Hlazy 69
Pasa taona ao
Hla chhihthatuhpa châta: Shoshannim ta sa awpa. Davi Reithaina Hla.
1 Hy Khazohpa, na pachha mah y! Tizy cha ei rao taih heta a sâh tlôh ta.
2 Chiatlao a thu ngaitapa, tlyna rai a y leina liata ei pamôh ngâ hih; ti a thuh ngaitapa, tisaih zy eina vaona su liata ei ngia haw hih.
3 Ei châna lâta thachhâpa ta y na ta; ei rao hi khai ha ta. Ei Khazohpa ei hâna liana heta ei mozy zoh haw ta.
4 Khâpa hrao leipa ta nâ haotuhpa zy cha ei sâbu hlâta hluh ei ta; a do lei ngaitapa ta na khakhaipa ta pahleipadia nâ chhuahtuhpa zy cha thatlô ngaitapa ama châ. Kheihta e ei la chachei leipa hmo cha ei pie heih aw?
5 Hy Khazohpa, nâ chata ei hru ngâna zie he pahno chi ta; ei moleina zy chhao he, nâ tawhtapa nyupa châ vei.
6 Hy Abeipa Pheisaihzy KHAZOHPA, nâma cha hâtuhpa zy cha keima vâta nozapa ta y khah ei se; hy Izarel Khazohpa, nâma cha tluatuhpa zy cha keima vâta zachhi leipa ta y khah ei se.
7 Nâma vâta reipachhiena tao na ta, zana ta ei hmia a khu khai haw.
8 Ei unawhpa zy liana chata khichhaipa châ haw na ta, ei nô sawzy liata pahno beih leipa ei châ haw.
9 Na o liata ei pahnai khohna ta na nie khai haw ta, nâma cha reipachhietuhpa zy reipachhiena zy cha ei chô liata a tla haw.
10 Cha na ta, cha heihna chôta ei hrona chhorei na ta, cha cha eina reipachhiena vaw châ ta.
11 Ei chysia ta latho poh ei hmâh nahta, âmo chata chhiena lâta pakhona vaw châ lymâ na ta.
12 Kuh chhikao liata atyuhpa zy chata ei thâtih reih ei ta, sahhma pari a hmâhpa zy hla ei châ hih.
13 Châhrasala hy ABEIPA, kei ta la, daihti ryhpaopa liata na lâta na thlah ei chhâ. Hy Khazohpa, na zawngiahna thata vâta, na pachhana hmeihseihna ta nâ chhy mah y.
14 Chiatlao tawhtapa he na pachha la, na pamôsa cheita khah y; nâ haotuhpa zy tawhtapa nata ti a thuh ngaitapa tawhtapa he pachhapa ta na paysa mah y.
15 Tisaih ta na vao cheita khah sala. ti athupa zy ta na palâ hra kha se, khaohtlô chhaota a pakah na mokhâh khah se.
16 Hy ABEIPA, nâ chhy mah y, na kyhpachâ ngiachhiena cha pha tlôh ta; na thapha ngaitana zie lymâ hawhta kei lâta a vaw heih mah y.
17 Cha chakaotuhpa tawhna heta na hmia chhao nyu khah y; ei nôpo tlôh ta, nâ chhy patoh mah y.
18 Ei hrona he a vaw hniapa ta, chatlai la, ei khakhaipa zy vâna heta na pachha mah y!
19 Nâ ta chyhsa eina reipachhiena zy, ei maohphyuna zy, ei nozana zy, na pahno na; nâ dyuhtuhpa zy cha na hmiakô liata ama y khai na.
20 Chyhsa eina reipachhiena heta ei palôh pachhie ta, thata pachârôhpa ta y na ta. Na ngiachhietuh awpa tlua na ta, châhrasala ahy hmahta y tlôh lei khâh ei ta; thlah na palôhtuh awpa zy tlua hra na ta. châhrasala ahy hmah hmô tlôh na va.
21 Ei niepa châta khâpa leipa khahpa na pie ei ta. ei dâhphina liata ti thaopa do awpa ta na pie ei ta.
22 Ama hmiakô liata ama tlâhkhai cha khohei vaw châ sala; amâ theihna kyhchhi cha a phy vaw châ mawh sy.
23 Ama mozy cha ama hmô thei lei nawpa ta pazohpa ta y mawh sy; ama chaizy cha khâ chalyusa mah y.
24 Na ruchhôna cha ama chô liata leithlu la, na pathi-ia hiehâhna chata âmo cha patu mawh sy.
25 Ama yna cha roryhrapa vaw châ sala, ama poh-ozy liana chata ahy hmahta pahrâ khah se.
26 Nâ tupa chyhsa cha taola ei ta, hmah na paphaopazy pachârôh zie cha reih tyh tlôh ei ta.
27 Ama hmoparaona cha hmoparaona ta baichha la; âmo cha na siana liana chata angia khah ei se.
28 Âmo cha hrona châbu tawhtapa phihpa ta y ei sala; a siapazy hry liana chata ropa châ hra khah ei se.
29 Châhrasala kei cha sipasa ngaitapa nata pachârôh ngaitapa châ na ta; hy Khazohpa, na pachhana chata su sâhpa liata na soh mawh sy.
30 Khazohpa mo cha hla ta reithai awna ta; alyna bie reipa ta ano ei palyupalih aw.
31 Cha hawhna chata viahchao tôhpa tlyma, ki nata châki a hneipa viahchao tôhpa tlyma hlâta cha, ABEIPA a palysa via aw.
32 A reisipazy chata cha cha hmô ei ta, aly ei ta; nâmo Khazohpa a tluapazy saih u, nama pathipalôh cha a hra mawh sy.
33 ABEIPA ta sipasapazy cha thei ta, a chyhsa atâhpa zy cha mohnao leipa ta.
34 Avâ nata alei chata ano cha reithai mawh sy, tilaipizy nata ama chhôh liata hmo a pie theipa maihzy chhaota.
35 Khazohpa ta Zaio cha pachhapa ta. Zudah khihzy cha sa tlôh aw ta; cha liana chata y aw ei ta, ama hnei hra aw;
36 a chakaopa sahlao pathlazy chhao chata ryu ta to aw ei ta, a mo a pasotuhpa zy cha a chhôh liata ama pahrâ aw.