Abeipa ta Zerusale a khokheipa vâta reithaina
1 ABEIPA reithai teh u! Eima Khazohpa reithai ta sapa he pha tlôh ta; cha cha aly a chhi ta, reithaipa he a ngiapa raina a châ.
2 ABEIPA chata Zerusale cha sa ta; Izarel papuapa sahlaozy cha a chhipakhy heih ta.
3 Pathipalôh eipazy cha patlâh ta, ama hmahzy cha chahry tyh ta.
4 Awhsi hluhna zie reih ta, ama moh bi chyu tyh ta.
5 Eima Beipa cha rôhnah ta, hmotaotheina lâta chhao thatlô ngaitapa châ ta; a sona chata chhâna rai hnei vei.
6 ABEIPA chata a reisipazy cha patu thlâh ha ta, hmoparaopazy cha alei liata a panawh tyh.
7 Alyna bie reipa ta ABEIPA palyupalihpa ta hla sa ula; totâ chhaota eima Khazohpa reithaipa ta sa teh u!
8 Ano chata avâ khi meihdo zy pahlisa ta, leilô chata vâsua a chhuahnoh ta, tlâhzy liana chata sibiepa papyusa tyh ta.
9 Ano chata sahroh hnohta a nie awpa a pie tyh, ra-awh taw sâh ngâpazy hnohta chhao.
10 Ano cha arâ thatlôna chô liana chata aly leipa ta, chyhsapa pheizy chô liata chhao alyna rai hnei tyh vei.
11 ABEIPA chata ano a chituhpa zy chô liana chata alyna a hnei tyh, a zawngiahna hnabeiseituhpa zy chô liana chata.
12 Hy Zerusale, ABEIPA cha reithai teh! Hy Zaio, na Khazohpa cha reithai teh!
13 Ano chata na kuh ochhizy hraina thua tlaizy pachyusa ta; na chhôh liata na saw a ypa zy cha byhnâ aw pa tlôh ta.
14 Na râhri chhôh liana chata adyhna tao ta, na pha chaipa chi ta a cha pabie tyh.
15 A biepiepa cha alei liana heta tuah ta; a bie cha a chatlie ngaitapa ta a ra tyh.
16 Dâhaw cha mietahkupa hmi hawhta pie ta; dâhaw tlapa cha buchâh tawhta ahie patla tyh.
17 A ti kuapa cha niepa tlawh dipa hawhta thy pathlah tyh ta; ano cha sina hmiakô liana chata ahy e a duah thei aw?
18 A bie tuah ta, chazy cha pazao ta; a thlih pathlisa ta, chatanachata tizy cha a vaw loh tyh.
19 A bie cha Zakaw sahlao hnohta palasa ta, a bieraopa zy nata pachiapa zy chhao cha Izarel sahlao hnohta a palasa tyh.
20 Ano chata kheih tahpa phopi chô liata hmahta cha hawhna chata tao beih vei; a pachiapazy hra cha pahno hra veih ei. ABEIPA cha reithai teh u!