Zôel 1

Zôel 1

Khawsu ta râh a paraonazie

1 Pethuel sawchapawpa Zôel hnohta ABEIPA bie a vaw tlôpa cha:

2 Pawpipa saih u, he he thei teh u, he râh liata a pahrâpa zydua saih u, nah pachôh teh u! He he nama daihti nota nata nama mahpawzy daihti nota chhaota a y beih ma?

3 Cha cha nama sawzy chho ula,nama sawzy chata ama sawzy chho ei sala, ama saw pachhuahpazy chata chhâ hropa chho lymâ ei se.

4 Tyka nie bâhpa maih cha kuri ta nie ta; kuri ta a nie bâhpa maih cha khawthlôhraipa ta nie ta. Khawthlôhraipa ta a nie bâhpa maih cha chângyu ta nie khai ta.

5 Paripa saih u, thyu ula, cha teh u; kresawti a dohpa zydua saih u, a kresawti thlôhpa vâna chata a tlaokali teh u; nama pakah tawhtapa la hawpa châ tlôh ta.

6 Pho thatlô ngaitapa, rei tiah lei, ei râh liata vaw pua haw tlôh ei ta; ama hâh cha chakeibarôhneipa hâh hawhta châ ta, chakeibarôhneipa hâh lai ngaitapa hawhpa ama hnei hra.

7 Ei krezô parao ta, ei theiku kô hy khai ta; a siapa ta khai ta, thy pathlah ta; a chiahzy cha parâ khai ha ta.

8 Laihsa ta latho poh a saipa ta, a locho noh vahpa mâchhie a sapa hawhta thata cha ta.

9 Niepa hlâna zy, dopa hlâna zy cha ABEIPA o tawhtapa pahleipa châ ta. Theihthaipa, ABEIPA chakaotuhpazy cha ama pachâ rôh ta.

10 Lyu cha paraopa châ ta, râh cha pachârôhpa ta y ta; zâ cha paraopa châ ta; kresawti thiehpa cha kua haw ta, thaw cha hie haw ta.

11 Hy, nâmo lyu a taotuhpa saih u, pachârôhpa ta y ula; hy, nâmo krezô a mohôhtuhpa saih u, uit sâh nata bâli sâh vâta pachâ chhie teh u; lyu liata sâh hria awpa cha leidia haw tlôh ta.

12 Krezô cha uah ta, theiku kô cha rao ta. Pawmikranat thei kô zy, thiahrazy nata apple thei kô zy, lyu liata tho zydua cha uah khai haw ta; chyhsa sawzy hry liata alyna cha dia haw tlôh ta.

13 Nâmo theihthaipazy saih u, latho poh a sai ula, cha teh u;nâmo maisâh chakaotuhpazy saih u,pachâ chhie teh u.Nâmo ei Khazohpa chakaotuhpazy saih u,a vy ula, latho poh a bupa ta zâkhidei ta a zia teh u!Nama Khazohpa o tawhna chata niepa hlâna nata dopa hlâna cha pakhâpa châ tlôh ta.

14 Nie leipa daihti pathaisa ula, pakhypi pathaihpa tao ula, ABEIPA nama Khazohpa o liana chata pawpipazy nata he râh liata a pahrâpa zydua cha pakhy ula;ABEIPA cha aw teh u.

15 Cha noh cha a hu a po na! ABEIPA noh cha a hnia tlôh ta, Atotaotheipa tawhtapa leidiana hawhpa a vaw tlô aw.

16 Eima mohmô liata niepa pahleipa châ vei ma, eima thaphana nata eimâ lyna cha eima Khazohpa o tawhtapa pahleipa châ vei ma?

17 Chizy chata bâtlâh ry liana zy chata thu ta, apâhzy cha roryhrapa ta y ta; sawvâzy phiepa ta y ta, sâh cha uah ha tlôh ta.

18 Sahrohzy cha ama sôh kaw dia! Viahchao hrizy cha ama nôpo ta, sibiepa hropa su ama hnei leipa vâta; mietahkupa zawzy cha roryhrapa ta y ta.

19 Hy ABEIPA, ei cha pado. Mei chata râhpathohpa râh sibiepa su cha kâ khai ha ta, meipaleih chata lyurâhpa tho zydua cha kâ khai ha tlôh ta.

20 Lyurâhpa sazy chata cha aw sao ei ta; vatiezy a kua hapa vâta mei chata râh sibiepa su cha patlô ha tlôh ta. 

Zoel (Joel)

Bo 1	Bo 2	Bo 3

Zôel 2

Zôel 2

1 Zaio liana chata chiahmie tô ula, ei tlâh pathaihpa liana chata zikyurâna phuah teh u! He râh chhôh liatahpa zydua cha a chalyu ei se, ABEIPA noh cha vaw tlô hai ta, a hnia haw tlôh ta,

2 zohna nata ati kaluna noh, meihdo a chhohna nata zohkaluna noh! Tlâh chô liata khih pavâpa khaihpa hawhta zawpi hluh ngaitapa nata thatlô ngaitapa; cha hawhta a y beih leipa, cha hnôh lâta chhâ hluhpi taih chhaota a y beih khao lei awpa cha.

3 Ama hmialâ cha mei ta kâ patlô ta, ama hnôh lâ cha meipaleih ta a palie. Ama hmiakô liata lyurâh cha Idâh sahdô hawhta a châ, ama hnôh lâ cha râhpathohpa râh chawhkaraipa châ ta, khâpa ta hmahta chazy cha khôkhâh veih ei.

4 Amâ lânazie cha arâ a lânazie hawhta châ ta, arâ a kiahpa hawhta a râ ei ta.

5 Adyuhna talaili pyu hawhta, tlâh chô liata a zaw ngâ ei ta, sawphaoh meipaleih a duah ngâpa hawhta nata, adyuhna liata zawpi thatlô ngaitapa ama chipa hawhta.

6 Ama hmiakô liata zawpizy cha thlahzopa ta y ei ta, ama hmiazy cha hlâh khai ha ta.

7 Chyhsa thatlô ngaitapa hawhta a râ ei ta, adyuhpa hawhta pâhchhô lâta kiah ei ta. Amo dady chyuta sie ei ta, ama patlâhnazie patypamâ veih ei.

8 A chatichahnao leipa ei ta, âmo lâpi liata sie chyu ei ta; chaihraizy chatôh pathla ei ta, tlei veih ei.

9 Khihpi chô lâta a zaw ei ta, kuh chô liata a râ ei ta; o chhôh lâta zy kiah ei ta; parutuhpa hawhta opy lâta a ngia ei ta.

10 Ama hmiakô liata alei a chatho ta, avâzy a chalyu ta. Noh nata thlâpâ cha zoh ta, awhsizy ta ama khaihna nyu ei ta.

11 ABEIPA chata a pheisaih hlao hmiakô liata a ao papua ta, a riena suzy cha rôhnah kaw tlôh ta; a bie a patlôtuhpa thatlôpa châ tlôh ta. ABEIPA noh cha rôhnahpa ta a rarôh y ngaita tlôh ta; ahy e a tao thei aw?

Abeipa zawngiahna

12 ABEIPA chata, “Cha chôna chhaota, atahmâ nama pathipalôh tlokhu ta, leipa ta, chapa ta, pachârôhpa ta kei lâ a vaw heih ula;

13 nama poh châ leipa ta, nama pathipalôh hrie ula,” tah ta. ABEIPA nama Khazohpa lâna cha a heihh teh u, ano cha ngiachhiena a hnei ngaitapa nata thapasana ta a biepa, nônaipa nata nôphana a hnei thlupa, hmopha leipa tawhta a heisai tyhpa a châ.

14 ABEIPA eima Khazohpa cha a palôh a vaw tlâh thei ngyu ta, eima chicheipazy byhnâ a hluhpi pie aw ta, ano lâta niepa nata dopa hlâna zy chhao eima hlâ thei aw.

15 Zaio liana chata chiahmie tô ula; nie leipa daihti pathaisa ula; pakhypi pathaihpa tao teh u;

16 zawpi pakhy ula, Apakhypa sahlao cha pathai ula; pawpipazy, hawtizy sâhpi a ngiehpazy pakhy ula. Myuthieh hneituhpa cha a chhôhpadâhpa tawhta vaw pua sala, myuthieh chhao a chhôhpadâhpa liah liah tawhtapa vaw pua mawh sy.

17 Theihthaipa, ABEIPA chakaotuhpazy cha, aikah nata maisâh likawh liana chata cha ei sala, “Hy ABEIPA, na chyhsazy pahlôh la, na ryutozy he reipachhiepa ta ypa ta, phozy ta ama chô liata ryu ama reipa awpa ta pie khâ. ‘Ama Khazohpa cha khataih liata a y haw,’ tahpa ta, ama zawpizy hry liana chata khazia e ama tah aw?” tah mawh sy.

18 ABEIPA chata a lyurâh cha a hiatlia ta, a chyhsazy ngiachhie ta.

19 ABEIPA chata a chyhsazy hnohta, “Nahthlie ula, nama hnohta sa zy, kresawti zy, thawzy vaw tlôkhei aw na ta, chazy chata rihbiepa ta y aw eichi ta; phopizy hry liana chata reipachhiepa ta cha paysa chachei aw veih ei na.

20 “Nâmo tawhtapa maw lâ pheisaih cha pasie syulyu aw na ta, râh chawhkaraipa nata roryhrana liata ei pasiesa aw, a hmia tuapa sahlao nochhi lâ tilaipi lâta, a hnôh lâtahpa sahlao notla lâ tilaipi lâta; thu aw ei ta roh chhie ngaitapa ta a pahnâh aw, hmo thata a tao hawpa vâta, tahpa ta a chhy ta.

21 “Hy râh, chi khâ; thaphapa ta awh teh; ABEIPA chata hmo rôhnah ngaitapa zy tao haw tlôh ta!

22 Sahroh saih u, chi kha y, râhpathohpa sibiepa su kaw thao ta; tho cha pathei ta, theiku kô nata krezô zy cha pathei ngaita tlôh ta.

23 “Nâmo Zaio sawzy saih u, aly teh u, ABEIPA nama Khazohpa liana chata thapha teh u; vâsua hmiatuapa cha hmialâ tahpa hawh tlaita cha pie tlôh ei ta, nama châta avâ pasuasa ta, thla khana liata vâsua hmiatuapa nata vâsua hnôhpa cha.

24 “Siphiahzy cha sa ta bie aw ta, kresawti nata thaw cha beizy liana chata khô ngâ aw ta.

25 Nama hry liata ei pheisaih hlao a hluhpi ei tuapa, tyka zy, kuri zy, khawthlôhraipa zy, chângyu zy ama nie khai kôzy kha ei cha thô heih aw ei.

26 “A hluhpi nie aw eichi ta, nama rihbie aw ta, noâh ngaitapa ta cha pachâ tyhtuhpa ABEIPA nama Khazohpa moh cha reithai aw eichi ta. Ei chyhsazy cha maohphyu chachei aw veih ei.

27 Izarelzy hry liata ei y tahpa nata ABEIPA nama Khazohpa châ na ta, ahyhmah a hrohpa y veih ei tahpa nama pahno aw. Ei chyhsazy cha maohphyu beih aw veih ei.

Khazohpa Thlahpa hryna

28 “Cha hnôh lâna chata he tana heta châ aw ta, chyhsa zydua chô liata ei thlahpa hry aw na ta; nama sawchapawpazy, nama sawchanônôzy ta ei bie chho aw ei ta, nama pawpipazy ta mâ lâta sa aw ei ta, nama satliapazy ta aluahnazy hmô aw ei ta.

29 Cha nohzy liana chata seichapawzy, seichanôzy chô liata chhao ei thlahpa hry aw na ta.

30 “Avâ liata nata alei liata hmonoâhpazy pahmôsa aw na ta, thisaih zy, mei meikhu a duahpa zy chhaota.

31 Noh, zohna lâta a lie aw ta, thlâpâ, thisaih lâta a lie aw ta, ABEIPA noh rôhnah ngaitapa nata rarôh y ngaitapa cha a vaw tlô hlâta.

32 Chatawhcha ahyrai ABEIPA moh a padopa maih cha pachhapa ta ama y aw; ABEIPA ta a reipa hawhna khata chatlaipazy cha Zaio Tlâh liata nata Zerusale liata y tlôh aw ei ta, alaibâhpazy hry liana chata ABEIPA ta a awpazy cha ama y aw. 

Zoel (Joel)

Bo 1	Bo 2	Bo 3

Zôel 3

Zôel 3

Phopizy chôta Khazohpa pachiana

1 “Cha nohzy liata nata cha daihti liana chata Zudah nata Zerusale zy sei ta ama ypa cha ei pakua tina chata,

2 phopi zydua pakhy aw na ta, âmo cha Zehôsapha saikao lâta chhihtha aw na ta, ei râh pachhaipa ta phopizy hry liata ama papaihpa, ei chyhsazy nata ei ryuto Izarelzy châna chata âmo cha cha liana chata pachia aw na ta,

3 chatawhcha ei chyhsazy chata pachao ei ta, sihrypa mâ chata pachao ei ta, sihrypa ma châta chapaw hawti pie ei ta, kresawti ama doh thei nawpa ta, ama châta chanô hawti zuah ei ta.

4 “Hy Tyre, Sidaw nata Philistina râh zydua saih u, kei châta khâpa ma nama châ tly? Viari ma eina thô eichi? Viari eina thô khiah eichi ta la, a chatlie ngaitapa ta a parah ngaitapa ta nama viarithôna cha nama luh chô tlai liata ei chathô hra aw ei.

5 Ei tâkâri nata ei ngôh la eichi ta, ei hmopha ngaitapa khochhihpazy nama chhyna-o chhôh lâta zy cheih bao hra eichi ta.

6 Zudah sawzy nata Zerusale sawzy chhao ama râhri tawhta lâhlapi ta nama pasie thei nawpa ta, Krika sawchapawpazy lâta zuah tlôh eichi ta.

7 Nama zuana su tawhna khata pathyupa ta papua aw na ta, nama viarithôna cha nama luh chô tlai liata ei thô hra aw.

8 Nama sawchapawzy nama sawchanôzy cha Zudah sawzy ku liata ei zuah aw, âmo chata phopi lâhlapi lâta Sabia mozy lâta âmo zuah aw ei ta; ABEIPA chata reih haw tlôh ta,” tah ta.

9 He he pho hry liata phuah ula: Adyuhna a chhuahdy ula, chyhsa thatlôpazy pathyu ula. Adyuhpa chyhsa zydua a vaw hnia ei sala, a khu ei se.

10 “Nama leipaliena hmao pazaohpazy zaozi lâta daih ula, nama theilâpa kô tainazy cha a sei lâta daih teh u; chyhsa chieh leipa chhaota, “Thatlôpa ei châ,” tah mawh sy.

11 A chheipâh liata phopi zydua saih u, a parah ula, a vy ula pôhpakhy teh u. Hy ABEIPA y, cha liana chata na chyhsa thatlô ngaitapazy pasiesa teh.

12 Phopizy cha a pathyu ei sala, Zehôsapha saikao liana chata a khy ei se; cha liana chata a chheipâh liata phopi zydua chô liata pachia awpa ta ei tyuh aw.

13 Nama savâ phia ula, sâh hria a daih haw tlôh ta. A vy ula, tly teh u; kre saona khaoh cha bie ta. Beihzy cha khô ta; ama moleina cha hluh ngaita tlôh ta.

14 Zawpi hluhpi kalihpi topa ta ei padiana saikao liata y ei ta! Cha saikao liata ABEIPA pachiana noh cha a hnia haw tlôh ta.

15 Noh nata thlâpâ zy zoh ei ta, awhsizy ta ama khaihna nyu ei ta.

Zudah pachhana

16 ABEIPA cha Zaio tawhna chata a rôh ngâ aw ta, Zerusale tawhta a ao papua aw ta, avâzy nata alei a chalyu aw ei ta. Châhrasala ABEIPA chyhsazy chata a pabohna châ aw ta, Izarel pathlazy châta kuh a châ aw.

17 “Chatanachata ABEIPA nama Khazohpa ei châ tahpa nama pahno aw, ei tlâh pathaihpa Zaio liata ei pahrâ ha aw. Chatanachata Zerusale cha khihpi pathaihpa châ aw ta, khichhaipa ahy hmahta chapia khao aw veih ei.

18 “Cha noh liana chata tlâh sâhpazy chata krezô ta pahly khai aw ta, tlâhzy liana cha sahrohzy hmô ha aw eichi ta, Zudah râh vatie zydua cha tizy ta loh aw ta; ABEIPA o tawhta tikhaoh vaw palih aw ta, Shiti saikao cha ti a vaw châ aw.

19 “Zudah sawzy chô liata nôchhie ngaitapa ta taopa ta ama râh liata athaipa thisaih ama palopa vâta, Izi râh cha roryhrapa ta y aw ta, Edôma râh cha râhpathohpa râh chawhkaraipa a châ aw.

20 Zudah râh deikua cha chhâzaw ta pahrâpa ta y thlâh ha aw ta, Zerusale cha chhâ zydua taihta.

21 Ama thisaih ei pathai leipa cha pathai aw na ta, ABEIPA cha Zaio liata pahrâ thlâh ha tlôh ta,” tah ta. 

Zoel (Joel)

Bo 1	Bo 2	Bo 3