Khazohpa kyhpachâna ngâchhihna
Hla chhihthatuhpa châta: ABEIPA chakaotuhpa Davi Reithaina Hla.
1 Hmoparaopa paraona cha a palôhrupa liata bie reih ta; a mohmô liata Khazohpa china rai y vei a tah.
2 Anosasyh mohmô liata a dôveipa ta a moleina cha hmôpa ta y leipa ta a hao awpa y hra vei, tahpa ta.
3 A pakah bie a puapa cha haipa nata dôveina sai châ ta; hmo pha nata sona kyh bâh ha ta.
4 A rakhô liana cha moleina pachâpady ta; hmo pha leipa lâna cha a tao raruah; moleina cha pasi vei.
5 Hy ABEIPA, na kyhpachâ zawngiahna cha avâ taihta kawh ta, na ngâchhihna cha meihdo zy khi a kaw daih.
6 Na siana cha Khazohpa tlâh zy hawhta châ ta, na pachiana zy chhao a thuh kalôpa hawhta a châ; hy ABEIPA, chyhsa nata sahroh na pabohsa tyh.
7 Hy Khazohpa, na kyhpachâ zawngiahna cha a sôh kaw dia! Na mathlaw nohpahli ry liana cha chyhsa sawzy ama pabohsa tyh.
8 Âmo cha na ochhôh hmo phapa ta lôhrâtlô ngaitapa ta y aw ei ta, nâ lyna chavâh zy liana cha dopa na pie tyh.
9 Hrona tikhaoh cha nâ liata y tlôh ta; na khaihna liana chata khaihna eima hmô aw.
10 Nâ cha pahnotuhpa zy hnohta na kyhpachâ zawngiahna cha paluahsa lymâ la, palôhrupa a dopa a phaohpa zy chôta na pachhana y hra mawh sy!
11 Apalaipa phei cha siehnao awpa ta kei lâta chakâ kha sala, hmoparaopa ku chata na to hra kha se.
12 Hao liata molei taotuhpa cha pao thlâh ha ta, chatipâpa châ ei ta, thyu thei khao veih ei.