Zeremiah 41
1 Thla sarina liana chata, Elisama sawchapawpa Nethaniah sawchapawpa Ishmael abei chi, abeisawzy hry liata pakha cha chyhsa pahrawh a chhipa ta, Mizpah liata Ahika sawchapawpa Kedailiah hnohta a vy ei ta, Mizpah liana chata pati hmaohkha ta nie ei ta.
2 Nethaniah sawchapawpa Ishmael cha a chyhsa a chhipa pahrawhzy chhao chata thyu ei ta, Shaphana sawchapawpa Ahika sawchapawpa, Babylaw beipa ta râh a vaotuh awpa ta a taopa Kedaliah cha zaozi ta thie haw ei ta.
3 A hnohta Zu chyhsa a ypa zydua Mizpah liata Kedaliah hnohta a ypazy nata cha liana chata Kaldia mo a ypazy, chariahpazy tlai cha Ishmael chata thie hra ta.
4 Kedaliah a thi tawhta noh nona liana chata, ahy hmah ama pahno hlâta,
5 Sekhe tawhta zy, Shiloh tawhta zy, Samari tawhta zy ta chyhsa sycharie ama kâhmi ngyupa ta ama chysiazy hriepa ta, âmosasyh ta a âpa ta, ama ku liata viahchhâ hlânazy nata rohpahâhpazy chabapa ta ABEIPA o liata hlâ awpa ta a vy ei ta.
6 Chatawhcha Nethaniah sawchapawpa Ishmael cha Mizpah tawhta âmo dy awpa ta pua ta, lâpi tly khata cha lymâ ta. Âmo a hmô nah chata ama hnohta, ‘Ahika sawchapawpa Kedaliah hnohta a vy teh u,” tah ta.
7 Khihpi chhôh ama vaw tlô nah chata, Nethaniah sawchapawpa Ishmael nata a chhipazy chata âmo cha thie ei ta, khaotlôpa liata thy haw ei ta.
8 Ama hry liata chyhsa pahrawh deikua chata Ishmael hnohta, “Maniah thie khah y, lyu liana chata uit sâh zy, bâli sâh zy, sathaw zy, kheihti zy thata nyu tlôh pi ta,” tah ei ta. Chatanachata âmo cha pahlôh ta, ama unawhpazy hry liana chata thie pâ leipa ta.
9 Chatawhcha khaotlô, Ishmael ta Kedaliah hnohta chyhsa a thihpazy a ri a thyna cha Izarel bei Baasha a chipa vâta Abei Asa ta a taopa a châ; Nethaniah sawchapawpazy Ishmael chata cha cha rizy ta pabie ta.
10 Chatawhcha Ishmael chata Mizpah liata chyhsa a hropa a y chhôhpa, abei sawchanôzy Ahika sawchapawpa Kedaliah nota vaihtuhpa hyutuhpa Nebuzarada ta a pavaosapa, Mizpah liata a ypa zydua chhao, seichâna ta a chhi khai haw ta. Nethaniah sawchapawpa Ishmael chata chazy cha sei ta a chhipa ta Amawni chyhsa râh pangaipa ta pua haw ta.
11 Châhrasala Kariah sawchapawpa Zôhana nata a hnohta a ypa pheisaih sahlao hyutuhpa zydua chata Nethaniah sawchapawpa Ishmael hmopha leipa a taopa zydua cha ama pahno nahta,
12 chyhsa zydua a chhi ei ta, Nethaniah sawchapawpa Ishmael adyuh awpa ta sie ei ta. Ti hluhpi yna su Kibia liana chata kei hmô ei ta.
13 Ishmael hnohta chyhsa zydua chata Kariah sawchapawpa Zôhana nata a hnohta pheisaih sahlao hyutuhpa zydua cha ama vaw hmô nahta, aly ngaita kaw ei ta.
14 Chatanachata Ishmael ta Mizpah tawhta sei ta a chhipa zydua cha a heihpa ta vaw kua ei ta, Kariah sawchapawpa Zôhana hnohna chata sie haw ei ta.
15 Nethaniah sawchapawpa Ishmael deikua cha chyhsa pacharie nata Zôhana tawhta a râ ei ta, Amawni chyhsazy hnohta sie haw ei ta.
16 Chatanachata Kariah sawchapawpa Zôhana nata a hnohta pheisaih sahlao hyutuhpa zydua chata Nethaniah sawchapawpa Ishmael ta Ahika sawchapawpa Kedaliah a thi tawhta Mizpah tawhta a lapa a y chhôhpa zydua adyuhpa chyhsa zy, chanô zy, hawtipa zy, chyhsa hrilyupa tlai cha, Kibia tawhta a chhi heihpazy cha a chhi khai haw ei ta.
17 Chatawhcha pua ei ta, Kaldia mo vâta Izi râh liata a ngia a chhuahpa ta, Bethlehe kiapâh ta Keru Kimha liana chata pahrâ ei ta,
18 Nethaniah sawchapawpa Ishmael chata Ahika sawchapawpa Kedaliah Babylaw beipa ta cha râh a vaotuhpa ta a taopa cha a thiepa vâta, âmo cha chi ngaita tlôh ei ta.