A hmotaopa zy Abeipa ta a hrôbie zie
1 Hy ei thlahpa, ABEIPA cha reithai teh! Hy ABEIPA, ei Khazohpa, nâ cha rôhnah ngaita chi ta! Zana nata abeina zie ta a tobi chi ta,
2 nâ chata khaihna cha poh hawhta parai chi ta, avâzy khi poh-o chô hawhta parai chi ta,
3 ano chata a chhôhpadâhpa chôpa khâpia zy cha tizy liana khita pakhâh ta, meihdo zy khi a talaili ta tao ta, thlih mathlaw chô liana zy chata charei ta,
4 a vâlyuhchâpa zy cha thlih zy ta pachâsa ta, a chakaotuhpa zy cha mei paleih ta a pachâsa tyh.
5 Leilô bônazy cha bô ta, chhâzaw ta a pasie lei nawpa ta.
6 Nâ chata leilô ti athuh ngaitapa he poh hawhta pabusa chi ta; tizy cha tlâhzy chô liata y ta.
7 Na rana vâna chata a râ syulyu ta; na tôkalôpa pyu vâna chata thlai sie syulyu haw ta.
8 Tlâhpi zy lâta kiah ta, saikao zy lâta zu ta, a châta su nâ chhuahdypa lâna chata.
9 A khô lei awpa ta râhri pakhâh chi ta, alei vao awpa ta a lai heih khao lei awpa ta.
10 Ano chata saikao zy liana chata tihnawh zy tuah ta; tlâh zy likawh liana chata loh ta.
11 chazy chata lyurâhpa sa to raizy do awpa pie tyh ta; alâ hrâhpa zy chata ama dâhphi ama papai tyh.
12 A kiahzy liana chata avâ pavaw zy ta yna hnei tyh ei ta; thobuh zy hry liana chata ama sâh tyh.
13 Ano chata a chhôhpadâhpa zy tawhna khita tlâhzy cha ti ta pasa tyh ta; alei he na hmotaopa theilâpa zy ta lôhrâtlôpa ta a y tyh.
14 Sibiepa cha sahrohzy châta papyusa tyh ta, chicheipa cha chyhsapa châta a papyusa tyh hra. alei tawhta nie awpa a papua thei nawpa ta.
15 chyhsa pathipalôh palysana kresawti chhaota, a hmia patlaona awpa ta sathaw chhaota, chyhsa pathipalôh tha patlôna viahchhâ chhaota.
16 ABEIPA thozy lôhrâtlôpa ta a y tyh. Lebanaw liata sidy tho a lohpa zy cha.
17 Cha liana chata pavaw zy ta ama bu râ tyh ei ta; vawpô deikua cha meisah thozy cha a o a châ.
18 Tlâh sâhpa zy cha sathawh châta châ ta; lôpanô zy cha kaoni châta a pabohna a châ.
19 Nâ chata thlâpâ cha daihti pahnona châta rao chi ta; noh khita a tla daihti cha a pahno tyh.
20 Nâ chata zohna tao chi ta, zâ vaw châ tyh ta, cha daihti liana chata lyurâhpa liata sa to rai zy cha ama pua tyh.
21 Chakeibarôhneipa dawpa zy chata ama sa tai awpa châta a hupa ta. Khazohpa tawhtapa ama nie awpa ama tlua tyh.
22 Noh chhi ta, sie syulyu ei ta, ama yna lôpu zy chyu liana chata a byu tyh ei ta.
23 Chyhsapa cha a raihriana lâta pua ta, zâlâ taihta a hriapasa tyh.
24 Hy ABEIPA, na hmotaona zy cha a hluh kaw dia! Sona ta na taopa sai a châ; leilô he na hneirôna ta a bie hih.
25 Hao liana hao tilaipi y ta, lai ngaitapa, kawh ngaitapa cha. hao liana haota hmo alyh theipa reih tiah lei y ta. sa chyhpa nata sa laipa zy cha.
26 Hao liana hao balyh zy a sie hao, hao liana hao ta Leviathan a y. a chhôh liata palao awpa ta na taopa cha.
27 Cha zydua chata a cha hâ chyu ei, a daihti liata ama niepa pie chyu tyh awpa ta.
28 Âmo na piepa maih, a huah tyh ei ta; na ku pakai chi ta, na phana ta rihbiepa ta ama y tyh.
29 Na hmia nyu chi ta, ama nôpo tyh ta; ama hu cha lapa chi ta, thi ei ta, ama dohlei liana chata ama kua heih tyh.
30 Na Thlahpa cha tuah chi ta, taopa ta y tyh ei ta; alei chô chhao he na tao pathi heih tyh.
31 ABEIPA rôhnahna cha chhâzaw ta y sala, ABEIPA cha a hmotaopa zy liana chata thapha mawh sy.
32 ano chata alei he moh ta, a chalyu tyh ta, tlâhzy cha hria ta, a khu tyh!
33 Ei hro chhôhta ABEIPA palyupalihpa ta hla sa aw na ta; ei hro chhôhta ei Khazohpa reithaipa ta ei sa aw.
34 Ei pachâna he ano châta a thlôh ngaitapa châ mawh sy. kei cha ABEIPA liana chata thaphapa ta ei y aw.
35 Moleipa zy cha alei tawhna heta pahleipadiapa ta y sala, hmoparaopa zy y khao khah se! Hy ei thlahpa, ABEIPA cha reithai teh! ABEIPA cha reithai teh u!