Esthy 1

Esthy 1

Abeinô Vasti ta Abei Ahasuara a pahaona

1 Abei Ahasuara a bei nota, cha Ahasuara cha India tawhta Ethiôpia taihta râh pachhaihpa za kha nata syno nata râh sari chôta a beipa châ ta;

2 Abei Ahasuara a râh beidyuchhai abei o Susa liata a tyuh no,

3 a bei kô thô kô liana khata a molaipa zydua nata a chyhsazy châta kyhchhi tao ta, Persia nata Media râh liata biehneituhpa zy ama râh pachhaihpa chyhsa phapazy nata molaipazy cha y khai ei ta,

4 a râh rôhnah ngaitapa ryuzy nata a bei rôhnah ngaitanazie bopi, noh sycharie tlai pamosa ta.

5 Cha khai nahta molaipa nata mo chyhpa, abei o Susa liata a vaw hlaopa zydua chata abei o sahdô dôhpachhôh tlyhmia liata, abei ta noh sari tlai kyhchhi tao ta.

6 Poh a ngyupa zy, a hrohpa zy, nohsaihpâpa zy, pala rih dipa saihdôhpa ta, pataona tâkâri dyuchhaizy cha awhlôteihpa a saihpa zy, a râhpa zy, a maihpa zy, a vyhpa zy ta taopa chô liata patyuh ei ta.

7 Ngôh nyu ta kresawti rai ei ta, nyu cha chi nanopa alyu leipa sai a châ, abei kresawti hluh ngaita ta, abei hneinazie hawhta.

8 Chatawhcha kresawti cha ryhpa hawhta doh ei ta, ahyhmah ta pasaipa châ leipa ta, chyhsa tota ama khopa hawhta ama tao chyu nawpa ta abei chata a o liata hyutuhpa zydua cha chho ta.

9 Abeinô Vasti chhaota Ahasuara abei o liata chanô sahlao châta kyhchhi tao ta.

10 A noh sari nona chata abei cha kresawti ta a palôh palaisa ta, chhôhpadâhpa o vaihtuhpa pasari Abei Ahasuara hmiakô liata a chakaotuhpa Mehuma zy, Bizatha zy, Hôbôna zy, Bitha zy, Abatha zy, Zetha zy, Karka zy cha

11 Abeinô Vasti a abei lakho a khona chôta zawpizy nata molaipazy a hmi phanazie pamosa awpa ta abeipa hmiakô lâta chhihtha awpa ta bie pie ta; a hmi pha ngaita tlôh ta.

12 Châhrasala Abeinô Vasti chata chhôhpadâhpa a vaihtuhpazy ta vaw awpa ta abei biepiepa ama chhopa cha ei ha ta; chavâta abei cha a hie hâh ngaita ta, a pathi-ia ha ta.

13 Chatanachata abei chata hmo a pahnopa chyhsa, chyhsa sopa zy hnohna chata ryhpa nata ryureinazie a pahnopa zydua cha cha hawhna chata abeipa ta a tao tyhnazie rai châ ta,

14 ano a pazituhpazy cha Karahana zy, Shetha zy, Admatha zy, Tasi zy, Mere zy, Marseha zy, Memuka zy, Persia nata Media râh molaipa pasari, abei hmia a hmô tyhpa, khihnarâh liata ano a hnia chai tyhpa zy ama châ:

15 “Chhôhpadâhpa a vaihtuhpazy ta bie ama vaw tlôkheipa hawhta, Abeinô Vasti chata Abei Ahasuara biepiepazy cha zyh khoh tlôh leipa ta a chô liata ryhpa hawhta tao awpa ta kheihta e eima tao aw?” tah ta.

16 Memuka chata abei nata molaipazy hmiakô liana chata, “Vasti chata abei chô liata a paraopa dei châ leipa ta. Abei Ahasuara râh pachhaihpa zydua lâta pho to chô liata chhao a paraopa a châ.

17 He beinô hmotaopa he chanô zydua ta pahno aw ei ta, Abei Ahasuara chata Abeinô Vasti a hmiakô lâta a vaw chhi awpa ta bie pie ta, châhrasala vawh vei,’ tahpa a pathâh khiahtala ama vahpazy ama mohnao aw.

18 Atanoh tlai chhao heta, Persia nata Media molaipa chanô sahlao beinô hmotaopa a pahnopa zy heta abei molaipa zy chô liata tao hra aw ei ta, chatanachata amohnaona nata hiehâhna thata a pua aw.

19 Abei ta a pha a tahnazie a châ khiahtala, abei biepiepa pathâhsapa châ sala, Abeinô Vasti cha Abei Ahasuara hmiakô liata a vy khao cheita khah sy, tahpa bie he panano khao chacheita lei awpa ta Persia nata Media khihnarâh ryhpa hryta ropa châ sala; chatawhcha abei ta ano hlâta a pha viapa abeinô chanô patosa sala.

20 Chatawhcha abei cha a khihnarâh zydua liata (kawh ngaita hra sala) pathâhsapa a châ tita cha molaipa nata mo chyhpa zy chhao, ama lahpinô zy ta ama vahpa zy ama za aw,” tah ta.

21 Cha bie chata abei nata molaipazy cha palysa kaw ta, chatanachata abei chata Memuka bie hawhna chata tao ta;

22 abei khihnarâh zydua liata, râh to liata âmo châ chyuta, pho to âmo reih chyu ta, chapaw ta ama o chhôh chyu liata bie ama hnei awpa a châ tahpa kyh a paphao haw. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 2

Esthy 2

Esthy cha Abeinô pachâsapa ta a y

1 Cha hmo hnôh lâta Abei Ahasuara hiehâhpa cha a dia tawhna chata, Vasti nata a hmotaopa nahta cha kyh liata biepiepa cha a thei ta.

2 Chatanachata abei chakaotuhpa, a chakaotuhpa zy chata a hnohta, “Abei chata laihsa hmi phapa tluapa châ sala.

3 Chanô a mohôhtuhpa abei chhôhpadâhpa vaihtuhpa Hekai vaihna chanô yna, abei ta a khihnarâh chhôh ta, râh pachhaihpa zydua liata hyutuhpa rao sala; chatawhcha ama pathaih nawpazy pie chyupa châ sala.

4 Abei a palysatuh chaipa laihsa cha Vasti vyuhpa ta beinô châ sala,” tah ei ta. Cha chata abei cha palysa ta, cha hawhna chata tao haw ta.

5 Abei o Susa liana chata Zu chyhsa pakha y ta, a moh cha Modekai châ ta, Benzami chyhsa Kisa saw, Shimei sawchapawpa, Zaira sawchapawpa a châ,

6 Babylaw beipa Nebukaneza ta Zudah beipa Zekônia seichâna ta a chhi nota Zerusale tawhta a chhipa a châ.

7 A paw unawhpa sawchanô Hadasa, Esthy ama tahpa cha chhy ta, paw hnei leipa ta, nô hnei hra leipa châ tlôh ta, laihsa cha chhithaipa ta, a hmi pha ngaita ta, a nô nata a paw ama thi tawhta Môdekai chata a sawchanô châta a hnohta a paysa.

8 Chatanachata abei biepiepa nata bieraopa cha vaw thei ei ta, laihsa hluhpi abei o Susa liata Hekai vaina liata amâ hmaohpakhy nona chata Esthy cha abei o liata chanô vaihtuhpa Hekai vaina liana chata a ngiakhei ei ta.

9 Chatawhcha laihsa chata palysa ta, a khokheina to ta; abei o tawhta a tovyuh nata a pathai nawpa ta thlai pie ei ta, laihsa pasari pie tlâh a châ viapazy chhaota, ano nata a laihsa heihzy cha chanô yna su pha chaipa lâta a chhi ta.

10 Esthy chata kheihawhpa chi ma a châ tahpa nata ahyzy ma a heihnawhzy a châ tahpa pahnosa leipa ta, Môdekai chata pahnosa lei awpa ta bie khâchâ pie ta.

11 Esthy chata khâpa ma tao tyh ta, kheihta ma a y tahpa pahno nawpa ta Môdekai cha nohchareih chanô yna tlyhmia dôhpachhôh lâna chata vawh tyh ta.

12 Chatawhcha thla hrawhleino chanô châta ryhpa hawhta ama chô liata hmotao tawhta Abei Ahasuara lâta laihsa sahlao ama vawna daihti a tlô nahta, (cha hawhpa liana chata ama pathaihna daihti a ki tyh ta. he hawhna heta ama tao tyh. Myr thaw thla charu, rohpahâhpa pahâh ngaitapa thla charu, chanô pathaisana nata ama hnia tyh),

13 he hawhna heta vawh tyh ei ta, abei o liata a ngiakhei awpa ta chanô yna tawhtapa ama khopa maih ama pie tyh.

14 Zâlâ ta vawh ei ta, a mylâ ta nôtho a vaihtuhpa abei chhôhpadâhpa a vaihtuhpa Shaaka vaipa chanô yna mianona lâta kua tyh ei ta; abei ta khoh ta, ama moh ta a aw pazy dei leipa ta cha abei lâta vawh khao leipa ta y tyh ei ta.

15 Môdekai unawhpa Abihai sawchanônô, a sawchanônô châta a ylâhpa Esthy cha abei lâta a vawna daihti a tlô nahta, chanô vaihtuhpa abei chhôhpadâhpa a vaihtuhpa Hekai raopa dei leipa ta cha khâpa hmah khoh leipa ta. Esthy cha a hmôpa maih kho a pao ta.

16 Chatanachata Esthy cha Abei Ahasuara abei o liata thla hrawhna Tebeth thla liata kô sari a bei kô ta a ngiakhei ei ta,

17 abei chata chanô hropa zydua hlâta a kyh pachâ ta, chanô hropa zydua hlâta ngiachhiena nata khokheina to ta, chatanachata a, beilakho pakhosa ta, Vasti vyuhpa ta abeinô ta tao ta.

18 Chatanachata Esthy moh ta abei chata molaipazy nata a chyhsa zy châta kyhchhi rôhnah ngaitapa tao ta. A râh pachhaihpa liata chyhsa zy châta yna noh rao ta, abei hmo hnei hluhna zie hawhta hmozy rai ta.

Môdekai ta abei thie amâ chhuahna a phuah

19 Chatawhcha laihsa sahlao amâ pakhy heih nona chata, Môdekai cha abei tlyhmia dôhpachhôh chhikao liata a tyuh ta.

20 Môdekai biepiepa vâta Esthy chata ahyzy ma a heihnawhzy tahpa nata kheihawhpa chi ma a châ tahpa a pahnosa leipa ta y ta; Esthy chata Môdekai bie cha a ylâh nota a zyh tyhpa hawhna khata zyh lymâ ta.

21 Chatawhcha abei tlyhmia dôhpachhôh chhikao liata Môdekai a tyu nona chata, abei chhôhpadâhpa a vaihtuhpa hry ta chyhsa pano, Bithana nata Teresa, chhikao a vaihtuhpa zy cha ama pathi-ia ta, Abei Ahasuara chôta ku pathlana ryhpaopa tlua ei ta.

22 Cha hmo cha Môdekai ta vaw pahno ta, Abeinô Esthy cha chho ta, Esthy chata Môdekai moh ta abei chho ta.

23 Cha bie cha pasiapanô ei ta, cha hawhna cha a châ tlai tahpa ama pahno nahta pa-aosao rairieh ei ta. Cha cha abei hmiakô liata abei thâtih rona châbu liata roh ei ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 3

Esthy 3

Hama ta Zunawh pahleipadia a chhuahna

1 Cha hmozy hnôh lâna chata Abei Ahasuara chata Akaki chyhsa Hamedatha sawchapawpa Hama cha pakiasâh sa ta, a molaipa zydua hlâta a chônôpa ta patyusa ta.

2 Chatawhcha abei tlyhmia dôhpachhôh chhikao liata ypa a chyhsa zydua chata Hama cha za ei ta, a naoh tyh ei ta; cha hawhta tao awpa ta abei ta bie a pie. Châhrasala Môdekai chata a hmiakô liata a khupa ta a naoh khoh leipa ta.

3 Chatawhcha abei chyhsa zy abei tlyhmia dôhpachhôh chhikao liata a ypa zydua chata Môdekai hnohta, “Khazia abei biepiepa na parao.” tah ei ta.

4 Nohchareih a hnohta reipa ta a pyh khoh hlei vei tawhna chata, Môdekai kyh cha a papeisa ma, papeisa vei ma, tahpa pahno nawpa ta Hama cha chho ei ta; Zu chyhsa a châ tahpa chhopa haw hra ei ta.

5 Hama ta Môdekai a hmiakô liata a khupa ta a naoh leipa a pahno nahta, Hama cha pathi-ia ngaitapa ta y ta.

6 Châhrasala Môdekai chô lia deita ta ku pathlapa cha a phahnaipa ta pahno leipa ta. Môdekai chi cha chho haw tlôh hra ei ta, chavâta Ahasuara râh chhôh zydua liata Zu sahlao, Môdekai chiheihzy cha pahleipadia khai a chhuah haw ta.

7 Abei Ahasuara kô hrawhleino a bei kô thla khana, Nisan thla liata Hama hmiakô liata nohchareih Pur pachao ei ta; thla chareih, thla hrawhleinona Adar thla taihta pachao ngâthlâh ha ei ta.

8 Chatawhcha Hama ta Abei Ahasuara hnohta, “Na râh pachhaihpa chhôh to liata pho kheihawhpa tlyma, pho hropa nata alyu leipa apananopa y patla hôlô ei ta; ama ryhpa zy cha pho hropa zy ryhpa nata alyu lei ngaitapa châ ta, abei ryhpa chhao zyh hra veih ei, chavâta cha hawhpa paysa pasaipa cha abei châta phahnai vei.

9 Abei ta a ryh a tah khiahtala pahleipadia khai awpa a châ tahpa liahsa ropa châ sala, abei sôh o liata so awpa ta abei sôh mokhâhtuhpa zy ku liata tâkâri talent thy kha ei pie aw,” tah ta.

10 Chatawhcha abei chata a kusadi pahluh ta, Zuzy khakhaipa Akaki chyhsa Hamedatha sawchapawpa Hama cha pie ta.

11 Abei chata Hama hnohta, “Tâkâ nata cha chyhsa zy chhao cha a pha na tahna zie hawhta tao awpa ta piepa na châ.” tah ta.

12 Chatanachata thla khana noh hrawhleithôh noh ta abei chârohtuhpa zy cha aw ei ta, Hama biepiepa hawhna chata abei machâ zy, râh pachhaihpa to a vaotuhpa zy, pho to pawhrâhpa zy paphao ei ta, râh pachhaihpa to liata âmo châ ta, pho to âmo reih chyu ta; Abei Ahasuara moh ta paphaopa châ ta, abei kusadi ta chahnaopa a châ.

13 Abei râh pachhaihpa to liata Zu chyhsa zydua cha thyudyupa nata pawpipa zy, hawtipa zy, chanô zy noh khata thla hrawhleinona Adar thla no hrawhleithôh noh tlaita pahleipadia khaipa ta, thie khaipa ta, pamokhaipa ta, ama sôh cha hraona ta la awpa ta cha paphao khai ei ta.

14 Cha noh chata amâ chiehpa ta y nawpa ta châ biepiepa cha râh pachhaihpa to liata piepa ta pho to lâta phuah awpa ta cha châ cha paphao ei ta.

15 Abei biepiepa ta papiesa parah ei ta, biepiepa cha abei o Susa liata phuah ei ta. Abei nata Hama cha sahmah doh awpa ta atyuh ei ta; châhrasala Susa khih cha a nôpo kaw ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 4

Esthy 4

Esthy ta a chyhsazy reikhei awpa ta bie â taina

1 Môdekai ta cha ama hmotaopa zydua cha a pahno nahta, Môdekai chata a poh hrie ta. Latho poh nata buchâh a bai ta, khih liah lâta vawh ta, ao paro ngaitapa nata palôh chhie ngaitapa ta cha ta;

2 Abei tlyhmia dôhpachhôh chhikao kiapâh taihta vawh ta, ahy hmah latho poh a bupa ta abei tlyhmia dôhpachhôh a ngiapa châ tlôh lei khâh ta.

3 Abei ta bie a piepa, biepiepa tlôna râh pachhaihpa zydua liata Zuzy hry liana chata chana zy, nie leina zy, sâh ngâna zy y ha ta, chyhsa hluhpi cha lathopoh liata nata buchâh hryta a zia ei ta.

4 Esthy cha a laihsa zy nata a chhôhpadâhpa a vaihtuhpa zy chata kei chho ei ta, chatanachata beinô cha a pachârôh ngaita ta; Môdekai cha a lathopoh hlaipa ta, a bu awpa ta poh paphao ta, chârasala vaw la khoh leipa ta.

5 Chatanachata Esthy chata abei chhôhpadâhpa vaihtuhpa pakha, ano a vaihtuhpa châta a raopa Hathaka cha aw ta, chazy cha khâpa ma châ ta, kheihta zie ta ma tahpa pahno nawpa ta Môdekai lâta pavawsa ta.

6 Hathaka cha abei tlyhmia dôhpachhôh chhikao dady by kawhpa liata Môdekai lâna chata vawh ta,

7 Môdekai chata a chô liata hmo a tlôpa zydua nata Zuzy pahleipadia nawpa ta abei sôh hry liata so awpa ta Hama ta tâkâ a piepa hluhna zie tlai vaw chho ta.

8 Esthy pamosa awpa nata pahnosa awpa nata abei lâta hiana tlôkheipa ta a chiheihzy châta hia awpa ta tuapa ta âmo pahleipadia nawpa ta Susa liata ama phuahpa biepiepa patlypa pie hra ta.

9 Hathaka chata Môdekai bietapa zy cha Esthy kei chho ta.

10 Chatanachata Hathaka cha Esthy chata bie a vaw chho ta,

11 Abei chakaotuhpa zy, abei râh pachhaihpa to liata chyhsa zy chata ahyrai, chanô rai, chapaw rai, pahleipadiapa ta a y lei nawpa ta abei ta ngôh chôhchahrei ano lâta a chalona zy dei leipa ta abei lâta a chhôh lâta angiapa cha thie lymâ awpa a châ tahpa ryhpa cha pahno chyu ei ta. Noh sythôh chhôh cha abei lâta a ngia awpa ta awpa châ leipa na ta.” tahpa ta Môdekai lâta reih awpa ta bieta ta.

12 Esthy bietapa cha Môdekai chho ei ta.

13 Chatawhcha Môdekai chata Esthy kei pachhosa heih ta. “Zu chyhsa zydua ta amâ khôkhâh lei awpa cha abei o liana chata nâ khôkhâh hlei awpa ta a pangiasa khâ.

14 Atahmâ hawhta nâ thlih thlâh ha khiahtala, su hro lâta Zuzy châta abohna nata puana a vaw ypa rai chhaota, nâma nata na paw chhôhkhapa zy cha nama leidia aw. Abei châna na topa he he hawhpa daihti châna tlai heta châ vei, ahyma a tah thei aw?” tah awpa ta tuah ta.

15 Chatanachata Esthy chata Môdekai a chhy heih awpa ta tuah ta,

16 “Susa liata a ypa Zu chyhsa zydua pakhy khai la, keima vâta nie leipa ta y ula, noh thôh nata zâ thôh khâpa hmah nie leipa nata doh leipa ta y teh u. Kei nata laihsa sahlao chhaota nie leipa ta y hra aw pi ta. Chatawhcha ryhpa leipa hawhta abei lâta a ngia aw na ta; ei leidia khiahtala leidia thlâh ha la vâ na.” tahpa ta.

17 Chatanachata Môdekai vawh ta, Esthy ta bie a piepa zydua hawhta tao ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 5

Esthy 5

Esthy ta abei nata Hama cha kyhchhina a hlao awpa ta a hrua

1 A noh thôh noh na chata Esthy chata a abei chysia a tobi ta, abei o dady ta abei o dôhpachhôh liana chata a kei duah ta. Abei cha abei o liana chata a abeidyuchhai liata a o a ngiana dadyta liata a tyuh ta;

2 Beinô Esthy cha abei tlyhmia dôhpachhôh liata aduahpa abei ta a hmô nahta a chô liata aly ta, abei chata a ngôh chôhchahrei a chabapa cha Esthy lâta hy ta. Chatanachata Esthy chata a kei hnia ta, abei chôhchahrei pawhmao cha kei hria ta.

3 Chatawhcha abei chata a hnohta, “Abeino Esthy y, khâpa na khoh? Khâpa na hiah khoh? Ei khihnarâh khophie taih chhao ei cha pie aw,” tah ta.

4 Esthy chata. “Abei ta a pha a tahna zie a châ khiahtala, atanoh châta kyhchhi na châta ei chhuahnohpa nie awpa ta abei nata Hama a vy ei se.” tah ta.

5 Abei chata, “Esthy reipa hawhta châ awpa ta Hama cha a parah mawh sy,” tah ta. Chatanachata abei nata Hama chata Esthy kyhchhi a chhuahnohpa cha nie awpa ta vawh ei ta.

6 Chatawhcha kresawti kyhchhina liana chata abei ta Esthy hnohta, “Khâpa na hiah aw? Piepa na châ aw. Khâpa na khoh? Ei khihnarâh khophie taih chhao piepa na châ aw,” tah ta.

7 Châhrasala Esthy chata “Ei hmo hiapa nata a hawpa cha:

8 Abei modypa ta ei châ nata ei hmo hiapa cha abei ta pie awpa ta a ryh a tahna zie a châ nahta, ei hmo hawpa cha tao awpa ta a ryh a tahna zie a châ khiahtala abei nata Hama châta ei kyhchhi a chhuahdypa cha nie awpa ta a vy ei sala, abei reipa hawhna chata mylâ ei tao aw,” tahpa ta a chhy ta.

Môdekai pa-aosaona a chhuahdyna

9 Cha noh liana chata Hama cha thaphapa nata aly ngaitapa ta pua ta. Châhrasala Hama chata abei tlyhmia dôhpachhôh chhikao liata Môdekai cha a vaw duah leipa nata a piepâ leipa ta a hmô nahta a pathi-ia ngaita ta.

10 Anodeikuacha Hama cha a sohsi lyhlia ta a di ha ta; a viasa zy nata a lahpinô Zeresa cha pa-awsa ta.

11 Hama chata a sôh nata a piah rôhnah zie zy, saw a hnei hluh zie zy, abei ta a pakiasâhna a sâhna hmo zydua zy, abei pawhrâhpa zy nata a chyhsa zy hropa hlâta a pachônôna zy ama hnohta reih ta.

12 Cha dei châ leipa ta, “Abeinô Esthy chata a kyhchhi liana chata keima dei leipa ta cha ahy hmah ta abei hnohta pahlaosa leipa ta. Mylâ khi abei nata maniah a hrua.

13 Chârasala Zu chyhsa Môdekai, abei tlyhmia dôhpachhôh chhikao liata atyupa ei hmô chhôhta cha he zydua he ei châta khâpa hmah phahnaina y vei,” tah hra ta.

14 Chatanachata a lahpinô Zeresa nata a viasa zydua chata a hnohta, “Dy sypangaw a sâhpa ta pa-aosaona pataosa awpa ta myta abei chho la; kyhchhina lâna chata abei hnohta aly ngaitapa ta vawh teh,” tah ei ta. Cha chata Hama cha palysa ta. pa-aosaona cha pataosa ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 6

Esthy 6

Hama cha Môdekai a naoh awpa ta biepiepa a châ

1 Cha zâ chata abei cha a mô thei leipa ta; abei thâtih rona châbu vaw cheih awpa ta bie pie ta, a hmiakô liana chata reih ei ta.

2 Bithana nata Teresa, abei chhôhpadâhpa a vaihtuhpa, ochhi a vaihtuhpa pano chata Abei Ahasuara chôta ku pathla amâ chhuahna kyh Môdekai ta a vaw pahnosapa kyh ropa cha hmô ei ta.

3 Chatawhcha abei chata, “Cha kyh vâna chata Môdekai heta kheihawhpa palyupalihna nata rôhnahna ma a hmô tly?” tah ta. Abei chakaotuhpa a chakao tyhpa zy chata, “Khâpa hmah ano châta taopa y vei,” tah ei ta.

4 Abei chata, “Ahy ma dôhpachhôh liata a ypa hao?” tah ta. Cha nona chata Hama cha pa-aosaona taopa ta Môdekai pa-aosao awpa kyh abei lâta reih awpa ta abei tlyhmia dôhpachhôh khôtho lâtahpa chhôh lâna chata a vypa châ ta.

5 Chatawhcha abei chakaotuhpa zy chata a hnohta, “Pachâ teh, abei tlyhmia dôhpachhôh liata aduahpa cha Hama a châ,” tah ei ta. Abei chata, “A vaw ngia mawh sy,” tah ta.

6 Chatanachata Hama cha a ngia ta, abei chata a hnohta, “Abei ta chyhsa palyupalih awpa a khohpa cha kheihta taopa e a pha aw?” tah ta. Hama chata, “Abei ta keima hlâta palyupalih a khohpa ahy a y aw?” a palôhrupa ta tah ta.

7 Hama chata abei hnohta, “Abei ta palyupalih a khohpa chyhsa cha,

8 abei ta a tobi tyhna abei poh zy, abei kia tyhna arâ zy, abeilakho abei ta a kho tyhpa zy vaw chei papa châ sala;

9 abei ta palyupalih a khohpa cha tobi nawpa ta abei poh nata arâ cha abei machâ hlô chaipa ku liata piepa châ sala, pakiasa sala khihliah chahrykheipa châ sala, a hmiakô liata, ‘Abei ta palyupalih a khohpa cha he hawhna heta taopa a châ aw,’ tahpa ta phuah lymâ sala,” tah ta.

10 Chatanachata abei chata Hama hnohta, “Na reipa hawhna chata abei poh nata arâ cha kei la parah la, abei tlyhmia dôhpachhôh chhikao liata atyuh tyhpa Môdekai chô liata cha hawhna tlai chata tao teh. Na rei hawpa zydua kha mypa y cheita khah se,” tah ta.

11 Chatanachata Hama chata abei poh nata arâ cha la ta, Môdekai cha tobi ta, khihliah liana chata pakiasa ta, a hmiakô liana chata, “Abei ta a palyupalih khohpa chyhsa cha he hawhna heta taopa a châ aw,” tahpa ta phuah ta.

12 Chatawhcha Môdekai cha abei tlyhmia dôhpachhôh chhikao lâna chata a vy heih ta; Hama deikua cha pachârôh ngaitapa ta, a luh a khupa ta ano o lâta a di haw ta.

13 Hama chata a lahpinô Zeresa nata a viasa zydua cha chho ta. Chatanachata a chyhsa sopa zy nata a lahpinô Zeresa chata a hnohta, “Nâ tyh pasina Môdekai cha Zu chyhsa a châ khiahtala pahnie chachei leipa aw chi ta, a hmiakô liana chata na piepasi thlyu aw,” tah ei ta.

14 Cha hawhta ama rei hai nona chata, abei chhôhpadâhpa avaihtuhpa zy cha vawh ei ta, Esthy a chhuahdypa kyhchhina lâta vaw awpa ta Hama cha parah ei ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 7

Esthy 7

Hama achhuahna hlao tloh leipa ta ano tlao pa-aosaopa a châ

1 Chatanachata abei nata Hama chata Beinô Esthy kyhchhipa cha a hlao ei ta.

2 Chatawhcha kresawti kyhchhi noh no nota abei chata Esthy hnohta, “Beinô Esthy y, khâpa na khoh? Piepa na châ aw. Khâpa na hiah aw?” tah heih ta.

3 Chatanachata Beinô Esthy chata, “Hy beipa y, na modypa ei châ nahta, abei a ryh a tahna zie a châ khiahtala, ei khopa cha ei hrona eina pahlôhpa awpa chi châ ta, ei hiapa cha ei chiheizy hrona pahlôhpa a châ.

4 Kei nata ei chiheihzy cha pahleipadia awpa nata thie awpa nata pamua awpa ta zuapa châ haw tlôh pi ta. Seichanô tlyma, seichapaw tlyma châ awpa ta zuapa eima châ khiahtala, khakhaipa chata abei hmo pasa taopa tha nai zô naina pie thei khao vei hrasala khâpa hmah reih leipa ta ei y thlâh ha awpa châ ta,” tah ta a chhy ta.

5 Chatanachata Abei Ahasuara chata reih ta. Beinô Esthy hnohta, “Cha hawhta a tao ngâhpa cha ahy ma châ ta? Khataih liata a y?” tah ta.

6 Esthy chata, “Dyuhtuhpa nata khakhaipa a châ! He moleipa Hama he a châ.” tah ta. Chatanachata abeinô nata abei hmiakô liata Hama cha a chalyu ta.

7 Chatawhcha abei cha a kresawti kyhchhina tawhtapa cha pathi-iapa ta thyu ta, abei sahdô lâta angia ta; Hama cha Beinô Esthy hnohta a hrona pahlôhpa awpa ta hiapa ta a duah ta, abei chata a chô liata hmopha leipa tao a chhuah awpa hawhta a pahnopa vâta.

8 Chatawhcha abei cha abei sahdô tawhtapa cha kresawti kyhchhina su lâna chata vawh heih ta, Hama cha Esthy atyuna dyuchhai liata pao thlâh ha ta; chatanachata abei chata, “He o liata ei mohmô tlai liata beinô cha a tah rarua tlyma?” tah ta. Cha hawhta abei ta a reipa ta nahta Hama hmia cha khu haw ei ta.

9 Chatanachata abei chhôhpadâhpa vaihtuhpa hry ta pakha, abei hmiakô liata a ypa Harhôna chata, “Pachâ teh, abei chata bie phapa a reihtuhpa Môdekai pa-aosao nawpa ta dy sypangaw a sâhpa, Hama tao chiehpa pa-aosaona Hama o liata a y,” tah ta. Abei chata, “Cha liana chata pa-aosao teh u.” tah ta.

10 Chatanachata Môdekai pa-aosao nawpa ta a chhuahdypa liana chata Hama cha pa-aosao ei ta. Chatanachata abei hiehâhna cha dia ha ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 8

Esthy 8

Zuzy cha adyuh awpa ta biepiepa ama châ

1 Cha noh liana chata Zuzy khakhaipa Hama o cha Abei Ahasuara chata Beinô Esthy pie ta. Chatawhcha Môdekai cha abei hmiakô lâta a vy ta, Esthy chata a khâpa ma a châ tahpa vaw chho haw ta;

2 abei chata Hama a lapa a kusadi cha pahluh ta, Môdekai pie ta. Chatawhcha Esthy chata Môdekai cha Hama o chhôh hyutuhpa ta tao ta.

3 Chatawhcha Esthy chata abei hmiakô liata bie reih heih ta, a phei thaby liata pao ta, mothlih tlana chôta Akaki chyhsa Hama hmopha leipa tao a chhuahpa Zuzy chô liata aryh a raopa cha pahlei awpa ta hiah ta.

4 Abei chata ngôh chôhchahrei cha Esthy lâna chata hy ta.

5 Esthy cha thyu ta, abei hmiakô liata a duah ta, “Abei a pha a tahna a châ nahta, a modypa ei châ nahta, abei pachâna zie ta a doh nata alyna zie ei châ khiahtala, Akaki chyhsa Hamedatha sawchapawpa Hama aryhna a raopa cha abei râh pachhaihpa zydua liata Zuzy pahleipadia khai awpa tahpa a ropa cha tao khao lei awpa ta ropa châ sala.

6 Kheihta e ei chiheih zy chô liata hmo pha leipa a vaw tlôpa hmô awpa cha pasa ei tao thei aw? Kheihta e ei chiheih zy leidiapa hmô awpa cha pasa ei tao thei aw?” tah ta.

7 Chatanachata Abei Ahasuara chata Beinô Esthy nata Zu chyhsa Môdekai hnohna chata, “Pachâ teh u, Zuzy chô liata a ku a pathlapa vâta Hama o cha Esthy ei pie, ano chhao cha pa-aosao haw ei ta.

8 Chatawhcha Zuzy lâta na khopa hawhta abei moh ta paphao awpa châ roh la, abei kusadi ta chahnaopa ta bai teh; abei moh ta ropa nata abei kusadi ta chahnaopa nata baipa cha ahy hmah ta panano thei veih ei.” tah ta.

9 Abei chârohtuhpa zy cha cha noh tlai chata, thla thôhna, Sivan thla noh syno nata noh thôh noh ta aw ei ta; Môdekai biepiepa hawhta Zuzy lâta zy, hyutuhpa zy lâta zy, India tawhta Ethiôpia taihta râh pachhaihpa to lâna chata âmo châ chyu ta, pho to âmo reih chyu ta, Zuzy lâta chhao, âmo châ chyu ta, ama reih ta paphao ei ta.

10 Abei Ahasuara moh ta roh ta, abei kusadi ta chahnao ta, cha cha arâ paphaosa ei ta, ano pasapa tlai abei chata a hmâh tyhpa arâ chahra ngaitapa chyhsa ta kiapa ta parâsa ei ta.

11 Cha cha chata Zu khi to liata chyhsa zy cha a pabohsa awpa ta a pachypa ta âmo a vaw dyuh awpa chyhsa zy nata râh chô liata bie a hneituhpa zydua pahleipadia awpa nata thiepa ta vaw pamua awpa ta hmaohpakhypa ta ama sawnawh zy, ama chanô zy,

12 Abei Ahasuara râh pachhaihpa zydua chhôh liatahpa noh kha ta thie awpa ta, seichâna ta patu khai awpa ta abei ta bie pie ta, cha noh cha Adar thla, thla hrawhleinona, noh hrawhleithôh noh a châ.

13 Cha cha liata biepiepa cha, cha noh liata ama khakhaipa zy chô liata phuh ama la thei nawpa ta Zuzy cha a pachyhpa ta ama y thei nawpa ta râh pachhaihpa zydua lâta paphaopa ta chyhsa zydua lâta phuah awpa tahpa a châ.

14 Chatanachata a chatlie ngaitapa ta abei biepiepa ta, abei châta hmâh tyhpa arâ chahrapa chôta kiapa cha a râkheituhpa sahlaozy cha pua ei ta; chatawhcha bihpihpa cha abei o Susa liata phuahpa a châ.

15 Chatawhcha Môdekai cha abei poh a nohsaih papa nata ngyuhpa a bupa ta, ngôh beilakho rôhnah ngaitapa nata poh rihdipa, viahpakao pasihpa saidôhpa a kypa ta abei o tawhtapa cha pua ta, Susa khih cha aw ngâh kaw ei ta, aly ngaita ei ta.

16 Zu sahlao chata a khaihpa zy, alyna zy, thaphana zy, palyupalihna zy hnei ei ta.

17 Abei biepiepa nata abei bie pathlupa tlôna râh pachhaihpa nata khih maih liana chata alyna nata thaphana hnei ei ta, kyhchhi zy tao ei ta, yna noh zy rao ei ta. Cha râh zy liata chyhsa zy hry liata a hluhpi cha Zu chyhsa ta a tao ei ta, Zuzy cha chi haw ei ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 9

Esthy 9

Zuzy ta ama khakhaipa zy cha ama tiah

1 Chatanachata thla hrawhleinona, Adar thla, noh hrawhleithôh noh, Zu sahlao khakhaipa zy ta ama chô liata ryurei awpa ta ama hnabeiseina noh, abei biepiepa hawhta ama rao nawpa noh cha a vaw hnia ha ta, châhrasala â lielâ ta Zuzy ta âmo a haotuhpa zy chô liata ryu ama reina tlao vaw châ ta,

2 Abei Ahasuara râh pachhaihpa zydua liata Zu sahlao cha ama rao nawpa a tluatuhpa chôta ku pathla awpa ta ama khihzy liana chata a hmaohpakhy ei ta. Ahy hmah ta pahnie leipa ei ta, âmo cha chyhsa zydua ta chi haw ei ta.

3 Cha râh pachhaihpa liata chyhsa phapa zydua zy, hyutuhpa zy, râh avaotuhpa zy, abei raihriatuhpa zy chata Zuzy cha bao ei ta, Môdekai ama chipa vâta.

4 Môdekai cha abei o liata chyhsa rôhnah ngaitapa châ ta, a moh cha ama râh pachhaihpa zydua liata pathâh haw hra ta; Môdekai cha bie a hnei via lymâpa a châ.

5 ‘Chatawhcha Zuzy chata ama khakhaipa zy cha zaozi ta chhawh ei ta, thie ei ta, pahleipadia ei ta, âmo a haotuhpa zy chô liata ama khopa hawhta tao ei ta.

6 Abei o Susa liata Zuzy ta chyhsa za pangawh thie ei ta, pahleipadia ei ta,

7 Hamedatha sawchapawpa Zuzy khakhaipa Hama sawchapawpa zy pahrawh,

8 Pasadatha zy, Dalfôna zy, Aspatha zy,

9 Pôratha zy, Adalia zy, Aridatha zy,

10 Parmasta zy, Arisai zy, Aridai zy, Vaizatha zy thie ei ta; hraona sôh deikua cha hria veih ei.

11 Cha noh liana chata abei o Susa liata ama thiepa hluh zie cha abei hmiakô liata pahnosa ei ta.

12 Chatawhcha abei chata Beinô Esthy hnohta, “Zuzy chata abei o Susa liana heta chyhsa za pangawh nata Hama sawchapawpa zy pahrawh thie ei ta, ama pahleipadia haw. Abei râh pachhaihpa hropa liana chata kheihta rimâ ma a châ aw tly! Khâpa na hiah aw? Piepa na châ aw. Khâpa na khoh heih aw? Taopa a châ tlai aw,” tah ta.

13 Esthy chata, “Abei ta a ryh a tah khiahtala Susa liata Zuzy heta atanoh ta biepiepa hawhna heta mylâ chhao tao ei sala. Hama sawchapawpa pahrawh zy cha pa-aosaona liata bangiepa châ mawh sy,” tah ta.

14 Chatawhcha abei chata cha hawhta tao awpa ta bie pie ta; Susa liata biepiepa cha phuah ei ta. Hama sawchapawpa pahrawh zy cha bangie ei ta.

15 Susa liata Zuzy cha Adar thla noh hrawhleipalih taihta a hmaohpakhy ei ta, Susa liata chyhsa za thôh thie ei ta; châhrasala hraona sôh cha hria veih ei.

Pachaona noh kyhchhi

16 Chatawhcha Zu hropa abei râh pachhaihpa to liata a ypa zy chhao ahmaohpakhy ei ta, a paboh awpa ta a pachyh ei ta, ama khakhaipa zy liata thlahlôhpa ta y ei ta, âmo a haotuhpa zy hryta chyhsa thy sari nata sâh pangawh thie ei ta; châhrasala hraona sôh cha hria veih ei.

17 Adar thla noh hrawhleithôh noh ta, cha cha tao ei ta, chatawhcha noh hrawhleipalih noh chata a pahâ ei ta, kyhchhi noh nata thaphana noh ta tao ei ta.

18 Susa liata Zuzy deikua cha cha noh noh hrawhleithôh nata noh hrawhleipalih noh ta ahmaohpakhy ei ta, noh hrawhleipangawh noh ta a pahâ ei ta, kyhchhi noh nata thaphana noh ta tao ei ta.

19 Chavâta kuh a hnei leipa khih zy liata Zuzy chata Adar thla noh hrawhleipalih cha thaphana nata kyhchhina noh nata noh rôhnahpa nata tovyuh a paphaopa noh ta ama tao.

20 Chatawhcha Môdekai chata cha hmozy cha roh ta, Abei Ahasuara râh pachhaihpa zy chhôh liata Zu zydua lâhnia nata lâhla liata chyhsa zy cha paphao ta,

21 Adar thla noh hrawhleipangawh noh cha kô chareih yna noh ta hmâ awpa ta bie pie ta,

22 cha noh liana chata Zuzy cha ama khakhaipa zy tawhta thlahlôhpa ta ama y hapa vâta nata cha thla liata pachârôhna cha ama châta alyna lâta a liepa ta, chana noh cha aly ngaitapa ta a vaw châ hawpa vâta; chatawhcha kyhchhi noh nata thaphana noh nata tovyuh a paphaohpa noh nata sipasapa zy hmo pina noh châta tao awpa ta bie pie hra ta.

23 Chatanachata ama vaw tao pathao haw chiehpa hawhta nata Môdekai ta ama hnohta a paphaopa hawhta Zuzy chata tao a chhuah ei ta.

24 Akaki chyhsa Hamedatha sawchapawpa Hama, Zuzy khakhaipa chata Zuzy cha pahleipadia awpa ta tei ta, Pur vaw pachao haw tlôh ta, cha cha âmo pamua awpa nata pahleipadia awpa ta pachaona a châ;

25 châhrasala abei hmiakô ta cha bie cha a vaw tlô nahta hmoparao ngaitapa ta Zuzy a teina cha ano luh chôta a lie aw ta, ano nata a sawchapawpa zy cha bangie awpa a châ tahpa ta bie a pie.

26 Chavâta cha noh zy cha Purim bi ei ta, cha cha pur tawhta bipa a châ. Chatanachata cha bie zydua vâta zy, cha hmozy vaw tlôpa ama hmôpa vâta zy, ama chô liata hmo a vaw tlôpa vâna zy chata,

27 Zuzy chata âmo chhâ liata nata ama pathlazy nata âmo a vaw chhaipa maih chhâ liata pahlei chachei leipa ta cha noh zy cha châ paphaopa liata ropa hawhta nata a daihti raopa hawhna tlai chata kô chareih yna noh châta hmâh awpa ta tah ei ta; râh pachhaihpa to liata, khi to liata a thei thlâh hapa ta yna noh ta ama hmâh awpa a châ, chatawhcha cha Purim noh zy cha Zuzy hry liata a papeisa leipa ta y awpa châ leipa ta, cha a thei thlâh hana chhao ama pathlazy liata a chhâ awpa châ vei tah ei ta.

29 Chatanachata Abihai sawchanônô Esthy nata Zu chyhsa Môdekai chata Purim kyh liata châ paphaopa mianona cha pa-i awpa ta bie hnei ngaitapa ta roh ei ta.

30 Ahasuara râh pachhaihpa za kha nata syno nata miasari liata Zu sahlao zydua hnohta, bie thlahlôh chhih ngaitapa nata bie hmeihseihpa ta, 31 Purim noh ama raopa zy cha Zu chyhsa Môdekai nata Beinô Esthy biepiepa hawhta nata âmo nata ama pathlazy châta nie leina kyh nata ama chana noh awpa âmo ta ama raopa cha pa-ipa ta châ paphao ta. 32 Purim kyh cha Esthy biepiepa ta pa-ipa châ ta, châbu liata ropa a châ. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10

Esthy 10

Esthy 10

Môdekai rôhnahna

1 Abei Ahasuara chata a râh nata tilaipi liahpahlô zy cha chhie pacheisa ta.

2 A hmotaotheina nata a thatlôna ta, a hmotaopa zydua nata Môdekai rôhnahna kyh abei ta a pachônôsana ryhpa bih a ki ngaitapa ta Media nata Persia abeizy amâ bei nota thâtih rona châbu liata ropa ta y vei mâ?

3 Zu chyhsa Môdekai cha Abei Ahasuara a pazipa châ ta, Zuzy hry liana chata chyhsa rôhnah ngaitapa, a unawh zy hluhpi palôhpatlâhpa ta, a chiheih zy phana tluapa ta, a phoheih zydua lâta thlahlôhna bie a reih tyhpa châ ta. 

Esthy (Esther)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10