Ngâchhihna palâhâhna
Davi Reithaina Hla.
1 Hy ABEIPA, thai na pachâsa mah y, palôhrupa phapa ta y na ta, ABEIPA cha ngâ hmeihseih tlôh na ta.
2 Hy ABEIPA, na moh pasia la, na pasia mah y; ei palôhrupa nata ei pathipalôh he pasia mah y.
3 Na kyhpachâ ngiachhiena cha ei hmiakô ta y tlôh ta, nâ liata ngâchhihpa ta ei y aw.
4 Chyhsa leipazy hnohta atyuh leipa na ta, haiphiahpazy hnohta chhao a ngia aw va na;
5 Moleina taotuhpa zy py cha a hao na ta, hmoparaopa zy hnohna cha atyuh aw va na.
6 Ei kuzy he seina y lei awpa ta asi na ta, chatanachata hy ABEIPA, na maisâh cha ei chahlô aw.
7 alyna biereina hla thata sapa ta, na hmotao noâhpa zydua ei chho aw.
8 ABEIPA, na pahrâna o cha tlaichhai na ta, na rôhnahna pahrâna su chhao.
9 Ei hrona he moleipazy hryta lapa leipa la, thisaih palo hmâhpa chyhsa hryta ei hrona he pahlao kha y,
10 cha hawhpa chyhsa kuzy liana cha tah raruana y ta, ama ku chachâh lâna cha ryruna tytuna ta a bie.
11 Châhrasala kei la, palôhrupa phapa phaohpa ta ei y aw; na chatlai la, na ngiachhie mah y.
12 Ei phei he su bypa liata a duah ta; Pôhpakhyna zy su liana cha ABEIPA ei reithai aw.