Hmia lâta pachhana zy nata atahmâ ta tymâna zy
Hla chhihthatuhpa châta. Kôrah sawchapawpazy Reithaina Hla. Maskil.
1 Hy Khazohpa, hlâno ta ama hro nota na taopa zy kha, eima mahpaw zy ta maniah ama chhopa, eima nah ta eima thei:
2 nâ ta na ku tlaita phopizy cha papua chi ta, âmo cha tlao loh chi ta; chyhsa to cha ama rie pathei chi ta, âmo cha a kawhpi ta paysa chi ta;
3 lyurâh he hnei awpa ta âmo zaozi ta ama lapa châ leipa ta, âmo bâh ta a pahniepa châ hra vei; ama chô liata nâ lypa vâta na ku chachâh lâ nata, na bâh nata na hmia khaihna ta tlao a châ.
4 Nâ cha ei Beipa nata ei Khazohpa na châ, Zakaw pahniena chata bie pie mah y.
5 Nâma vâta eima khakhaipa zy cha su pathla aw pi ta; na moh vâta maniah a siehnaotuhpa zy cha eima tlysao aw.
6 Ei libaw he ngâ tlôh leipa aw na ta, ei zaozi heta na pachha hra aw vei.
7 Nâ dyuhtuhpa zy tawhta cha nâ ta tlao na pachha haw chi ta, nâ haotuhpa zy cha maoh na paphyuh haw hra.
8 Noh y ta Khazohpa a palaikhei pi ta, na moh cha chhâzaw ta eima reithai hra aw. Selah
9 Atahmâ deikua cha nâ ta maniah thy haw chi ta, eima no maniah paza chi ta, eima pheisaih zy hra adyuhna liata chhihtha khao leipa chi ta.
10 Dyuhtuhpazy tawhna chata maniah parâ-paisa tyh chi ta; maniah a haotuhpa zy chata sô cha âmo khozie ta ama la tyh.
11 Nâ ta thie awpa ta raopa mietahkupa hawhta maniah pie chi ta, pho to hry liata maniah papai hra chi ta.
12 Na chyhsazy he khâpa hmah châ leipa ta zuah chi ta, ama ty cha hneirôh khei hlei tlôh leipa chi ta.
13 Nâ ta eima chheipâh chyhsa zy reipachhiepa ta maniah pa ysa chi ta, eima vaih zy mohnaopa nata pahneisaopa ta maniah paysa chi ta.
14 Nâ ta phopi hry liata a chhiena lâta pakhopa ta maniah pa ysa chi ta, chyhsa to hry liata luh chahuasaipa ta maniah paysa hra chi ta.
15 Ei nozana noh noh y ta ei hmiakô liata y tyh ta, ei maohphyuhna heta eina khu khai haw,
16 ratuhpa nata reipachhietuhpa ao vâta nata khakhaipa nata phuh latuhpa vâta.
17 Cha zydua cha eima chô liata tlô ta, châhrasala cha my beih leipa pi ta, na biehrai liana heta a pakheipa ta tao beih hra ma pi.
18 Eima pathipalôh he kua leipa ta, eima phei chakâna zy heta na lâpi cha tleisai beih hra vei,
19 sihâ yna liata maniah taochhie chi ta, thina nohpahli zohna ta maniah na khu haw.
20 Eima Khazohpa moh mypa ta tlyma râh hropa khazoh lâta eima ku zy eima pazawh tlyma khiahtala,
21 Khazohpa ta cha cha tlua papua aw vei mâ? Pathipalôh liata nyuna zy he pahno thlâh ha tlôh ta.
22 Nâma vâta noh y ta thiepa ta eima y tyh, mietahkupa thih awpa hawhta pachâpa eima châ.
23 Hy ABEIPA, a hra châh chi! Khazia nâ mô? Thyu la! Chhâzaw ta maniah thy kha y!
24 Khâpa vâta e na hmia nyu chi ta, eima riethei zie nata pasaipa-i eima taozie he na my tyh tly?
25 Eima hrona he dolei supa ta a bôh ta; eima py hra, lei liata khâchâ a bai tlôh ta.
26 Maniah bao awpa ta thyu ta! na kyhpachâ zawngiahna vâta maniah chatlai mah y!