Patlâhna thlahchhâna
Hla chhihthatuhpa châta: Davi Reithaina Hla.
1 Sipasapazy a pachâtuhpa cha a nohhlao na! Nôpona noh liana cha ABEIPA ta ano cha a pachha aw;
2 ABEIPA ta ano cha vaih aw ta, a pahro aw; alei liata ano cha nohhlao ama tah aw; a khakhaipazy khona hawhta pie tlôh leipa chi ta.
3 ABEIPA ta a rietheina rakhô liana chata tha patlô ta; a tlâh lei nota a chieh leina zydua na patlâh tyh.
4 Kei chata, “Hy ABEIPA, zawh nâ ngiah la; na chôta molei ha na ta, na patlâh mah y!” tah na ta.
5 Ei khakhaipa zy chata na reipachhiepa ta ei kyh he hawhta reih ei ta: “Khatita ma thi aw ta, a moh a lei aw tly?” tahpa ta.
6 Ama hryta pakha ta eina vaw hmô nahta, bie thuthâ leipa sai a reih, pathipalôh liata moleina lapakhy ta; a pua pata nahta a pathâhsa tyh.
7 Nâ haotuhpa zydua ta ei kyh cha bieparu ta reih ei ta; ei chhie nawpa ama pachhi pachâ tyh.
8 “Pasa chichhih ngaitapa ta patu ha ta; a ziana tawhtapa thyu thei khao aw vei,” ama tah.
9 Ei viasa lôhkhypa, ei ngâ ngaitapa, viahchhâ ei nie lâhpa chata a phei ngavâh hmaothy ta thata na chapie ta.
10 Châhrasala hy ABEIPA, nâ ta zawh na ngiah la, âmo viari ei thô thei nawpa ta na pathyu heih mah y!
11 He liana heta ei chôta nâ ly tahpa ei pahno, ei khakhaipa chata eina pahnie tyh leipa liana heta.
12 Kei la palôhrupa phapa ei phaohna kyh liana heta nâ ta khâ na patu chi ta, na hmiakô lâna cha chhâzaw ta eina soh chi.
13 ABEIPA, Izarel Khazohpa cha, chhâzaw tawhta chhâzaw taih reithaipa ta y mawh sy! Amen nata Amen.