BU II (PSALMS 42-72)
Khazohpa vâna
Hla chhihthatuhpa châta: Kôrah sawchapawpazy Maskil.
1 Sakhih vatie ti do khopa ta a pahlapa hawhta, cha hawhna chata hy Khazohpa, ei hrona he nâma vâpa ta a pahla.
2 Ei hrona he Khazohpa vâpa ta, Khazohpa hropa vâpa ta a dâh a phi. Khatita ma Khazohpa kô tlô aw na ta, ei luah aw tly?
3 Ei mothlihzy he a chhô a zâ ta ei pati a châ, chyhsazy hra chata, “Khataihta e na Khazohpa cha?” khâ na tah ei ta.
4 He hmozy he ei pahno thlâh ha, ei hrona he leitha na ta: Khazohpa o lâ pangaipa ta aly na ta, thaphana pyuzy chhaota, hla sana chôta ama kyhchhihna daihti liata hmia ei chhihtha tyhpa kha.
5 Hy ei hrona, khazia nâ khu thlâh haw, khazia ei chhôh liata nâ tymâ tly? Khazohpa hnabeiseih teh; ano cha ei reithai heih aw na, nâ baotuhpa nata ei Khazohpa cha.
6 Ei hrona cha ei chhôh liata a khu thlâh ha ta, chavâta Zawdâh nata Hamaw râh tawhta nata, Miza Tlâh tawhna zy chata ei châ thei thlâh haw.
7 Na ti lopa pyuzy liana chata athuhpa nata athuhpa a aw ei ta; na ti chalâparâpa nata chatlaopazy chata na vao ei ta.
8 ABEIPA kyhpachâ zawngiahna chata nohchhô ta bie pie ta; zâ ta a hla chata eina ypâ aw, ei hrona Khazohpa lâta thlahchhâna chata.
9 Ei Khazohpa, ei lôpanô hnohna chata: “Khazia eina my chi? Khazia khakhaipa pasai pa-ina vâta pachârôhpa ta ei khie ngâ tly?” ei tah aw.
10 Ei rupa liata zaozi ypa hawhta, na dyuhtuhpa zy chata eina reipachhie tyh ei,
11 Khataih liata e Khazohpa cha? “khâ eina tah thlâh ha ei.” Hy ei hrona, khazia thlahzopa ta na y, khazia ei chhôh liata nâ tymâ tly? Khazohpa hnabeiseih teh; ano cha ei reithai heih aw na. Na baotuhpa nata ei Khazohpa cha.