Moleipa zy duahmo dadiena
Davi Reilhaina Hla.
1 Hmoparaopa zy vâta na pachâ a parôh kha la, moleina a taotuhpazy cha uava hra khâ!
2 Sibiepa hawhta thlai chhawh pathlapa ta y aw ei ta, âhnalasi hrohpa hawhta thlai ama uah aw.
3 ABEIPA cha ngâ la, hmopha tao teh; he râh liana heta y la, ngâchhihna zi lymâ teh.
4 ABEIPA chô liana cha aly teh, chatanachata na palôh khona zy cha a cha pie aw.
5 Na yzie awpa cha ABEIPA liata pahnieh la; ano ngâ la, ano ta a tao aw.
6 Na siana zie cha khaihna hawhta a papua aw; na thai châna chhao nohchhô hawhta a châ aw.
7 ABEIPA liana cha a pahâ la, ano cha hâ hualua teh; a yzie vâhneina vâta nâmasasyh ta palôh a pachhie khâ, chyhsa chôta moleina pi a patlohsatuhpa vâna chata!
8 Hiehâhpa he bâhsai la, nôchhie he roh teh! Pachâ a parôh leipa la; moleina tlâ a tlôkhei tyh.
9 Hmoparaopa cha pahleipadiapa ama châ aw; ABEIPA a hâtuhpa zy deikua chata râh he ama pahrâ aw.
10 Bohpi leipa tawhta, hmoparaopa zy cha y khao aw veih ei; a yna su cha a phapa ta moh hra la, y khao aw vei.
11 A reisipazy deikua chata râh he ama pahrâ aw, aryh ngaitana liata amâ ly aw.
12 Hmoparaopa chata chyhsa siapa chalei ta, a chôta a hâh a charieh thlu;
13 ABEIPA chata hmoparaopa zy cha pahneisao ta, a noh a vaw tlô awpa cha a pahnopa vâta.
14 Sipasapa zy nata dyhchhiepa zy papao awpa nata yzie dopa zy thie awpa ta, hmoparaopa zy chata zaozi phia ei ta, ama libaw a kei hra ei ta;
15 ama zaozi chata ama pathipalôh chhô aw ta, ama libaw chhao cha thliepa ta a y hra aw.
16 Chyhsa siapa hmo a chyhta hneipa cha, hmoparaopa a hnei thlupa hlâta a pha via.
17 Hmoparaopa bâhzy cha thliepa ta y aw ta; chyhsa siapa deikua ABEIPA ta a patu thlâh ha tyh.
18 ABEIPA chata chyhsa siapakipa nohzy cha pahno ta, ama ryutona chhao chhâzaw ta a y thlâh ha aw;
19 daihti pha leipa liata maophyuh leipa aw ei ta, chakâh kôzy chhaota ama hnei thlu thlâh ha aw.
20 Hmoparaopazy deikua cha leidia aw ei ta; ABEIPA khakhaipa zy chhao sibie panyupa hawhta ama châ aw, leidia aw ei ta, meikhuh hawhta ama pai aw.
21 Hmoparaopa chata dyuchei ta, thô heih khao vei, chyhsa siapa deikua cha a ria pha ta, tlao a pie tyh;
22 ABEIPA byhnâ a totuhpa zy cha râh cha pahrâ aw ei ta, chhiena a topazy deikua cha chhawh pathlahpa ama châ aw.
23 Chyhsa phei chakâna cha ABEIPA pa-ipa châ ta, a lâpi kyh liana cha â ly tyh;
24 pao hra sala, pao pathla aw vei, ABEIPA ta a ku ta patu thlâh ha tlôh ta.
25 Hawti vaw cha nahta, atahma la ei machâ haw; chyhsa siapa pathluapa ta a ypa hmô beih leipa na ta, a pathlazy kudaopa hmô hra va na.
26 Chyhsa khâ ngiachhie ta, a pahlie tyh ei, a pathlazy cha byhnâ ama to tyh.
27 Moleina siesai la, hmopha tao teh; chatanachata chhâzaw ta na pahrâ aw.
28 ABEIPA cha pachiana siapa khoh ta; a mopathaipa zy cha siesai beih aw vei. Chhâzaw châta hrôhbiepa ta y ei ta, hmoparaopa pathlazy deikua cha pahleipadiapa ama châ aw.
29 A siapazy deikua chata râh cha to ei ta, a chô liata chhâzaw ama pahrâ aw.
30 Chyhsa siapa pakah chata sona bie reih ta, a paleih chhaota siana a reih tyh.
31 A Khazohpa ryhpa cha a pathipalôh liata y ta; a phei chakâna rai a haih aw vei.
32 Hmoparaopa chata a siapa a byh tyh ta, thie awpa ta a tlua tyh.
33 ABEIPA ta ano ku liata siesai leipa aw ta, ryurei tina chata thai lei pachâsa pasaih aw vei.
34 ABEIPA cha hâ la, a lâthlôh cha a chhih teh, chatanachata râh he pahrâ awpa ta a cha palyupalih aw; hmoparaopa zy pahleipadiapa ta ama ypa cha na hmô aw.
35 Hmoparaopa cha bie hnei ngaitapa ta a pyuna liata tho hrohpa a chhyh a thaopa buh rôpa hawhta hmô na ta.
36 Cha cha sie pakhô na ta, châhrasala vaw y khao vei; tlua hra aw sala, hmô theipa châ khao vei.
37 Seina hnei leipa chyhsa ngia la, chyhsa dopa moh teh, cha hawhpa chyhsa chhâna cha thlahlôhna a châ.
38 Hmoparaotuhpa zy deikua cha hmaohkha ta pahleipadiapa ama châ aw; hmoparaopazy chhâna awpa cha pahleipadiana a châ aw.
39 Chyhsa siapazy pachhana cha ABEIPA tawhtapa a châ; ano cha ama pachârôh nota abohna châ tlôh ta.
40 ABEIPA ta âmo cha bao ta, a pachha tyh; Hmoparaopa zy tawhtapa pachha ta a pabohsa, ano liata ama pabohsapa vâta.