha rie patheisa aw vei.
13 Ahyma alei pamokhâh sa ta, khizaw pôhpalôhpa he a hnohta a pavai sa?
14 Anosasyh ta chyhsa thlahpa cha lapakhua sala, a husona cha a hnohta a lapakhy khiahta cha.
15 sapa zydua leidia khai haw ei ta, chyhsapa cha dolei lâta a kua ha aw.
16 Pahnothaina na hnei khiahtala he he thei teh; khâpa e ei reih a phapa ta nahthlie teh.
17 Dona kyh a haotuhpa chata ryu a rei aw ma? Abei siapa nata hmotaotheipa cha thai lei na pachâsa aw mâ,
18 ahyma abeizy kei ta, ‘Dyutlai leipa’ tah ta, molaipa hnohta, ‘Hmoparaopa’ tah aw ta;
19 abeisawzy chhao khokhei hlei leipa ta, hneirôhpa chhao cha dyhchhiepa hlâta khokhei leipa ta, ama zydua ta ano kuta taopa châ tlôh ei?
20 Sôkhata ta thi ei ta; zâ cho ta chyhsa zy a chalyu ei ta, ama lei, thatlôpa zy chhao ku hmâh leipa ta lapa ta ama y.
21 A mo cha chyhsa yzie chôta khaih ta, a kei chakâna zydua a hmô khai.
22 Zohna y leipa ta, thina nohpahli y hra vei, moleina taotuhpa zy a nyu nawpa cha.
23 Khazohpa hmiakô liata pachiana kyh lâ sie awpa ta, chyhsa châta a daihti raopa châ vei.
24 Chyhsa thatlôpa zy cha hiahri tua leipa ta parao ta, ama su liata chyhsa hropa zy a soh.
25 Ama hmotaopa zy cha a pahnopa vâta, zâ ta âmo parao ta, a chanaoh khai ei.
26 Chyhsa zy mohmô ta ama hmoparaopa vâta hrie ta,
27 ano ama zina tawhta ama tleisai vâta nata, a siena kyh zy amâ papeisa leipa vâta,
28 ano lâta sipasapa zy awna ao patlôsa ei ta, ano chata rietheipa zy awna ao cha vaw thei ta.
29 Ano cha a vaw chalih ha sala, ahy e thai lei pachâsa thei aw? A hmia cha nyu ha sala, ahy hmô thei aw ta, phopi ta ma, chyhsa ta?
30 Khazoh pahno leipa chata ryurei leipa aw ta, Zawpi zy amâ ao lei nawpa ta.
31 “Chyhsa ta Khazohpa ota,’ Hriena tao na ta; hmoparao khao aw va na;
32 ei hmô thei leipa cha na pachu la, moleina ei taopa chhaota, tao heih khao aw va na,’ a tah bei ma?
33 A viarithôna cha na khozie hawhta cheingei ma a châ aw, ano na eipa cha? Kei châ leipa ta nâma ta nâ tlyhpana a châ; chavâta na pahnopa cha reih teh.
34 Chyhsa pahnona a hneipazy chata ei hnohta reih ei ta, a sopa chyhsa ta na nahthliepa ta ei hnohta,
35 ‘Zawba he pahnona khâpa hmah ta hnei leipa ta bie a reih, a biezy liana he sona y vei,’ ama tah aw.
36 Zawba cha pasia khaipa ta y sala, chyhsa moleipa hawhta â chhypa vâta.
37 A moleina baichhapa ta â ty ta, eima hry liata a ku chabaih ta Khazohpa lâta a bie a pahluh.