Pasa taona tawhta abohna vâta reithaina
Davi Reithaina Hla: Abimeleka hmiakô ta hru pakhei ta, ano chata vaw papua ta, a sie haw no tahpa.
1 ABEIPA cha khati no raita ei reithai aw; ano reithaina cha ei pakah liata khâ a pua aw.
2 Ei hrona heta ABEIPA cha â palaikhei; pasa a taopazy chata pahno ei sala, aly ei se.
3 ABEIPA cha na parôhnahsa khei ula, a moh cha palyupalih khoh chyu suh vy!
4 ABEIPA cha tlua na ta, chatanachata einâ chhy haw, ei china zydua tawhtapa cha eina pachha haw.
5 Ano lâ moh la, khaih teh; na hmia cha nozapa ta y beih aw vei.
6 He chyhsa rietheipa he aw ta, ABEIPA ta â chhy haw, atymâna zydua tawhtapa cha a pachha haw.
7 Ano a chituhpa zy, ama chheipâh ta ABEIPA vâlyuhchâpa ta a ypâ tyh ei, chatawhcha a pachha tyh ei.
8 ABEIPA phazie he padi ula, hmô tua rai u! Ano liata ngâna a pahniehpa chyhsa cha a nohhlao na!
9 Hy a mopathaihpa zy saih u, A BEIPA cha chi teh u, ano chituhpa chata cha phahlana rai y aw vei:
10 Chakeibarôhneipa lochopa zy cha a phahlapa ta ama nodi tyh ta; ABEIPA a tluatuhpa zy deikua cha hmo phapa rai a phahla aw veih ei.
11 A vy ula, sawchapawzy saih u, ei bie nahthlie teh u, ABEIPA china kyh ei cha pachu aw ei.
12 Phana a hmô thei nawpa ta, hrona khohpa ta hrona pasih a khohpa chyhsa cha ahy e a châ?
13 Moleina tawhta na paleih a sohsi la, na hmao cha haipa bie rei lei awpa ta vaih teh.
14 Moleina siesai la, hmo phapa tao teh; adyhna tlua la, a chadai teh.
15 ABEIPA mo cha chyhsa siapazy chôta moh tyh ta, a nahkhao chhao ama awna lâta a pachôh.
16 ABEIPA hmia cha molei taotuhpazy adyuh ta, ama thei thlâh hana cha alei tawhta pahlei awpa ta.
17 A siapazy chata aw ei ta, ABEIPA ta thei ta, a nôpona zydua tawhtapa a pachha tyh
18 ABEIPA chata palôhkeichheipazy cha a hnia tyh ta, palôhrupa a ngiapachhipa maih cha a pachha tyh.
19 A siapazy rietheina cha hluh ta; châhrasala cha zydua tawhtapa cha ABEIPA ta a pachha tyh ei.
20 A rupa zydua a phapa ta a vao ta; miakha hmah thliepa ta y vei.
21 Hmo pha leipa ta hmoparaopa cha thie aw ta; chyhsa siapa a haotuhpazy cha thailei ama châ aw.
22 ABEIPA chata a seizy hrona cha chatlai tyh ta; ano liata ngâna a pahniehpa zy cha pakha hmahta thai lei a châpa y aw veih ei.