Moleipazy pahlei nawpa ta thlahchhâna
1 Hy ABEIPA, khazia lâhlapi ta nâ duah tly? Khazia nôpona noh liata nâ nyu tly?
2 Hmoparaopazy palaina vâta chyhsa sipasapazy cha thata a chadai paipa ta ama y; ama pachâpa taopa liana tlai cha âmosasyh ta a ao ei se.
3 Hmoparaopa chata a palôhrupa khona kyh liata a palai ta, khohlei khopa chyhsa chata ABEIPA cha reipachhiepa ta, mohnao ta.
4 Hmoparaopa a palaina hmia phaohpa chata ano tlua leipa aw ta; a pachâna liata, “Khazohpa rai y vei,” a tah tyh.
5 Khâpa no raita a lâpizy cha patlâh thlâh ha ta; na pachiana cha a chô lâ hmo pha leina liata a châ; ano adyuhtuhpa zydua ta ama pahneisao.
6 A palôhrupa ta, “A chalyu tiarâh va na; chhâ zydua chhôhta nôpona a tyh va na,” tah ta.
7 A pakah cha chhiesana zy, dôna zy, taolana zy ta bie ta; a paleih ryta moleina nata paraona a y.
8 Khihzy liata a byhkhâhpa ta a tyuh ta; su dâhna liata athaipa chyhsazy a thie tyh.
Khâpa hmah a tah thei leipa chyhsa cha a mo ta â byh tyh,
9 chakeibarôhneipa a lôpu tawhta a byhkhâh tyhpa hawhna heta, su dâhna liana chata a byhkhâh tyh ta; chyhsa rietheipa patu awpa ta â byh tyh, chyhsa rietheipa cha a patu pata nahta khoheih lâ â daophi tyh.
10 A paphia ta, a byu thlâh ha ta, khâpa hmah a tah thei leipa chyhsazy cha a thatlôna ta a papao tyh ei.
11 A palôhrupa ta, “Khazohpa ta a my haw, a hmia cha nyu ha ta, khâpa no hmahta hmô vei.” a tah tyh.
12 Hy ABEIPA, thyu la; hy Khazohpa, na ku chalo teh; pasa a taopazy cha my khah y.
13 Khazia hmoparaopa chata Khazohpa a reipachhie, a palôhrupa ta “A hnaw hlei va chi,” a tah tyh?
14 Hmô thlâh haw chi ta; na ku ta viarithô awpa ta, patypamâtuhpa nata rupachhôpa cha na moh thlâh haw; khâpa hmah tao leipa cha nâma liata cha pavaosa tyh ta; paw a hnei leipa zy na bao tyhpa kha.
15 Hmoparaopa nata moleina taotuhpa bâh cha thlie la; a moleina cha hmôpa a y khao leina taihta tlua mah y.
16 ABEIPA cha tlyzaw nata tlyzaw chhôhta beichaipa châ ta; phopizy cha a râh tawhta a pahleipadia aw.
17 Hy ABEIPA, a reisipa khona zie cha thei haw chi ta; ama palôhrupa cha a chhuahdy chi ta, na nah na pachôh aw,
18 paw hnei leipa nata pasataopazy pachia nawpa ta, chatanachata alei liata chyhsa a ypa chata a pachhipary khao lei nawpa ta.