Nehemia 1

Nehemia 1

Zerusale châta Nehemia thlahchhâna

1 Hakaliah sawchapawpa Nehemia biezy cha. Kô synona Kisleva thla liata, a bei o Susa liata ei y nota,

2 ei unawhpa pakha Hanani nata Zudah râh tawhta chyhsa thokha zy a vy ei ta; Zudah sahlao seichâna tawhta a puapa a hropa zy a vy ei ta; Zudah sahlao seichâna tawhta a puapa a hropa zy thâtih nata Zerusale thâtih hiahri na ta.

3 Chatawhcha ei hnohta, “Seichâna tawhta a puapa cha râh liata a hropa ta a ypa zy cha tovyuh chhie ngaitapa nata reipachhiepa ta y ei ta; Zerusale kuh cha cho hôlô ta, ochhizy chhao mei ta a kâ haw,” tah ei ta.

4 Cha biezy cha ei thei nah ta, thlai atyuh na ta, cha na ta, noh khazie tlyma cha pachârôhpa ta y na ta, nie leipa ta y na ta, avâ Khazohpa hmiakô liata thlahchhâ na ta.

5 “Hy ABEIPA avâ Khazohpa, Khazohpa rôhnahpa nata chichhihpa, nâma kyh pachâpa ta na biepiepa a pyhtuhpa zy chô liata biehrai patlôpa ta, ngiachhiena a palâsatuhpa y;

6 Izarel pathlazy moleina, na chô liata eima moleina reipha ei cheih chhôhta na nah vaw pachôh la, na mo vaw padeih la, na chakaotuhpa thlahchhâna na lâta a chhô a zâ ta, na chakaotuhpa Izarel pathlazy chata ei hiana he, vaw nahthlie mah y, kei nata ei paw chhôhkhapa zy cha molei haw tlôh pi ta.

7 Na chô liata hmo pha lei ngaitapa tao pi ta, na chakaotuhpa Mawsi hnohta na piepa biepiepa zy, ryhpa zy, ryureina zy cha zyh khoh leipa pi ta.

8 Na chakaotuhpa Mawsi hnohta, ‘Nama parao khiahtala pho to hry liata cha papai aw ei na ta;

9 anodeikuacha kei lâ namâ heih nahta, ei biepiepa zy a pyhpa ta nama zyh khiahtala nama hry liatahpa kaoki taih chhaota topa ta y hra ula. Cha tawhtapa ei raopa su liata ei chhi heih aw,’ tahpa ta bie na piepa kha, ngiachhiepa ta a thei thlâh ha mah y.

10 He sahlao he na chakaotuhpa zy nata na chyhsa zy, na hmotaotheina rôhnah ngaitapa nata na ku thatlô ngaitapa ta na chatlaipa zy châ ei ta.

11 Hy ABEIPA y, ngiachhiepa ta na chakaotuhpa thlahchhâna nata na moh a chipa alyna zie a châpa, na chakaotuhpa zy thlahchhâna lâna heta na nah vaw pachôh mah y; atanoh heta na chakaotuhpa he hlao na patlohsa la, he chyhsa mohmô liana heta ngiachhiepa ta zawngiahna na patosa mah y,” tah na ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 2

Nehemia 2

Nehemia cha Zerusala lâ tuapa a châ

1 Kei cha abei nyu a hlâtuhpa châ tlôh na ta. Abei Artazerzia kô syno a bei kô Nisan thla liata, kresawti ama vaw pie nahta, kresawti cha la na ta, abei cha pie na ta. Cha hlâta cha a hmiakô liata pachârôhna hmia phaoh beih leipa na ta.

2 Chatawhcha abei chata ei hnohta, “Na tlâh leipa châ tlôh leipa ta kheihta zie ta e pachârôhpa hmia na phaoh tly. Hmo hropa châ aw vei, na palôhrupa lâta a pachârôhpa a châ he,” na tah ta. Chatanachata chi ngaita na ta.

3 Kei chata abei hnohta, “Beipa cha chhâzaw ta hroh mawh sy! Na pathlatuhpa zy thlâ yna khih cha roryhrâpa ta, a ochhi zy cha mei ta kâ khai ha tlôh ta, pachârôh hmia a phaoh lei thei awpa ma ei châ tly,” tah na ta.

4 Chatanachata abei chata ei hnohta, “Khâpa e na hiah khoh?” tah ta. Chatanachata avâ Khazohpa lâta thlahchhâ na ta, abei lâna chata, “Beipa a ryh atahna zie a châ nata na chakaotuhpa heta na modypa ei châ khiahtala, Zudah râh liata na pathlatuhpa zy thla yna khih lâta na pasiesa la, khih cha ei kei padua heih aw,” tah na ta.

6 Chatawhcha abei chata ei hnohta (abeinô chhao a kiapâh liata a tyuh ta), “Khachâ e hawh aw chi ta, khatita e nâ vy heih aw?” na tah ta. Chatanachata abei chata aly ngaitapa ta na pasiesa haw ta; chatawhcha keima ta daihti taih na ta.

7 Cha dei leipa ta abei hnohna chata, “Beipa a ryh a tahna zie a châ khiahtala, Chavah Haosâ lâta ryureituhpa zy hmô awpa ta Zudah râh ei tlôna taihta eina pasiesa lymâ awpa pasaih nawpa ta chazy na pie la;

8 chatawhcha abei thothi a vaihtuhpa Asapha hmô awpa ta a vaihna kuh ochhi chhaichhi châta zy, khihpi kuh châta zy, ei kei pahrâ nawpa o châta zy, tho eina pie thei nawpa ta cha na pie hra teh”, tah na ta. Chatawhcha ei Khazohpa eina khokheina lymâ hawhta abei chata na pie ta.

9 Chatanachata Chavah Haosâ liata ryureituhpa zy lâna cha kei tlô na ta, abei chazy cha pie na ta. Chatawhcha abei chata ei hnohta pheisaih hyutuhpa zy nata pheisaih arâ akiahpa zy a pasiesa hra.

10 Châhrasala Hôrô chyhsa Sanbala nata Amawna chyhsa chakaotuhpa Tobiah zy ta ama vaw thei nata, Izarel pathlazy huhiehna a pachâtuh awpa ta chyhsa amâ vy tahpa ta ama pachârôh kaw ta.

Nehemia ta zawpizy cha khih dôhna pâhchhô taopa ta a pasyu

11 Chatanachata Zerusale kei tlô nahta, noh thôh y na ta.

12 Chatawhcha zâ ta thyu na ta, keima nata mo hropa a chyhta zy chhaota, Zerusale châta ei tao awpa ei Khazohpa ta ei palôhrupa liata a sopa cha ahyhmah chho leipa na ta. Ei kiana sa dei leipa ta cha sa hropa ei hnohta a ypa y leipa ta.

13 Zâ ta saikao ochhi lâta pua na ta, Drakao tikhaorei lâ nata Hnaihny Chhikao lâta sie na ta, Zerusale kuh a chopa nata a ochhi mei ta a kâpa zy cha moh na ta.

14 Chatawhcha Tikhaorei Chhikao nata Abei Tipo taihta sie lymâ na ta; châhrasala ei kiana sa sie thei nawpa rai y leipa ta.

15 Chatanachata zâ ta chavah kaw sao na ta, kuh cha moh na ta; chatawhcha kua ha nata, Saikao Chhikao lâna chata angia na ta, cha hawhna chata a di haw na ta.

16 Ryureituhpa zy chata khataihlâ ei siepa nata khâpa ei tao tahpa chhao pahno veih ei. Zuzy, theihthaipa zy, chyhsa phapa zy, ryureituhpa zy nata mo hropa rai a hriatuh awpa rai chhao chho mâh hra leipa na ta.

17 Chatanachata ama hnota, “Eima topa a chhiezie he hmô eichi ta, Zerusale roryhrapa ta a y tahpa zy, a ochhizy mei ta a kâ tahpa zy chhao pahno eichi ta. A vy teh u, reipachhiepa eima châ khao lei nawpa ta Zerusale kuh cha sa pathi ei suh u,” tah na ta.

18 Chatawhcha ei Khazohpa eina khokheina kyh zy chho na ta, ei hnohta abei bie reipa zy chhao. Âmo chata, “Thyu ei suh u, padua tlai ei suh u,” tah ei ta. Chatanachata cha raihria phapa hria awpa ta ama ku tha a patlô ei ta.

19 Anodeikuacha Hôrô chyhsa Sanbala nata Amawna chyhsa chakaotuhpa Tôbiah nata Arabia chyhsa Kesa ta ama thei nata na pahneisao ei ta, na mohnao ei ta, “Nama hmotaopa he kheihta zie ta ma a châ, abei chô liata atyna ma a châ?” na tah ei ta.

20 Chatanachata âmo cha achhy na ta, “Avâ Khazohpa chata vânoh maniah patosa aw ta, chatanachata keimo a chakaotuhpa zy chata thyu aw pi ta, padua aw pi ta, nâmo deikua chata Zerusale liana heta tovyuh tlyma, biehneina tlyma, khâpahmah hnei aw veih eichi,” tah na ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 3

Nehemia 3

Tao pathi awpa ta raopa zy

1 Chatanachata theihthaipa Eliashi cha a unawhpa theihthaipa zy nata thyu ei ta, Mietahkupa Chhikao tao ei ta, pathaisa ei ta. A ochhizy tao ei ta, O sâhpa Zakha taihta pathaisa ei ta, Hananel O sâhpa taih châ ta.

2 A pazipa ta Zerikô mozy ta tao ei ta. Âmo a pazipa ta Imri sawchapawpa Zaku ta tao ta.

3 Nga Chhikao cha Hasenah sawchapawpa zy ta tao ei ta; a chhaichhizy soh ei ta, a ochhizy paryh ei ta, a hraina zy nata a hreipakhâhpa zy paryh ei ta.

4 Âmo a pazipa ta Hakôza saw, Uriah sawchapawpa Meremô ta tao pathi ta. Âmo a pazipa ta Meshezabel saw, Berekiah sawchapawpa Mesula ta tao pathi ta, a pazipa cha Baana Zadôka sawchapawpa ta tao pathi heih ta.

5 Âmo a pazipa ta Tekôa sahlao ta tao pathi ei ta; châhrasala ama molaipa zy chata ama hyutuhpa rai hriana liana chata a chahrao khoh veih ei.

6 Chhikao Parohpa cha Pasiah sawchapawpa Zehôiada nata Besôdei sawchapawpa Mesula ta tao pathi ei ta; a chhaichhizy soh ei ta, a ochhi paryh ei ta, a hraina zy nata a hreipakhâhpa zy paryh ei ta.

7 Âmo pazipa ta Kibia chyhsa Melatia nata Merônôthi chyhsa Zadô ta Chavah Haosâ râh avaotuhpa bie ry liata a ypa Kibia chyhsa nata Mizpah mozy chhaota tao pathi ei ta.

8 A pazipa ta ngôh a daihtuhpa hry liatahpa Harhaiah sawchapawpa Uziel ta tao pathi ta. A pazi heipa ta rohpahâhpa ataotuhpa hry liatahpa Hananiah ta tao pathi ta; Kuh Chhapa taihta Zerusale cha tao pathi ei ta.

9 Âmo a pazipa ta Zerusale bia khophie hyutuhpa Hura sawchapawpa Rephai ta tao pathi ta.

10 Âmo a pazipa ta Haruma sawchapawpa Zadaiah ta a o dady tao pathi ta; a pazipa ta Hasabnia sawchapawpa Hatata ta tao pathi ta.

11 Hari sawchapawpa Melkiah nata Pahamôaba sawchapawpa Hasahu zy chata su hropa nata meihô patina o sâhpa tao pathi ei ta.

12 A pazipa ta Zerusale bia khophie hyutuhpa Halôhe sawchapawpa Shaluma ta a sawchanô zy chhaota tao pathi ei ta.

13 Saikao Chhikao cha Hanu nata Zanôa sahlao zy ta tao pathi ei ta; a ochhizy paryh ei ta, tao ei ta, a hraina zy nata a hreipakhâhpa zy paryh ei ta, Hnaihny Chhikao taihta kuh dy sâh kha tao hra ei ta.

14 Hnaihny Chhikao deikua cha Behakere hyutuhpa Rekabi sawchapawpa Malkiah ta tao pathi ta; a ochhizy paryh ta tao ta, a hraina zy nata a hreipakhâhpa zy paryh ta.

15 Mizpah bia hyutuhpa Kôlhôzeh sawchapawpa Shaluma ta Tikhao Chhikao cha tao pathi ta; a ochhizy paryh ta tao ta, khu ta, a hraina zy nata a hreipakhâhpa zy paryh ta; chatawhcha abei sahdô kiapâh ta Shelah Tipo dôhna cha, Davi khih tawhta a chôpa hleidy taihta tao pathi hra ta.

16 A pazipa ta Azbu, Zebu bia khophie hyutuhpa sawchapawpa Nehemia chata Davi thlâ dady nata tipo pa-opa nata chyhsa riahphapa zy o taihta tao pathi ta.

17 A pazipa ta Livai sahlao ta tao pathi ei ta; Bani sawchapawpa Rehu sahlao ta; a pazipa ta Keilah bia khophie hyutuhpa Hasabiah chata ano bia mo ta tao pathi ta.

18 A pazipa ta a unawhpa zy ta tao pathi ei ta. Keilah bia khophie hyutuhpa Henada sawchapawpa Bavai sahlao ta;

19 a pazipa ta Mizpah hyutuhpa Zesua sawchapawpa Eza chata su hropa kuh Pakopa liata chariah chhaichhi sona kaw pangaina dady tao pathi ta.

20 A pazipa ta Zabai sawchapawpa Baruka chata phahnai khoh ngaitapa ta su hropa kuh Pakopa tawhta theihthaipa bei Eliashi o ochhi taihta tao pathi ta.

21 A pazipa ta Hakôza saw Uriah sawchapawpa Meremô ta su hropa. Eliashi a ochhi tawhta Eliasi o chhâna taihta tao pathi ta.

22 A pazipa ta a chheipâh liata theihthaipa sahlao ta tao pathi ei ta.

23 Amo a pazipa ta Benzami nata Hesu ta ama o dady cha tao pathi ei ta. Amo a pazipa ta Ananih saw Maasei sawchapawpa Azariah ta a o kiapâh tao pathi ta.

24 A pazipa ta Henada sawchapawpa Binui ta su hropa Azariah o tawhta kuh Pakopa a ki taihta tao pathi ta.

25 Uzai sawchapawpa Pala chata kuh Pakopa dady nata atâhna o kiapâh ta abei o a chô viapa tawhta a sei patluapa o sâhpa dady tao pathi ta. A pazipa ta Parô sawchapawpa Pedai ta tao pathi ta.

26 Achhyna-o chakaotuhpa sahlao cha nochhi lâchhâh Ti Ochhi dady taih nata o sâhpa seih patluapa taihta Ôphel liata y ei ta.

27 A pazipa ta Tekô sahlao ta su hropa o sâhpa laipapi seih patluapa dady nata Ôphel kuh taihta tao pathi ei ta.

28 Ara Chhikao chôlâ cha theihthaipa sahlao ta ama o dady chyuta tao pathi ei ta.

29 Âmo a pazipa ta Ima sawchapawpa Zadôka ta a o dady ta tao pathi ta. A pazipa ta nochhi lâ chhikao a vaihtuhpa Sekaniah sawchapawpa Shemiah ta tao pathi ta.

30 A pazipa ta Shelemiah sawchapawpa Hananiah nata Zala sawchapawpa pacharuna Hanu zy chata su hropa tao pathi ei ta. A pazipa ta Berekiah sawchapawpa Mesula ta a yna dady ta tao pathi ta.

31 A pazipa ta ngôh a daihtuhpa hry liatahpa Malkiah chata Hamiphaka ochhi dady achhyna-o chakaotuhpa sahlao o nata sôhdaopa sahlao o taihta nata a ki kaw pangaina taihta tao pathi ta.

32 Chatawhcha a ki kaw pangaina nata Mietahkupa Chhikao likawh cha ngôh a daihtuhpa nata sôhdaopa zy ta tao pathi ei ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 4

Nehemia 4

Raihriatuhpa zy ta khakhaipa zy ama vaih

1 Châhrasala Sanbala ta kuh eima tao tahpa a thei nahta, a pathi-ia ta, thata a hie a pahâh ta, Zuzy pahnei sao ta.

2 Chatanachata a unawhzy nata Samari pheisaih zy hmiakô liana chata bie reih ta, “He Zu chyhsa dyutlai leipa sahlao zy heta khâpama ama tao tly? Hmozy cha ama tao pathi aw tlyma? Ama thei bao hra aw tlyma? Noh noh khata zua ama paloh thei aw mâ? Hnaihny tawhtapa alô mei ta a kâ khai hawpa zua ama padua pathi aw mâ?” tah ta.

3 A kiapâh ta Amawna chyhsa Tôbiah chata, “Vaw padua tua rai ei sa, changie hmahta vaw kiah sala ama alô kuh cha a pacho thlâh ha aw,” tah ta.

4 Hy eima Khazohpa, moh teh. Mohnaopa ta eima ypa he; maniah ama reipachhiena cha âmo luh chô lâta paliesa la, âmo chhao khataih râh liata tlyma maophyuh ngaitapa ta sei pachâsa mah y.

5 Ama hmoparaona khu leipa la, ama moleina zy cha na hmiakô tawhtapa pahlei khah y; a taotuhpa zy hmiakô liata na pathi ama cha pa-iapa he.

6 Chatanachata kuh cha tao pi ta; a sâhna lâ khophie ta kuh zydua pazao khai pi ta. Zawpi zy chata hria khona palôhrupa ama phaoh.

7 Anodeikuacha Sanbala zy, Tôbiah zy, Arabia mozy, Amawna mozy nata Asadô mozy ta Zerusale kuh cha tao pathipa a châ lymâ tahpa nata a raonazy eima pamai pathao tahpa ama thei nata, ama pathi-ia ngaita ta;

8 Zerusale cha adyuhpa ta tymâna tao awpa a chhuah ei ta.

9 Chatanachata âmo vâta eima Khazohpa lâta thlahchhâ pi ta, chhô nata zâ âmo a vaihtuhpa soh pi ta.

10 Châhrasala Zudah chata, “Raihriatuhpa zy tha chhâ ha ta, hnaihny hra hluh kaw tlôh ta; kuh cha tao thei khao aw ma pi,” tah ta.

11 Chatawhcha eima khakhaipa zy hra chata, “Ama hryta vawpa ta, thiepa ta, raihria cha eima pachhâsa hlâta cha pahno leipa aw ei ta, maniah hmô aw veih ei,” tah tlôh hra ei ta.

12 Ama kiapâh ta Zu a pahrâpa zy amâ vy tyh nona khata, su hropa liata a ypa zy ta ei hrawh tlai, “Keimo lâ nama vaw kua heih awpana a châ,” maniah vaw tah bailai ei ta.

13 Chatanachata kuh pahliepa a hnai chaina su pavâpa zy cha chhôhkha chyu ta ama zaozi zy, ama asei zy, ama libaw zy a chabâhpa ta yna su paryhsa na ta.

14 Chatawhcha mohmia pasaih na ta, thyu na ta, chyhsa phapa zy nata ryureituhpa zy nata zawpi hropa zy hnohna chata, “Âmo sahlao cha chi khah u, Abeipa rôhnah ngaitapa nata chichhi ngaitapa cha a thei thlâh hapa ta nama unawhpa zy, nama sawchapaw zy, nama sawchanô zy, nama lahpinô zy, nama ozy hrôhbie awpa ta adyuh teh u,” tah na ta.

15 Eima khakhaipa zy eima pahno tahpa nata ama hmo tao a chhuahpa cha Khazohpa ta khâpa leipa ta a tao tahpa ama thei nata kuh lâta eima raihriana chyu lâta sie khai heih pi ta.

16 Cha rakha tawhna cha eima satlia sahlao khophie zy chata raihria ei ta, a khophie zy chata asei zy, vyhphao zy, libaw zy chachôhna vyhphao zy cha a vao ei ta; ryureituhpa zy cha Zudah chhôhkhapa zydua hnôh lâta y ei ta.

17 Kuh a taotuhpa zy nata a phaotuhpa zy cha a ryh kawhpa ta a tobi ei ta, ama ku râ kha ta raihria ei ta, râ kha lâta chaihrai chaba ei ta.

18 A taotuhpa zy chata ama zaozi a vao chyu ei ta, cha chôna chata ama tao. Chiahmie a tôtuhpa cha ei kiapâh liata y ta.

19 Chatawhcha chyhsa phapa zy nata ryureituhpa nata zawpizy hmiakô liana chata, “Raihria cha hluhpa ta, kawh ngaita ta, kuh liana heta pailyupa ta a hla kaw tlôh pi ta.

20 Chiahmie pyu nama theina lâ maih liana chata cha liana chata keimo lâta a vaw râ ula. Eima Khazohpa ta maniah adyupa aw,” tah na ta.

21 Cha hawhna chata rai cha hria pi ta, a khophie chata my a pavâh hiehupa tawhta awhsi a lâna taihta aseizy cha a vao ei ta.

22 Cha hawhna hra chata cha noh lilaw chata zawpizy hnohta, “Zâ ta maniah vaipa ta, nohchhô ta raihria chata ahyrai ama chakaotuhpa zy chhaota Zerusale chhôh liata a rie khai mawh sy,” ei tah.

23 Chatanachata kei chhao, ei unawhpa zy chhao, ei satliazy chhao, vaihtuhpa na zi tyhpa zy chhao, ahyhmah ta eima chysia pahluh leipa pi ta; chaihrai a chaba chyuna chôta ti lâna cha vawh tyh pi ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 5

Nehemia 5

A pôhpa piena ryhpa pahleina

1 Chatanachata zawpi zy nata ama lahpinô zy cha ama unawhpa Zuzy chôta paphôhpa ta thata awh ei ta.

2 “Keimo sahlao he eima sawchapaw zy nata eima sawchanô zy chhaota hluh chheih ha pi ta; chatanachata niepa ta eima hroh thei nawpa ta sa achhuhrao ei suh u,” a tahpa zy y ei ta.

3 “Eima lyu zy, eima kresahdô zy, eima ozy soka ta soh tlôh pi ta, chakâhpa vâna heta sa achhuhrao ei suh u,” thokha a tahpa zy chhao y ei ta.

4 “Eima lyuzy nata eima kresadô zy soka ta sopa ta abei hnohta chhie cheih awpa sôhzy dyu chei pi ta. Eima sapa cha eima unawhpa zy sapa hawh hra ta châ ta, eima sawzy chhao ama sawzy hawh hra ta châ tlôh ei ta; châhrasala he eima sawchanôzy nata eima sawchapawzy he chakaotuhpa châta sei ta eima pangiasa dâhdei aw, eima sawchanô thokha zy chhochhi cha sei ta a ngia haw ei ta,” a tahpa zy thokha y hôlô hra ei ta.

6 Cha biezy nata ama awh pa pyu cha ei thei nahta ei pathi-ia kaw ta.

7 Ei palôhrupa ta pachâ na ta, chyhsa phapazy nata ryureituhpa zy cha adyuhpa ta ama hnohta, “Chyhsa tota nama unawhpa zy a pôhna a chadaipa ta sôh pacheisa eichi ta,” tah na ta. Chatawhcha ama thâtih pachâ awpa ta chyhsa pakhy na ta,

8 ama hnohta, “Pho hropa zy lâta zuapa eima unawhpa Zu sahlaozy cha eima theipa hawhta chatlai pi ta; nâmo ta nama unawhpa zy cha zuah namâ chhuah mâ? Keimo lâ cheingei heta zuapa ama châ ma!” tah na ta. A thlih thlâh ha ei ta, achhyna khâpahmah pahno leipa ei ta.

9 “Nama hmotaopa he pha cheita vei. Eima khakhaipa pho hropazy maniah ama reipachhina vâna heta eima Khazohpa chipa ta nama y awpa byuh vei mâ.

10 Kei nata ei unawhzy nata ei satliazy chhaota cha hawhta a pôhna hneipa ta eima sôh chyhsa dyu eima pacheisa hra mâ tâh. A pôhna hneipa ta dyu pacheisapa he pathlei ei suh u.

11 Atanoh tlai heta ama lyu zy, ama kresahdô zy, ama ôli sahdô zy ama ozy nata ama sôh nata ama sâh nata ama kresawti nata sathaw su za kha nama la tyhpa chhao cha pie khai heih teh u,” tah hra na ta.

12 Chatanachata âmo chata, “Eima pie khai heih aw, âmo liata khâpahmah a hnaw aw ma pi. Na tahpa hawhna tlai khata eima tao aw,” tah ei ta. Chatawhcha theihthaipa zy aw na ta, ama hmiakô liata cha bietaipa hawh tlaita tao cheingei awpa ta chhie pasasa na ta.

13 Ei poh ei saipa cha chatho na ta, “He bietaipa a tao leipa maih he Khazohpa ta a o tawhta nata a raihria tawhta he hawhna heta chatho pathla mawh sy,” tah na ta. Chatawhcha ahmaohpakhypa zydua chata, “Amen”, tah ei ta, ABEIPA reithai ei ta. Chatawhcha zawpizy chata cha bietai hawhna chata tao ei ta.

14 Cha leipa chhao cha Zudah râh liata âmo a vaotuhpa chata raopa ei cha rakha tawhta, Abei Artazerzia kô syno abei kô tawhta kô sythôh nata kô no abei kô taihta, kô hrawhleino chhôhta, kei nata ei unawhzy heta râh avaotuhpa tovyuh” viahchhâ rai nie leipa pi ta.

15 Cha hlâta râh avaotuhpa ei hmia lâta a vaw ypa zy cha chyhsa zy rie patheisa kaw ei ta, tâkâ sekel sypalih rei leipa ta ama viahchhâ zy nata kresawti lapa tyh ei ta. Cha tho ta ama chakaotuhpa zy cha chyhsa zy chô liata a pabeisa kaw ei ta. Châhrasala kei la Khazohpa china vâta cha hawhna chata tao va na.

16 He kuh raihriapa heta y thlâh ha na ta, lyurâh rai chalei leipa na ta; ei satlia sahlao zydua chhao rai cha hriapa ta cha liana chata ama y thlâh ha hra.

17 Cha dei chhao cha leipa ta, eima chheipâh liata pho hropazy hry tawhtapa avypa rei leipa ta, Zuzy nata ryureituhpa zy hryta ei tlâhkhai a dôhpa chyhsa za kha nata sypangawh ama y thlâh haw.

18 Chatawhcha noh kha châta ama chhuahdypa cha viahchao tôhpa pô kha nata mietahkupa pô charu, a phapa sai châ ta; awh zy chhao ei châta a chhuahdy ei ta, noh hrawh padai lymâ ta kresawti chi nanopa a hluhpi chhao; cha hawhna chata a chhuahdy hrasala he chyhsa zy pasa taopa he a pasa ngaitapa vâta râh avaotuhpa tovyuh viahchhâ cha ei hnaw leipa rai a châ.

19 Hy ei Khazohpa y he chyhsa zy châta ei hmotaopa zydua he ei pha nawpa ta a thei thlâh ha mah y. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 6

Nehemia 6

Khakhaipa zy byhkhâhna

1 Chatawhcha Sanbala nata Tôbiah nata Arabia chyhsa Kese nata eima khakhaipa hropa raizy ta kuhzy tao nata a pyupa rai y khao vei tahpa ama thei nahta, (anodeikuacha cha nona chata chhikao liana chata ochhizy paryh mâh leipa na ta),

2 Sanbala nata Kesa chata, ”Avy la, Ônô bypi liata khih miakha liata eimâ tyh pakhy aw,” tahpa ta bie na vaw paphao ei ta. Châhrasala ei chôta hmo pha leipa tao amâ chhuahpa châ ta.

3 Chatawhcha kei ta ama hnohta, “Raihria rôhnah ngaitapa tao na ta, a zu thei va na. Khazia nâmo lâta ei zu sai chhôhta raihria cha a chalih aw,” tahpa ta chyhsa tuah na ta.

4 Cha hawhna sai chata ei palih bie na vaw paphao ei ta, cha hawhna sai chata a chhy hra na ta.

5 Sanbala chata cha hawhna hra chata a ei pangawhna liana chata a chakaotuhpa cha pahy chiehpa chabapa ta kei lâta vaw tuah ta.

6 Cha liana chata, “Nâma nata Zu sahlao chata nama palôhrupa ta aty a chhuah eichi ta; cha vâna chata kuh cha na tao tahpa kyh pho hropa zy hry liata a pathâh. Kasmu ta reih hra ta; chatawhcha ama reinazie liata nâma he abei châ awpa ta khoh chi ta.

7 ‘Zudah râh liana chata abei a y,’ tahpa ta na thâtih Zerusale liata phuah awpa ta hrohsopa chhao rao haw hra chi ta. He kyh he abei lâta thlai reih aw ei ta. Chavâta a vy la, a chhosie ei si,” tahpa ta roh ta.

8 Chatanachata a hnohta, “Na reipa hawhna rai heta khâpahmah taopa y vei, na tao chhypa a châ,” tahpa ta ano lâta chyhsa tuah na ta.

9 Ama raihria cha ama patlô thei lei nawpa ta ama kuzy cha tha pazeisapa ta a y aw,” tahpa ta chyhsa a pachhipary khohpa sai châ ei ta. Chatanachata hy Khazohpa y, ei kuzy he tha na patlôsapa mah y.

10 Cha khai tawhna chata Mehetabel saw Delaiah sawchapawpa Shemaiah atahpa o lâna chata vawh na ta, ano chata, “Khazohpa o liata achhyna-o chhôh lia tlaita eimâ tyh aw, achhyna ochhi zy khâchâ khaw ei si; nama thie awpa ta amâ vy aw, zâ ta a cha thie awpa ta amâ vy aw,” vaw tah ta.

11 Châhrasala kei chata, “Keima hawhpa he a râ awpa ma ei châ? Âmo hrona paboh awpa chhaota achhyna-o liata ahy e a ngia khoh aw? A ngia cheita aw va na,” tah na ta.

12 Chatawhcha ei vaw pahno pasia nahta, Khazohpa tuapa vaw châ tiarâh leipa ta, keima nâ dyuhpa ta cha biezy cha a vaw reipa tlao châ ta, Tôbiah nata Sanbala ta ama pahruapa vaw châ ta.

13 Chi na ta, cha hawhta taopa ta hmoparaopa ta moh pachhie nawpa ta ama hnei theipa ta eina reipachhie nawpa ta ama hruapa a châ.

14 Hy ei Khazohpa y, Tôbiah nata Sanbala he ama hmotaopa lymâ hawhna heta a thei thlâh ha mah y, hrohsonô Nôadiah nata hrohsopa hropa pachisa nâ chhuahpa zydua chhao heta.

15 Chatanachata kuh cha noh sypangawh nata noh no liata Elul thla noh syno nata noh pangawh nota palohpa châ ta.

16 Chatawhcha eima khakhaipa zydua ta cha cha ama thei nahta, eima chheipâh ta pho hropa zy ta chi ei ta, ama tovyuh chhie kawpa ta a pahno ei ta; raihria cha eima Khazohpa hriapa a châ tahpa pahno haw tlôh ei ta.

17 Cha leipa chhaota cha nona chata Zu chyhsa phapa zy chata Tôbiah cha châ hluhpi paphao tyh ei ta, chatawhcha Tôbiah châ chhao hmô tyh hra ei ta.

18 Ano cha Arah sawchapawpa Shekaniah piahpa a châpa vâta Zudah râh liata chyhsa hluhpi chhiesapa ta ano bie a paraohkheipa y ei ta; chatawhcha a sawchapawpa Zehôhana chata Berekia sawchapawpa Mesula sawchanônô cha lahpinô ta hnei ta.

19 Ei theina liata a hmotao phapa zy reih tyh ei ta, ei biereipa zy ano lâta ama tlôkhei tyh hra. Chatanachata Tôbiah chata eina pachhipary nawpa ta châzy a vaw paphao tyh. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 7

Nehemia 7

Nehemia ta Zerusale avaotuhpa zy a rao

1 Chatawhcha kuhzy taopa ta ochhizy paryh pi ta, ochhivaihtuhpa zy, hla satuhpa zy, Livai sahlaozy raopa ama châ khai nah ta,

2 ei unawhpa Hanani nata kuh hyutuhpa Hananiah cha Zerusale pavaosa na ta, chyhsa ngâchhih ngaitapa, chyhsa zydua hlâta Khazohpa a chipa châ tlôh ta.

3 Chatawhcha ama hnohta, “Zerusale kuh ochhizy he noh a sa hlâta cha pahypa châ khah se; ama vaih nona chata ochhizy khaw khaipa châ sala, khâchâ hraipa châ mawh sy. Zerusale liata a ypa zy hry liatahpa vaihtuhpa zy rao ula, chyhsa to amâ duana su chyu liata, chyhsa to âmo o dady chyu ta,” tah na ta.

4 Khih cha kawh ta, lai kaw ta; châhrasala a chyhsa a ypa zy chyhta ei ta, ozy chhao sa leipa châ tlôh ta.

Seichâna tawhta a vaw kuapa zy

5 Chatawhcha Khazohpa ta ei palôhrupa liata chyhsa phapa zy, ryureituhpa zy, zawpi zy, aw pakhy khaipa ta, ama pathlatuhpa zy lymâ hawhta rei awpa ta na pahnosa ta. Chatawhcha a hmiatuapa ta a khypa zy pathlatuhpa zy moh rona châbu cha hmô na ta, cha liana chata he hawhta ropa hmô na ta.

6 Seichâna ta a ypa Babylaw beipa Nebukaneza ta â chhipazy hry ta, seichâna tawhta a puapa Zerusale nata Zudah râh lâta ama khih chyu lâta a dipa ta cha râh liata a ypa zy cha hezy he ama châ.

7 Zerubabel zy, Zesua zy, Nehemia zy, Azariah zy, Raamiah zy, Nahamani zy, Môdekai zy, Bilsa zy, Mispere, Bikvai zy, Nehu zy, Benah zy chhao heta ama sie. Izarel sahlao hry liata vâtlâh hluhna zie cha:

8 Parô pathlazy, sâh no nata za kha nata sysari nata pano.

9 Shephatiah pathlazy, za thôh nata sysari nata pano.

10 Arah pathlazy, za charu nata sypangawh nata pano.

11 Zesua nata Zôaba pathlazy hry ta, Pahamôaba pathlazy, sâh no nata za charie nata pahrawhleicharie.

12 Elama pathlazy, sâh kha nata za no nata sypangawh nata papalih.

13 Zatu pathlazy, za charie nata sypalih nata papangawh.

14 Zakai pathlazy, za sari nata sycharu.

15 Binui pathlazy, zacharu nata sypalih nata pacharie.

16 Bebai pathlazy, za charu nata syno nata pacharie.

17 Azaka pathlazy, sâh no nata za thôh nata syno nata pano.

18 Adônika pathlazy, za charu nata sycharu nata pasari.

19 Bikvai pathlazy, sâh no nata sy charu nata pasari.

20 Adina pathlazy, za charu nata sypangawh nata papangawh.

21 Hezekiah pathla liatahpa, Atera pathlazy, sy chaki nata pacharie.

22 Hasu pathlazy, za thôh nata syno nata pacharie.

23 Bezai pathlazy, za thôh nata syno nata papalih.

24 Harifa pathlazy, za kha nata pahrawhleino.

25 Kibia pathlazy, sychaki nata papangawh.

26 Bethlehe nata Netôpha khih liatahpa, za kha nata sycharie nata pacharie.

27 Anathô khih liatahpa, za kha nata syno nata pacharie.

28 Bethamô khih liatahpa, sypalih nata pano.

29 Kiriaziari zy, Kephirah zy nata Berô khih liatahpa zy, za sari nata sypalih nata pathôh.

30 Tama nata Kaba khih liatahpa, za charu nata syno nata pakha.

31 Mikmasa khih liatahpa, za kha nata syno nata pano.

32 Bethel nata Ai khih liatahpa, za kha nata syno nata pathôh.

33 Nebô hropa liatahpa, sypangawh nata pano.

34 Elama hropa liata pathlazy, sâh kha nata za no nata sypangawh nata papalih.

35 Hari pathlazy, za thôh nata syno.

36 Zerikô pathlazy, za thôh nata sypalih nata papangawh.

37 Lôdi zy nata Ônô pathlazy, za sari nata syno nata pakha.

38 Senah pathlazy, sâh thôh nata za chaki nata sy thôh.

39 Theihthaipazy: Zesua chhôhkha hry liatahpa, Zedai pathlazy, za chaki nata sysari nata pathôh.

40 Ima pathlazy, sâh kha nata sypangawh nata pano.

41 Pashu pathlazy, sâh kha nata za no nata sypalih nata pasari.

42 Hari pathlazy, sâh kha nata pahrawhleisari.

43 Livai sahlaozy: Hôdevah pathla liatahpa, Zesua nata Kadmiel pathlazy, pahrawhleipalih.

44 Hla satuhpa zy: Asapha pathlazy, za kha nata sypalih nata pacharie.

45 Ochhivaihtuhpa zy: Shaluma pathlazy, Ata pathlazy, Talmô pathlazy, Aku pathlazy, Hati pathlazy, Shôbai pathlazy, za kha nata sythôh nata pacharie.

46 Achhyna-o chakaotuhpa sahlao: Ziha pathlazy, Hasupha pathlazy, Tabao pathlazy,

47 Kerô pathlazy, Sia pathlazy, Padô pathlazy,

48 Lebanaw pathlazy, Hakaba pathlazy, Shalmai pathlazy,

49 Hana pathlazy, Kidal pathla zy, Kaha pathlazy,

50 Reiai pathlazy, Rezi pathlazy, Nekôda pathlazy,

51 Kazama pathlazy, Uza pathlazy, Pasia pathlazy,

52 Besai pathlazy, Meuni pathlazy, Nephisesi pathlazy,

53 Bakbu pathlazy, Hakupha pathlazy, Harhu pathlazy,

54 Bazli pathlazy, Mehida pathlazy, Harsa pathlazy,

55 Barkô pathlazy, Sisera pathlazy, Tamah pathlazy,

56 Neziah pathlazy, Hatipha pathlazy.

57 Sawlawmaw chakaotuhpa zy pathla: Sôtai pathlazy, Sôphere pathlazy, Perida pathlazy,

58 Zalai pathlazy, Darkô pathlazy, Kidel pathlazy,

59 Shephatiah pathlazy, Hati pathlazy, Pôkerehazebai pathlazy, Amawna pathlazy.

60 Achhyna-o chakaotuhpa zydua nata Sawlawmaw chakaotuhpa zy pathla cha za thôh nata sychaki nata pano ama châ.

61 Telmelah zy, Telharsa zy, Keru zy, Adô zy, Ima zy tawhta a khypa zy cha he sahlao châ ei ta; châhrasala ama mahpaw zy chhôhkha zy nata ama pathla lymâ zy, Izarel mo ama châ nata châ lei a laichadai thei leipa ei ta:

62 Delaiah pathlazy, Tôbiah pathlazy, Nekôda pathlazy za charu nata sypalih nata pano.

63 Theihthaipa zy hry liatahpa: Habai pathlazy, Hakôza pathlazy, Kilia chyhsa Barzilai sawchanônô hry liatahpa lahpinô ta hnei ta, ama moh a phaohpa Barzilai pathlazy cha.

64 Cha sahlao chata ama pathlatuhpa zy lymâ hawhta reipazy hry liana chata ama moh rona tlua ei ta, châhrasala hmô leipa ei ta, chavâta pathaih leipa ta pachâpa ta y ei ta;

65 khihnarâh avaotuhpa chata âmo cha Urim nata Thumim a kypa ta theihthaipa a duah hlâ lei cha hmo ziehpa zy cha ama nie awpa châ vei tahpa chho ta.

66 Zawpi ahmaohpakhypa zydua cha thy palih nata sâh no nata za thôh nata sycharu châ ei ta,

67 ama chakaotuhpa chanô nata chapaw sâh sari nata za thôh nata sythôh nata pasari rei leipa ta; chatawhcha hla satuhpa chanô nata chapaw za no nata sypalih nata papangawh châ ei ta.

68 Ama arâ cha za sari nata sythôh nata pô charu châ ta, ama sabaitu cha za no nata sypalih nata pô pangawh châ ta,

69 ama râraoseihpa cha za palih nata sythôh nata pô pangawh châ ta, ama alâ cha sâh charu nata za sari nata syno a châ.

70 Chhôhkha pawhrâhpa thokha zy ta cha raihria châna chata hria ei ta. Râh avaotuhpa chata o sana sôh châta ngôh darik sâh kha, rahô sypangawh, theihthaipa chysia za pangawh nata sythôh thyu ta.

71 Chhôhkha pawhrâhpa thokhazy ta o sana sôh châta ngôh darik thy no nata tâkari khopathliapa sâ no nata za no thyu ei ta.

72 Chyhsa zydua piepa cha ngôh darik thy no nata tâkâri khopathliapa sâ no nata theihthaipa chysia sycharu nata zo sari a châ.

73 Chatanachata theihthaipa zy, Livai sahlao zy, ochhivaihtuhpa zy, hla satuhpa zy nata chyhsa thokha zy nata achhyna-o chakaotuhpa sahlao nata Izarel mo zydua cha ama khih chyu liata y ei ta.

Ezra ta ryhpa cha zawpi hnohta a phuah,

Chatanachata thla sarina a vaw tloh nahta, Izarel pathlazy cha ama khihzy liana chata y ei ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 8

Nehemia 8

1 Chyhsa zydua cha reikha tlapa ta Ti Ochhi dady su kawpa lialiah liana chata a pahmaoh ei ta; chârohtuhpa Ezra cha ABEIPA ta Izarel sahlaozy zyh awpa ta bie a piepa Mawsi ryhpa châbu cha a vaw chei awpa ta chho ei ta.

2 Chatawhcha thla sarina noh kha noh ta, theihthaipa Ezra chata a hmaohpakhypa sahlao paw tlohpa nata nô tlohpa a pahno thaipa rakha zydua hmiakô liana chata ryhpa cha vaw cheih ta.

3 Cha liatahpa cha Ti Ochhi dady su kawhpa liana chata nô tloh paw tlohpa nata a pahno thaipa hmiakô liana chata mydi tawhta nohchhô taihta reih ta; chatawhcha chyhsa zydua châta ryhpa bie kyh liana chata ama nah pachôh chyu ei ta.

4 Cha hawhpa châta ama taopa tho tlâhkhai liana chata Ezra cha a duah ta, a kiapâh chachâh lâna chata Matithia zy, Shema zy, Anaiah zy, Uriah zy, Hilkiah zy, Maasei zy a duah ei ta, a chavei lâna chata Pedai zy, Mishael zy, Malkizah zy, Hasu zy, Hasabadana zy, Zekaria zy, Mesula zy.

5 Chatawhcha Ezra chata chyhsa zydua mohmô liana chata châbu lohpa cha pathlâ ta, chyhsa zydua hlâta a sâhpa ta a duah ta; chatawhcha a vaw pathlâ nahta chyhsa zydua cha a duah khai ei ta.

6 ‘Chatanachata Ezra chata ABEIPA Khazohpa rôhnah ngaitapa cha reithai ta; zawpi chata ama bâh pakaipa ta, “Amen, Amen,” tahpa ta achhy ei ta; chatawhcha ama luh abôh ei ta, ama hmia alei supa ta ABEIPA cha a naoh ei ta.

7 Zesua zy, Bani zy, Sherebiah zy, Zamina zy, Aku zy, Shabethai zy, Hôdiah zy, Maasei zy, Keita zy, Azariah zy, Zôzaba zy, Hana zy, Pelai zy, Livai sahlaozy chata zawpizy cha ryhpa chhopasia ei ta, zawpizy cha amâ duana su liana chata y thlâh ha ei ta.

8 Chatawhcha châbu, Khazohpa ryhpa châbu liatahpa cha a siapa ta reih ei ta; a yzie chhopasia ei ta, chatanachata ama reipa cha pahno pasiasa lymâ ei ta.

9 Chatawhcha râh avaotuhpa Nehemia nata theihthaipa nata chârohtuhpa a châ hrapa Ezra nata zawpizy pachutuhpa Livai sahlaozy chata zawpi zydua lâta, “Atanoh he ABEIPA nama Khazohpa châta noh pathaihpa châ ta; palôh chhiepa ta y khah u”, tah ei ta. Ryhpa bie ama thei nahta zawpi zydua cha cha ngâ tlôh ei ta.

10 Chatanachata ano chata ama hnohta, “Sie ula, a thawpa niepa ta, a thlôhpa doh ula, khâpa hmah a chhuahnohpa a hnei leipa zy châta tovyuh paphao teh u, atanoh noh he eima Beipa châta noh pathaihpa a châ hih; pachârôhpa ta y khah u, ABEIPA chôta, alyna cha nama thatlôna châ tlôh ta”, tah ta.

11 Chatanachata Livai sahlaozy chata, “A thlihthlâh ha teh u, atanoh he noh pathaihpa châ tlôh ta; pachârôhpa ta y hra khah u”, tahpa ta zawpi zydua cha chalihsa ei ta.

12 Chatanachata bie a chhopasiapa cha ama pahno thaipa vâta zawpi zydua cha nie awpa zy, do awpa zy, mo hropa tovyuh paphao awpa zy, thapha ngaitapa ta y awpa ta pai khai haw ei ta.

13 A noh no noh liana chata zawpi zydua hryta chhôhkha pawhrâhpa zy, theihthaipa zy, Livai sahlaozy cha ryhpa bie a chu awpa chata chârohtuhpa Ezra lâta a vy ei ta.

14 Chatawhcha ABEIPA ta Mawsi hmâpa ta zyh awpa ta bie a piepa ryhpa liana chata thla sarina kyhchhi nota Izarel pathlazy byureih liata ama y awpa kyh,

15 ama ropa hawhta, “Tlâh lâta sie ula, ôli chiah zy, ôli pakheipa chiah zy, mytali chiah zy, thiahra kuah zy. tho laipa chiah zy, byureih sa nawpa ta la teh u,” tahpa ta ama khih zydua lâta nata Zerusale liata pathâhsa awpa nata phuah awpa a châna kyh zy reih ei ta.

16 Chatanachata zawpizy cha sie ei ta, la ei ta, chyhsa zydua ta ama o chô liata zy, ama tlyhmia liata zy, Khazohpa tlyhmia liata zy, Ti Ochhi su kawhpa lialiah liata zy, Ephrai Ochhi su kawhpa lialiah liata zy, ama châ chyuta byureih tao ei ta.

17 Chatawhcha seichâna tawhta a puapa ahmaohpakhypa zydua chata byurei tao ei ta, byureih zy liata pahrâ ei ta: Nuna sawchapawpa Zawsua chhâ hnôh lâ tawhta cha noh taihna chata Izarel pathlazy chata cha hawhna chata tao beih leipa ei ta. Chatanachata alyna thata y ta.

18 Nohchareih a thao tua no tawhta a chhâna taihta Khazohpa ryhpa châbu liatahpa reih hra ta. Chatawhcha kyhchhi cha nohsari hmâh ei ta; chatawhcha a noh charie noh cha biepiepa hawhta pakhyna pathaihpa châ ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 9

Nehemia 9

Ezra ta Izarel moleinazy a palâhâhna

1 Chatanachata cha thla, noh syno nata noh palih noh liana chata Izarel pathlazy cha nie leipa ta, latho poh a bupa ta, alei a baipa ta, ahmaohpakhy ei ta.

2 lzarel pho cha pho hropa zy tawhta a panano ei ta, aduah ei ta, ama moleina zy nata ama mahpaw zy moleinazy reihpha cheih ei ta.

3 Chatawhcha âmo su chyu liata aduah ei ta. Cha noh su palih ta pachhaih ta, su kha chhôh liana chata ABEIPA ama Khazohpa ryhpa châbu cha reih ei ta, su palih ta pachhaih ta, su kha a hropa chhôh liana chata reihpha cheih ei ta. ABEIPA ama Khazohpa a chhy ei ta.

4 Livai sahlao hleidy kiana liana chata Zesua zy, Bani zy, Kadmiel zy, Shebama zy, Buni zy, Sherebiah zy, Bani zy, Kekani zy cha a duah ei ta; ao paro ngaitapa ta ABEIPA ama Khazohpa pado ei ta.

5 Chatanachata Livai chyhsa Zesua nata Kadmiel zy, Bani zy, Hasabania zy, Sherebiah zy. Hôdizah zy, Shebaniah zy nata Pethahia zy chata, “Aduah ula, ABEIPA nama Khazohpa cha chhâzaw taihta reithai teh u. Palyupalihna nata reithaina zydua ta a pha leipa na moh rôhnahpa cha reithaipa ta y mawh sy.” tah ei ta.

6 Ezra chata, “Nâma deita he ABEIPA châ chi ta; avâzy avâ nata a chhôh liata a ypa zydua chhao, aleilô nata a chô liata a ypa zydua chhao tilaipi nata a chhôh liata a ypa zydua chhao tao chi ta; a zydua ta pakhâta ta a vao tyh chi ta, avâ liata a ypa sahlao chata châ naoh tyh ei ta.

7 Nâ cha ABEIPA Khazohpa, Abra a tly chi ta, Kaldai râh Ur tawhta a papuatuhpa nata Abaraha tahpa ta a moh bituhpa na châ;

8 a pathipalôh cha na hmiakô liata ngâchhihpa ta pahno chi ta, Kana mozy, Hiti mozy, Amawri mozy, Periza mozy. Zebu mozy Kirkasi mozy râh cha pie awpa a pathlazy taih pie awpa ta bie hraih chi ta; na bie cha patlôsa chi ta, sia ngaitapa châ tlôh chi ta.

9 “Izi râh liata eima mahpaw zy rietheizie cha hmô thlâh ha chi ta, Tilaipi Saihpa ngiahkâ liata ama awpa pyuzy cha thei chi ta,

10 Phirao nata a chakaotuhpa zydua nata a râh liata chyhsa zydua chô liata pahnona zy nata hmonoâhpa zy paluahsa chi ta, a palai ngaitapa ta ama chô liata hmo ama taopa pahno tlôh chi ta; chatanachata atahmâ taih heta na châta hmo tao chi ta.

11 Chatawhcha ama hmiakô liata tilaipi cha pachhaih chi ta, chatanachata alei hipa liata tilaipi chhôh siepahlie ei ta; âmo a chadaituhpa zy cha ti a thu ngaitapa liata ti hluh ngaitapa liata alô thypa hawh tlaita thy chi ta.

12 Nohchhô ta ameitô ta chhihtha tyh chi ta, zâ ta chhao ama siena awpa lâpi liata âmo a khaih awpa ta meitô ta chhihtha tyh chi ta,

13 Sinai Tlâh liana chata za chô chi ta, avâ tawhta ama hnohta bie reih chi ta, ryureina do ngaitapa zy, ryhpa do ngaitapa zy, bieraopa nata a biepiepa pha ngaitapa zy pie chi ta,

14 chatawhcha na pahânoh pathaihpa cha âmo pahnosa chi ta, na chakaotuhpa Mawsi hmâpa ta a biepiepa zy, bieraopa zy, ryhpa zy pie chi ta.

15 Ama nodi papai nawpa ta avâ tawhta viahchhâ pie chi ta, ama dâhphi papai nawpa ta lôpanô tawhta ti papuapa chi ta, na bâh pazawhpa tlaita ei pie aw; na tahpa râh pahrâ awpa bie pie chi ta.

16 “Châhrasala âmo nata eima mahpaw zy chata a palai ngaitapa ta hmo tao ei ta, chhorupa ta y ei ta, na biepiepa zy cha angiah leipa ei ta;

17 zo khoh leipa ei ta, ama hryta na hmonoâhpa taopa zy chhao pahno khoh khao veih ei; chhorupa ta y ei ta, atypa ta ama seichâna lâta kua heih awpa ta hyutuhpa tlao rao ei ta. Châhrasala nâma cha a ngiahthai awpa ta ama thla hapa Khazohpa, chyhsa ngiachhie theipa, thapasana ta a biepa, nônaipa, zawngiahna a hnei thlupa châ chi ta, âmo pathlua hlei leipa chi ta.

18 Âmo chata viahchao taw nohthlahpa a tao ei ta. ‘He he Izi râh tawhta châ chhihthatuhpa na Khazohpa cha,’ tahpa ta hiehâh a chhi ngaitapa ta hmo ama tao nona chhao khata,

19 na zawngiahna hluh ngaitapa chata râhpathohpa liana khata pathlua hlei leipa chi ta; lâpi liata âmo chhihtha awpa ta ama chôta ameitô chata nohchhô ta siesai leipa ta; âmo a khai awpa nata ama siena awpa lâpi a pahmô awpa ta meitô chhao chata zâ ta siesai hra vei.

20 Âmo pachu awpa ta na Thlahpa pha ngaitapa cha pie hra chi ta, na mana cha ama pakah liata angia awpa pasai leipa ta y leipa chi ta, ama dâhphi papai nawpa ta ti pie chi ta.

21 Râhpathohpa liana khata kô sypalih pasa chi ta. Khâpa hmah a phahla leipa ei ta; ama chysiazy paroh leipa ta ama pheizy thlô leipa ta.

22 Chatawhcha râh nata pho zy pie chi ta, chazy cha ama tovyuh rai chyu chi ta, chatanachata Sihaw râh, Hesbaw beipa râh nata Basana beipa Ôka râh cha pahrâ ei ta.

23 Ama pathlazy cha avâ awhsi zie ta papôh hra chi ta, ama pahrâ awpa ta ama mahpaw zy hnohta na vaw rei hawpa râh liana chata pangiasa chi ta.

24 Chatanachata ama pathlazy chata râh cha pahrâ ei ta, nâma ta cha râh liata a ypa Kana mozy cha ama hmiakô liata panawhsa chi ta, ama khopa hawhta tao awpa ta ama abeizy nata cha râh liata chyhsa zy chhao ama ku liata pie chi ta.

25 Kuh a hneipa khihpi zy, râh pha ngaitapa zy la ei ta, hmo phapa to abiepa o zy pahrâ ei ta, tikhao tao chiehpa zy, kresahdô zy, ôli sahdô zy, thokô hluhpi zy hnei ei ta; chatanachata nie ei ta, rihbiepa ta y ei ta, thawh ei ta, na phana hluh ngaitapa liana chata lôhrâhtlôpa ta y ei ta.

26 “Châhrasala chhorupa ta y ei ta, na chô liata aty ei ta, na ryhpa cha siesai ei ta, nâma lâ kua heih pachhuahsapa ta a chhoreituhpa na hrohsopa zy cha thie ei ta, hiehâh a chhih ngaitapa ta hmo tao ei ta.

27 Chavâta âmo rie a patheituhpa ama khakhaipa zy ku liana chata pie chi ta; ama nôpo nota ama cha pado nona khata avâ tawhta nahthlie chi ta, chatawhcha na zawngiahna hluh ngaitapa chata ama khakhaipa zy tawhta pachhatuh awpa ta pachhatuhpa zy pie chi ta.

28 Châhrasala thlahlôhpa ta ama y tawhna chata na mohmô liata hmo pha leipa tao heih ei ta, chavâta ama khakhaipa zy ku liata pie chi ta, chatanachata ama chô liata biehnei ei ta; châhrasala vaw kuapa ta ama cha pado nona khata avâ tawhta nahthlie chi ta, ei hluhpi na nôphana chata pachha chi ta.

29 Chatawhcha na ryhpa liata na chhihtha heih thei nawpa ta chhorei tyh chi ta. Châhrasala a palai ngaitapa ta hmo tao ei ta, na biepiepa zy angiah leipa ei ta, na ryureina chakhiapa ta hmoparao ei ta, chyhsa ta a ngiapa ta ama hrona awpa cha, chatawhcha ama hnokhi chhâpa chhy ei ta, chhorupa ta a paysa ei ta, nahthlie khoh leipa ei ta.

30 Kô hluhpi chhy thai chi ta, na Thlahpa ta na hrohsopa zy hmâpa ta chhorei tyh chi ta; châhrasala thei lei nahpâ a pachâsa ei ta. Chavâta cha râh zy liata chyhsa zy ku liana chata pie haw chi ta.

31 Châhrasala na nôphana hluh ngaitapa chata ama chhâ pathlana cha patlôsa leipa chi ta, pathlua hra va chi. Khazohpa ngiachhie thei ngaitapa thapasana ta a biepa châ tlôh chi ta.

32 “Chavâta eima Khazohpa, Khazohpa rôhnahpa ato tao theipa nata chichhihpa, biehrai patlôpa ta ngiachhiena a paluahsatuhpa chata keimo chô nata eima abei zy, eima molaipa zy, eima theihthaipa zy, eima hrohsopa zy, eima mahpaw zy nata na chyhsa zydua chôta Asuria abeizy ama bei no tawhta atahmâ taihta ama rietheina a vaw tlôpa zydua he hmo chyhpa ta ta pachâ khah y.

33 Khâpa rai châsala eima chô liata hmo a tlôpa zydua liana heta nâ cha a siapa châ chi ta, nâma chata â dopata ta hmo tao chi ta, keimo deikua chata a pha lei ngaitapa ta eima tao;

34 eima abei zy, eima molaipa zy, eima theihthaipa zy, eima mahpaw zy chhaota na ryhpa cha a ngiah leipa ei ta, na biepiepa nata na bie pahnosapa âmo na chhoreina zy cha angiah hra vei ei.

35 Ama chô liata pha ngaitapa na piepa liana chata cha chakao tlôh leipa ei ta; ama hmoparaopa bâhsai hlei veih ei.

36 Pachâ teh, atahmâ he chyhsa chakaotuhpa châ pi ta; lyurâh chô liata a patheipa nata hmo phapa eima mahpaw zy niepa châta na piepa cha, cha liana chata chakaotuhpa lâta eima châ haw.

37 Eima moleipa vâta eima chôta abei châta na raopa zy chata hneirôhpa ta y ei ta; eima pôhpa liata nata eima sahroh chô liata zy taih chhao ama khopa hawhta bie hnei ei ta, eima nô a po ngaita na,” tahpa ta.

Zawpizy cha rypa zi awpa ta bi amâ taina

38 Cha zydua vâna chata bie â i ngaitapa ta hraih pi ta, roh pi ta, eima molaipa zy, eima Livai sahlao nata eima theihthaipa zy ta maniah chahnao pa-i khei ei ta. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13

Nehemia 10

Nehemia 10

1 Maniah chahnao pa-ikheituhpa zy cha hezy he ama châ, Hakaliah sawchapawpa râh avaotuhpa Nehemia nata Zedekiah zy,

2 Seraiah zy, Azariah zy, Zeremiah zy,

3 Pashu zy, Amariah zy, Malkizah zy,

4 Hata zy, Shebaniah zy, Malu zy,

5 Hari zy, Meremô zy, Ôbadiah zy,

6 Daniel zy, Kinethô zy, Baruka zy,

7 Mesula zy, Abizah zy, Mizami zy,

8 Maazia zy, Bilkai zy, Shemaiah zy; he sahlao he theihthaipa ama châ.

9 Chatawhcha Livai sahlaozy; Azaniah sawchapawpa Zesua zy, Henada sawzy hry liatahpa Binui zy, Kadmiel zy;

10 ama unawhpa Shebaniah zy, Hôdiah zy, Kelita zy, Pelai zy, Hana zy,

11 Mika zy, Rehô zy, Hasabiah zy,

12 Zaku zy, Sherebiah zy, Shebaniah zy,

13 Hôdiah zy, Vani zy, Beninu zy.

14 Zawpi hyutuhpa zy: Parô zy, Pahamôaba zy, Elama zy, Zatu zy, Bani zy.

15 Buni zy, Azkada zy, Bebai zy,

16 Adônizah zy, Bikvai zy, Adina zy,

17 Atera zy, Hezakia zy, Asu zy,

18 Hôdiah zy, Hasu zy, Bezai zy,

19 Haripha zy, Anathô zy, Nebai zy,

20 Makpia zy. Mesula zy, Hezi zy,

21 Meshezabel zy, Zadôka zy, Zadua zy,

22 Pelatiah zy, Hana zy, Anaiah zy,

23 Hôsia zy, Hananiah zy. Hashu zy,

24 Halôhe zy, Pileha zy, Shôbe zy,

25 Rehu zy, Hasabnah zy, Maasei zy,

26 Ahizah zy, Hana zy,

27 Malu zy, Hari zy, Banah zy.

28 Mo hropa, theihthaipa zy, Livai sahlao zy, ochhivaihtuhpa zy, hla satuhpa zy, achhyna-o chakaotuhpa zy nata Khazohpa ryhpa zy a chhuahpa ta, cha râh liata chyhsa zy tawhta apananopa zydua, ama lahpinô zy, ama sawchapaw zy, ama sawchanô zy pahnona nata novâhna a hneipa maih chata,

29 ama unawhpa zy, ama molaipa zy cha khâchâ patu ei ta, Khazohpa chakaotuhpa Mawsi piepa Khazohpa ryhpa zyh awpa ta ABEIPA eima Beipa biepiepa zydua nata ryureina zy nata a biepiepa zy cha zyhpa nata a vaopa ta.

30 Cha râh liata chyhsa zy cha, eima sawchanô zy pahneisa leipa ta, eima sawchapaw zy chata ama sawchanô zy hnei hra leipa ta;

31 cha râh liata chyhsa zy ta pahânoh ta hmo zua awpa, hmobaoh tlyma, niepa rai zuah awpa tlyma, vaw lapa ta pahânoh tlyma, yna noh tlyma ta chaleipa leipa ta kô sarina liata râh pahâsapa ta, leibâh zydua hia lei awpa ta chhiesapa ta y awpa ngâpa ta chhie sa ei ta.

32 Eima Khazohpa o lâta chakaona châta sekel su thôh ta pachhaih ta su kha kô chareih pie awpa ta eima châta ryhpa tao pi ta;

33 viahchhâ sopa châta zy, niepa hlâna kha hlâ awpa châta zy, raopa hlâna kha hlâ awpa châta zy, pahânoh châta zy, thla thiehpa châta zy, daihti raopa kyhchhi châta zy, mopathaihpa châta zy, Izarel mozy châta, ryhna tao nawpa ta molei atheihna châta nata eima Khazohpa o lâta tao awpa tao nawpa ta zy.

34 Eima mahpaw zy chhôhkha lymâ hawhta kô chareih ta daihti raopa ta ryhpa châbu liata ropa hawhta ABEIPA eima Khazohpa maisâh liata rao awpa tho hlâpa, eima Khazohpa o lâta a palytuh awpa pahno nawpa ta theihthaipa sahlao chhao, Livai sahlao chhao, zawpizy chhaota pachao pi ta.

35 Kô chareih ta eima lyu liata chicheipa a daih tuapa nata tho chi to a pathei tuapa ABEIPA o liata so awpa zy;

36 ryhpa liata ropa hawhta eima sawchapaw nata eima sahroh a pih tua chaipa zy, eima viahchao hri nata mietahkupa zaw hry ta a pih tua chaipa zy chhao eima Khazohpa o liata chakaotuhpa theihthaipa zy lâta eima Khazohpa o lâta chhi awpa zy;

37 eima Khazohpa o chhôhpadâhpa liata theihthaipa zy lâta eima viahchhâ tao tua chaipa zy; eima hiepa hlâna zy, tho chi to patheipa zy, kresawti nata sathaw chei awpa zy, eima lyu liatahpa su hrawh liata su kha Livai sahlao zy pie awpa zy ta ryhpa tao hra pi ta, âmo Livai sahlaozy chata eima khih hryta lyu a hneipa khih maih liata su hrawh liata su kha la tyh ei ta.

38 Chatawhcha Livai sahlao ta suhrawh liata su kha ama la nota Arawna pathla, theihthaipa cha Livai sahlao hnohta ama y awpa châ ta; Livai sahlaozy ta su hrawh liata su kha ama lapa tawhta su hrawh liata su kha cha eima Khazohpa o liata sôh sona chhôhpadâhpa liana chata ama soh awpa a châ;

39 Izarel pathlazy nata Livai pathlazy chata sâh nata kresawti nata sathaw hiepa hlâna cha supathaipa hmobaoh nata chakaotuhpa theihthaipa zy ochhivaihtuhpa zy hla satuhpa zy yna chhôhpadâhpa liana chata ama soh awpa châ ta. Cha hawhna chata eima Khazohpa o cha uasa leipa ta y lei awpa ta ryhpa eima tao. 

Nehemia (Nehemiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13