1 Ei luh he ti châ sala, ei mo he mothlih hnawh a châ mawh sala, ei chyhsa ei sawchanô thipazy chata a chhô nah zâ ei cha awpa tlai!
2 Râhpathohpa liata tlôna o ei hnei thei mawh sala, ei chyhsazy siesaipa ta âmo tawhta ei pua aw! Apheihmâhpa chyhsa châ khai tlôh ei ta,dô thaipa a y pakhypa dei ama châ.
3 Ama paleih cha libaw hawhta haipa ta hmâh ei ta; a râh liata ama laiseih, hmeiseihna liata laiseih leipa ta;moleina liata laiseih lymâ ei ta, kei na pahno leipa ta, ABEIPA ta a tah.
4 Nama vaih mo liata a chado chyu ula, nama unawhpazy rai ngâh khah u; unawhpazy cha dôhmâhpa châ tlôh ei ta, vaihzy chhao kyh rei a hmâhpa ama châ.
5 Âmo vaih chyu ama dô aw, bie hmeiseihpa reih aw veih ei; ama paleih haipa rei pachu ei ta; hmoparaona hriapa ta ama rie a thei tyh
6 Dôhmâhpa hry liata pahrâ chi ta, ama dôna vâta kei na pahno khoh veih ei, ABEIPA ta a tah.
7 Chavâta Pheisaihzy ABEIPA ta he tana heta a tah: “Âmo cha pazao aw na ta, ei pasia aw, chyhsa ei sawchanô vâna chata khâpa hropa e ei tao aw tly?
8 Ama paleih cha thina châtai châ ta; dôpa bie a reih tyh; chyhsa ta pakah ta a vaih hnohta adyhna bie reih hra sala, a pathipalôh liata ano cha a byh thlâh ha tyh.
9 He hmozy vâna heta hrie aw va na ma? ABEIPA ta a tah. Phopi he hawhpa liana heta viarithô aw va na ma?
10 “Tlâhzy chata cha aw na ta, ei sâh ngâ aw,râhpathohpa sibiepa suzy mâchhiesa aw na ta, ahy hmah sie khao lei awpa ta a kâ khai hawpa vâta; sâh zawh pyu chyhsa ta thei khao leipa aw ei ta,avâ pavawzy nata râh sazy chhao a râpai ei ta, ama sie syulyu haw.
11 Zerusale cha hmo chhiepa pahmaohna ta ei tao aw, sihâzy pahrâna su a châ aw; Zudah khihpizy cha pahrâtuhpa y leipa ta roryhrapa ta ei paysa aw.
Roryhrana nata râpaina zikyurâna
12 He he a pahno thai awpa ta chyhsa sopa cha ahy e, a châ? Phuah awpa ta ABEIPA bie reipa a vaw lytuhpa cha ahy e a châ? Khâpa vâta e râh cha rao khai haw ta, ahyma sie leina awpa ta râhpathohpa hawhta a kâ haw tly?
13 ABEIPA chata, “Ei ryhpa bie ama hmiakô liata ei sopa pathlua ei ta, ei reipa zo leipa ta, zyh hra leipa ei ta.
14 Âmo pathipalôh pachyupa zyhpa ta, ama mahpawzy ta ama pachupa Baalzy cha tlao amâ chadai hawpa vâta.
15 Pheisaihzy ABEIPA Izarel Khazohpa chata he tana heta a tah: “He chyhsazy tlai he, hmo khapa ta pasa aw na ta, ti khapa ei padosa hra aw.
16 Âmo nata ama mahpawzy chhaota ama pahno beih leipa phopizy hry liata ei papai aw; ei pahleipadia khai hlâ lei cha zaozi ei chadaisa aw.”
17 Pheisaihzy ABEIPA chata he tana heta a tah: “Chanô mâchhiesapazy a vy awpa ta aw teh u; chanô zôthaipazy cha a vy awpa ta awh hra teh u;
18 vaw chatlie ei sala, na vaw cha thlu ei se, ei mothlih lohpa ta eima mozy liata ti a pua thei nawpa ta.
19 Zaio tawhta chana pyu theipa châ tlôh ta, Thata hraopa ta y pi ta! Thata patypamâpa ta y pi ta, eima râh eima siesaipa vâta nata eima pahrânazy ama thy pathlah hawpa vâta.”
20 Hy, nâmo chanôzy saih u, ABEIPA bie cha nahthlie ula, a bie reipa nama nah liata a ngia sala; nama sawchanôzy chaphôh pachu ula, chyhsa to ta a vaih hnohta chaphôhtuna pachu mawh sy.
21 Eima opy zy liata thina a vaw ngiapa ta, eima o rôhnahpazy liata a ngia haw tlôh ta, khôtho tawhta hawti pahlei awpa nata khih liah tawhta satlia pahlei awpa ta.
22 “ABEIPA chata he tana heta a tah: ‘Chyhsa rizy cha atlypa liata i hawhta pao aw ei ta, sâhriatuhpa sâh mypa hawh tlaita, ahy hmah ta pakhy khao aw veih ei,’ tah ta.
Khazohpa pahnona kyh cha chyhsa rôhnahna a châ
23 ABEIPA chata he tana heta a tah: “Chyhsa sopa chata a sona liata a parôhnahsa khah se, chyhsa thatlôpa chata a thatlôna liata aparôhnahsa khah se, chyhsa hneirôhpa chata a hneirôna liata aparôhnahsa hra khah se;
24 a parôhnahsapa maih deikua he he parôhnahsa se, kei ABEIPA he kyhpachâ ngiachhiena kyh, pachiana dopa zy, siana zy, alei liata a hmâh tyhtuhpa ei châ tahpa, pahnopa ta novâhna cha, he hmozy he ei kho viapa lâ châ tlôh ta, ABEIPA ta a tah”
25 “Nohzy a vaw tlô na, ABEIPA ta a tah, chopawtaipa châ tlôh ta, chopawtai leipa hawhpa zy cha ei hrie aw;
26 Izi zy, Zudah zy, Edôma zy nata Môaba zy nata râhpathohpa liata a pahrâpa ama hnokhi a tlypa ta a ngyupa sahlaozy; phopi zydua cha chopawtai leipa châ tlôh ei ta, Izarel chhôhkha zydua pathipalôh liata chopawtai leipa ama châ.”