Hlazy 29
Thlihpipa liata Abeipa ao
Davi Reithaina Hla.
1 Hy hmotao thei ngaitapa sawzy saih u. ABEIPA lâna cha pie ula, ABEIPA lâna chata rôhnahna nata thatlôna pie teh u.
2 ABEIPA lâna cha a moh rôhnahna pie ula; pathaihna angiana atobipa ta ABEIPA achhy teh u.
3 ABEIPA ao cha tizy liata y ta; rôhnahna Khazohpa cha paro ngâ ta, ABEIPA cha tizy hluhpi chô liata.
4 ABEIPA ao cha hmotaothei ta, ABEIPA ao cha abeina zie ta a bie.
5 ABEIPA ao chata sidy thozy thlie ta, Lebanaw liata sidy thozy cha ABEIPA chata a thlie.
6 Lebanaw cha viahchao taw châki zôpa hawhta paysa ta, Siriô tlâhzy cha chaoliah taw hawh tlaita.
7 ABEIPA ao chata mei paleizy a pachhai tyh.
8 ABEIPA ao chata râhpathohpa chalyu ta. ABEIPA chata Kadesa râhpathohpa a chalyu.
9 ABEIPA ao chata ôaka thozy chaneichanâsa ta, râhmâhpa tho hnazy chanaoh pathla khai ta; a achhyna-o liana cha ato ta, “A rôhnah na!” ama tah.
10 ABEIPA cha tipa-ua chôta abei ta a tyu ta; ABEIPA cha tlyzaw ta beichaipa ta â tyu.
11 ABEIPA chata a chyhsazy lâta thatlôna pie aw ta! A chyhsazy cha ABEIPA ta thatlôna ta byhnâ pie mawh sy!