Hmotaopa zydua cha Abeipa palyupalihpa ta hruapa
1 ABEIPA cha reithai teh u! Avâzy tawhna khita ABEIPA cha reithai ula, chô lâna zy khita ano cha reithai teh u!
2 A vâlyuhchâpa zydua saih u, ano cha reithai ula, a zawpi zydua saih u, ano cha reithai teh u!
3 Noh nata thlâpâ saih u, ano cha reithai ula, awhsi khaihpa sahlao zydua saih u, ano cha reithai teh u!
4 Avâzy avâ saih u, ano cha reithai ula, avâ chô liata ti a ypa zy saih u, ano cha reithai hra teh u!
5 Cha sahlao chata ABEIPA moh reithai mawh sy! Ano chata bie pie ta, taopa ta vaw y haw tlôh ei ta.
6 Ano chata cha sahlao cha chhâzaw nata chhâzaw châta pa-i ta; bie a leidia lei awpa cha rao ta.
7 Alei tawhna heta nâmo drakao zy nata ti athuhpa zydua saih u,
8 mei nata pareihzy, dâhaw suapa nata ameizy saih u, a bie zyh tyhpa thlihpi zy saih u, ABEIPA cha reithai teh u!
9 Tlâh laipa nata tlâh chyhpa zydua saih u, tho a pathei khohpa zy nata sidy tho zydua saih u!
10 Lyurâhpa sa zy nata sahroh awhvapa zydua saih u, a lyhtheipa zy nata a zawpa pavaw zy saih u!
11 Alei liata abeizy nata chyhsa to saih u, abei sawzy nata alei liata pachiatuhpa zydua saih u!
12 Satlia nata laihsa saih u, pawpipa nata hawti saih u!
13 Cha sahlao chata ABEIPA moh cha reithai mawh sy, a moh deita cha pachônô sapa ta y tlôh ta; a rôhnahna chata alei nata avâ khô syulyu ta.
14 A chyhsa zy ki cha pachônôsa hra ta, mopathaihpa zydua reithaina ta, Izarel pathla a kiapâh ta chyhsa a ypa zy tlai cha. ABEIPA cha reithai teh u!