Hrohso pakheipazy thai lei pachâsana
1 ABEIPA bie cha ei hnohta vaw tlô heih ta:
2 “Chyhsa y, Izarel hrohsopazy lâta chhochhielie la, âmo pathipalôh tawhtapa a chhochhielie a hmâhpazy hnohta chhochhielie teh: ‘ABEIPA bie cha pachâ teh u!’ tahpa ta.
3 Abeipa KHAZOHPA chata he tana heta a tah: Hrohsopa hrupa, âmo thlahpa a zipa cha ama hu a pona! Khâpa hmahta hmô tlôh lei khâh ei ta.
4 Hy Izarel y, na hrohsopazy cha khih rypa sihâzy hawhta deita ama châ,
5 ABEIPA nohta adyuhna liata aduah thei awpa ta Izarel chhôhkha vaina châta pâhchhô tao leipa eichi ta, a pyupa liana chata to ngâh hra vei eichi.
6 Haipa bie nata bie doleipa reih ei ta, ABEIPA ta a tua leipa ei chhaota, ama bie cha pitloh awpa ta khâchâ ngâ tlôh ei ta, He he ABEIPA bie a châ tlaina,’ tahpa ta ama tah tyh.
7 Aluahna khâpa hrao leipa dei hmôpa ta, bie reih chhieliena a do leipa nama reipa châ vei ma? Khazohpa lâta nama haipa châ vei ma? Nama reina maihta, ‘ABEIPA ta a tah,’ tah tlôh eichi ta; châhrasala kei ta reih tlôh leipa na ta,” tah ta.
8 Chavâta Abeipa KHAZOHPA chata he tana heta a tah: “Khâpa hrao leipa reih eichi ta, haipa nama hmôpa vâta pachâ teh u, ei châ dyuh ei na, Abeipa KHAZOHPA ta a tah.
9 Ei ku heta hrohsopa khâpa hrao leipa hmôtuhpazy nata haipa a chhochhielietuhpazy adyuh aw ei ta, Izarel chhôhkhazy moh rona liata ropa ta y hra aw veih ei, Izarel râh liata a ngia hra aw veih ei; chatanachata Abeipa KHAZOHPA ei châ tahpa nama pahno aw.
10 Thlahlôhna y tlôh leipa ta, Thlahlôh a chhih na,’ tahpa ta ei chyhsazy ama paviasapa vâta nata chyhsa alô pâhchhô taopa liata hlyu râhpa ama hniapa vâta;
11 hlyu râhpa a hniatuhpazy hnohna chata a tlâh thlâh ha heih aw! Avâ vaw suah aw ta, pareih laipapizy vaw tla aw ei ta, thlih ru ngaitapa ta a parao aw, tah teh;
12 chatawhcha a cho tina chata, Nama hlyu hniana cha khataih lâ a y?’ cha tah aw veih ei ma?
13 Chavâta Abeipa KHAZOHPA chata he tana heta a tah: Ei pathi-iana ta thlihpi ru ngaitapa ta ei parao khai aw; ei hiehâhna ta vâsua aw ta; ei pathi-iana pareisa ngaitapa patlô awpa ta a tla aw.
14 Chatanachata hlyu nama hniapa alô pâhchhô kha pacho aw na ta, a lei taihta cho aw ta, chatanachata a lôbôzy taih a la aw; chatawhcha cho aw ta, a pâhchhô chopa liana chata pahleipadiapa ta nama y aw; chatanachata ABEIPA cha ei châ tahpa nama pahno aw.
15 He hawhna heta alô pâhchhô chô liata nata hlyu a hniatuhpazy chô liata ei pathi-iana ei patlôsa aw; alô pâhchhô cha y khao leipa ta, a hniatuhpazy chhao y khao hra veih ei, ei cha tah aw ei.
16 cha cha Izarel hrohsopa Zerusale thâtih chhochhieliepa ta y khao leipa ta, thlahlôhna a hmôpatuhpazy tlai kha y khao veih ei, Abeipa KHAZOHPA ta a tah.
17 “Chatawhcha nâ chyhsa y, na chyhsazy sawchanôzy âmo pathipalôh ta a chhochhielietuhpazy cha a hei hnao la; âmo lâta chhochhielie teh,
18 Abeipa KHAZOHPA ta he tana heta a tah: Chanô, chyhsazy bâh liata hmo a pakysatuhpa nata chyhsa hronazy patu hawpa ta chyhsa laipa, chyhsazy luhkhuna a bituhpazy cha ama hu a po na! Ama hro nawpa ta ei chyhsazy hrona nama patu aw ma?
19 Bâli sâh a chyhta nata viahchhâ tlâ hmô nawpa ta a thi lei awpa pathi nawpa nata a hro lei awpa pahro nawpa ta nama haipa reipa ei chyhsazy ta ama zopa vâta ei chyhsazy hry liata ei moh nama papuapalei.
20 “Chavâta Abeipa KHAZOHPA chata he tana heta a tah: Pachâ teh u, chyhsa hrona patu awpa ta nama hmo pakysapazy cha ei hao, nama bâhzy tawhtapa cha a dao pachhô khai aw na ta; nama chyhsa patu awpa zy hrona cha ei pathlie khai aw, pavaw hawhta nama patu awpazy hrona tlai cha.
21 Nama luhkhunazy chhao cha hrie aw na ta, ei chyhsazy cha nama ku tawhtapa ei pachha aw, nama patu thei awpa ta nama ku liata y khao aw veih ei; chatanacha ABEIPA cha ei châ tahpa nama pahno aw.
22 Keima pachâ parôhsapa châ leipa ta chyhsa siapazy pathipalôh haipa ta nama pasasapa vâta nata hmoparaopa cha a hropa ta a nawpa ta a moleina lâpi tawhta a kua lei nawpa ta hmoparaopa kuzy cha tha patlôsa eichi ta;
23 chavâta khâpa hrao leipa bie chhochhieliepa a do leipa tlyma cha hmô khao chacheita aw veih eichi; ei chyhsazy cha nama ku tawhtapa pachha aw na ta. ABEIPA cha ei châ tahpa nama pahno aw, a tah, tahpa ta reih teh,” tah ta.