Izarel châta Abeipa hmotao noâhchhihpa zy (1 Tr 16: 7-22)
1 ABEIPA lâta alyna bie hlâ ula, a moh pado teh u, pho to hry liana chata a hmotaopa zy cha pahnosa teh u!
2 Ano palyupalihpa ta hla sa ula, ano reithaipa ta sa teh u, a hmonoâh taopa zydua kyh cha rei teh u!
3 A moh pathaihpa cha parôhnahsa teh u; ABEIPA a tlua tyhpa zy pathipalôh cha thapha mawh sy!
4 ABEIPA nata a thatlôna cha tlua ula, a hmia cha khâ tlua teh u!
5 Hy a chakaopa Abaraha pathla saih u, Zakaw pathla a tlypa saih u,
6 a hmonoâh taopazy a thei thlâh ha teh u, a hmonoâhpa zy nata a pakah ta pachiana zy cha.
7 Ano cha ABEIPA eima Khazohpa cha châ ta; a pachianazy cha alei chô zydua liana heta a y.
8 A biehraina cha chhâzaw ta a thei tyh ta, chhâ sâh kha taihta a bie vaw piepa cha.
9 Abaraha hnohta biehraipa nata Aisika hnohta chhiesapa cha.
10 cha tlai cha bieraopa châ ta, Zakaw liata pa-i ta. Izarel liata chhâzaw biehrai châ ta,
11 “Kana râh he ei cha pie aw na, na ryu to awpa cha,” tahpa ta.
12 Chyhsa chyhta dei ama châ nona khata, a chyhta dei cha râh liana chata khichhaipa cha bailai tlôh ei ta.
13 pho nano, nanopa lâta sie ngâ ei ta, râh nano nanopa tawhta chyhsa nanopa zy lâta,
14 ahy hmah pasaipa-i pasaih leipa ta; âmo vâta abeizy chhao ra ta,
15 “Ei sathaw thupa zy cha hria khah ula, ei hrohsopa zy lâta hmopha leipa rai tao khah u!” tahpa ta.
16 Cha râh liata a tla awpa ta chakâhna aw ta, nie awpa rai paysa leipa ta,
17 ama hmiakô lâta chyhsa tuah ta, Zawsi cha sei châta zuapa ta y ta.
18 A pheizy cha keihrai ta pasasa ei ta, thua bâlia a kypa ta y haw ta;
19 a bie a vaw tlô hlâ lei ta cha ABEIPA bie ta ano pasia tyh ta.
20 Abei chata chyhsa tuah ta, pathlie ta, papua haw ta, chyhsa to ryureituhpa tlai chata;
21 ano chhôhkhapa zy chô liata hyutuhpa ta nata a sôh zydua chô liata ryureituhpa ta tao ta,
22 abeisaw zy cha a khopa hawhta chahry awpa nata a machâ sahlao pasosa awpa ta.
23 Izarel chhao cha Izi râh liata a ngia ta; Zakaw cha Hama râh liata y thlâh ha chy ta.
24 A chyhsa zy cha thata papôhsa ta, âmo adyutuhpa hlâta tha patlô via ta.
25 Achyhsazy a hao awpa ta ama pathipalôh pakuasa ta, a chakaopa zy chô liata piepieh ngaitapa ta tao awpa ta.
26 A chakaotuhpa Mawsi cha tuah ta, a chyhsa a tlypa Arawna chhaota.
27 Âmo chata a pahnosana zy cha ama hry liata a pamosa ei ta, Hama râh liana chata hmonoâhpazy pamosa ei ta.
28 Ano chata zohna tuah ta, pazohsa haw ta; chatanachata a biezy cha ei khao leipa ei ta.
29 Ama tizy thisaih ta pachâsa ta, ama ngazy cha thie haw ta.
30 Ama lyurâh cha châchie ta bie haw ta, ama beizy chhôhpadâhpa tai chhaota.
31 Ano cha bie reih ta, chatanachata mathyupa hluh ngaitapa a vy ta, ahri chhao ama râh chhôh zydua liata a vy hra ta.
32 Ama hnohta vâsua vyuhpa ta pareih pie ta, ama râh liata mei paleih pie haw hra ta.
33 Ama krezôh zy nata ama theiku kôzy thie ta, ama râh liata thozy cha thlie haw hra ta.
34 Ano chata bie reih ta, chatanachata khawsuzy a vy ei ta, chângyu zy chhaota reitiahpa rimâ a châ leipa heta;
35 chazy chata ama râh liata chicheipa to raizy cha nie khai ei ta, ama alei theizy chhao nie khai haw hra ei ta.
36 Ama râ liata saw tuapa zydua tusao ta, ama thatlôna zydua thei hmiatua chaipa zy cha.
37 Chatanachata tâkâ nata ngôh chhaota a chhi haw ta, ama phozy hry liana chata a chi leipa pakha hmah y veih ei.
38 Ama pua nona chata Izi sahlao cha aly ei ta, âmo cha ama vaw chi hawpa vâta.
39 Ano chata a khutuhpa châta meihdo pazawhsa ta, zâ ta a khai awpa ta mei pie hra ta.
40 Hiah ei ta, chatanachata mamozy vaw patlôsa ta, avâ viahchhâ ta âmo lôhrâpatlô haw ta.
41 Lôpanô cha pahy ta, chatanachata ti vaw pua ngâ ta, su hipa zy liana chata chavah hawhna tlai heta loh haw ta.
42 A bie pathaihpa kha a thei ha tlôh ta. a chakaotuhpa Abaraha chhao kha ta.
43 Chatanachata a chyhsa zy cha thapha ngaitapa ta a chhi haw ta. a chyhsa a tlypa zy cha hla sana chô lymâ ta.
44 Pho to lyurâh zy cha âmo pie ta; âmo chata chyhsa to hria chiehpa cha to haw ei ta,
45 a bieraopa zy cha zyh theipa ta, a ryhpa zy cha a phapa ta ama vao thei nawpa ta. ABEIPA cha reithai teh u!