Zeremiah 47
Philistina mo thâtih chhochhieliena
1 Phirao ta Kaza a tusao hlâta Philistina chyhsazy hry liata hrohsopa Zeremiah hnohta ABEIPA bie a vaw tlôpa cha.
2 “ABEIPA chata he tana heta a tah: Moh teh u, maw lâ tawhta ti vaw lai ta, a kao biepa ta a khô aw; râh cha cho aw ta, a chhôh liata a ypa zydua chhaota, khihpi nata a chhôh a pahrapa zydua chhao cha. Chyhsazy cha aw aw ei ta, râh liatahpa zydua ama sa ngâ aw.
3 Arâ thatlôpa phei pyu liata adyuhna talaili paro ngâpa liata, a talaili pyu liata zy, pawzy thazeipa ta y ei ta, ama sawzy hrâkyu leina taihta,
4 Philistina mo zydua hraona noh Tyre nata Sidaw tawhtapa baotuhpa a y tlakaipazy chhawhsaona noh vâta. ABEIPA chata liahpahlô Kafataw liata a laibâhpa Philistina mozy cha parao tlôh aw ta.
5 Kaza mozy luh a pôlô haw; Askelaw cha moh haw ta. A râh bypi liata a pahrâ tlakaipa zy cha, a â aw chi ta, khacha e nâsasyh ta mâchhie na sa aw?
6 Ah! ABEIPA zaozi cha! Khachâ e na y molo aw? Na paih liata khôpa ta a pahâ la, y molo teh!
7 ABEIPA ta tao awpa a cha pie tlôh khiahta cha kheihta e na y molo thei aw? Askelaw nata tilaipi raphyu chô liata adyuh awpa ta a cha rao khiahta cha.