Zeremiah 22
1 ABEIPA chata he tana heta a tah: “Zudah beipa o lâta zu la, he bie he za reih teh,
2 ‘Hy Zudah bei, Davi ryureina dyuchhai liata atyuhpa, nâ nata châ chakaotuhpazy nata na chyhsazy, he ochhi liata a ngiapazy chhao heta ABEIPA bie he nahthlie teh u, tah ta.
3 ABEIPA chata he tana heta a tah: A dopa nata a siapa ta pachia ula, taolatuhpa ku tawhta hraona pasa taotuhpa cha pachha ula. Chatawhcha khichhaipazy, paw hnei leipazy, do leina tlyma, nôchhiena tlyma hmâh khah u, he su liana heta a thaipa thisaih chhao palosa hra khah u.
4 He bie nama zyh thei khiahtala, Davi ryureina dyuchhai chô liata abeizy cha talailihzy nata arâzy chô liata kiapa ta âmo nata ama chakaotuhpazy nata ama chyhsazy cha, he o ochhizy liana heta amâ ngia thei aw.
5 Châhrasala he biezy he nama nahthlie leipa khiahtala, he o he roryhrapa ta a y aw tahpa ta, keima a reipa ta chhie ei sa, ABEIPA ta a tah.
6 ABEIPA chata Zudah bei chhôhkha kyh he tana heta reih ta: “‘Nâ cha, kei châta Kilia hawhta Lebanaw tlâh laki hawhta na châ, châhrasala râhpathohpa cha pachâsa aw na ta, pahrâtuhpa a y leipa khihpizy hawhna tlai heta.
7 Nâma cha pahleipadia awpa zy, adyuhna chhaichhi hnei chyupa ta a chhuahdy aw na ta; na sidy tho pha chaipazy thlu aw ei ta, mei liata ama ti aw.
8 ‘Chatawhcha phopi hropa a hluhpizy ta he khihpi he chapia aw ei ta, chyhsa to ta ama vaihzy hnohta, “ABEIPA chata he khihpi rôhnah ngaitapa he khâpavâta he tlatlu ta a taopa ma a châ tly?” ama tah aw.
9 “Ama Khazohpa ABEIPA biehrai cha a heisaipa ta khazoh hropazy a chhy ei ta, ama chakaopa vâta a châ,” tahpa ta amâ chhy aw.’”
10 A thi hawpa cha chakhei leipa ula,mâchhie sa hra khah u;a sie hawpa deikua cha thata chakhei teh u, vaw kua hei khao tlôh leipa aw ta, pina râh he a hmô khao lei awpa vâta.
11 Zudah beipa Shaluma Zôsiah sawchapawpa, a paw Zôsiah vyuhpa ta ryu a reituhpa, he su tawhta a pua hawpa kyh cha ABEIPA ta he tana heta a reih: “He liana heta vaw kua hei khao aw vei,
12 seichâna ta ama siekheina su liata cha liana tlai chata thi aw ta, he râh he hmô heih khao aw vei.”
13 “Sia leina ta o sapa ta, a do leina ta a chhôhpadâhpa chônôpazy a taotuhpa; a saipa ta ano vaihzy tha hmâpa ta hlao a pie khoh leituhpazy hu cha a po aw;
14 ‘O kawhpa a sa aw na ta, chhôhpadâhpa laipazy a hneipa ta opy zy tao aw na ta, sidy tho ta patho khai aw na ta, hlyu saipa ei hnia aw,’ a tahtuhpa kyh cha.
15 Sidy tho ta rihchâkha na khopa vâta abei ta nâsasyh ta na pachâ ma? Na paw khata nie ta, doh ta,a dopa ta ryurei vei ma? Cha cha ano châta a pha na.
16 Sipasapazy nata dyhchhiepazy cha pachiapa ta; cha cha a pha na.He he ei na pahnona zie awpa châ vei ma?ABEIPA ta a tah.
17 Châhrasala na karâyna châta zy, a thaipa thisaih palona châta zy, pasaipa-ina châta nata nôchhiena châta deita na moh nata na pathipalôh na phaoh.”
18 Chavâta Zudahzy beipa Zehôiki Zôsiah sawchapawpa kyh cha ABEIPA chata he tana heta reih ta: “‘Hy ei unawhpa! Hy ei sietanô!’ tahpa ta chakhei leipa aw ei ta, ‘Hy abeipa! ‘Hy rôhnah chaipa! tahpa ta mâchhiesa hra aw veih ei.
19 Zerusale kuh khô lâta papuapa ta thypa ta, alâ pabuna zi ta pabupa ta a y aw.”
20 “Lebanaw lâ khy la, aw teh, Basana liata na ao papua teh; Abari tawhta aw teh, na kyh pachâtuhpa zydua leidia khai haw tlôh ei ta.
21 Na huhieh chhôhta na hnohta bie rei na ta, nâ hra chata, ‘Nahthlie aw va na,’ tah chi ta. Ei reikah na nahthlie leipa he, na thyutlia noh tawhta he he na yzie a châ.
22 Thlih ta na mietahkuvaituhpa zydua pasa aw ta, na kyhpachâtuhpazy sei ta a tâh aw ei ta; nâ chhao na moleina zydua vâta maophyu ngaitapa nata nôpo ngaitapa ta na y tlai aw.
23 Hy Lebanaw liata a ypa, sidy tho hry liata bu a tutuhpa, pasana na chô liata a vaw tlâ nata ngiachhie nâ chhi awpa zie rimâ cha, chanô sawzeipa pasapa hawhna tlai heta!”
24 “A hro ta ei hroh chhôhta cha ABEIPA ta a tah, Zudah beipa Kôniah, Zehôiki sawchapawpa cha ei ku chachâh lâta chahnaona kusadi châ hra la, cha tawhtapa cha ei cha phia tlai aw,
25 thie awpa ta châ tluatuhpa ku liata nata a hmia nama chipa ku liata, Babylaw bei Nebukareza ku liata nata Kaldia sahlao ku liana tlai chata ei cha pie aw.
26 Na pina a châ leipa râh hropa liata, nâ nata na nô châ satuhpa cha thy aw ei na ta, cha liana chata nama thi aw.
27 Ama palôhrupa ta kua heih ama byuh ngaitana râh liana chata, kua heih khao hra aw veih ei.”
28 He Kôniah he bei keipa, mohnao chhihpa châ vei ma, beih a chhôh liata khôpa y leina cha châ vei ma? Khazia ano nata a pathlazy cha papuapa ta râh ama pahno beih leipa lâna chata thypa ta ama y?
29 Hy leilô, leilô, leilô y, ABEIPA bie he thei teh!
30 ABEIPA chata he tana heta a tah! ”He chyhsa he saw leipa, a hro chhôhta thlao a chhi lei awpa a châ;a pathlazy ahy hmah ta thlao achhipa ta Davi ryureina dyuchhai liata a tyuh awpa,nata Zudah râh liata ryu a rei heih awpa y tlôh aw veih ei, tahpa ta roh teh u.”