Ezekiel 37
Ru chawkaraipa saikao
1 ABEIPA ku cha ei chô liata y ta, ABEIPA Thlahpa chata nâ chhi ta, saikao liah liata na soh ta; cha saikao cha ru sai ta bie ta.
2 Chatawhcha ama hry liana chata na chhihtha ta; saikao liana chata vaw y hôlô ei ta; a chawhkaraipa sai ama châ.
3 Chatawhcha ei hnohta, “Chyhsa y, he ruzy he a hroh thei aw ma?” tah ta. Chatawhcha kei chata a chhy na ta, “Hy Abeipa KHAZOHPA y, nâma ta na pahno,” tah na ta.
4 Ano chata ei hnohta reih heih ta, “He ruzy chô liana heta bie reih la, ama hnohta, Hy nâmo ru chawhkaraipazy saih u, ABEIPA bie he nahthlie teh u.
5 He ruzy hnohna heta Abeipa KHAZOHPA chata he tana heta a tah: Pachâ teh u, nâmo liata hu pangiasa aw na ta, nama hroh aw.
6 Chatawhcha nâmo liata thari soh aw na ta, sapa ta cha pahly aw ei na ta, vo ta ei cha khu aw ei, nama chô liata hu paysa aw na ta, nama hroh aw; kei he ABEIPA cha ei châ tahpa nama pahno aw, tah mah y” tah ta.
7 Chatanachata bie eina piepa hawhna chata reih na ta; ei reih nona chata a pyu vaw y ta, paro hôlô ta, a ruzy chata âmo a pazaopalâ chyuta a pazao haw ta.
8 Chatawhcha ei vaw moh nona chata, âmo liata thari vaw y ta, sapa ta pahly ta, vo ta khu ta; hu deikua cha âmo liata y vei.
9 Chatanachata ano chata ei hnohta, ‘Thlih hnohta bie reih la, chyhsa y, reih tlai la, thlih hnohna chata Abeipa KHAZOHPA ta he tana heta a tah: Hy hu y, kaokih miapalih tawhta a vy la, he thihpazy chô liana heta ama hrona hâh ta hu so teh, tah mah y,” tah ta.
10 Chatanachata bie eina piepa hawhna chata reih na ta, hu cha âmo liata a vaw ngia ta, hroh haw ei ta, âmo phei chyuta aduah ei ta, pheisaih hri rôhnah ngaitapa vaw châ haw ei ta.
11 Chatanachata ei hnohta, “Chyhsa y, he ruzy he Izarel chhôhkha pôhpalôhpa châ ei ta. Âmo chata, ‘Eima ruzy chawhkarai khaipa ta, eima hnabeiseina a lei khai haw; chhaw pathla khaipa ta eima y haw,’ tah tyh ei ta.
12 Chavâta chhochhielie la, ama hnohta, Abeipa KHAZOHPA chata he tana heta a tah: Pachâ teh u, nama thlâzy pahy aw na ta, hy ei chyhsazy saih u, nama thlâ tawhta ei cha papua aw ei; chatawhcha Izarel râh liana chata ei cha chhihtha aw ei.
13 Chatawhcha nama thlâzy pahypa ta nama thlâ tawhta ei cha papua tina chata hy ei chyhsazy saih u, ABEIPA ei châ tahpa nama pahno aw.
14 Chatawhcha nâmo chhôh liata ei Thlahpa soh aw na ta, hroh aw eichi ta, nama râh tlai liata ei cha soh aw ei; chatawhcha kei ABEIPA heta reih haw na ta, ei tao tlai hra tahpa nama pahno aw, ABEIPA ta a tah,” tah ta.
Zudah nata Izarel a pazao pathina chhochhieliena
15 ABEIPA bie cha ei hnohta vaw tlô heih ta:
16 “Nâ, chyhsa y, masôh miakha la la, a chô liana chata, ‘Zudah nata a sahlao Izarel pathlazy,’ tahpa roh teh, masô hropa la heih la, a chô liana chata, ‘Zawsi (Ephrai masôh) nata a sahlao Izarel chhôhkha zydua,’ tahpa roh teh;
17 chatawhcha masôh miakha cha miakhapa liata pazao la, na ku liata miakha a vaw châ aw.
18 Na chyhsazy châta, ‘Hezy he khâpa tahna ma maniah pahnosa aw va chi ma?’ ama cha tah tina chata,
19 ama hnohta, Abeipa KHAZOHPA chata he tana heta a tah: Zawsi masôh Ephrai nata a sahlao Izarel phozy ku liatahpa cha la aw na ta; Zudah masôh nata pazao aw na ta, masôh miakha ta tao aw na ta, ei ku liata miakha a vaw châ aw, na tah aw.
20 Masôh chô liata na ropazy tlai kha ama mo tlai liata na ku liata a y aw;
21 ama hnohta, Abeipa KHAZOHPA chata he tana heta a tah: Pachâ teh u, Izarel pathlazy cha phopi ama kei sienazy tawhtapa a chhi aw na ta, ki to tawhta pakhy aw na ta, ama râh liana chata ei pangiasa aw;
22 cha râh Izarel tlâhzy liana chata phopi miakha tao aw na ta; abei pakha cha ama zydua bei a châ aw; phopi miano châ khao leipa aw ei ta, khihnarâh miano ta pachhaihpa châ khao hra aw vei.
23 Ama khazoh nohthlahpazy, ama hmo pasichhihpazy, ama taopasinazy ta a papuapalei khao aw veih ei; ama molei tyna ama pachâna su zydua tawhta pachha aw na ta, liahsa ei pathaisa aw; chatanachata ei chyhsazy châ aw ei ta, kei ama Khazohpa ei châ aw.
24 “Nâ chakaotuhpa Davi cha âmo chô liata abei châ aw ta; âmo zydua chô liata mietahkuvaihtuhpa pakha a y aw. Ei biepiepazy a ngiah aw ei ta, ei bieraopazy zyh aw ei ta, ama tao aw.
25 Na chakaotuhpa Zakaw hnohta râh ei piepa nama mahpawzy vaw pahrâ tyhna liana chata ama pahrâ aw; cha liana chata chhâzaw ta pahrâ aw ei ta, âmo nata ama sawzy, ama sawzy sawzy chhao; na chakaotuhpa Davi cha chhâzaw ta ama abeisaw a châ aw.
26 Âmo hnohta adyhna biehrai tao aw na ta; âmo chata chhâzaw biehrai châ aw ta; ama hnohta pie aw na ta, âmo cha papôh aw na ta, ama hry liana chata chhâzaw ta ei supathaihpa ei padua aw.
27 Ei byureizy chhao ama hnohta y aw ta; ama Khazohpa châ aw na ta, âmo cha ei chyhsazy ama châ aw.
28 Chatawhcha ama hry liata chhâzaw châta ei supathaihpa a duah tina chata, kei he ABEIPA Izarel a pathaisatuhpa ei châ tahpa phopizy chata ama pahno aw, tah mah y,” tahpa ta.