Ataotuhpa nata hrôbiehtuhpa reithaina
1 Hy chyhsa siapa saih u, ABEIPA liata thapha teh u! Chyhsa siapa châta la reithaipa he â ngia tlai na.
2 Tlaipi ta ABEIPA cha reithai ula, ano lâna cha aony taopa ta totâ rihrawhpa zy ta reithai teh u!
3 Ano palyupalihpa ta hla thiehpa sa ula, pyu paro ngaitapazy chhaota thai ngâsâpa ta tô teh u.
4 ABEIPA bie cha a do ta; a taopa zydua cha ngâchhi ngaitapa ta taopa châ tlôh.
5 Siana nata adona he pasô ta; aleilô he ABEIPA kyhpachâ ngiachhiena ta bie khai ta.
6 ABEIPA bie ta avâzy khi taopa châ ta, a ypa sahlao zydua chhao cha a pakah hu ta taopa châ hra ei ta.
7 Ano chata tilaipi tizy cha chhihra-ôh liata rypa hawhta soh pakhy ta; ti a thuh ngaitapa zy cha sopakhyna-o liata zy a soh tyh.
8 Aleilô a pahrâpa zydua ta ABEIPA chi ei se, khizaw liata a pahrâpa zydua ta ano chi ei se!
9 Ano chata reih ta, y thlâh ha ta; bie pie ta, a vaw i thlâh ha ta.
10 “ABEIPA ta phopizy ryhraona cha hrao leipa pachâsa ta; chyhsazy pachâna cha khâpa hmah phahnaina hnei leipa ta a tao tyh.
11 ABEIPA ryhraona cha chhâzaw ta y aw ta, a palôh liata a pachâpa zydua cha chhâ zydua ta a y thlâh ha aw.
12 ABEIPA Khazohpa a hneipa phopi cha ama nohhlao na, a ryutona châta a tlyhpa chyhsa zy cha!
13 ABEIPA chata avâ tawhta za sai ta, chyhsa saw zydua he a hmô ei.
14 alei liata a pahrâpa zydua cha, a pahrâna su tawhta a za sai,
15 ama palôh zydua tao ta, ama hmotaopa zydua a pachâ tyh.
16 Abei rai he a pheisaih sahlao hluhpa vâ deita pachhapa ta y beih veih ei; chyhsa thatlôpa he thatlô ngaitana vâta deita pachhapa châ hra veih ei.
17 Arâ he pahniena châta khâpa hmahta phahnai vei, a thatlôna vâta ahy hmahta pachha thei vei.
18 ABEIPA mo cha ano a chituhpa zy chôta khaih ta, a kyhpachâna hnabei a seihtuhpazy chô liana cha,
19 thina tawhta ama hrona pachhapa nata chakâhna liata âmo pahro awpa ta.
20 Eima hrona heta ABEIPA cha hâ thlâh ha ta; ano cha eima vyhphao nata baotuhpa a châ.
21 Ano liana cha eima palôhzy aly ta, a moh pathaihpa eima ngâpa vâta.
22 Hy ABEIPA, na zawngiahna cha eima chô liata y sala, hnabei eima cha seihpa lymâ hawhna heta.