Abeipa hmotao siapazy reithaina
1 ABEIPA cha reithai teh u! Ei thlahpa y, ABEIPA cha reithai teh!
2 Ei hro chhôh zydua ta ABEIPA cha reithai aw na ta; ei hro chhôh zydua ta ei Khazohpa reithaipa ta ei sa aw na.
3 Chyhsa rôhnahpa zy cha ngâ kha la, chyhsa ahyrai baona y leina cha, ngâ hra kha y.
4 A hu ta puasai ta, ano cha leilô lâta kua heih ta; cha noh liana tlai chata a pachâna zy cha a lei hra.
5 Zakaw Khazohpa baotuhpa ta a hneipa cha aly ngaitapa ta a y tyh. ABEIPA Khazohpa liata hnabeiseina a hneituhpa cha,
6 ano cha avâ zy, alei zy, tilaipi zy nata ama chhôh liata a ypa zydua ataotuhpa a châ; ano chata bie hmeihseihpa chhâzaw châta a phapa ta a vao tyh ta;
7 ano chata pasaipa-ina a taopazy châta pachia tyh ta; ano chata nodipazy lâta niepa a pie tyh. ABEIPA chata atâhpa zy cha pathlie tyh ta;
8 ABEIPA chata mochaopazy mo pavâsa tyh ta. ABEIPA chata a bôh ngâpa zy cha pathyu tyh ta; ABEIPA chata a siapazy cha ama kyh pachâ tyh ta,
9 ABEIPA chata khichhaipazy cha aphapa ta a vao tyh ta, paw a hnei leipa nata nôhmei cha patu thlâh ha tyh ta; hmoparaopazy lâpi deikua cha alie lâta a paysa tyh.
10 ABEIPA cha chhâzaw ta ryu a reih aw, hy Zaio, na Khazohpa cha chhâ zydua taihta ryu a reih aw. ABEIPA cha reithai teh u!