Ezekiel 48
1 “Hezy he ama pho mohzy cha a châ. Maw lâ râhri tilaipi laipa tawhta Hethlô sie palâhpa ta Hama angiana saikao liata Damaska râhri lâta Hama kiapâh maw lâchhâh Hazarenô taihta nochhi nata notla ta, vyuh kha cha Dana sahlao topa châ ta.
2 Dana sahlao topa nata a ripa ta nochhi nata notla ta, vyuh kha cha Asera sahlao topa châ ta.
3 Asera sahlao topa nata a ripa ta nochhi nata notla ta vyuh kha cha Nathalai sahlao topa châ ta.
4 Nathalai sahlao topa nata a ripa ta nochhi nata notla ta, vyuh kha cha Manase sahlao topa châ ta.
5 Manase sahlao topa nata a ripa ta nochhi nata notla ta, vyuh kha cha Ephrai sahlao topa châ ta.
6 Ephrai sahlao topa nata a ripa ta nochhi nata notla ta, vyuh kha cha Rubena sahlao topa châ ta.
7 Rubena sahlao topa nata a ripa ta nochhi nata notla ta, vyuh kha cha Zudah sahlao topa châ ta.
8 “Zudah sahlao topa nata a ripa ta nochhi nata notla ta râh pahlôhpa nama hlâ awpa cha a hâ dy thy no nata sâh pangawh châ aw ta, a doh cha nochhi nata notla ta vyuh hropa hawh hra ta châ ta, a liah liata supathaihpa y awpa ta.
9 Râh pahlôhpa ABEIPA lâta nama hlâ awpa cha a doh dy thy no nata sâh pangawh, a hâ dy thy no a châ awpa a châ.
10 He liana heta theihthaipazy chata râh pathaihpa pahlôh awpa châ aw ta, maw lâta a doh dy thy no nata sâh pangawh nata notla lâta a hâ dy thy kha nata nochhi lâta a hâ dy thy kha, chho lâta a doh dy thy no nata sâh pangawh a châ awpa a châ, a liah liata ABEIPA supathaihpa a ypa ta.
11 Theihthaipa pathaisa hawpa Zadôka sawchapawpazy ei bie a vaotuhpazy châta a châ aw, chazy cha Izarel pathlazy ama viavi nota Livai chizy ama viavi hrapa hawhta a viavi leipazy kha châ ei ta.
12 Chatawhcha râh pahlôhpa pôhpalôhpa tawhta ama châta pahlôh eihpa su pathaih chaipa châ aw ta, Livai chi topa nata a ripa ta.
13 Theihthaipa topa kiapâh lymâ liana chata Livai chizy ta topa hnei aw ei ta, a doh dy thy no nata sâh pangawh, a hâ dy thy kha a châ aw, a doh zydua cha dy thy no nata sâh pangawh, a hâ dy thy no a châ aw.
14 Ama zuah awpa châ leipa ta amâ ri awpa châ hra vei; a râh phapa chhao mo hropa hnohta pie awpa châ vei, ABEIPA châta pathaipa châ tlôh ta.
15 “A hâ dy thy no nata sâh pangawh tho ta dy sâh pangawh cha vâtlâh topa khihpi paduana awpa, pahrâna o awpa zy nata a chheipâhzy châta a châ aw, khihpi cha a liah liata a y aw;
16 chatawhcha a thlienazie cha he hawhna heta a châ aw: a maw lâchhâh dy sâh palih nata za pangawh, a chhôh lâchhâh dy sâh palih nata za pangawh, a nochhi lâchhâh dy sâh palih nata za pangawh, a notla lâchhâh dy sâh palih nata za pangawh.
17 Chatawhcha khihpi chata diasua hnei aw ta, maw lâchhâh dy za no nata sypangawh, chho lâchhâh dy za no nata sypangawh nochhi lâchhâh dy za no nata sypangawh, notla lâchhâh dy za no nata sypangawh.
18 A doh lâ a laibâhpa râh pahlôhpa pathaisa hawpazy kiapâh liatahpa cha nochhi lâta dy thy kha, notla lâta dy thy kha a châ aw. Râh pahlôhpa pathaisa hawpa kiapâh lymâ ta a châ awpa a châ. Cha liata hmo a puapazy cha khihpi liata raihriatuhpazy nie awpa a châ aw.
19 Chatawhcha khihpi liata raihriatuhpa Izarel pho zydua liatahpazy châta alei ama palie aw.
20 Râh pahlôhpa pôhpalôhpa cha a doh dy thy no nata sâh pangawh, a hâ dy thy no nata sâh pangawh a châ aw, râh pahlôpa pathaisa hawpa ki palihpa khihpi topa chhaota nama hlâ awpa a châ.
21 “A laibâhpa râh pahlôhpa nata pathaisa hawpa khihpi topa kâ lâ rairieh cha abeisaw topa châ aw ta. Nochhi lâchhâh ta râh pahlôhpa dy thy no nata sâh pangawh thota nata notla lâchhâh ta dy thy no nata sâh pangawh thota, râh hropazy kiapâh cha abeisaw topa a châ lymâ aw. Râh pahlôhpa pathaisa hawpa nata o pipa su pathaisapa cha a liah liata a y aw,
22 chatawhcha Livai chi topa nata khihpi topa cha abeisaw topazy likawh ta y aw ta. Abeisaw topa cha Zudah topa nata Benizami topa chhaota a ri aw.
23 “Pho a ypazy kyh liata cha: Nochhi nata notla ta vyuh kha, Benzami sahlao topa châ ta.
24 Benzami sahlao topa nata a ripa ta, nochhi nata notla ta vyuh kha, Simeôna sahlao topa châ ta.
25 Simeôna sahlao topa nata a ripa ta, nochhi nata notla ta vyuh kha, Iskara sahlao topa châ ta.
26 Iskara sahlao topa nata a ripa ta, nochhi nata notla ta vyuh kha, Zebulawna sahlao topa châ ta.
27 Zebulawna sahlao topa nata a ripa ta, nochhi nata notla ta vyuh kha, Kada sahlao topa châ ta.
28 Kada sahlao topa, chho lâchhâh râhri cha Tamar tawhta Meribahkadesa tizy taihta, Izi chavah saopa ta tilaipi laipa a tlô aw.
29 He he Izarel phozy ryuto awpa ta râh a chhaihna yzie awpa nata ama râhzy cha a châ, Abeipa KHAZOPA ta a tah.
Khihpi chhikao nata moh
30 “Hezy he khihpi tawhta puanazy cha: Maw lâchhâh dy sâh palih nata za pangawh liana chata chhikao miathôh,
31 khihpi chhikaozy cha Izarel pho moh lymâ hawhta bi awpa châ ta, maw lâta chhikaozy miathôh cha Rubena chhikao miakha, Zudah chhikao miakha, Livai chhikao miakha châ aw ta.
32 Nochhi lâchhâh dy sâh palih nata za pangawh liana chata chhikao miathôh, Zawsi chhikao miakha, Benzami chhikao miakha, Dana chhikao miakha châ aw ta.
33 Chho lâchhâh dy sâh palih nata za pangawh liana chata chhikao miathôh, Simeôna chhikao miakha, Iskara chhikao miakha, Zebulawna chhikao miakha châ aw ta.
34 Notla lâchhâh dy sâh palih nata za pangawh liana chata chhikao miathôh, Kada chhikao miakha, Asera chhikao miakha, Nathalai chhikao miakha a châ aw.
35 Padôpa ta dy thy kha nata sâh charie châ aw ta. Cha noh tawhna chata khihpi moh cha, ABEIPA yna su, tahpa a châ awpa a châ,” tah ta.