Thina tawhta pachhana vâta alyna
Davi Reithaina Hla. Achhyna-o hlâna Hla.
1 Hy ABEIPA, ei cha palyupalih aw na, nâ ta na pathyu chi ta, nâ dyuhpazy ta ei chôta aly khao veih ei.
2 Hy ABEIPA ei Khazohpa, nâ lâta baona cha hiah na ta, nâ ta na patlâh ha tlôh chi ta.
3 Hy ABEIPA, nâ chata ei thlahpa cha Sheôl tawhta na puakhei chi ta, khaotlôpa lâta a zupa zy tawhta nata na pahro ha chi ta.
4 Hy mopathaipa saih u, ABEIPA reithaipa ta sa ula, a moh pathaihpa cha alyna bie hlâ teh u.
5 A hiehâhna cha buakha châ deita châ ta, a khokheina deikua hro chhôh châta a châ. Chana cha zâ chhôh ta y thei, my ta deikua cha thaphana tlao a vaw tlô.
6 Keima ta la ei vânoh tona liana heta, “Khâpa no hmahta a pasi aw vana,” tah na ta.
7 Hy ABEIPA, na khokheina vâta, tlâ a i ngaitapa hawhta na padua ha chi ta; na hmia na nyu hapa vâta, ei pachâ a vaw rôh.
8 Hy ABEIPA, nâ cha aw na ta; ABEIPA lâna tlai cha ngiachhiena ei hia:
9 “Ei thina liana cha khâpa a thôhna e a y aw, Khaotlôhpa lâta zu ha aw sala? Dohlei chata a cha reithai aw ma? Na bie hmeihseihpa he a pahnosa aw ma’?
10 Hy ABEIPA, na thei la, zawh nâ ngiah mah y! Hy ABEIPA, nâ cha na baotuhpa châ mah y!” tah na ta.
11 Ei mâchhiesana cha kei châta lâna lâta pachâsa chi ta; ei latho poh cha na pahluhpa chi ta, thaphana ta ei chai eina pasai ha chi,
12 ei thlahpa he a chalih thlâh ha leipa ta nâma tlao a cha reithai theina awpa ta. Hy ABEIPA, ei Khazohpa, tlyzaw ta alyna bie khâ ei cha hlâ tyh aw.