Abeipa phana nata hmotaotheina reithaina
Reithaina Hla. Davi Hla.
1 Hy Abeichaipa ei Khazohpa, ei cha palyupalih aw, na moh he chhâzaw nata chhâzaw ta ei reithai aw.
2 Noh tato ta cha reithai aw na ta, na moh chhâzaw nata chhâzaw ta ei reithai aw.
3 ABEIPA cha rôhnah ta thata reithai awpa a châ. a rôhnah zie cha laichadai khai theipa rimâ châ vei.
4 Chhâ kha châta chhâ hropa lâta na hmotaopazy cha reithai pachhuah lymâ aw ei ta, na hmotaopa rôhnah ngaitapazy cha ama pahnosa aw.
5 Nâma palyupalihna abeina zie rôhnah ngaitapa nata na hmonoâh taopazy cha ei pachâ aw.
6 Chyhsazy ta na hmotaopa rarôh y ngaitapa zy thatlôzie cha reih aw ei ta, kei chhaota na rôhnah zie cha ei pahnosa hra aw.
7 Na phana rôhnah ngaitapa ama thei thlâh hapa cha reih aw ei ta, na siana kyh he thapha ngaitapa ta hla ta ama sa aw.
8 ABEIPA cha ngiachhie theipa, thapasana ta a biepa, pathi-iana lâta nainô sôpa, zawngiahna thata a hneipa a châ.
9 ABEIPA cha ato chô liata chhao a pha na, a zawngiah thapasanazy cha a hmotaopa zydua chô liata y ta.
10 Hy ABEIPA, na hmotaopa zydua chata nâ lâta alyna bie reih aw ei ta, na mopathaihpa zy chhaota ama cha reithai aw ei!
11 Na khihnarâh rôhnah zie bie reipa ta, na hmotaotheina kyh cha ama reih hra aw,
12 Chyhsa sawzy lâta a hmotaopa rôhnah ngaitapa zy nata a khihnarâh a beina zie rôhnah ngaitapa pahnosa awpa ta.
13 Na khihnarâh cha chhâzaw khihnarâh awpa châ ta, na biehneina cha chhâ y chhôh zydua ta a y thlâh ha aw. ABEIPA cha a bie zydua liata ngâchhih ta, a hmotaopa zydua cha ngiachhiena a châ.
14 ABEIPA chata a hluahpa zydua cha patu thlâh ha tyh ta, a bôh ngâpa zydua cha a pathyu tyh.
15 Na hmotaopa zydua mo chata chahâ tyh ei ta, nâ ta a daihti ta ama niepa na pie tyh.
16 Na ku pakai chi ta, hmohrohneipa zydua hnohna cha na papaipa tyh,
17 ABEIPA cha a yzie zydua liata sia ta, a hmotaopa zydua liata ngiachhie thei ngaitapa a châ tyh.
18 ABEIPA chata a padotuhpa zydua cha a hnia tyh ta, hmeihseihpa ta ano a padotuhpa zydua cha.
19 Ano a chituhpa zy khopa cha hlaopatlohsa aw ta, ama awna ao thei aw ta, âmo cha a pachha aw.
20 ABEIPA chata ano kyh pachâtuhpa zydua cha pahlôh tyh ta, hmoparaopa deikua cha a pahleipadia khai aw.
21 Ei pakah heta ABEIPA reithaina bie a reih aw, sapa zydua chata a mo pathaihpa cha chhâzaw nata chhâzaw ta reithai mawh sy.