Zeremiah 50
Babylaw thâtih chhochhieliena
1 Babylaw thâtih Kaldia mozy râh thâtih liata hrohsopa Zeremiah pakah ta ABEIPA bie reipa cha:
2 “Phopi to hry liata reih ula, pahnosana chaluah ula, phuah ula, nyu khah u;‘Babylaw lapa châ haw ta, Bel cha a maophyu haw, Merôda cha patypamâpa ta y hawhta. Ano khazoh nohthlahpazy cha maophyupa ta y ta, a khazoh nohthlahpa cha a rao khai haw.’
3 “Maw lâ tawhta ano cha phopi miakha ta siehnao ta, cha chata a râh cha roryhrapa ta paysa ta, cha liana chata ahy hmah ta pahrâ khao aw veih ei, a râpai ei ta, ama lei khai haw; chyhsa nata sa chhao.
4 “Cha nohzy liata nata cha daihti liana chata Izarel pathlazy cha a vy aw ei ta, âmo nata Zudah pathlazy chhaota chana chôta a vy aw ei ta; ABEIPA ama Khazohpa ama tlua aw, ABEIPA ta a tah.
5 Zaio lâ a heihpa ta ama chakaona awpa, hiahhri aw ei ta, ‘A vy teh u, chhâzaw biehrai my khao lei awpa liana chata ABEIPA cha patu teh u,’ ama tah aw.
6 “Ei chyhsazy cha mietahkupa leipa châ ei ta; ama vaihtuhpazy chata paviasa ei ta, tlâhzy liana chata pasiesa ei ta; tlâh liata zy, tlâh byuhpa liata zy, sie ei ta, ama syna su ama my khai aw.
7 A hmôpa maihta nie lymâ ei ta, ama khakhaipazy chata, ‘Keimo thai leipa châ vei, ABEIPA siana pahrâna, ama pathlatuhpazy hnabeiseipa ABEIPA tlai chô liata hmo ama paraopa vâta a châ,” tah ei ta.
8 “Babylaw chhôh tawhta a râ ula, Kaldia mozy râh tawhtapa pua ula, mie zawzy hry liata mietôhpazy hawhta y teh u.
9 Babylaw a vaw dyuh awpa ta maw lâ râh tawhta phopi sahlao rôhnah ngaitapa a pahmaohpa cha pathyu aw na ta, ano adyuh awpa ta amâ chhuah aw, cha tawhna chata lapa ama châ aw. Ama châtaizy cha chariah adyuh thai ngaitapa, khâpa hrao leipa a kua leipa hawhta ama châ aw.
10 “Kaldia cha hraopa châ aw ta; ano a hraotuhpazy cha lôhrâtlô kawpa ta ama y aw, ABEIPA ta a tah.
11 “Thaphapa ta y hra ula, aly hra ula, hy ei ryuto a hraotuhpa saih u, sibie panyuhpa hry liata viahchao zeinô bâ ngâpa hawhta nata arâ tôhpa a sâh ngâpa hawhta châ hra ula,
12 nama mo cha noza ngaitapa ta y aw ta, nâmo châ satuhpa cha a maohphyu aw. Pachâ teh u, phopizy hry liata a nawh chaipa, râhpathohpa râh, râh chawhkaraipa lyurâh ruapa a châ aw.
13 ABEIPA hiehâna vâta pahrâpa ta y aw vei, roryhrapa ta tlao a y aw; Babylaw lâta a siepa maih cha ama no paâhsa aw ta, a hriena zydua vâna chata hmaoto chipa ta a y aw.
14 Libaw a cheituhpa zydua saih u, Babylaw chadôpa ta a paziah ula; ka ula, châtaizy cha chado khah u, ABEIPA chô liata molei haw tlôh ei ta.
15 Rahao chie ula, ano ta a pie haw; a kuhzy cha pao haw ta, a pâhchhôzy cha a cho haw. ABEIPA phuhlana châ tlôh ta; a chô liata phuh la ula, a taopa lymâ hawhta a chô liata tao teh u.
16 Babylaw tawhta chi a hietuhpa chhawhpathla ula, sahria nota sava a cheituhpa chhaota; pasaipa-ina zaozi cheipa ta, âmo chyhsazy lâta pangai aw ei ta, âmo râh chyu zy lâta amâ râ aw.
17 “Izarel cha mietahkupa pai patlapa châ ta, chakeibarôhneipazy ta a chadai pai ei ta. Asuria beipa ta ano nie tua ta, a chhâna lâta Babylaw beipa Nebukareza chata a ruzy thlie aw ta.
18 Chavâta Pheisaihzy ABEIPA, Izarel Khazohpa chata he tana heta a tah: Pachâ teh u. Asuria râh beipa ei hriepa hawh hra ta Babylaw beipa nata a khihnarâh cha ei hrie aw.
19 Izarel cha a bana su lâta a chhi heih aw na ta, Kamel nata Basana liana chata ba aw ta, Ephrai tlâh nata Kilia liana chata ano cha lôhrâtlôpa ta a y aw.
20 Cha nohzy liata nata cha daihti liana chata Izarel hmoparaonazy cha tlua aw ei ta, hmô awpa ta y aw vei; Zudah hmoparaonazy chhao hmô awpa y hra aw vei; a laibâhpa awpa ta ei pahlôhpazy cha, a ngiahthai tlôh aw na ta, ABEIPA ta a tah.
21 “Merathai râh siehnao teh u,a râh nata Pekô a pahrâtuhpazy tlai cha. Thie ula, liahsa pahleipadia khai ula, bie ei cha piepa lymâ hawhta tao teh u. ABEIPA ta a tah.
22 Cha râh liana chata chariah pyu a y, thata pahleipadiana pyu chhaota!
23 Khizaw pôhpalôhpa syulô cha a patlawpa ta a rao kaw dia! Phopizy hry liata kheihta zie ta e Babylaw cha roryhrapa ta a y!
24 Hy Babylaw y, nâ chata khohei ei chôna pahno leipa ta nâ ao haw hih; hmôpa nata patupa ta na y haw, ABEIPA na siehnaopa vâta.
25 ABEIPA chata a chariah chhaichhi chhôhpadâhpa pahy haw ta, a hiehâna chaihraizy cha a la haw, Abeipa Pheisaihzy KHAZOHPA chata Kaldia mozy râh liata tao awpa a hnei.
26 Râhri chhâ chaina tawhta vaw siehnao ula; a hmo so pakhynazy cha pahy khai ula, thy pakhy ula liahsa pahleipadia khai teh u, khâpa hmah pahlôh leipa ta.
27 A viahchao tôhpazy cha thie khai ula, thiepa ta y khai mawh sy. Ama hu a po kaw dia, ama hriena noh liata.
28 “ABEIPA eima Khazohpa phulapa, achhyna-o phulana tlai cha, Zaio liata phuah awpa ta Babylaw tawhta a râpa nata a râ paipazy pyu cha.
29 “Babylaw adyuh teh u. A chheipâh ta ariena su tao ula, ahy hmah ta pua khah se. A hmotaopa lymâ hawhta viarithô teh u, a tao hawpa zydua hawhna cha a chô liata tao teh u, ABEIPA Izarel Mo pathaihpa cha pahao ngâ tlôh ta.
30 Chavâta a satliapazy cha othliahzy liata pao aw ei ta, chariahpa zydua zy cha cha noh liana chata ama leidia aw, ABEIPA ta a tah.
31 Hy nâ apalaipa chi, ei châ dyuh, Abeipa Pheisaihzy KHAZOHPA chata a tah; na noh a vaw tlô haw, na hriena awpa noh cha.
32 Apalaipa chyhsa cha pao aw ta,ahy hmah ta pathyu aw veih ei,a khihpizy liana chata mei pati aw na ta, a chheipâh ta a ypa zydua zy cha a kâ khai aw.
33 “Pheisaihzy ABEIPA chata he tana heta a tah: Izarel pathlazy nata Zudah pathlazy cha pasaipa-ipa ta hmaohkha ta y ei ta, seichâna ta a chhituhpa zydua chata khâchâ patu ei ta, pathlie khoh veih ei.
34 Ama Chatlaituhpa deikua cha thatlôpa a châ; a moh cha Pheisaihzy ABEIPA a châ. Ano cha âmo chhâh châ aw ta, Babylaw liata pahrâpazy cha patypamâpa ta, khizaw liata thlahlôhna a tlô thei nawpa ta.
35 “Kaldia mozy chô liata zaozi y ta,Babylaw liata a pahrâpazy, abei sawzy nata a chyhsa sopazy chô liata chhao, ABEIPA ta a tah!
36 A haipazy chô liata zaozi y ta,ahrupa ama vaw châ aw! A chariapa chô liata zaozi y ta,tymâpa ta ama y aw!
37 Ama arâ nata talailizy chô liata zaozi y ta, a chhôh liata chyhsa a pahlaopahlipa zydua chô liata chhao,chanô hawhta ama vaw châ aw! Ryu hmo chô liata zaozi y ta, hraopa ta ama vaw châ aw!
38 A tizy kuapa ta chawh khai haw ta! Khazoh nohthlapazy râh châ tlôh ta, khazoh nohthlapazy cha hru khai ei ta.
39 “Chavâta râhpathohpa sahrâhpazy, changiezy chhaota, Babylaw liana chata pahrâ aw ei ta, pavawpizy chhao, cha liana chata ama pahrâ aw; chyhsa pahrâpa ta y beih khao aw vei, chhâ zydua taih chhaota pahrâpa ta y aw vei.
40 Khazohpa ta Sawdawma nata Kawmawra nata a chheipâh khihpizy a paraopa hawhna tlai khata, cha liana chata ahy hmah ta pahrâ khao leipa aw ei ta, chyhsa saw ahy hmah ta tly khao aw veih ei, ABEIPA ta a tah.
41 “Maw lâ râh tawhta chyhsazy amâ vy; alei su chhâna tawhta phopi rôhnah ngaitapa nata abei hluhpi ama vaw thyu na.
42 Libaw nata asei a chei ei ta; nôchhie ngaitapa, zawngiahna rai a hnei leipa ama châ. Ama pyu cha tilaipi a paro ngâpa hawhta châ ta; arâzy chô liata kiah ei ta, chyhsa to chariahpa hawhta a tobipa ta, hy Babylaw sawchanô y, ama cha vaw siehnao aw,
43 “Ama pyu theipa ta Babylaw beipa ku thazeipa ta y ta; chanô sawzei no pasapa hawhta pasana thata a patu haw.
44 ‘Pachâ teh u, Zawdâh râh râhhmâhpa tawhta chakeibarôhneipa sahroh pathliena su lâta a khypa hawhta a khy aw ta, châhrasala sôkha ta ano tawhta âmo parâsa aw na ta; a chô liata bie a hnei awpa ta ei khopa maih ei rao aw. Keima hawhpa he ahy e a y? Ahy e daihti na raopa aw? Mietahkuvaihtuhpa ei hmiakô liata a duah awpa cha.
45 Chavâta Babylaw chô liata ABEIPA chhosiena bieraopa Kaldia mozy chô liata a hmo chhuahpa cha nahthlie teh u; sahroh zaw tawzy tlai cha a daophipa ta y aw ei ta; sahroh pathliena su liata roryhrapa ta a paysa tlai aw.
46 Babylaw lana pyu alei chalyu aw ta, a chana pyu cha phopizy hry liata theipa a châ aw,” tahpa ta.