Zeremiah 52
Zedekiah abeina zie (2 Ab 24: 18-20; 2 Tr 36: 11-18)
1 Zedekiah cha ryurei a thao nota kô syno nata kô khapa châ ta; Zerusale liata kô hrawhleikha ryurei ta. A no moh cha Hamuta châ ta, Libnah khih liata Zeremiah sawchanônô a châ.
2 Zehôiki a taopa lymâ hawhta ABEIPA mohmô liata hmo moleipa tao ta.
3 ABEIPA a hiehâh ngaitapa vâta Zerusale nata Zudah râh liana chata a hmiakô tawhtapa a thyna taihta hmo vaw tlô ha ta.
Zerusale paonazie(2 Ab 24: 20-25: Zer 39: 1-7)
4 Zedekiah cha Babylaw beipa chô liata aty haw ta.
5 Chatawhcha ryu a reina kô chakina liata thla hrawhna, cha thla noh hrawh noh liana chata, Babylaw beipa Nebukareza nata a pheisaih sahlao zydua cha Zerusale adyuh awpa ta a vy ei ta, a riena tao pachhai haw ei ta, a chheipâh ta kuhzy tao haw ei ta.
6 Beipa Zedekiah kô hrawhleikhana taihta khihpi padôpa ta y ta. Thla palihna, cha thla noh chakina liana chata khihpi liata chakâhna cha ru ngaita ta, râh zawpizy châta niepa rai y khao leipa ta.
7 Chatanachata khihpi kuh pâhchhô papyu ei ta; adyuhpa chyhsa zydua cha a râ ei ta, abei sahdô liata alô sahdô miano likawh ta chhikao lâta puapa ta zâta khihpi tawhtapa a râ ei ta. Kaldia mozy cha khihpi chheipâh ta y ei ta. Arabah lâpi lâna chata sie haw ei ta.
8 Châhrasala Kaldia pheisaihzy chata abei cha a chadai ei ta, Zerikô bypi liata Zedekiah pha haw ei ta; a pheisaih sahlao zydua cha ano tawhtapa pai khai haw ei ta.
9 Zedekiah cha patu ei ta, Babylaw beipa hnohta Hama râh lâ Riblah lâna chata siekhei haw ei ta, chatawhcha ano ta a thâtih pachia ta.
10 Babylaw beipa chata Zedekiah sawchapawpazy cha a hmiakô tlai liata thie ta, Riblah liana chata Zudah abeisaw zydua chhao thie haw ta.
11 Zedekiah mozy thaoh ta, Babylaw beipa chata thua bâlia pakysa ta, Babylaw lâta siekhei haw ta, a thi noh taihta patâhna o liata soh ta.
Zudah la pahniepa ta y ta(2 Ab 25:8-21; 2 Tr 36:17-21; Zer 39:8-10)
12 Babylaw beipa Nebukareza kô hrawhlei chakina thla pangawhna, cha thla noh hrawhna liana chata abei vaihtuhpazy hyutuhpa Babylaw beipa hmiakô liata a duahtuhpa Nebuzarada cha Zerusale lâta a vaw ngia ta.
13 ABEIPA o nata abei o rao ta, Zerusale liata o zydua chhaota; o rôhnahpa to cha mei ta rao ta.
14 Chatawhcha Kaldia pheisaih sahlao zydua, abei a vaihtuhpa py hyutuhpa hnohta a ypazy chata Zerusale kuhzy padôna cha pacho khai haw ei ta.
15 A vaihtuhpa py hyutuhpa Nebuzarada chata zawpi hry liata sipasa chaipazy khihpi liata siesaipa zy, Babylaw beipa hnohta âmosasy ta a pie hawpa zy nata chyhsa zôthaipa laibâhpa zydua chhaota seichâna ta a chhi khai haw ta.
16 Châhrasala a vaihtuhpa py hyutuhpa Nebuzarada chata cha râh liata sipasa chaipa thokhazy cha kresahdô mokhâhtuhpa nata vaihtuhpa châta siesai ta.
17 ABEIPA o liata dawh tôhzy nata atyuna zy, dawh rahô laipa ABEIPA o liatahpa zy cha Kaldia mozy chata parao ei ta, dawh zydua Babylaw lâta siekhei haw ei ta.
18 Bei zy, alei lina zy, sathaw meiôh pachhaina zy, rahô zy, phiathla zy, dawh hmobaoh zydua chakaona ta ama hmâ tyhpazy cha la khai haw ei ta;
19 nyuzy chhao, meipaoh sona zy, rahô zy, beih zy, sathaw meiôh sona zy, phiathla zy nata biebu zy, Ngôh ta a taopa cha ngôh ta, tâkâri ta taopa cha tâkâri ta a vaihtuhpa py hyutuhpa chata a la khai haw.
20 A tôh miano dawh ta taopa viahchao tôhpa sâhrawhleino rahô patyuna Abei Sawlawmaw ta ABEIPA o châta a taopa cha, he hmobao zydua dawh he a hrina zie rei theipa châ vei.
21 A tôhzy kha cha, a tôh miakha a sâhna zie cha dy hrawhleicharie châ ta, dy hrawhleino ta padôpa a châ, a chhâna lâ cha zôpalih châ ta, pakao ta.
22 A chô liana chata dawh luh pabyuhpa y ta; a luh pabyuhpa a sâhna lâ cha dy pangawh châ ta; a luh pabyuhpa cha dawh sai ta pangiapa nata pawmikranat châ ta. A tôh miano chhao chata he hawhna heta pawmikranat hnei ta.
23 A kâ lâna chata pawmikranat sychaki nata sâcharu y ta, a chheipâh ta a pangiana pawmikranat zydua cha za kha a châ.
24 A vaihtuhpa py hyutuhpa châta theihthaipa bei Seraiah nata theihthaipa panona Zephania nata ochhi vaihtuhpa pathôhzy cha patu ta;
25 adyuhpa chyhsazy chô liata hyutuhpa ta raopa nata chyhsa pasari abei hmiakô liata a duah tyhpa khihpi liata a ypazy nata pheisaih hyutuhpa a rohtuhpa râh liata chyhsazy mo a vaotuhpa nata râh zawpi hry liatahpa chyhsa sycharu khihpi liata a vaw ypazy cha, khihpi tawhtapa papua ta.
26 Nebuzarada a vaihtuhpa py hyutuhpa chata âmo a chhi ta, Babylaw beipa hnohna chata Riblah lâta vaw tlôkhei ta.
27 Babylaw beipa chata Hama râh Riblah liana chata âmo tusao ta, thie ta. Cha tawhna chata Zudah phopi cha ama râh tawhtapa seichâna ta a chhipa ta y haw ei ta.
28 Hezy he Nebukareza ta zawpi seichâna ta a chhipazy cha ama châ, kô sarina liana chata Zu sâh thôh nata syno nata pathôh;
29 Nebukareza kô hrawhleichariena liana chata Zerusale tawhta chyhsa za charie nata sythôh nata pano seichâna ta a chhi ta;
30 Nebukareza kô ki nata kô thôhna liana chata Nebuzarada a vaihtuhpa py hyutuhpa chata Zu chyhsa za sari nata sypalih nata papangawh seichâna ta a chhi ta; ama zydua ta cha sâh palih nata za charu ama châ.
Babylaw liata Zehôikina pathliepa nata zakheipa ta y ta(2 Ab 25:27-30)
31 Zudah beipa Zehôikina kô sythôh nata kô sarina, a thla hrawhleinona, cha thla noh ki nata noh pangawh noh liana chata he tana heta vaw châ ta, Babylaw beipa Evilmerôda chata a ryurei kô khana liana chata Zudah beipa Zehôikina cha, a luh pasasa ta, patâhna-o tawhtapa cha papua ta;
32 a hnohna chata a phapa ta reih ta, Babylaw liata a hnohta a ypa abei sahlao dyuchhai hlâta a sâhpa ta ryureina dyuchhai cha patyu pâ ta.
33 Chatawhcha Zehôikina cha atâhna-o chysiazy cha pahluh ta. A hro chhôh noh zydua chata a hmiakô liata niebawpa ta y ta;
34 a pasana chata a hro chhôh noh zydua a thi noh taihta noh chareih a tovyuh cha Babylaw beipa ta pie tyh ta.