Abeipa cha ei khaihna nata pachhana a châ
Davi Reithaina Hla.
1 ABEIPA cha ei khaihna nata ei pachhana a châ; ahy e ei chi aw? ABEIPA cha ei hrona thatlôna a châ; ahy e ei chi aw?
2 Moleina taotuhpazy na siehnao ei ta, moh pachhiepa ta, ei chariahpa nata nâ dyuhtuhpazy ta einâ dyuh tina chata a chapiapa ta ama pao aw.
3 Zawpi sahlao ta tei nâ chhuahpa ta na siehnao hra ei sala, ei palôhrupa heta chi tiarâh aw vei; ei chôta adyuhna vaw tlô hra sala, chata chhaota khâchâ ei ngiapâ thlâh ha aw.
4 ABEIPA ota hmo miakha hiah na ta, cha cha khâ ei tlua aw; ei hro chhôh noh zydua liana heta. ABEIPA o liata ei pahrâ thei nawpa ta. ABEIPA ngiana zie hmô awpa na ta. a achhyna-o liata bie hiahri awpa ta.
5 Nôpona noh liana cha a bohna liata eina nyu aw; a poh-o ry liana chata eina nyu aw, lôpanô chô liata eina patyusa aw.
6 Atahmâ la ei khakhaipa zy na chadôpa zy chô lâta ei luh he chaluahpa ta a y aw; a poh-o liana chata atheihna aly ngaitapa ta awpa ta ei hlâ aw; ABEIPA reithaipa ta ei sa aw.
7 Hy ABEIPA, a paropa ta ei cha aw tina cha nâ thei mah y. Na ngiachhie la, nâ chhy mah y!
8 A vy la, a hmia tlua teh, “ei palôhrupa ta tah ta, “ABEIPA, na hmia ei tlua aw,” tah na ta.
9 Keima tawhta na hmia nyu kha y. Na chakaotuhpa he hiehâhpa ta pahleipadia kha y, nâ cha na bao tyhpa châ tlôh chi. Hy Khazohpa ei pachhana, na thy pathla leipa la, na siesai hra kha y!
10 Ei paw nata nô ta na siesai ei ta, châhrasala ABEIPA ta tlao einâ pyh aw.
11 Hy ABEIPA, na lâthlôh cha na pachu la; lâthlôh a raihpa liana cha nâ chhi mah y, ei khakhaipa vâna heta.
12 Nâ dyuhtuhpazy khozie hawhta taopa ta na pasai kha y; pahnotuh pakheipazy ta na thyuhnao ei ta, reikah chhiepa cha ama papua tyh.
13 A hropa râh liana heta ABEIPA phana cha hmô awpa ta angiapâ tlôh na ta!
14 ABEIPA cha hâ thlâh ha teh; thatlôpa ta y la, na palôhrupa riahpha mawh sy; ABEIPA cha hâ thlâh ha teh!