Hezekiah abeina (2Ab 18:1-3)
1 Hezekiah cha kô syno nata kô pangawh a châ no ta, abei pathao ta, Zerusale liata kô syno nata kô chaki a bei ta. A nô cha Abizah, Zekaria sawchanônô châ ta.
2 A mahpaw Davi hmotaopa maih tao hrapa ta ABEIPA mohmô liata hmo phapa tao tyh ta.
Hezekiah ta achhyna-o liata achhyna a tao heih
3 Ano chata a bei tua kô, thla khana liata ABEIPA o ochhi zy cha pahy ta, angiapa ta tao pathi ta.
4 Theihthaipa zy nata Livai mozy a ngiakhei ta, nochhi lâchhâh su kawhpa liata pahmao pakhy ta,
5 ama hnohta, “Nâmo Livai mozy saih u, ei bie he nahthlie teh u! Su pathaihpa tawhtapa a puapa zy he thy teh u.
6 Eima mahpaw zy chata hmo parao haw ei ta, ABEIPA eima Khazohpa mohmô liata hmo pha leipa tao ei ta; pathlua ei ta, ABEIPA yna cha a heisai ei ta, hnôh chhy haw ei ta.
7 Aikah ochhi zy cha khaw ei ta, meiôh zy cha pachhai ei ta, Izarel zy Khazohpa su pathaihpa liana chata rohpahâhpa zy rao leipa ei ta, raopa hlâna zy hlâ hra leipa ei ta.
8 Chavâta ABEIPA pathi-iana cha Zudah zy nata Zerusale chô liata y ta; nama mo ta nama hmôpa hawhna heta, moh chhiepa nata noâhpa châta nata pahneisao awpa ta a vaw tao haw.
9 Eima mahpaw zy cha zaozi ta panawhpa ta y ei ta; eima sawchanônô nata eima sawchapaw zy eima lahpinô zy cha chazy vâna cha sei ta y ei ta.
10 A pathi-ia ngaitana cha a pai khai nawpa ta ABEIPA Izarel zy Khazohpa lâta biehrai ei chhuah.
11 Ei nawhta saih u, pachâ leipa ta y khah u, ABEIPA châta a chakaotuhpa châ ei ta, a hmiakô liata chakao awpa nata rohpahâhpa a raotuhpa ta a châ tlyh haw ei,” tah ta.
12 Chatanachata Livai chyhsa Amasai sawchapawpa Maha zy, Kôha chyhsa Azariah sawchapawpa Zôel zy; Merari sawchapawpa zy hry liata Abdi sawchapapawpa Kisa zy, Zehalelel sawchapawpa Ida zy;
13 Elizapha sawchapawpa zy hry liatahpa Shimri nata Zeuel zy; Asapha sawchapawpa hry liatahpa Zekaria nata Mataniah zy;
14 Hema sawchapawpa zy hry liatahpa Shimei nata Zehuel, Zeduthu sawzy hry tawhta Shemai nata Uziel zy cha pua ei ta.
15 Ama unawhpa zy pakhy ei ta, a pathai ei ta, ABEIPA bieta abei bie piepa hawhta, ABEIPA o pathai awpa ta a ngia ei ta.
16 Theihthaipa zy cha pathai awpa ta ABEIPA ochhôh lâta a ngia ei ta, ABEIPA achhyna-o liata hmo puapa ama hmôpa zydua cha ABEIPA o dôhpachhôh lâta puakhei ei ta, chatawhcha Livai sahlao ta la ei ta, Kidraw chavah lâta siekhei ei ta.
17 Thla khana noh kha noh ta a thao ei ta, cha thla, noh charie noh ta ABEIPA o cha pathai ei ta, thla khana noh hrawhleicharu noh ta paloh khai ei ta.
18 Chatanachata Abei Hezekiah lâta abeipa o liata a ngia ei ta, “ABEIPA o cha eima pathai khai haw, raopa hlâna maisâh zy, cha liata hmobaoh zydua zy, viahchhâ sona tlâhkhai zy, cha liata chhaichhi zydua chhao.
19 Abei Ahaza ta a bei nota hmo parao ta, a pahleipa hmobaoh zydua chhao eima padua pathi khai haw, pathai hra pi ta; ABEIPA maisâh hmiakô liata a y,” tah ei ta.
20 Chatanachata Abei Hezekiah cha mydi ta thyu ta, khih liata molaipa sahlao zy cha aw pakhy ta, ABEIPA o lâna chata khy ei ta.
21 Râh nata su pathaihpa nata Zudah sahlao zy chata molei atheihna awpa ta viahchao tôhpa pô sari nata mietahkupa tôhpa pô sari nata mietahkupa taw pô sari nata mie tôhpa pô sari cheih ei ta. Arawna sawchapawpa theihthaipa zy cha ABEIPA maisâh liata hlâ awpa ta biepie ta.
22 Chatanachata viahchao tôhpa zy cha thie ei ta, theihthaipa zy chata thisaih cha la ei ta, maisâh cha hie ei ta; mietahkupa tôhpa zy chhao cha thie ei ta, a thisaih chata maisâh cha hie ei ta, mietahkupa taw zy chhao cha thie ei ta, a thisaih chata maisâh cha hie ei ta.
23 Chatawhcha mie tôhpa zy cha molei atheih nawpa ta abei nata zawpi sahlao kiapâh lâna chata a vaw chhi ei ta, ama chô liana chata ama ku pahnieh ei ta,
24 theihthaipa zy chata thie ei ta, ama thisaih chata Izarel chyhsa zydua chata adyhna tao nawpa ta maisâh liata molei a theihna hlâ ei ta. Izarel chyhsa zydua chata raopa hlâna nata molei atheihna tao awpa ta abeipa chata bie pie ta.
25 Davi nata abeipa hrohsopa Kada nata hrohsopa Natha bie piepa hawhta ABEIPA o liana chata Livai sahlao cha paotlâ zy, tlaipi zy, totâ zy tô awpa soh ta; biepiepa cha a hrohsopa zy hmâpa ta ABEIPA piepa châ tlôh ta.
26 Livai sahlao cha Davi taopa paropasyupa chhaota a duah ei ta, theihthaipa zy cha chiahmie chhaota.
27 Hezekiah chata maisâh liata raopa hlâna hlâ awpa ta bie pie ta. Chatawhcha raopa hlâna ama hlâ pathao nahta ABEIPA hla cha chiahmie nata Izarel beipa Davi taopa paropasyupa chhaota sa pathao hra ei ta.
28 Zawpi zy chata Khazohpa achhy ei ta, hla satuhpa zy chata hla sa ei ta, chiahmie a tôtuhpa zy chata tô ei ta; raopa hlâna hla khai hlâ lei cha cha hawhna chata tao ei ta.
29 Chatawhcha hlâna ama hlâ khai nahta abeipa nata a hnohta a ypa zydua chata abohpa ta Khazohpa achhy ei ta.
30 Abei Hezekiah nata molaipa zy chata Livai mozy cha Davi nata hrohsopa Asapha phipa reithaina hla sa awpa ta bie pie ei ta. Chatawhcha thapha ngaitapa ta reithaina hla sa ei ta, a bôh ei ta khazohpa a chhy ei ta.
31 Chatanachata Hezekiah chata, “ABEIPA châta a pathai haw eichi ta; a vaw hnia ula, ABEIPA o liata atheihna nata alyna bie reina hmo hlâpa vaw hlâ teh u,” tah ta. Zawpi zy chata atheihna zy, alyna bie reina hmohlâpa zy vaw hlâ ei ta; a khohpa maihta raopa hlâna vaw hlâ ei ta.
32 Zawpi ta raopa hlâna ama hlâpa hluhna zie cha viahchao tôhpa sysari nata mietahkupa tôhpa za kha nata mietahkupa taw za no a châ; he zydua he ABEIPA châta raopa hlâna sai a châ.
33 Pananopa hlâpa zydua cha viahchao tôhpa za charu, mietahkupa tôhpa sâh thôh a châ.
34 Anodeikua theihthaipa chyh tu ha ei ta, raopa hlâna cha a vo hlai tiah leipa ei ta; chavâta ama unawhpa zy Livai mozy ta ama mâ hlâta cha theihthaipa zy ama pathaipana taihta baokhâ ei ta; (Livai mozy cha theihthaipa sahlao hlâ hmahta a pathaisana kyh liata pa-i pacha via tlôh ei ta.)
35 Raopa hlâna zy cha hluh ngaita ta, raopa hlâna to châta adyhna hlâna thaw zy niepa hlâna châta zy chhao hluh ngaita hra ta. Cha hawhna chata ABEIPA o chakaona yzie taopathi ei ta.
36 Zawpi zy chata Khazohpa ta a chhuahnohpa hmo vâna chata Hezekiah nata chyhsa zydua cha aly ngaita ei ta; pangiasa leipa ta sôkha ta hmo a vaw ypa châ tlôh ta.