Daniel 1

Daniel Châbu 1

Daniel nata a viasazy achuna

1 Zudah beipa Zehôiki ryureina kô thôhna liana chata, Babylaw beipa Nebukaneza Zerusale lâ a vy ta, dô ta.

2 Abeipa chata Zudah bei Zehôiki cha a ku liata pie ta, Khazohpa o hmobaoh thokhazy chhaota; ano chata Shina râh liata a khazoh o lâta siekhei haw ta; a khazohpa sôh-o liata vaw tlôkhei ta.

3 Chatawhcha abei chata Izarel sawzy hry liatahpa, abei pathlazy nata chyhsa phapa sawzy,

4 satlia seina a hnei leipa, hmipha ngaitapa, sona to liata ryhpaona a pahnopa, pahnona lâta novâhpa, hmo a laichadai thaipa, abei o liata a pielyu thaipa, vaw chhihtha awpa nata Kaldia reih nata hmo thaina pachu awpa ta, a chyhsa hrilyupazy hyutuhpa Aspenaza cha chho ta.

5 Abei chata abei pati pahâhpa hawhta nata a kresawti doh tyhpa tawhtapa cha nohchareih ama to awpa ta rao ta, cha hawhta kô thôh pasapa ta, cha khai tawhta abei hmiakô liata amâ duah thei nawpa ta.

6 Hezy hry liana heta Zudah pathla liatahpa Daniel zy, Hananiah zy, Mishael nata Azariah zy a hlao ei ta.

7 Hrilyupa hyutuhpa chata ama moh bi chyu ta: Daniel cha Beltesaza, Hananiah cha Shadraka, Mishael cha Mesaka, Azariah cha Abe-nekô tahpa ta.

8 Châhrasala Daniel ta a palôhrupa ta abei pati nata a kresawti do tyhpa zy chata a papuapalei lei awpa ta khâchâ a chhuah ta; a papuapalei lei nawpa ta hrilyupazy hyutuhpa cha hiah ta.

9 Chatanachata Khazohpa ta Daniel cha hrilyupazy hyutuhpa liata khokheina nata ngiachhiena patosa ta;

10 hrilyupazy hyutuhpa chata Daniel hnohta, “Nama nie awpa nata nama do awpa a raotuhpa ei beipa, beichaipa cha ei chi; nama hmia he satlia, nama rihchâhkhazy hlâta a chhie viapa ta a vaw hmo aw mâ tâh! Chata a châ khiahta cha beichaipa liata ei luh chôta chichhihpa ta nama taopa a châ aw mâ tâh,” tah ta.

11 Chatawhcha hrilyupazy hyutuhpa chata Daniel zy, Hananiah zy, Mishael zy, Azariah zy mokhâhtuhpa ta a taopa hnohna chata Daniel ta,

12 “Ei châ haw na, chakaotuhpazy he noh hrawh maniah pasia teh, niepa âhnalasi nata dopa tisopa maniah pie thlâh ha teh.

13 Chatawhcha na hmiakô liata eimâ lânazie nata abei pati pahâhpa a niepa satliazy a lânazie cha pakhopa châ sala, na hmônazie hawhta na chakaotuhpazy chô liata tao mah y,” tah ta.

14 A vaihtuhpa ta cha bie cha paryhsa ta, âmo cha noh hrawh pasia ta.

15 Noh hrawh chhâna lâta abei pati pahâhpa a niepa satlia zydua hlâna chata ama hmia alânazie a ngia viapa ta tlao thawh via ei ta.

16 Chatanachata mokhâhtuhpa chata ama niepa nata ama dopa kresawti cha lapâpa ta âhnalasi tlao pie ta.

17 He satlia papalih he châ thaina nata sona zydua liata pahnona nata novâhna Khazohpa ta pie ta; Daniel chata aluahna nata mâsana zydua chhopasia thei ta.

18 Abei ta âmo a vaw chhi awpa ta noh a raopa chhâna lâna chata hrilyupazy hyutuhpa chata âmo sahlao cha Nebukaneza hmiakô lâna chata vaw chhihtha ta.

19 Abei chata bie a vaw chho chyu ei ta, âmo sahlao hry liana chata Daniel zy, Hananiah zy, Mishael zy, Azariah zy hawhpa rai y leipa ei ta, chavâta abei hmiakô liana chata a duah haw ei ta.

20 Chatawhcha sona nata novâhna bie to abei ta a hiahri nata a khihnarâh tlokhuh liata dyuthaipa nata awhsi kyh a pahnopa zydua hlâna chata a lie hrawh ta ama pha via tahpa pahno ta.

21 Daniel cha Abei Kôrasa kô khana taihta hria lymâ ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 2

Daniel 2

Daniel ta Nebukaneza mâ a chhopasiazie

1 Nebukaneza ryureina kô nona liana chata Nebukaneza chata mâ sa ta; a palôh patypamâpa ta y ta, a mô thei khao leipa ta.

2 Chatanachata abei chata a mâsapa cha ano a chho awpa ta molie thaipazy, awhsi kyh a thaipazy, dyuthaipazy, Kaldia mozy aw awpa ta bie pie ta. Chatanachata a vy ei ta, abei hmiakô liana chata a duah ei ta.

3 Chatawhcha abei chata ama hnohta, “Mâ sa na ta, ei mâsapa cha pahno awpa ta ei palôh a tymâ ha ta,” tah ta.

4 Kaldia mozy chata Suria reih ta, abei hnohna chata, “Hy beichaipa, chhâzaw ta hroh mah y! Na mâsapa cha na chakaotuhpazy he chho la, chatawhcha a chhopasiana cha eima cha pamosa aw,” tah ei ta.

5 Abei chata Kaldia mozy cha a chhy ta ama hnohta, “Keima tawhtapa bie cha a pua haw, mâsapa nata a chhopasiana cha ei hnohta nama palâsa leipa khiahtala a chai khaipa châ aw eichi ta, nama ozy chhao ie sona ta taopa a châ aw.

6 Mâsapa nata a chhopasiana nama palâsa khiahta deikua cha kei tawhta hmopiepa nata lymâ nata palyupalihna rôhnah ngaitapa nama hmô aw: chavâta mâsapa nata a chhopasiana cha na pamosa teh u,” tah ta.

7 Âmo chata a ei nona ta achhy heih ei ta, “Abei chata cha mâsapa cha a chakaotuhpazy he maniah chho sala, a chhopasiana cha eima pamosa aw,” tah ei ta.

8 Abei chata a chhy ta, “Daihti nama pasihsapa deita a châ tahpa a siapa ta ei pahno; kei tawhtapa bie cha a pua haw tahpa nama pahno na.

9 Ei hnohta mâsapa cha nama palâsa leipa khiahtala nama châta ryhpa miakha deita a y: daihti a pahiena taihta ei hmiakô liata rei awpa haipa bie nata bie hraoleipa namâ chhuahnoh he. Chavâta mâsapa cha na chho teh u, chatawhcha a chhopasiana chhao eina pamosa thei eichi tahpa ei pahno aw.” tah ta.

10 Kaldia mozy chata abei cha a chhy ei ta, “Abei hmo he a pamosa thei aw pakha hmahta alei chô liana heta y veih ei: abei zy, hyutuhpa zy, ryureituhpa zy, ahy hmah ta he hawhpa hmo he molie thaipa tlyma, awhsi kyh a thaipa tlyma, Kaldia mo tlyma hiahri beih tlôh lei khâh ei ta.

11 Abei hmo a hnawpa he hmo ru ngaitapa châ ta, sapa ta a y leipa khazohzy tah dei leipa ta cha abei a pamosa thei awpa ahyhma ta y veih ei,” tah ei ta.

12 Cha vâna chata abei cha a pathi-ia ngaita ta, a hrâh ngaita ta, Babylaw chyhsa sopa zydua cha pahleipadia khai awpa ta bie pie ta.

13 Chatanachata biepiepa cha pua haw ta, chyhsa sopa sahlaozy cha thie awpa châ haw ei ta; Daniel nata a viasazy chhao thie awpa ta tlua ei ta.

14 Chatawhcha Daniel chata Babylaw chyhsa sopazy thie awpa ta a puapa, Ariôka, abei vaihtuhpa py hyutuhpa cha ryhpaona pahno ngaitapa nata so ngaitapa ta a chhy ta;

15 abei vaihtuhpa py hyutuhpa Ariôka hnohna chata, “Kheihtazie ta e abei biepiepa cha cha tlatluta â parah tly?” tahpa ta a chhy ta. Chatawhcha Ariôka chata Daniel cha chho ta.

16 Daniel cha a ngia ta, abei cha a chhopasiana a pamosa thei nawpa ta daihti pie awpa ta a haw ta.

17 Daniel cha a o lâ a di ta, cha hmo cha a viasa Hananiah zy, Mishael zy, Azariah zy chho ta,

18 Babylaw chyhsa sopa hropazy hry liata Daniel nata a viasazy cha ama leidia hra lei nawpa ta he bie anyupa kyh liana heta avâ Khazohpa ngiachhiena ama hia nawpa ta.

19 Cha bie nyupa cha zâ aluahna liata Daniel hnohta a luah ta, avâ Khazohpa cha reithai ta,

20 Daniel chata: “Khazohpa moh cha chhâzaw nata chhâzaw ta reithaipa ta y mawh sy,sona nata hmotaotheina ano eih châ tlôh ta.

21 Daihtizy nata daihti raopazy panano ta;abeizy pasie ta, abeizy padua ta;chyhsa sopa hnohta sona pie ta,pahno thaipa hnohta novâhna pie ta;

22 hmo a thuhpa nata hmo a nyupazy palâsa ta; zohna liata a ypa chhao pahno ta, a hnohta khaihna pahra ta.

23 Hy ei pathlatuhpazy Khazohpa, sona nata tao theina na pietuhpa, nâ liata eima hmo hiapa atahmâ na pahnosatuhpa cha lyna bie hlâpa ta ei cha reithai na; abei hmo cha na pahnosa haw tlôh chi ta,” tahpa ta reih ta.

24 Chatanachata Daniel cha Babylaw chyhsa sopazy pahleipadia awpa ta abei ta a raopa Ariôka lâna chata vawh ta, a hnohta, “Babylaw chyhsa sopazy cha pahleipadia khâ; abei hmiakô liana chata na chhihtha la, abei hnohna chata a chhopasiana ei pamosa aw na,” tah ta.

25 Ariôka chata Daniel cha a parah ngaitapa ta abei hmiakô lâna chata a chhi ta, a hnota, “Zudah seichâna ta a ypa hry liata abei lâta a chhopasiana a pahnosatuh awpa mo pakha ei hmô haw,” tah ta.

26 Abei chata Daniel, a moh Beltesaza hnohna chata, “Ei mâsapa nata a chhopasiana cha eina pahnosa thei chi ma?” vaw tah ta.

27 Daniel chata abei cha a chhy ta, “Hmo a nyupa, abei ta a pahno khohpa cha, chyhsa sopazy, molie thaipazy, awhsi ky a thaipazy, chhochhieliena kyh a hmâh thaipazy chata abei hnohta pamosa thei leipa ei ta;

28 châhrasala hmo nyupazy a phuahtuhpa Khazohpa cha avâ liata y ta, Abei Nebukaneza he atahmâ tawhta hmo a vaw y awpazy cha a pahnosapa a châ hih.

29 Hy beichaipa y, nâma chata na rakhô liana chata atahmâ tawhta hmo a vaw y awpazy pachâ chi ta, hmo nyupazy a phuahtuapa châta atahmâ tawhta hmo a vaw y awpazy cha a cha pamosa.

30 Kei heta mo hropazy hlâta sona ei hnei via pachaipa vâta he hmo nyupa he kei liata phuahpa châ leipa ta, abei lâta a chhopasiana pahnosa awpa ta tlao a châ, na pathipalôh liata na pachâpazy cha na pahno thei nawpa ta.

31 “Hy beichaipa, mohmia pasaih chi ta, nohthlahpa rôhnah ngaitapa vaw y ta. Cha nohthlahpa pahreipapi, thlarawsie ngaitapa cha, na hmiakô liata a duah ta; a lânazie chhao chichhih ngaitapa a châ.

32 Cha nohthlahpa cha a luh ngôh suapa châ ta, a chachôhna nata a bâhzy cha tâkâri, a py nata a bypizy dawh,

33 a pheizy thua, a pheipazah cha thokha thua, thokha beihlei châ ta.

34 Nama châta alô, ku ta châ leipa ta chakhiana taihta moh chi ta, cha chata nohthlahpa cha a pheipazah thua nata beihlei liana chata vi ta, padizao khai ha ta;

35 chatanachata thua zy, beihlei zy, dawh zy, tâkâri zy, ngôh zy cha hmaohkha ta zao khai haw ei ta, nopinoh sawhri liata sawsipa hawhta vaw châ haw ei ta; thlih ta âmo phaoh ta, ama yna su rai pahnopa châ khao leipa ta; châhrasala nohthlahpa a vituhpa alô cha tlâh laipapi lâta a vaw lie ta, alei tlokhuh bie ha ta.

36 “He he mâsapa cha châ ta; a chhopasiana cha abei hmiakô liana heta eima reih heih aw na.

37 Hy beichaipa y, nâma he abeizy beipa, avâ Khazohpa ta khihnarâh zy, hmotaotheina zy, thatlôna zy; rôhnahna zy a piepa châ chi ta;

38 chavâta khataih lâ rai chyhsa sawzy pahrâna maih liata lyurâhpa sa zy, avâ liata a zawpa zy, na ku liata pie ta, ama zydua chô liata ryu reih awpa ta cha tao ta: ngôh luh cha nâma na châ.

39 Na hnôh lâta khihnarâh hropa nâma hlâta chynawh viapa a vaw duah aw; dawh, khihnarâh miathôhna, alei chô zydua liata ryu a reih awpa cha a y heih aw.

40 Chatawhcha khihnarâh miapalihna cha thua hawhta pachyupa a châ aw: thua chata padizaopa ta hmo zydua a pahnie tyhpa hawhna heta: thua ta hmo zydua a pakeipa hawhta ano chata padizaopa ta a charoh pazao aw.

41 Chatawhcha a pheipazah nata a parozy cha thokha beihvituhpa beih-lei, thokha thua a châpa ta na hmôpa hawhna tlai khata khihnarâh a pachhaipa châ aw ta, châhrasala ano liana chata thua pachyuna cha a y aw, thua nata beih-lei naipa a pahlaopa na hmôpa hawhna tlai khata.

42 Chatawhcha a pheiparo thokha thua, thokha beih-lei a châpa hawhna khata khihnarâh cha thokha liata cha thatlôpa châ aw ta, thokha liata a rao nao aw.

43 Thua nata beih-lei naipa a pahlaopa na hmôpa hawhna tlai khata âmo cha chyhsa chi ta a pahlao aw ei ta; châhrasala thua nata beih-lei apahlao hmeihseih thei leipa hawhta apazao thlâh ha aw veih ei.

44 Cha abeizy noh liana chata avâ Khazohpa ta khihnarâh vaw padua aw ta, cha cha rao beih khao leipa aw ta, a beina chhao mo hropa châta siesaipa châ hra aw vei; he khihnarâh zydua he padizao khaipa ta patlô khai aw ta, chhâzaw ta a duah thlâh ha aw;

45 tlâh tawhta alô, ku ta châ leipa ta chakhiapa ta thua zy, dawh zy, beih-lei zy, tâkâri zy, ngôh zy a padizaopa na hmôpa hawhna tlai khata. Khazohpa rôhnah ngaitapa chata abei hnohna heta atahmâ tawhta hmo a vaw y awpa cha a phuah. Mâsapa cha a hmeiseihpa tlai châ ta, a chhopasiana chhao a dopa tlai a châ,” tah ta.

46 Chatanachata Abei Nebukaneza cha â khu lâta pao ta, Daniel cha a naoh ta, a hnohna chata hmohlâpa nata rohpahâhpazy vaw hlâ awpa ta bie pie ta.

47 Abei chata Daniel cha a chhy ta, “He hmo nyupa na phuah theinazie liana heta nama Khazohpa cha khazohzy Khazohpa, abeizy Beipa, hmo nyupa a phuahtuhpa a châ tlai na,” tah ta.

48 Chatanachata abei chata Daniel cha palai ta, hmopiepa rôhnahpa a hluhpi pie ta, Babylaw râh tlokhuh liata ryureituh awpa nata Babylaw chyhsa sopa zydua chô liata hyutuh chaipa châ awpa ta tao ta.

49 Daniel hiapa hawhta abei chata Shadraka zy, Mesaka zy, Abenekô zy cha Babylaw râh liata hyutuhpa ta soh ta, Daniel deikua cha beichaipa ryureina liana chata y haw ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 3

Daniel 3

Mei chichhihpa tawhta pabohsapa a chânazie

1 Abei Nebukaneza chata ngôh nohthlahpa, a sâhna lâ dy sycharu, a phiana lâ dy charu tao ta, Babylaw kao liata Dura bypi liata padua ta.

2 Chatawhcha Abei Nebukaneza chata biehneituhpa zy, vyuhpa ta a ytuhpazy, ryureituhpa zy, sôh mokhâhtuhpa zy, a ryhna a raotuhpa zy, ryhpa a pahnopazy nata khihnarâh ryureituhpa zydua cha Abei Nebukaneza nohthlahpa paduapa liata ahmaohpakhyna liata ahlao awpa bie tah ta.

3 Chatawhcha biehneituhpa zy, vyupa ta a ypazy, a vaotuhpa zy, ryureituhpa zy, sôh mokhâhtuhpazy, a ryhna a raotuhpa zy, ryhpa a pahnopa zy nata râh chhôh ryureituhpa zydua cha Abei Nebukaneza nohthlahpa paduana pahmaopakhyna liana chata a vaw pakhy ei ta, Abei Nebukaneza nohthlahpa paduapa hmiakô liana chata a duah chyu ei ta.

4 Chatawhcha ao paro ngaitapa ta tlâh-awhpa vaw awh ta, “Hy, chyhsa to saih u, reih to saih u,

5 chiahmie zy, ramo zy, totâ zy, tlaipi zy, totâ laipa zy, baza zy nata paropasyupa chi zydua nama thei tita Abei Nebukaneza ngôh nohthlahpa paduapa cha a khupa ta a naoh awpa ta biepiepa nama châ;

6 ahyrai a khupa ta a naoh leipa cha, cha nohna tlai chata patina meihô liata thy awpa a châ aw,” tahpa ta.

7 Chavâta cha noh liata zawpi zydua ta chiahmie zy, ramo zy, totâ zy, tlaipi zy, totâ laipa zy nata paropasyu theipa zydua ama thei nata chyhsa tozy, pho tozy, reih to zydua chata Abei Nebukaneza ngôh nohthlahpa paduapa cha a khupa ta a naoh ei ta.

8 Cha nona chata Kaldia chyhsa thokhazy a vaw hnia ei ta, Zu chyhsazy cha vaw leih ei ta.

9 Abei Nebukaneza hnohna chata “Hy beichaipa y, chhâzaw ta hroh mah y.

10 Nâma ta, hy beichaipa y, chyhsa ahyrai chiahmie zy, ramo zy, totâ zy, tlaipi zy, totâ laipa zy, baza zy, paropasyu theipa chi zydua a theipa maihta a khupa ta ngôh nohthlahpa amâ naoh awpa a châ;

11 ahyrai a khupa ta a naoh leipa maih patina meihô liata thypa ama châ aw, tahpa ta biepiepa tao chi ta.

12 Zu chyhsa thokha Babylaw râh kyh liata hyutuhpa ta na taopa Shadraka zy, Mesaka zy, Abenekô zy kha y ei ta. He chyhsazy heta hy beichaipa y, châ papeisa veih ei; na khazohzy chakao leipa ei ta, ngôh nohthlahpa na paduapa cha a naoh hra veih ei,” tahpa ta reih ei ta.

13 Chatanachata Nebukaneza chata pathi-iapa nata hiehâh ngaitapa ta Shadraka zy, Mesaka zy, Abenekô zy cha a vaw chhi awpa ta bie pie ta. He chyhsazy he abei hmiakô liana chata a vaw chhi ei ta.

14 Nebukaneza chata adaih ei ta ama hnohta, “Hy Shadraka, Mesaka, Abenekô, ei khazohpa chakao leipa ta, ei ngôh nohthlahpa taopa a naoh lei awpa namâ chhuahpa rai ma a châ?

15 Atahmâ he chiahmie zy, ramo zy, totâ zy, tlaipi zy, totâ laipa zy, baza zy nata a paro theipa zydua nama thei tita a khupa ta ei nohthlahpa taopa namâ naoh ha khiahtala a pha na; namâ naoh leipa khiahta deikua cha noh liana tlai chata patina meihô liata thypa nama châ aw; ei ku tawhtapa cha pachha awpa khazoh cha ahy e a châ?” tah ta.

16 Shadraka zy, Mesaka zy, Abenekô zy chata abei cha achhy ei ta, a hnohta, “Hy Nebukaneza  y, he kyh liana heta eima châ chhy awpa chhao byuh vei.

17 Eima Khazohpa, eima chakao tyhpa chata patina meihô tawhtapa maniah pachha thei tlôh ta, na ku tawhtapa chhao, hy beichaipa, na khazohzy chakao leipa aw pi ta, na ngôh nohthlahpa paduapa chhao a naoh hra aw ma pi, tahpa pahno mah y,” tah ei ta.

19 Chatanachata Nebukaneza cha a pathi-ia ngaita ta, Shadraka zy, Mesaka zy, Abenekô zy liana chata a hmia cha anano khai ha ta. Patina mei cha a sanazie tyhpa hlâta ei sari ta pasah awpa ta bie pie ta.

20 Chatawhcha a pheisaih sahlao hry liata chyhsa thatlôpa thokhazy cha Shadraka zy, Mesaka zy, Abenekô zy chahry awpa nata patina meihô liata thy awpa ta bie pie ta.

21 He chyhsazy he ama viahpakao ry zy, ama khutho zy nata ama chysia hropa zy chhaota chahrypa ta patina meihô liata thypa cha haw ei ta.

22 Abei biepiepa cha a parah ngaitapa vâta nata mei cha a sah ngaitapa vâta Shadraka zy, Mesaka zy, Abenekô zy a chalotuhpazy cha mei-paleih chata thie haw ei ta.

23 He chyhsa pathôh Shadraka zy, Mesaka zy, Abenekô zy he chahryna chôta patina meihô liah liana chata pao ei ta.

24 Chatanachata Abei Nebukaneza chata a noâh kaw ta, a chatliepa ta thyu ta, a ryhna a raokheituhpazy hnohna chata, “Chyhsa pathôh kha chahrypa ta mei liata thy ma pi ma khâ?” tahpa ta reih ta. Abei cha a chhy ei ta, “Y, abeichaipa y, eima thy na,” tah ei ta.

25 Ano chata, “Pachâ teh u, chyhsa papalih pathlapa ta mei liata a khie ei ta, pasa chachei leipa ta hmô na ta, a papalihna a lânazie chhochhi cha khazoh hawhta a châ,” tah ta.

26 Chatanachata Nebukaneza cha patina meihô chhikao liana chata a vaw hnia ta, “Shadraka, Mesaka, Abenekô y, nâmo Chônôchaipa Khazohpa chakaotuhpazy saih u, vaw pua ula, he lâ a vy teh u,” tahpa ta chho ta. Chatanachata Shadraka, Mesaka nata Abenekô zy cha mei tawhta vaw pua ei ta. Biehneituhpa zy, vyuhpa ta a ytuhpa zy, râh a vaotuhpa nata abei a ryhna a raokheituhpazy a vaw pahmaopakhypa chata he chyhsazy pôhpa chô liana heta mei ta hmotaotheina hnei leipa ta, ama sâ chhao kâ hra vei, ama viahpakao pasihpa zy a nano hra leipa ta, mei roh rai chhao pahnâh hra vei, tahpa hmô ei ta.

28 Nebukaneza chata bie reih ta, “Shadraka zy, Mesaka zy, Abenekô zy Khazohpa cha reithaipa ta y mawh sy; ano chata a vâlyuhchâpa vaw tuah ta, a chakaotuhpa ano angiapâtuhpazy cha pachha ta, cha chyhsazy chata ama Khazohpa dei leipa ta cha khazoh hropa rai chakao leipa ta amâ naoh lei nawpa ta abei biepiepa pananopa ta ama pôhpa hlâ ngâh ei ta.

29 Chavâta chyhsa to, pho to, reih to, Shadraka zy, Mesaka zy, Abenekô zy Khazohpa chô liata bie pha leipa a reihpa maih cha chhawh pathlahpa châ aw ei ta, ama ozy cha ie sona ta taopa a châ aw tahpa biepiepa ei tao; he hawhna tlaita a pachha theipa Khazohpa hropa rai y tlôh lei khâh ei ta,” tah ta.

30 Chatanachata abei cha Shadraka zy, Mesaka zy, Abenekô zy cha Babylaw bia liana chata palai haw ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 4

Daniel 4

Nebukaneza hrunazie

1 Abei Nebukaneza chata chyhsa tozy, pho tozy, rei to zydua, aleilô zydua liata a pahrâpazy hnohna chata: Nama chô liata adyhna papôhsapa ta y mawh sy!

2 Chônôchai Khazohpa ta ei hnohta hmo pamosanazy, hmonoâhpazy, a tao hawpa he palâsapa a pha ei tah na.

3 A hmo pamosanazy cha rôhnah ta, a hmotao noâhpazy cha thata a châ kaw dia! A khihnarâh cha khihnarâh hlôpa châ ta; a ryureina cha chhâ y chhôh zydua a châ aw.

4 Kei, Nebukaneza he ei o liata phasa ngaitapa nata ei o rôhnahpa liata hneirôh ngaitapa ta y na ta.

5 Mâsana ei chi ngaitapa sa na ta; ei rakhô liata ei pachâpadyna nata ei luh liata aluahna chata na patypamâ ta.

6 Chavâta Babylaw chyhsa sopa zydua cha ei mâsapa chhopasiana eina pahnosa thei nawpa ta ei hmiakô liata a vaw chhi awpa ta biepie na ta.

7 Chatanachata molie thaipazy, awhsi kyh a thaipa zy, Kaldia mo zy, chhochhieliena kyh a hmâhpazy cha a vy ei ta; ei mâsapa cha chho na ta, châhrasala a chhopasiana rai cha na pahnosa leipa ei ta.

8 A chhâ chaina liata Daniel, ei khazohpa moh hawhpa a phaohpa, a moh Beltesaza, ano liata khazoh pathaihpazy thlahpa a ypa cha ei hmiakô liata a vy ta: chatawhcha ei mâsapa cha chho na ta,

9 “Hy Beltesaza y, molie thaipazy hyutuhpa y, nâma liana chata khazoh pathaihpazy thlahpa a y tahpa nata bie nyupa rai ta cha patypamâ vei tahpa ei pahnopa vâta, ei mâ lâta ei hmôpa aluahna nata a chhopasiana cha na chho tua.

10 Ei rakhô liata ei luh liata aluahnazy cha he hawhna heta a châ: Mohmia pasaih na ta, alei liah liah liata tho vaw y ta; a sâhnazie cha thata châ ta. 11 Tho cha laiseih ta, a lai pha ta, a sâhna lâta avâ daih ta, kaokih tawhta a lâ thei khai ta.

12 A hnazy cha a ngia ta, a theizy hluh ta, ano liana chata hro hneipa zydua chata niepa y ta. Lyurâhpa sazy chata a nodina a chhai ei ta, avâ liata a zawpa pavawzy cha a chiahzy liata pahrâ ei ta, sapa a phaohpa zydua cha ano pasapa ama châ.

13 “Ei rakhô liata ei zia thlâh no ta, ei luh liata aluahna hmô na ta, avâ tawhta vaihtuhpa mo pathaihpa za chô ta.

14 A paro ngaitapa ta, ‘Tho cha thlu la, a chiahzy cha pathai la, a hnazy chatho pathlah la, a theizy papai pathlah teh; a ry tawhtapa lyurâhpa sazy cha pai ei sala, a chiah tawhtapa pavawzy chhao a zaw pai ei se.

15 Anodeikuacha lyurâhpa sibiepa a pyupa hry liata alei liata a thabiapa cha thua nata daw ta chahrypa ta, pahlô la. Avâ diati ta dâ sala; a tovyuh awpa cha lyurâhpa sazy nata sibiepa hry liata ypa châ se;

16 a palôhrupa cha chyhsa palôhrupa tawhta pananopa châ sala, a hnohta lyurâhpa sa palôhrupa piepa châ mawh sy; a chô liata daihti miasari lei mawh sy.

17 Bie pathlapa he vaihtuhpazy biepiepa ta taopa châ ta, hmo a hnawpa he mo pathaihpazy bie ta taopa châ ta. Chônôchaipa chata chyhsazy abeina khihnarâh chô liata bie hnei ta, a khokheipa maih pie ta, chyhsa nawh chaipazy chhao a pahrâsa tyh tahpa chyhsa ta ama pahno nawpa ta a châ,’ tahpa ta aw ta.

18 He mâ he kei, Abei Nebukaneza ta sa na ta, nâ, hy Beltesaza y, a chhopasiana cha phuah teh. Ei khihnarâh liata chyhsa sopa zydua chata a chhopasiana cha na pahnosa thei tlôh lei khâh ei ta; nâ deikua chata na pahnosa thei na, nâma liana chata khazoh pathaihpazy thlahpa cha y tlôh ta,” tahpa ta.

19 Daniel, a moh Beltesaza cha no-umâpa ta y chy ta, a pachâpazy chata patypamâ ta. Abei chata a hnohta, “Beltesaza y, mâsapa tlyma, a chhopasiana tlyma chhaota cha patypamâ khah se,” tahpa ta reih ta. Beltesaza chata a hnohta, ‘’Ei beipa y, mâsapa cha, châ haotuhpa châta châ sala, a chhopasiana chhao cha na khakhaipazy châta châ mawh sy.

20 Tho na hmôpa vaw laiseihpa ta, a lai phapa ta, avâ daihpa ta, kaoki tawhta a lâ thei khaipa nata a ry liata lyurâhpa sazy pahrâpa ta, a chiahzy liata avâ liata pavaw a zawpazy pahrâna a vaw châpa cha,

22 hy beichaipa y, nâma châ chi ta; laiseih chi ta, na tha tlô ta, na rôhnahna cha laiseih ta, avâ daih ta, na ryureina cha kaoki taihta châ tlôh ta.

23 Avâ tawhta vaihtuhpa mo pathaihpa za chôpa ta, ‘Tho cha thlu la, pahleipadia teh; anodeikuacha lyurâhpa sibiepa a pyuhpazy hry liata, alei liata a thabiapa cha thua nata dawh ta chahrypa ta pahlô la; avâ diati ta padâ sala, a to awpa cha lyurâhpa sazy nata ypa châ mawh sy, a chô liata daihti miasari a leina taihta vaw khôpa ta.

24 He he a chhopasiana cha a châ, hy beipa y, Chônôchaipa biepiepa, beichaipa ei beipa chô liata a vaw tlôpa cha a châ na;

25 chyhsa hry tawhtapa topa châ aw chi ta, na pahrâna cha lyurâhpa sazy hry liata châ aw ta; viahchao hawhta sibiepa paniesapa châ aw chi ta, avâ diati ta padâpa châ aw chi ta, na chô liata daihti miasari a lei aw; Chônôchaipa chata chyhsazy abeina khihnarâh chô liata bie hnei ta, a khokheipa maih a pie tyh tahpa na pahno hlâ lei cha.

26 A thabiapa pahlôh awpa ta bie ama vaw piepa hawhna khata avâ ta bie a hnei tahpa na pahno tawhna chata na khihnarâh cha nâma eih a châ ha aw.

27 Chavâta hy beipa y, ei cha chhohiana bie he apyh tlâh awpa ta pachâ la; na moleina cha siana ta ri la, na hmoparaonazy cha chyhsa sipasapa chô liata zawngiahna ta ri teh, na hro lôhrâtlôna he a pasie thei ngyu aw ta,” tahpa ta a chhy ta.

28 He zydua he Abei Nebukaneza chô liana chata a vaw tlô.

29 Thla hrawhleino chhâna liana chata Babylaw beipa o chô liata abei cha a khie ngâ ta,

30 abei chata, ‘’He Babylaw rôhnahpa he keima thatlôna tlaita abei pahrâna su châta nata ei rôhnahna angia nawpa ta ei taopa cha châ vei ma?” tahpa ta reih ta.

31 Cha bie cha abei pakah tawhta a pua hai nota, avâ tawhta ao za pua ta, “Hy Abei Nebukaneza y, nâ lâta bie a vaw tlô na: Abeina khihnarâh chata a châ nanosai haw,

32 chyhsapa hry tawhta topa châ aw chi ta, na pahrâna cha lyurâhpa sa hryta a châ aw; viahchao hawhta sibiepa paniesapa châ aw chi ta; na chô liata daihti miasari a lei aw; Chônôchaipa chata chyhsapazy abeina khihnarâh chô liata bie hnei ta, a khokheipa maih hnohta a pie tyh, tahpa na pahno hlâ lei cha,” tahpa ta.

33 Cha nona tlai chata pachiana cha Nebukaneza chô liata thlai vaw tlô ta. Chyhsapa hry tawhtapa topa ta y haw ta, viahchao hawhta sibiepa nie ta, a pôhpa cha avâ diati ta padâpa ta y ta, a sâzy pahmôpi hmi hawhta seihpa ta nata a patozy pavaw pato hawhta a châna taihta.

34 Cha nohzy chhâna lâna chata, kei, Nebukaneza chata avâ lâ mohmia pasaih na ta, ei novâhna cha kei lâta vaw kua ha heih ta. Chônôchaipa cha byhnâ aw na ta, a hroh thlâh hapa cha reithai na ta, za na ta; a ryureina cha chhâzaw ryureina châ ta, a khihnarâh cha chhâ y chhôh zydua châ tlôh ta;

35 chhaolei a pahrâpa zydua he khâpa hrao leipa ta pachâpa châ ei ta, avâ pheisaih hrizy hry liata nata chhaolei a pahrâpazy hry liana chata ano reisai ta tao ta; ahyta hmahta a ku cha pahâsa thei leipa ei ta, a hnohta, “Nâma ta khâpa na tao?” chhao tah thei hra veih ei.

36 Cha noh lilaw chata ei novâhna cha kei lâta vaw kua heih ta; ei khihnarâh rôhnah nawpa ta ei rôhnahna nata angiana cha kei lâta vaw kua haw hei ta. Ei ryraokheituhpazy nata ei chyhsa rôhnahpazy chata na vaw pangai heih ei ta, ei khihnarâh liana chata pa-ipa ta y na ta, rôhnahna thata baichhapa ta y na ta.

37 Chatanachata kei, Nebukaneza heta avâ Beipa cha reithai na ta, pasâhsa na ta, za na ta; a hmotaopa zydua cha a do ta, a lâpizy cha sia tlôh ta; apalaipa ta a chareipazy cha a panawh thei. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 5

Daniel 5

Pâhchhô liata ku ropa

1 Abei Belsaza chata a chyhsa rôhnahpa sâh khazy châta kyhchhi rôhnah ngaitapa tao ta, sâh kha hmiakô liana chata kresawti doh ta.

2 Belsaza chata kresawti a do via tawhna chata ngôh nata tâkâri hmobaoh a paw Nebukaneza ta Zerusale achhyna-o tawhtapa a lapa cha vaw cheih awpa ta bie pie ta; abei nata a chyhsa rôhnahpazy nata a lahpinôzy nata a nôthozy ta kresawti ama do nawpa ta.

3 Chatanachata ngôh hmobaoh, Zerusale liata Khazohpa achhyna-o tawhtapa lapazy cha vaw cheih ei ta; abei nata a chyhsa rôhnahpazy, a lahpinôzy, a nôthozy chata dona ta hmâh ei ta.

4 Kresawti cha doh ei ta, ngôh zy, tâkâri zy, dawh zy, thua zy, tho zy, alô zy ta taopa khazohzy cha thata palyupalih ei ta.

5 Cha nona tlai chata chyhsapa kuparoh he a vaw luah ta, abei o pamihpa, meiôh sona dady lâna chata vaw roh ta; abei chata a rohtuhpa ku taipachhupa cha hmô ta.

6 Cha chata abei cha a hmia panano ta, a palôhrupazy cha atymâ khai ha ta; a kyu ru a pazaonazy thazei khaipa ta y ta, a pakhuzy a chakhy ngâ ta.

7 Abei cha, “Awhsi kyh a hmâh thaipazy, Kaldia mo chhochhieliena a hmâh thaipazy a vaw chhi awpa,” tahpa ta aw ta. Abei chata Babylaw chyhsa sopazy hnohna chata, “Ahyrai ta he ropa he reipa ta a chhopasiana na pamosapa cha poh sailawpa pabusapa châ aw ta, a rao liata ngôh bâlia pa-aosapa châ aw ta, khihnarâh liata ryureituhpa pathôhna a châ aw,” tahpa ta reih ta.

8 Chatanachata abei chyhsa sopa zydua cha a vaw ngia ei ta; châhrasala a ropa cha reih thei leipa ei ta, a chhopasiana cha abei pahnosa thei veih ei.

9 Abei Belsaza cha a nôpo ngaita ta, a hmia a nano ta; a chyhsa rôhnahpazy cha ama nôpo ngaita hra ta.

10 Abei nata a chyhsa rôhnahpazy awna pyu vâna chata abeinô cha kyhchhina o liana chata a vaw ngia ta; abeinô chata, “Hy beichaipa y, chhâzaw ta hroh mah y! Na palôhrupa cha atymâ khah sala, na hmia chhao anano khah se.

11 Na khihnarâh liana heta chyhsa pakha, ano liata khazoh pathaihpazy thlahpa a ypa cha y ta. Na paw daihtizy liata chhao khaihna zy, novâhna zy, sona zy, khazohzy sona hawhpa ano liana chata a y tahpa pahnopa châ haw ta; hy beichaipa y, na paw Abei Nebukaneza, na paw chata molie thaipazy, awhsi kyh a hmâh thaipazy, Kaldia mozy, chhochhieliena kyh a hmâh thaipazy hyutuhpa ta tao ta;

12 ano liana chata palôhrupa pha pachaipa zy, novâhna zy, pahno thaina zy, mâsapa chhopasiana zy, bierupa pasiana zy, dyu su theina zy cha Daniel, abei ta Beltesaza a bipa liana chata a y tahpa pahnopa châ haw ta. Atahmâ Daniel cha awpa châ sala, a chhopasiana cha a cha pamosa thlâh ha aw,” tahpa ta reih ta.

13 Chatanachata Daniel cha abei hmiako liata a vaw chhi ei ta. Abei chata Daniel hnohta, “Daniel y, Zudah seichâna liata atâhpa sawzy hry liatahpa, ei paw beichaipa ta Zudah râh tawhta a cha vaw chhipa cha na châ ma?

14 Nâma liana chata khazohzy thlahpa y ta, khaihna zy, novâhna zy, sona pha pachaipa zy nâma liana chata a y tahpa pahnopa a châ, tahpa bie vaw thei na ta.

15 Atahmâ he châ ropa he reih awpa nata a chhopasiana na pahnosa awpa ta chyhsa sopazy, dyuthaipazy, ei hmiakô liata a vaw chhi haw ei ta; châhrasala cha hmo chhopasiana cha na pamosa thei veih ei.

16 Nâ deikua chata chhopasia thei chi ta, dyu na su thei tahpa cha vaw thei na ta. Atahmâ na thei khiahtala ropa he reih la, a chhopasiana na pahnosa la, poh sailawpa pabusapa châ aw chi ta, na rao a dôpa ta ngôh bâlia pa-aosapa châ aw chi ta, khihnarâh liata ryureituhpa pathôhna na châ aw,” tahpa ta reih ta.

17 Chatawhcha Daniel chata a chhy ta, abei hmiakô liana chata, “Na hmo piepa cha nâma châta châ sala, na lymâ cha mo hropa hnohta pie mah y; châhrasala ropa he abei reipa aw na ta, a chhopasiana cha ei pahnosa aw.

18 Hy beichaipa y, Khazohpa Chônôchaipa chata na paw Nebukaneza cha khihnarâh zy, laina zy, rôhnahna zy, abeina zy pie ta;

19 laina a hnohta piepa vâna chata mo tozy, pho tozy, reih tozy chata chi ei ta, a hmiakô liana chata a chalyu tyh ei ta; a khopa maih thie ta, a khopa maih pahro ta; a khopa maih pasasa ta a khopa maih panawh tyh ta.

20 Châhrasala a pathipalôh a pasâhsa ta, a palôhrupa châkaru ha ta, a palai ngaitapa ta y haw ta, abeidyuchhai tawhtapa panawhpa châ ta, a rôhnahna cha lapa haw ta;

21 chyhsazy hry tawhtapa topa ta y ta, a palôhrupa cha lyurâhpa sa hawhta sibiepa ta pasa ei ta; a pôhpa cha avâ diati ta padâpa ta y ta, Khazohpa Chônôchaipa chata chyhsapazy abeina khihnarâh chô liata bie hnei ta, a khokheipa maih a pahrâsa tyh tahpa na pahno hlâ lei cha.

22 Châhrasala nâma a sawchapawpa, hy Belsaza y, he zydua he na pahno tarawpa ta na palôhrupa nâ panawh leipa vâta,

23 avâ Beipa chô liana chata tlao a pasâhsa chi ta; a o liata hmobaohzy cha na hmiakô liata vaw cheih ei ta, nâma nata na chyhsa rôhnahpazy, na lahpinôzy nata na nôthozy chhaota kresawti dona ta hmâh eichi ta; chatawhcha tâkâri zy, ngôh zy, dawh zy, thua zy, tho zy, alô zy ta taopa khazoh, a hmô thei leipa, a thei thei leipa, a pahno thei leipazy cha palyupalih chi ta, Khazohpa, na hrona nata na lâpi zydua liata a ku ta châ vaotuhpa cha za leipa chi ta.

24 “Chatanachata ano tawhna chata ku taipachhupa cha tuapa châ haw ta, he ropa he a vaw roh haw hih.

25 He he bie ropa cha châ ta: MENE, MENE, TEKEL, U PHARSIN.

26 He he a chhopasiana cha a châ: MENE, Khazohpa ta na khihnarâh cha reipati khai ha ta, a chhâna a patlôsa haw;

27 TEKEL, khopathliapa ta y chi ta, tloh khao va chi;

28 PERES, na khihnarâh cha pachhaipa ta y ta. Medai nata Persia hnohta piepa a châ haw,” tah ta.

29 Chatanachata Belsaza chata bie pie ta. Daniel cha poh sailawpa pabusa ei ta, a rao liata ngôh bâlia pa-aosa ei ta, a khihnarâh liana chata ryureituhpa pathôhna a châ awpa a châ, tahpa ta phuah haw ei ta.

30 Cha zâ liana chata Kaldia beipa Belsaza cha thiepa châ ta.

31 Daria, Medai chyhsa chata khihnarâh cha to haw ta, ano cha kô sycharu nata kô no rachhôhpa a châ. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 6

Daniel 6

Daniel chakeibarôhneipa hry liata

1 Daria chata khihnarâh avao awpa ta biehneituhpa za kha nata syno, râh pôhpalôhpa liata soh patlapa cha a phapa ta pahno ta;

2 ama chô liana chata hyutuhpa pathôh tao ta, ama hry liata pakha cha Daniel châ ta; he biehneituhpazy heta ama hnohta thâtih tlôkhei pachhuah lymâpa ta Daria ta raona rai a hnei lei nawpa ta. Daniel he palôh pha pachaipa a phaohpa a châpa vâta hyutuhpa hropa nata biehneituhpazy hlâta aluah pachai ta; abei chhaota khihnarâh pôhpalôhpa chô liata soh awpa ta a chhuah ta.

4 Chatanachata hyutuhpazy nata biehneituhpazy chata khihnarâh kyh liana chata Daniel chô liata leina tlua ei ta; châhrasala lei nawpa rai hmô thei leipa ei ta, ado leina hmô thei hra veih ei; ngâchhih ngaitapa a châpa vâta, ano liana chata taochheipa tlyma, ado leina tlyma hmô awpa y tlôh lei khâh ta.

5 He chyhsazy heta, “A Khazohpa ryhpa kyh liata a chô liata leih-na eima hmô leipa khiahtala he Daniel chô liana heta leih nawpa hmô aw ma pi,” tah ei ta.

6 Hyutuhpazy nata biehneituhpazy cha abei lâna chata a pahmaohpakhy ei ta, he tana heta reih ei ta: “Abei Daria y, chhâzaw ta hroh mah y.

7 Khihnarâh hyutuhpazy, vyuhpa ta a ypazy nata biehneituhpazy ryraotuhpa nata a vaotuhpa zydua cha noh sythôh chhôh liata, hy beichaipa y, nâma lâ dei leipa ta cha khazoh tlyma, chyhsa tlyma lâta hiana a hneipa maih cha chakeibarôhneipa lôpu liata thy awpa, tahpa ta abei heta biepiepa taopa ta liahsa pakhâ sala,” tahpa ta a paraoh ei ta.

8 “Atahmâ he, hy beichaipa y, pakhâna cha pa-i la, Medai nata Persia ryhpa a nano beih leipa lymâ hawhta bie ropa he a nano heih cheita khao lei awpa ta moh ro thlu mah y,” tahpa ta.

9 Cha hawhna chata Daria chata bie ropa nata pakhâna liana chata a moh a roh haw ta.

10 Daniel chata biepiepa ropa cha moh ro thlupa a châ tahpa a pahno pata nahta a o liata a ngia ta, a chhôhpadâhpa liata a opyzy cha Zerusale lâ heih ta pahypa châ ta; cha hlâta a taonazie hawhta noh kha ta ei thôh a pakhu paneih ta, thlahchhâ ta, a Khazohpa lâta alyna bie reih ta.

11 A khakhaipazy chata a ru lâta ngia thlâh ei ta, Daniel ta a Khazohpa lâta hiana nata hawna a hlâ tyh tahpa pahno haw ei ta.

12 Chatawhcha abei hnohta a vy ei ta. “Noh sythôh chhôh liata hy beichaipa y, nâma lâ dei leipa ta cha khazoh tlyma, chyhsa tlyma lâta hiana a hneipa maih cha chakeibarôhneipa lôpu liata thypa ama châ aw, tahpa ta pakhâna liana khata moh roh va chi ma khâ?” tah ei ta. Abei chata, “Cha hmo cha â i na, Medai nata Persia ryhpa a nano beih leipa hawhna khata,” tahpa ta a chhy ta.

13 Chatanachata abei cha a chhy ei ta, “Daniel, Zudah seichâna liata atâhpa sawzy hry liatahpa khata, hy beichaipa y, cha papeisa leipa ta, pakhâna moh na ro thlupa chhao kha a papeisa hra vei: noh kha ta ei thôh hiana tlao a hnei,” tah ei ta.

14 Abei chata he biezy he a thei nahta a palôh châ lei ngaitapa ta y ta, Daniel cha a palôhrupa ta pachha awpa khâchâ a chhuah ta; pachha awpa ta noh tlana taihta a chhuah ta.

15 Cha chyhsazy cha abei lâna chata a vaw hmaohpakhy ei ta, “Hy beichaipa y, Medai nata Persia ryhpa ta pakhâna tlyma, ryhpa tlyma abeichaipa ta a pa-i hawpa cha a nano beih vei tahpa pahno mah y,” tah ei ta.

16 Chatanachata abei chata bie pie ta, Daniel cha a vaw chhi ei ta, chakeibarôhneipa lôpu liana cha thy haw ei ta, abei chata Daniel hnohta, “Na Khazohpa na chakao tyhpa khata a cha pachha aw,” tahpa ta reih ta.

17 Chatawhcha alô vaw cheih ei ta, lôpu pakah cha pamai ei a; abei chata Daniel kyh he a nano khao cheita lei nawpa ta ano kusadi tlai nata a chyhsa rôhnahpazy kusadi ta chahnao ta.

18 Abei cha ano o lâ a di ta, nie leipata zâ khihdei y ta, a hnohta chanô rai vaw chhi leipa ei ta, mosa paso leipa ta.

19 Chatanachata a mylâ mydi ta thyu ta, aparah ngaitapa ta chakeibarôhneipa lôpu lâna chata vawh ta.

20 Daniel yna lôpu a vaw hnia nata cha hmapa ta aw ta beichaipa chata Daniel hnohta, “Hy Daniel, Khazoh hrohpa chakaotuhpa y, na Khazohpa, na chakao tyhpa chata chakeibarôhneipa tawhtapa a cha pachha thei ma?” tah ta.

21 Daniel chata abei hnohta, “Hy beichaipa y, chhâzaw ta hroh mah y,

22 Ei Khazohpa cha a vâlyuhchâpa vaw tuah ta, chakeibarôhneipa pakah pabieh ta, khâpa hmahta na pasasa vei; a mohmô liata seina hnei leipa ta y na ta; na chô liata chhao hy beichaipa y, hmo peipa khâpa hmahta tao va na,” tah ta.

23 Abei cha aly ngaita ta, Daniel cha lôpu tawhtapa la awpa ta bie pie ta. Daniel cha lôpu tawhtapa cha la ei ta, ano liana chata a pasapa rai y leipa ta, a Khazohpa khâchâ a ngâpa vâta.

24 Abei chata bie pie ta, Daniel a leihtuhpazy cha a vaw chhi ei ta, chakeibarôhneipa lôpu liana chata thy haw ei ta, âmo sahlao nata ama sawzy nata ama lahpinôzy chhaota; chakeibarôhneipazy chata âmo cha a vaw zawhnao ei ta, ama ruzy cha padizao khai ei ta, lôpu chao chhao tlô hmâ veih ei.

25 Chatanachata Abei Daria chata chyhsa tozy, pho tozy, reih to zydua, chhaolei liata a pahrâpa zydua lâna chata châ roh ta, “Nama chô liata adyhna papôhsapa ta y mawh sy.

26 Ei râh avaopa zydua liana heta chyhsazy ta Daniel Khazohpa cha chipa ta a chalyu mawh sy, tahpa ta biepiepa ei tao, ano cha Khazohpa hrohpa châ ta, chhâzaw ta a i ta, a khihnarâh cha parao awpa rimâ châ leipa aw ta, a chhâna taihta a vao tlôh aw ta.

27 Ano chata paboh ta, pachha ta, alei nata avâ liata pahnonazy nata hmonoâhpazy tao ta; ano he chakeibarôhneipa hmotaotheina tawhtapa Daniel a pachhatuhpa cha a châ,” tahpa ta.

28 He Daniel he Daria ryurei nota nata Persia chyhsa Kôrasa ryurei nona chata thlao a chhi ngaita ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 7

Daniel 7

Daniel ta sahrâhpa miapalih mâ ta a hmô

1 Babylaw beipa Belsaza kô khana liana chata Daniel ta mâ sapa ta a rakhô liata a luh liata aluahna zy cha hmô ta. Chatanachata a mâsapa cha roh ta, a tlâhpipa ta reih ta.

2 Daniel chata: “Zâ ta aluahna liana chata hmôpa hnei na ta, kaoki miapalih liata thlih he tilaipi rarôy ngaitapa chô liata vaw pathli ta.

3 Chatawhcha tilaipi liana chata sa rarôy ngaitapa he vaw pua ta, a nano khaipa châ ei ta.

4 A miakhana cha chakeibarôhneipa alyupa châ ta, pahmôpi mathlaw hnei ta. A mathlawzy cha phiapa ta, alei tawhta chalopa ta, chyhsapa hawhta a phei miano ta a duah awpa ta taopa ta; chyhsapa pathipalôh pipa a châna taihta moh thlâh ha na ta.

5 Chatawhcha sa hropa a mianona cha chavyh alyupa châ ta. Tlaw rakhata a duah ta; a pakah liana chata kâru miathôh a hâh likaw liata y ta; a hnohna chata Thyu la, sapa thata nie teh,’ tahpa ta chho ei ta.

6 Cha hnôh lâna chata moh na ta, a hropa, keichho alyupa, a hnôh lâta pavaw mathlaw miapalih a hneipa vaw y ta; cha sa chata luh miapalih chhao hnei ta; ano hnohna chata ryureina piepa châ ta.

7 Cha hnôh lâna chata zâ ta aluahnazy liana chata sa miapalihna rarôypa nata chichhih ngaitapa, thatlô ngaitapa hmô na ta; thua hâh rarôy ngaitapa hnei ta; a bawhta bawh ta, hriechhei ta, a laibâhpazy cha a phei ta tly ta. A hmiakô liata sa hropa zy tawhna khata cha a nano ngaitapa a châ; ki hrawh hnei ta.

8 Kizy cha pachâ na ta, ama hry tawhna chata ki hropa miakha, a chyhpa ta kaw pua ta; a hmiakô liana chata ki hmiatuapa miathôhzy cha a thaby liata tlo ha ta; he ki liana heta mokhaoh zy chyhsapa mo hawhna tlai heta y ta, pakah chhao y ta, a palaina bie ta a biepa a châ.

9 Ei mo thlâh ha nona chata: Abeidyuchhaizy vaw patyu ei ta, chyhsa pakha hlôthlâhpa cha a tyuh ta; a chysiazy cha dâhaw hawhta a ngyuhpa châ ta, a sâ cha sahmi pathaih ngaitapa hawhta châ ta; a abeidyuchhai cha meipaleih châ ta, cha talaili phei cha mei kâ ngâpa châ ta.

10 A hmiakô tawhna chata mei chavah vaw pua ta, loh ta, a sâh a sâh ta chakao ei ta, a hmiakô liana chata thy sâh hluhpi ta chakao ei ta; ryureina vaw y ta, châbuzy cha pahypa châ ta.

11 Cha nona chata ki ta a palai ngaitapa ta bie thata a reipa pyu vâna chata kaw moh na ta, sa cha thiepa ta, a pôhpa paraopa ta, mei ta rao awpa ta piepa a châna taihta moh thlâh ha na ta.

12 Sa hropazy kha cha ama ryureina lapâpa ta y ei ta, ama hrona deikua cha daihti raopa ei kha nata daihti miakha chhôh châta pahlôhpa a châ.

13 Zâ ta aluahnazy liana chata,avâ meihdozy nata a vypa, chyhsa pakha, chyhsa sawchapawpa alyupa hmô na ta. Hlôthlâhpa hnohna chata a vy ta, a hmiakô liana chata ano cha a vaw chhi ei ta.

14 Chatawhcha ryureina zy, rôhnahna zy, khihnarâh zy a hnohta piepa châ ta, chyhsa to zy, pho to zy nata reih to zydua chata ama chakao nawpa ta; a ryureina cha ryureina hlôpa, a tlei beih lei awpa châ ta, a khihnarâh cha parao rimâ awpa châ aw vei.

15 “Kei, Daniel he, ei pôhpa chhôh liana heta ei palôhrupa a pachâ rôh ta, ei luh liata aluahnazy chata eina patypamâ.

16 A vaw duahpazy hryta pakha cha a kei hnia na ta, he zydua kyh liata bie hmeihseihpa cha hiahri na ta. Chatanachata na chho ta. a chhopasianazy chhao cha na pahnosa haw ta.

17 ‘He sa rarôh y ngaitapa miapalihzy he, abei papalih alei tawhta a vaw pua awpa zy cha châ ei ta.

18 Châhrasala Chônôchaipa moh pathaihpazy chata khihnarâh cha to aw ei ta, chhâzaw ta, chhâ zydua chhôh ta,’ tah ta.

19 “Chatanachata sa miapalihna, a hrohpazy hlâta a nano pachaihpa, chi chhih ngaitapa, a hâhzy thua châ ta, a patohzy dawh châ ta; a bawh ta bawh ta, hriechhei ta, a laibâhpa a phei ta a tlypâtuhpa ky liana chata bie hmeihseihpa pahno byuh kaw na ta;

20 a luh liata ki hrawh nata ki hropa vaw puapa ta, a hmiakô liata miathôh a pao hawpa ky zy; kha ki, mokhaohzy hneipa ta, hmo ru ngaitapa a reihtuhpa, pakah chhao hneipa ta, aluahna zie chhao a viasazy hlâta rarôh y pachaihpa zy kha pahno byuh kaw na ta.

21 Chatawhcha moh thlâh ha na ta, cha ki tlai chata mopathaihpazy cha adyuh ta, pahnie ta;

22 Hlôthlâhpa a ryhpa ta, ryureina cha Chônôchaipa mopathaihpazy hnohta piepa châ ta, mopathaihpazy chata khihnarâh ama tona daihti vaw tlô hlâ lei cha.

23 “He hawhna heta tah ta: ‘Sa miapalihna cha, alei liata khihnarâh miapalihna a vaw y awpa pamosana châ ta, khihnarâh hropa zydua liata a nano pachaipa, alei pôhpalôhpa a bawhta bawhpa ta, tlypa ta a padizaotuh awpa cha a châ aw.

24 Ki hrawhzy kyh cha, he khihnarâh tawhtapa he abei pahrawh ama vaw pua aw; âmo hnôh lâna chata pakha vaw pua aw ta; hmia lâtahpa tawhna chata a nano aw ta, abei pathôhzy cha a panawh aw.

25 Chônôchaipa chakhiapa ta bie reih aw ta, daihtizy nata ryhpa cha panano a chhuah aw ta; daihti su kha nata daihtizy nata daihti khophie chhôh cha a ku liata piepa ama châ aw.

26 Châhrasala ryureina vaw y aw ta, a biehneina cha pachhapa ta paraopa thlah awpa ta ama lei aw.

27 Khihnarâh nata ryureina nata avâ tlokhuh ry liata khihnarâh zy rôhnahna cha Chônôchaipa mopathaipazy hnohna chata piepa a châ aw; a khihnarâh cha khihnarâh hlôpa châ ta, a vaopa khihnarâh zydua ta chakao aw ei ta, ano rei amâ ngiah aw.

28 “He he hmo chhâna cha a châ. Kei, Daniel, he ei pachânazy chata na patypamâ ta, ei hmia a nano ta; châhrasala ei palôhrupa ta bie cha a vao thlâh ha na ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 8

Daniel 8

Daniel ta mietahku tôhpa nata mie tôhpa aluahna ta a hmôzie

1 Abei Belsaza ryureina kô thôhna liana chata ei hnohta, kei, Daniel, hnohna tlai heta aluahna a vaw lâ ta, cha hlâta ei hnohta a vaw luahpa hnôh lâna khata.

2 Aluahna liana chata hmôpa hnei na ta; ei hmô nona cha Elama bia liata Susa abei o liata y na ta; aluahna liana chata hmôpa hnei na ta; Ulai chavah kiah liata y na ta.

3 Ei mo kaw ua na ta, moh na ta, chavah kiapâh liana chata mietahkupa tôhpa, ki miano a hneipa a duah ta: a ki mianozy cha a sâh kaw ta; châhrasala miakha cha a hropa hlâna chata a sâh via ta, a sâh viapa cha hnôh lâta a kaw thaopa châ ta.

4 Mietahkupa tôhpa chata notla lâ nata maw lâ nata chho lâta atopa ei hmô; a hmiakô liana chata sa hropa rai a duah theipa y leipa ei ta, a ku tawhtapa a pachha theipa y hra veih ei; a khopa hawhta y ta, ano a palai ta.

5 Ei pachâ hai nota, notla lâ tawhta alei pôhpalôhpa chô liana heta mie tôhpa vaw pua ta, alei chhao hria vei; chatawhcha mie cha a mokhaoh likawh liana heta ki a luah ngaitapa hnei ta.

6 Ano chata mietahkupa tôhpa, ki miano a hneipa, alei liata aduahpa ei hmôpa kha vaw pangai ta, a thatlô thei chhâna ta a zaw ta.

7 Mietahkupa tôhpa cha a kei pahlyhpa ta hmô na ta, a chô liata a pathi-ia ngaita ta, mietahkupa tôhpa cha kei daih ta, a ki miano cha thliepâ haw ta; ano ato awpa ta mietahkupa tôhpa liana chata thatlôna rai y khao leipa ta, alei liata papao ta, tlypa ta; mietahkupa tôhpa cha a ku tawhta a pachha theipa rai y veih ei.

8 Chatawhcha mie tôhpa cha thata a palai ta; a thatlô locho ta a ki rôhnahpa cha tlie ha ta; a vyuhpa ta ki a luah kawpa miapalih, kaokih miapalih lâ a heipa ta vaw pua ei ta.

9 Ama hry liata miakha chata ki chyhpa ta vaw pachia ta, chho lâta zy, nochhi lâta zy, khihnarâh rôhnahpa lâta zy vaw laiseih ta.

10 Avâ liata a ypa sahlao taihta vaw laiseih ta; chazy sahlao thokhazy nata awhsi thokhazy cha a lei liata thy ta, tlypa ta.

11 Chazy sahlao abei taihta a palai ta: raopa hlâna a y tyhpa cha lapa haw ta, a su pathaihpa yna cha paraopa ta y ta.

12 Chazy sahlao cha raopa hlâna a y tyhpa chhao chata paraona vâta, a hnohta piepa châ ta; bie hmeihseihpa cha alei liata thy ta, cha hawhna chata tao ta, a hlaotloh kaw.

13 Chatawhcha mo pathaihpa reih thei na ta; mopathaipa hropa ta ahy tlyma a vaw reipa hnohna khata, “Raopa hlâna a y tyhpa zy, rory pahrasatuhpa paraona zy, supathaihpa nata a ypa sahlao cha tlypâ awpa ta piepa ama châna kyh liata aluahna cha kha tluta pasihpa e a châ aw” tah ta.

14 Ano chata a hnohta, “My nata zâlâ sâh no nata zâ thôh taihta; cha liana chata supathaihpa cha pathaisapa a châ aw,” tah ta.

15 Kei, Daniel, tlai heta aluahna cha ei hmô na ta, a yzie pahno a chhuah na ta, ei hmiakô liana cha chyhsa hawhta aluahpa ta a vaw duah ta.

16 Ulai haosâ nata heisâ liana chata chyhsa ao, “Kabriel y, aluahna cha he chyhsa he pahno thaisa teh tahpa ta a awpa he thei na ta.

17 Chatanachata ei duana cha a vaw hnia ta; a vy nahta chi ngaita na ta, a khupa ta pao na ta. Châhrasala ano chata ei hnohta, “Hy chyhsa y, pahno thai mah y, aluahna cha chhâna daihti awpa châta châ tlôh ta,” tah ta.

18 Eina chho hai nona chata a khupa ta a vaw mô ha na ta; châhrasala na vaw hria ta, na padua ta.

19 Ano chata, “Pachâ teh, pathi-iana daihti hnôh lâta hmo a vaw y awpa cha ei cha pahnosa aw; chhâna daihti raopa liatahpa châ tlôh ta.

20 Mietahkupa tôhpa, ki miano hneipa na hmôpa kha Media nata Persia bei châ ei ta.

21 Chatawhcha mie tôhpa hmi rôhpa cha Krika bei a châ, chatawhcha a mokhaoh likawh ta ki rôhnahpa cha abei hmiatua chaipa a châ.

22 Kha ki, tliepa ta a su liata miapalih a vaw puapa kha cha, cha pho tawhna chata khihnarâh miapalih a vaw duah aw tahna châ ta, a hmotaotheina ta deikua châ leipa ta.

23 Chatawhcha ama khihnarâh daihti hnôh lâta hmo paraopazy ta a mie pakina ama tlô tina chata, abei hmia chichhih ngaitapa, bie khiakhipa a thaipa a vaw pua aw.

24 A biehneina tha tlô ngaita aw ta, ano hmotaotheina tlai vâna deikua cha châ leipa ta; noâh ngaitapa ta a parao aw, tao thei aw ta, cha hawhna chata a tao aw; chatawhcha chyhsa thatlôpazy nata mopathaihpazy cha parao aw ta.

25 A hmotaonazie vâta piepiena a ku liata tao theipa ta y aw ta; a pathipalôh liata ano a palai aw ta. Pachâ phapa ta ama y nota a hluhpi a parao aw; abeizy Beipa a duahnao aw ta, châhrasala ku ta châ leipa ta paraopa ta a y aw.

26 My ta nata zâ ta aluahna, rei hawpa kha, â do; châhrasala aluahna cha a chalihkhei teh, noh hluhpi tawhta a vaw y awpa châ tlôh ta,” tah ta.

27 Chatawhcha kei, Daniel cha ei tha zei ta, noh khazie tlyma tla leipa ta y na ta; thyu na ta, abei rai cha hria heih na ta; aluahna cha ei noâh ngaita ta, châhrasala ahy hmah ta pahno thei veih ei.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12

Daniel 9

Daniel 9

A chyhsazy châta Daniel thlahchhâna

1 Ahasuara sawchapawpa, Daria, Medai chi liatahpa, Kaldia râh chô liata abei ta taopa kô khana,

2 a ryurei kô khana liana chata, kei, Daniel heta châbuzy liana chata hrohsopa Zeremiah hnohta ABEIPA bie a vaw tlôpa, Zerusale raona patlôna awpa kô hluhzie cha vaw pahno thai haw na ta, kô sysari cha.

3 Chatawhcha nie leipa ta, latho pohzy, buhchâh zy chhaota thlahchhâna nata hiana ta tluapa ta ABEIPA Khazohpa lâ cha a heih na ta.

4 ABEIPA ei Khazohpa hnohna chata thlahchhâ na ta, a phuah na ta, “Hy Abeipa, Khazohpa rôhnah ngaitapa nata rarôh y ngaitapa, ano kyh pachâ ta a biepiepazy a zyh tyhtuhpa hnohta biehrai nata zawngiahna a hnei tyhtuhpa y,

5 na biepiepa nata ryureinazy tawhta tleipa ta molei ha pi ta, a do lei ngaitapa nata molei ngaitapa ta tao haw pi ta, eimâ ty haw;

6 na chakaotuhpa eima beizy, hyutuhpazy nata pawzy nata khihnarâh zawpi zydua hnohta na moh ta biereituhpa hrohsopazy cha nahthlie hra ma pi.

7 Hy Abeipa, siana cha na tovyuh châ ta, keimo tovyuh deikua cha nozana deita a châ, atahmâ hawhna heta; Zudah liata chyhsazy, Zerusale liata a pahrâpa zy, Izarel sahlao zydua, lâhnia liatahpa nata lâhla liatahpa, ama paraona, na chô liata ama paraonazy vâta râh to liata na papaipazy hrata cha hawhna hra chata châ ei ta.

8 Hy Abeipa y, na chô liata eima molei hawpa vâta keimo tovyuh la nozana dei a châ, eima beizy, eima hyutuhpazy, tovyuh chhao.

9 Zawngiahna nata ngiahthaina cha Abeipa eima Khazohpa chata a hnei; a chô liata aty haw hra ei sihla;

10 a chakaotuhpa hrohsopazy hmâpa ta eima hmiakô liata a sopa, a ryhpazy a chhipa ta ABEIPA eima Khazohpa ao cha zyh hra ma pi.

11 Izarel sahlao zydua ta na ao zy lei awpa ta tleipa ta na ryhpa ama parao haw. Chavâta achhi cha eima chô liata leithapa ta y haw ta, Khazohpa chakaotuhpa Mawsi ryhpa liata ropa chhiesana bie chhaota; a chô liata molei haw tlôh pi ta.

12 A bie eima chô liata a reipa nata eima ryureituhpa, ryu maniah a reituhpazy chô liata a reipa kha eima chô liata hmopha lei ngaitapa patlôsapa ta paki haw ta; Zerusale chô liata tao hawpa hawhpa cha avâ ry tlokhuh liata chhao taopa ta y beih vei.

13 Mawsi ryhpa liata ropa hawhta he hmopha leipa zydua he eima chô liata a vaw tlô; châhrasala eima hmoparaonazy cha a heisaipa ta na bie dopa pahno thaina zy eima hnei nawpa ta ABEIPA eima Khazohpa palôhtlâhna cha tlua tlôh pi ta.

14 Chavâta ABEIPA chata hmopha leipa cha moh thlâh ha ta, eima chô liata a vaw patlôsa haw; ABEIPA eima Khazohpa cha a hmotaopa a taopa zydua liata sia tlôh ta, a ao a ngia khao ma pi.

15 Chatawhcha atahmâ he, hy ABEIPA eima Khazohpa, Izi râh tawhtapa ku thatlôpa ta na chyhsa chhituhpa nata moh pathâhna, atahmâhlâ hawhpa he, a taotuhpa y, molei ha pi ta, hmoparao ngaitapa ta eima tao haw.

16 Hy Abeipa y, eimâ châ haw na, na siana zydua zie lymâ hawhta na pathi-iana nata na hiehâhna cha na khihpi Zerusale, na tlâh pathaihpa tawhna chata kua sala; eima moleinazy vâta nata eima pawzy hmoparaona vâta Zerusale nata na chyhsazy he eima chheipâh liata chyhsa zydua hry liata reipachhiepa a vaw châ haw.

17 Chavâta hy eima Khazohpa y, atahmâ he na chakaotuhpa thlahchhâna nata hianazy he nahthlie la, Abeipa vâta na supathaihpa roryhra chiehpa chô liana chata na hmia pakhaih mah y.

18 Hy ei Khazohpa y, na nah vaw pachôh la, nahthlie tua; na mo padeih la, roryhrapa ta eima ynazie zy nata khihpi na moh bipa ta a ypa he moh tua: eima hianazy cha eima sianazy vâta na hmiakô liata eima hlâpa châ tlôh lei khâh ta, na zawngiahna rôhnah ngaitapa vâta tlao a châ.

19 Hy ABEIPA y, nahthlie tua; hy ABEIPA y, ngiahthai teh; hy ABEIPA y, nahthlie la, hria mah y; hawh khah y, hy ei Khazohpa y, nâma vâ tlaita na khihpi nata na chyhsazy na moh bipa ta ama ypa vâta,” tahpa ta.

Hâta sysari chhochhieliena

20 Keima moleipa nata ei chyhsa Izarelzy moleipa reihpha cheipa ta, thlahchhâpa ta, bie reipa ta, ABEIPA ei Khazohpa hmiakô liata ei Khazohpa tlâh pathaihpa chata ei hiana ei hlâ hai nota;

21 thlahchhâpa ta ei reih hai nona tlai chata, chyhsa, Kabriel, hmia tuata aluahna liata ei hmôpa khata, zâlâ hmohlâna daihti hawhpa liata a chatlie ngaitapa ta a zawpa ta na vaw pangai ta.

22 Novâhna na pahneisa ta, bie na chho ta, ei hnohta, “Hy Daniel y, novâhna so ngaitapa cha pahneisa awpa ta ei zu hih.

23 Na hiah tuapa liana khata biepiepa pua haw ta, cha chho awpa ta ei vy, khochhih ngaitapa châ tlôh chi ta; chavâta hmo cha pachâ la, aluahna cha pahno thai teh.

24 “Hmoparaona paki awpa zy, moleina pachhâsa awpa zy, taopasina pathai awpa zy, chhâzaw siana pangia awpa zy, aluahna nata bie chhochhieliepa chhaota ngia awpa zy, su pathaih chaipa cha sathaw thu awpazy ta na chyhsazy nata na khihpi pathaihpa châta nohsari sysari raopa a châ.

25 Chavâta Zerusale paduapa nata sa pathi awpa ta biepiepa a puana tawhta sathaw thupa, abei a vaw yna taihta nohsari ei sari a châ aw tahpa pahno pasia thai mah y. Nohsari sycharu nata miano liata othliah nata a lâpi chhao sa heihpa a vaw châ aw, daihti tymâ ngaitana liata chhao.

26 Chatawhcha nohsari sycharu nata miano hnôh lâna chata sathaw thupa cha pahleipa châ aw ta, khâpa hmahta hnei khao aw vei; abei a vy awpa chyhsazy chata khihpi nata supathaihpa cha ama parao aw. A chhâna cha ti laipa hawhta châ aw ta, a chhâna taih chhaota adyuhna a y aw; raonazy cha a rao chiehpa a châ.

27 Nohsari ei kha châta chysa hluhpi hnohta biehrai â i ngaitapa tao aw ta; nohsari khophie liana chata atheihnazy nata hmohlâpazy a pabâsa aw; chatawhcha rorypahrasatuhpa cha pasichhihna mathlaw chô a chopa ta a vy aw ta; chhâna, a vaw tlô tlai awpa ta rao chiehpa taihna chata pathi-iana cha rorypahrasatuhpa chô liata leithapa a châ aw,” tah ta. 

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12