Hlazy 106
Izarel atyuna zie
1 ABEIPA cha reithai teh u! ABEIPA lâta alyna bie reih teh u, ano cha pha tlôh ta; a zawngiahna chhao chhâzaw ta y tlôh aw ta!
2 Ahy e, ABEIPA hmotao rôhnahpa zy cha reih thei ta, a reithaina zydua a pahnosa khai thei tly?
3 Pachiana kyh a phapa ta a ôtuhpazy cha ama nohhlao na, khati no rai ta a sia ngaitapa ta a taotuhpa chhao cha!
4 Hy ABEIPA, na chyhsa zy na khokheina ta nâ thei thlâh ha la; na pachhana chhaota kei lâta a vy mah y;
5 na chyhsa a tlypa zy vânohtona cha hmô theipa ta, na phopi alyna liana chata thaphapa ta ei y thei na ta, ryuto sahlao chhaota ei parôhnahsa thei na hâh ta.
6 Eima mahpaw zy chhao khata molei pi ta; hmo moleipa tao pi ta, hmo parao ngaitapa ta eima tao haw.
7 Eima mahpaw zy khata Izi râh liata na hmonoâh taopa zy kha pahno thei leipa ei ta; na zawngiahna hluh ngaitapa kha athei thlâh ha leipa ei ta, Chônôchaipa lâta tlao aty haw. Tilaipi Saihpa liana khata.
8 Chata chôna chhaota ano moh vâta âmo cha pachha haw ta, a hmotaotheina rôhnah ngaitapa cha a pahnosa thei nawpa ta.
9 Tilaipi Saihpa cha ra ta, chatanachata kua haw ta; chatanachata âmo cha râhpathohpa liata chhihthapa hawh tlaita ti athuh ngaitapa zy liana chata chhihtha haw ta.
10 Âmo a haotuhpa ku tawhtapa cha pachha ta, khakhaipa ku tawhtapa cha chatlai haw ta.
11 Tizy chata âmo adyuhtuhpa zy cha khu khai haw ta; pakha hmah a hrohpa ta a puapa y leipa ei ta.
12 Cha nona chata biezy cha a ngiapâ ei ta; reithaina hla sa ei ta.
13 Châhrasala a hmotaopa zy cha thlai my ei ta; a ryhraopa cha hâ hoh leipa ei ta.
14 Râhpathohpa liana chata hmo aohrao ngaitapa ta y ei ta, leisadi liana chata Khazohpa tlao pasia ei ta;
15 ama hmo hiapa cha pie ta, châhrasala âmo hrona liana chata zaona paysa haw ta.
16 Amâ riena bu liana chata Mawsi cha hnâchhao ei ta, ABEIPA mo pathaihpa Arawna chhaota.
17 Alei cha a â ta, Datha cha palâ ta, Abira sahlaozy cha khu khai haw ta.
18 Ama sahlao hry liana chata mei patipa ta vaw y ta; mei paleih chata hmoparaopa zy cha kâ patlô ta.
19 Hôriba liana chata viahchao taw nohthlahpa tao ei ta, a nohthlahpa leipa cha achhy haw ei ta.
20 Cha hawhna chata Khazohpa rôhnahna cha viahchao tôhpa sibiepa a bâpa deita ta pachâsa haw ei ta.
21 Khazohpa ama Pachhatuhpa Izi râh liata hmo rôhnah ngaitapa a taopa kha, ama my haw,
22 Hama râh liata hmonoâh ngaitapa zy, Tilaipi Saihpa kiah liata hmo rarôh y ngaitapa zy a taotuhpa cha.
23 Chavâta a pahleipadia pathlei aw na, tahpa ta, a hiehâhna paruasa awpa ta a chyhsa â tlypa Mawsi cha a ngiana awpa liana chata a hmiakô liana chata a duah vei chhochhi khiahta cha, a pahleipadia aw tahpa reih ta.
24 Lyurâh khochhi ngaitapa cha khâpasaw ta reih leipa ei ta, a bie cha zyh khoh leipa ei ta.
25 Ama poh-ozy liana chata tlao paphôh ei ta, ABEIPA ao cha nahthlie khoh veih ei.
26 Chavâta âmo lâna chata a ku pazawh ta, âmo sahlao cha râhpathohpa liata a pahnieh awpa nah ta.
27 ama chi pathla awpa zy cha photo hry liata tiahpa ta, râh to liata a papai na awpa ta.
28 Baal-Peôr lâna chata a bai ei ta. athihpa lâta atheihna zy cha nie haw ei ta;
29 cha hawhna chata ama hmotaopa zy ta ano cha a pathipa-iasa ei ta, hri cha ama chô liata vaw charei haw ta.
30 Cha nona chata Phineha cha a duah ta, pachia ta, hri cha papaipa ta y haw ta.
31 Cha cha a Siana ta raopa a châ. chhâzaw ta chhâ zydua taihta.
32 Meribah tizy liana chata ano cha a hie pahâh ei ta, âmo vâta Mawsi chô liata hmopha leipa tlô ta;
33 a thlahpa chô liata aty ei ta, a hmao ta a pha lei ngaitapa ta a reipa vâta.
34 ABEIPA ta âmo bie a piepa hawhta zawpi sahlaozy cha pahleipadia veih ei.
35 Pho to cha a pahlao ei ta, ama hmotaopazy cha tlao a chu ei ta.
36 Ama khazoh nohthlahpa zy chakao ei ta. chazy cha ama châta khohei vaw châ haw ta.
37 Ahripa zy lâna chata ama sawchapaw zy, ama sawchanô zy ta atheih ei ta;
38 Thisaih a thaipa ama sawchapawpa zy nata ama sawchanôzy thisaih tlai cha palo haw ei ta, cha sahlao cha Kana râh khazoh nohthlahpa zy lâta atheih ei ta; cha râh cha thisaih ta papuapa ta a y haw.
39 Cha hawhna chata ama raihria zy liata papua paleipa ta y ei ta, ama hmotaopazy liana chata sihrypa ta vaw châ haw ei ta.
40 Chavâta ABEIPA pathi cha a chyhsa zy liata ia ta, ryuto cha pasie haw ta;
41 âmo cha phopi ku liata pie ta, âmo a haotuhpa zy chata âmo chô liata ryureih haw ei ta.
42 Âmo khakhaipa zy ta pasaipa-i ei ta, ama kuzy liana chata panawhpa ta y ei ta.
43 Ei hluhpi âmo cha pachha ta. châhrasala ryhraotuhpa liana chata aty tyh ei ta, ama paraona liana chata panawhpa ta y haw ei ta.
44 Chata chôna chhaota ano ama pado nah ta ama nôpona cha pachâ ta.
45 A biehraipa cha âmo chata a theih thlâh ha ta, a zawngiahna hluh ngaitana zie lymâ hawhta a palôhrupa pakuasa haw ta.
46 Seichâna ta a chhituhpa zydua cha âmo pangia chhiesa ta.
47 Hy ABEIPA eima Khazohpa, maniah pachha la, phopi hry tawhtapa maniah a chhi pakhy mah y. na mo pathaihpa cha reithai awpa nata na reithaina palaisa awpa ta.
48 ABEIPA Izarel Khazohpa cha reithaipa ta y mawh sy. chhâzaw tawhta chhâzaw taih chhaota! Chyhsa zydua chata, Amen!” tah mawh sy! ABEIPA cha reithai teh u!