Reithaina hla (1 Tr 16:23-33)
1 ABEIPA lâta hla thiehpa sa ula; leilô zydua saih u, ABEIPA lâta sa teh u!
2 ABEIPA lâta hla sapa ta a moh reithai ula; noh chareih a pachhana bie cha pahnosa teh u.
3 Pho to hry liata a rôhnah zie phuah ula. chyhsa tozy hry liata a hmonoâhpa taopa zy cha phuah teh u!
4 ABEIPA cha rôhnah ta thata reithai awpa châ tlôh ta; khazoh zydua hlâta chi awpa a châ.
5 Phopi sahlao khazoh zy cha nohthlahpa zy châ tlôh ei ta; ABEIPA deikua cha avâ zy khi a tao.
6 Zana nata abeina zie a hmiakô liata y ei ta; thatlôna nata ngiana cha a su pathaihpa liata ama y.
7 Mo to liata chi to rai saih u, ABEIPA cha pie ula, ABEIPA cha rôhnahna nata thatlôna pie teh u!
8 ABEIPA cha a moh rôhnahna cha pie ula; hmo hlâ awpa cheipa ta a dôhpachhôh tlyhmia liana zy chata a vy teh u!
9 Pathaihna a ngiana a baipa ta ABEIPA cha achhy ula; leilô zydua saih u, a hmiakô liata a chalyu teh u!
10 Pho to hry liata, “BEIPA cha ryu a reih haw hih! Khizaw chhao he a chalyu thei lei awpa ta pa-ipa ta y ta; ano chata thlei hlei hnei leipa ta mo to a pachia aw,” tah teh u.
11 Avâzy khi aly ngaitapa ta y sala; alei chhao he thapha ngaitapa ta y mawh sy; tilaipi nata a chhôh liata hmo a ypa zydua he paro ngâ mawh sy;
12 lyu nata a chhôh liata a ypa zydua he aly ngaitapa ta y mawh sy! Cha tina chata râhhmâhpa liata tho zydua he thaphapa ta ama sa aw.
13 ABEIPA hmiakô liana chata ano cha a vy aw na. alei pachia awpa ta a vy tlôh aw ta. Khizaw he a sia ngaitapa ta pachiapa aw ta, mo to zy cha a hmeihseihna ta a pachiapa hra aw.