Zeremiah 23
A laibâhpa kuana
1 “Ei sibiepa su liata mietahkupa pahleipadiapa ta a papaituhpa sahlao hu a po na!” ABEIPA ta a tah.
2 Chavâta ABEIPA Izarelzy Khazohpa chata ei chyhsazy vaituhpa, mietahkuvaituhpa chhao chata he tana heta a tah: “Ei sahroh zawzy cha papai eichi ta, to eichi ta, chahlô leipa eichi ta. Nama hmoparaopa vâna heta ei cha vaw pachâ aw ei, ABEIPA ta a tah.
3 Chatawhcha ei sahroh zaw a laibâhpazy cha ei tona râh zydua tawhtapa a vaw chhi heih aw na ta, ama dôhpachhôh liata pangia heih aw na ta, a pôh kho ngaitapa châ aw ei ta, ama pôh aw.
4 Âmo a pachâ awpa ama châta mietahkuvaituhpa soh aw na ta, chi khao leipa aw ei ta, ama nôpo khao leipa aw ta, ahy hmah ta a leipa y khao hra aw veih ei, ABEIPA ta a tah.
5 “Davi chata Chi a siapa ei papuapa daihti cha a vaw tlô aw, ABEIPA ta a tah, ano cha ryurei aw ta, so ngaitapa ta tao aw ta, râh zydua liata a dona nata siana a patlô aw.
6 Ano nohzy chhôhta Zudah cha pachhapa châ aw ta, Izarel cha a bohpa ta a pahrâ aw, he he moh ama bi awpa cha a châ, ‘ABEIPA cha eima siana a châ,’ tahpa hih
7 “Chavâta a daihti a tlô aw, ABEIPA ta a tah, ‘Izarel sahlaozy Izi râh tawhta a chhihthapa ABEIPA cha a hroh na,’ tah khao leipa ta,
8 ‘Maw lâ râh nata a tona râh zydua tawhta Izarel chhôhkhazy pathlapa sahlao chhihthapa ta a pakuasa heih tuhpa ABEIPA cha a hroh na,’ tlao ama tah aw. Chatawhcha âmo râh tlai liata ama pahrâ aw.”
A haihpa hrohsopazy leih-na
9 Hrohsopazy kyh cha: Ei pathipalôh chhôh liata paraopa ta a y, ei rupa zydua a chalyu ta; paripa hawhta ei châ, kresawti ta paripa chyhsa hawhna tlai heta, ABEIPA vâta nata a bie pathaihpa vâta.
10 A râh cha apheipa sahlao ta bi ta; he chyhsa sahlaozy vâta a râh chata mâchhiesapa ta, râhpathohpa sibiepa suzy cha chawhkarai khai haw ta. Ama lâpi cha moleipa châ ta, ama thatlôna cha a do vei.
11 “Hrohsopazy nata theihthaipazy chata Khazohpa papeisa leipa ei ta; ei o chhôh tlai liata chhao ama moleina ei hmô, ABEIPA ta a tah.
12 Chavâta ama châta ama siena lâpi cha zâ zohpa lâpi pahniapa hawhna he châ aw ta, cha liana chata topa ta y aw ei ta ama pao aw; ama chô liata hmo pha leipa vaw patlôsa tlôh aw na ta, ama hriena daiti cha, ABEIPA ta a tah.
13 Samari hrohsopazy chô liata pasichhihpa ei hmô: Baal reipa ta chhochhielie ei ta, ei chyhsa Izarelzy ama paviasa.
14 Zerusale hrohsopa sahlao chhôh liata chhao,hmo rarôy ngaitapa ei hmô: a phei ei ta, haipa ta khih sa ei ta; hmo moleipa taotuhpazy ku cha thapatlô ei ta, ahy hmah ta ama molei ro a chhuah leipa ei ta; kei chata cha Sawdawma liata chyhsazy hawhta nata Kawmawra liata a ypazy hawhta vaw châ khai ei ta”.
15 Chavâta hrohsopa sahlao kyh liana chata ABEIPA chata he tana heta a tah: “Pachâ teh u, hmo khapa ta pasa aw na ta, châmaih ti padosa aw na ta; Zerusale liata hrohsopazy tawhna chata râh zydua liana chata Khazohpa pachâ leina pua tlôh ta.”
16 Pheisaihzy ABEIPA chata he tana heta a tah: “Hrohsopa nama hnohta chho chhielietuhpazy nahthlie khah u, khâpa hmah a hâ leipa cha pachu ei ta; ABEIPA pakah tawhtapa a châ leipa âmo pathipalôh pachâpazy ama reih tyh.
17 ABEIPA bie mopakhôtuhpazy hnohna chata, ‘Nâ chata a pha aw,’ tah bailai ei ta; âmo kho viapa tao raruahtuhpazy hnohna chata, ‘Hmopha leipa khâpa hmah na chô liata vaw tlô aw vei,’ tah ei ta.”
18 ABEIPA ryraona liata ahyma a hlao ta, a bie thei ta, a pahno awpa ahy e a y? Cha khiahtala ahy e pachâpa ta a nahthliepa a y?
19 Pachâ teh u, ABEIPA thlihpi cha! Pathi-iana cha pua haw ta khisô thlihpipa cha; moleipazy luh cha a chanaoh aw.
20 ABEIPA hiehâhna cha a pathipalôh ta khâchâ a chhuah hawpazy cha patlôpa ta a tao khai hlâta cha kua thlâh ha aw vei. Noh hnôh lâzy liana chata nama pahnopasia aw.
21 “Hrohsopazy cha ei tuah leipa ta a râ ei ta; ama hnohta bie ei rei leipa chhaota, chho chhielie ei ta.
22 Ei ryraona liana chata a y hrapa châ ei sala, ei bie he ei chyhsazy hnohta ama phuah awpa tlai, ama hmotaopazy a do leipa tawhta ama pakuasa awpa tlai.
23 “Lâhlapi ta a ypa Khazohpa châ leipa ta, Khazohpa a hnia thlâh hapa ma ei châ? ABEIPA ta a tah.
24 Su nyupa liata ei hmô thei lei awpa ta a nyu theipa ama y aw ma? ABEIPA ta a tah. Avâ nata alei liana heta bie vana ma? ABEIPA ta a tah.
25 “Mâ ta ei sa, mâ ta ei sa!” tahpa ta ei moh ta haipa a reihtuhpa hrohsopa sahlao chho chhieliepa cha ei thei.
26 Hrohsopa haipa a reih tyhpa ama pathipalôh dô chhyhpa ta chho chhielie tyhpazy pathipalôh liana chata he he khachâ e a y aw tly?
27 Âmo chata ama vaihzy hnohta ama mâ chhopa ta ei chyhsazy ei moh pamysa a chhuah ei ta, ama pawzy ta Baal vâta ei moh ama my hawpa hawhna khata.
28 Hrohsopa mâ a sapa chata a mâ cha reih mawh sy, ei bie hneituhpa chata ei bie cha ngâchhihpa ta reih mawh sy. Sâhkô nata sâh hmô chata khâpa e a lyuna ama hnei? ABEIPA ta a tah.
30 Chavâta hrohsopa sahlao ei bie a parupa rairieh tyhpa zy cha ei dyuh, ABEIPA ta a tah.
31 Hrohsopa âmo palei pahniasapa ta, ‘ABEIPA ta a tah a tahtuhpazy cha ei dyuh, ABEIPA ta a tah.
32 Mâ haipa reipa ta chho chhieliepa ta ama haina biezy nata amâ palaina bie hrao leipazy vâta ei chyhsazy a paviasatuhpa hrohsopa zy cha ei dyuh, ABEIPA ta a tah; tuah tlôh leipa na ta, bie pie hra leipa na ta, he chyhsa zy he paphahnaisa hra aw veih ei, ABEIPA ta a tah.
33 “He chyhsa hry liatahpa tlyma, hrohsopa ahy tlyma, theihthaipa ahy tlyma ta, ‘ABEIPA phaohri*cha khâpa maw,’ tahpa ta ama cha hiahri khiahtala, he tana heta nâ chhy aw, ‘Nâmo he phao hri cha nama châ, ei cha thy aw ei, ABEIPA ta a tah.’
34 Hrohsopa tlyma, theihthaipa tlyma, chyhsa ahy tlyma ta ABEIPA phao hri a tahpa ama y khiahtala, cha chyhsa nata a chhôhkhazy cha ei hrie aw.
35 Chyhsa ahyrai ta a vaih hnohta nata ahyrai ta a unawhpa hnohta, ‘ABEIPA chata kheihta e â chhy?’ ‘ABEIPA chata khâpa a reih?’ tahpa ta ama hiahri aw.
36 ‘ABEIPA phao hri cha,’ reih khao leipa aw eichi ta, chyhsa ahyrai ano bie reipa cha a châta phao hripa châ tlôh aw ta, Khazohpa hropa Pheisaihzy ABEIPA eima Khazohpa bie cha pali haw tlôh eichi ta.
37 Hrohsopa hnohna chata, ‘ABEIPA chata kheihta e a châ chhy?’ ‘ABEIPA chata kheihta e a reih?’ tah mah y.
38 Châhrasala, ‘ABEIPA phao hri cha,’ nama tah tlai khiahta cha, ABEIPA chata he tana heta a tah, ‘ABEIPA phao hri cha, nama tah awpa châ vei,’ tahpa ta cha tuah na ta, “ABEIPA phao hri cha,” tahpa ta bie nama reipa vâta,
39 ei cha phia tlai aw ei, ei kiahpâ tawhta ei cha thy aw ei, nâma nata he khihpi nama hnohta nata nama pawzy hnohta ei vaw pie hawpa chhao heta.
40 Chatawhcha chhâzaw reipachhiena nata maophyuna my thei leipa cha nama chô liata ei vaw patlô sa aw,’”