Khazohpa rôhnahna nata chyhsa zachhihna
Hla chhihthatuhpa châta: Gittith ta sa awpa. Davi Reithaina Hla.
1 Hy ABEIPA, eima Beipa, alei chô zydua liana heta na moh cha a pha kaw dia! Na rôhnahna cha avâ chô lâna khita y ta.
2 khakhaipa nata phuh a latuhpa padiana awpa ta, nâma châ dyuhtuhpa zy vâta hawsaihpa nata hawtipa zy pakah liata puapa chata thatlôna pa-isa chi ta.
3 Nâ avâ na kuzôthaina, thlâpâ nata awhsi zy na raopa he, ei pachâ châhna heta;
4 chyhsapa he khâpa châta ma khâ nâ thei thlâh ha tly, chyhsa sawchapawpa chhao he khâpa ma châ ta khâ na hmô thlâh ha tyh tly? ei tah tyh.
5 Ano cha Khazohpa hlâta a hnai viapa ta tao chi ta,rôhnahna nata palyupalihna pakhôsa tlôh chi ta.
6 Nâ na ku hmotaopa zy chôta biehneina pie chi ta; a phei ry liana cha ato zydua soh chita,
7 mietahkupa nata viahchao zydua chhao, râhsa zydua chhao,
8 aruapa liata a zawpa pavaw zydua nata tilaipi liata nga zydua chhao, tilaipi lâpi liata a siepa zydua chhao.
9 Hy ABEIPA, eima Beipa, alei chô zydua liana heta na moh cha a pha kaw dia!