Seichâna tawhta kua nawpa zie bietaipa
1 Zeremiah hnohta ABEIPA tawhta bie a vaw tlôpa cha.
2 “ABEIPA Izarel Khazohpa chata he tana heta a tah: Na hnohta ei rei hawpa zydua kha châbu liata roh teh.
3 Izarel nata Zudah ei chyhsazy seichâna kyh ei paliesa awpa nohzy cha a vaw tlô hai na, chatawhcha ama mahpawzy hnohta râh ei piepa liana chata pakuasa aw na ta, ama pahrâ ha hra aw, ABEIPA ta a tah,” tahpa ta.
4 Izarel nata Zudah kyh liata ABEIPA bie reipazy cha hezy he a châ:
5 “ABEIPA chata he tana heta a tah: Adyhna châ leipa ta, thlahzopa pyu,chipa ta awh pa pyu ei thei.
6 Atahmâ hiahhri ula, moh teh u, chapaw ta saw amâ zei beih ma? Kheihtazie ta e chanô saw a zeipa hawh tlaita chapawzy heta ama chaizy ama nâ? Khaziama hmiazy a vaw hlâh hawpa ta ei hmô tly?
7 Cha rimâ ngaita cha! cha noh cha a rôhnah kaw dia, alyupa rai y vei; Zakaw nôpona noh a châ tlai na;châhrasala cha tawhtapa cha pachhapa ta a y aw.
8 “Cha noh liana chata Pheisaihzy ABEIPA chata a raopakypa a kypa cha paraopa aw na ta, a ripa cha ei chhi aw, khichhaipa chyhsazy chata ano cha chakaotuhpa ta hmâh beih khao aw veih ei a tah.
9 ABEIPA ama Khazohpa nata ama beipa chata ei padua awpa Davi tlao ama chakao aw a tah.
10 “Chavâta hy nâ chakaotuhpa Zakaw y, chi chacheita khâ, Hy Izarel y,chipa ta y hra khâ, ABEIPA ta a tah; lâhlapi tawhta ama seichâna tawhtapa cha pachha aw na ta, na pathlazy tlai cha. Zakaw cha kua heih aw ta, pahâpa ta nata palôhtlâhpa ta y aw ta, ahy hmah pachisa khao aw veih ei.
11 Cha pachha awpa ta na hnohta y thlâh ha tlôh na ta, ei cha papaina phopi zydua cha pachha aw na ta. Nâ deikua cha pachha leipa ta a daihpa rakha ta cha hrie aw na ta, hrie leipa ta cha pua chachei aw va chi, ABEIPA ta a tah.
12 “ABEIPA chata he tana heta tah tlôh ta: Na hmah phaopa cha patlâh theipa rimâ châ leipa ta, na hmah cha a ru ngâsâ na.
13 Ahy hmah ta cha uasatuhpa y leipa ei ta, na hmah châta thohna y vei; na châta tlâhna y vei.
14 Na kyh cha pachâtuhpazy chata cha my khai haw ei ta; cha pachâ khao veih ei; khakhaipa hmâpa ta hmah cha paphao na ta, chado leipa ta cha hrie na ta, hmoparaona lai kaw ta, na hmotaopa moleipazy a pôhpa vâta.
15 Khazia e na hmah vâta na cha? Na pasapa cha patlâh theipa rimâ châ vei. Na hmoparaona lai kaw ta, hmotaopa moleipazy a pôhpa vâta, he hmozy he na chô liata ei tao hih.
16 Chavâta cha palâtuhpa zyduazy cha palâpa ta y aw ei ta, châ dyutuhpa zyduazy cha chyhsa to sei ta chhipa ta ama y aw; cha hraotuhpa maih hraopa ta y aw ei ta, sei ta cha patutuhpa zydua cha sei ta patu awpa ta ei pie aw.
17 Tlâhna cha pie heih aw na ta, na hmah zyduazy cha ei patlâh heih aw, ABEIPA ta a tah, papuapa cha bieh ei ta: ‘Ahy hmah pachâ leipa Zaio a châ hih! ’ama cha tahpa vâta.
18 “ABEIPA chata he tana heta a tah: Pachâ teh, Zakaw poh-o seichâpazy cha pakua aw na ta, a pahrâna suzy ei ngiachhie aw; a khihpi cha a yna tyhpa liana chata sapa châ aw ta, a o rôhnahna cha a yzie ualua ta a duah heih aw.
19 Âmo hry tawhna chata alyna bie reih na ta, thaphana pyuzy cha, chazy tawhna chata a vaw pua aw. A chyhsa cha papôh aw na ta, chyh chai aw veih ei; âmo cha parôhnahsa aw na ta, chyhta aw veih ei.
20 Ama sawzy chhao hmia lâtahpa hawhta y aw ei ta, ei hmiakô liata pôhpakhypa ta a i aw ei ta; âmo a pasaipa-ituhpazy cha ei hrie lymâ aw.
21 Ama abeisaw cha âmo chyhsa tlai châ aw ta, ama ryureituhpa cha âmo hry liata a vaw puapa tlai a châ aw; ano cha eina vaw hnia awpa ta tah aw na ta, ano chata einâ vaw hnia aw, âmo reisai ta ahy e nâ hnia ngâh hlei aw? ABEIPA ta a tah.
22 Chatawhcha ei chyhsazy châ aw eichi ta, kei nama Khazohpa ei châ aw.”
23 Pachâ teh u, ABEIPA thlihpipa! A pathi-iana thlihpipa ru ngaitapa cha a pua haw, hmoparaopazy luh cha a chanaoh aw.
24 A pathipalôh a chhuahnazy patlôpa ta a tao khai hlâ lei cha ABEIPA hiehâhna chichhi ngaitapa cha pakua aw vei. Noh hnôh lâzy liana chata nama pahno thai aw.